យើងធ្លាប់បានឮថា ឪពុក-ម្តាយមួយចំនួនតែងតែនិយាយកុហកកូនៗរបស់ពួកគេថា បើធ្វើខ្លួនមិនបានល្អទេ នឹងឱ្យប៉ូលិសចាប់, បើជាក្មេងឌឺ អាបនឹងស៊ីថ្លើម, បើមិនឈប់យំទេ ប្រយ័ត្នសត្វតុកកែស៊ីថ្លើម និងពាក្យកុហកជាច្រើនទៀត ។ ការនិយាយពាក្យទាំងនេះរបស់ឪពុក-ម្តាយ គឺចង់ឱ្យកូនៗរបស់ពួកគេនៅស្ងាត់ស្ងៀម ឬមិនធ្វើអ្វីមួយដែលឪពុក-ម្តាយហាមឃាត់ ។ ប៉ុន្តែពាក្យទាំងនេះបានធ្វើឱ្យក្មេងក្លាយជាមនុស្សចូលចិត្តកុហកនៅពេលពួកគេធំពេញវ័យ ។

ក្រុមអ្នកស្រាវជ្រាវផ្នែកវិទ្យាសាស្ត្រសង្គម និងចិត្តវិទ្យា មកពីសាកលវិទ្យាល័យបច្ចេកវិទ្យាណានយ៉ាង បានបោះពុម្ភផ្សាយការស្រាវជ្រាវមួយក្នុងទស្សនាវដ្តី ដែលទទួលបានជំនួយថវិកាពីក្រសួងអប់រំប្រទេសសិង្ហបុរី ហើយការស្រាវជ្រាវនេះមានចំណងជើងថា «Journal of Experimental Child Psychology» ។

ការស្រាវជ្រាវនេះលើកឡើងថា បើឪពុក-ម្តាយ ឬអាណាព្យាបាលនិយាយស្តីកុហកកូនច្រើនប៉ុនណា វានឹងកាន់តែធ្វើឱ្យកូនពួកគេចូលចិត្តនិយាយកុហកច្រើនដែរពេលពួកគេធំឡើង ។ លើសពីនេះ ពួកគេអាចក្លាយជាមនុស្សពិបាកសម្របខ្លួនក្នុងសង្គមរស់នៅទៀតផង ។

ក្រុមអ្នកស្រាវជ្រាវកត់សម្គាល់ថា ពាក្យសម្តីកុហករបស់ឪពុក-ម្តាយបានបង្ហាញពីការប្រើអំណាចទៅលើកូន ដូចជា ៖ បើមិនធ្វើខ្លួនឱ្យល្អទេ នឹងចាប់បោះក្នុងទឹកសមុទ្រឱ្យត្រីស៊ី ។ ការនិយាយបែបនេះ ធ្វើឱ្យកូនពិបាកកែប្រែចិត្តគំនិត និងពិបាកចូលរួមក្នុងសង្គម នៅពេលពួកគេក្លាយជាមនុស្សធំ ។ ហេតុនេះ ការនិយាយឱ្យកូនខ្លាច បានផ្តល់នូវផលប៉ះពាល់ខ្លាំងដល់កូន និងខ្លាំងជាងពាក្យសម្តីដែលឪពុក-ម្តាយនិយាយបិទបាំងការពិតថា «មិនបានយកប្រាក់មកទេ» នៅពេលកូនពួកគេយំចង់ទិញរបស់លេងក្នុងហាង ។

ជំនួយការសាស្ត្រាចារ្យឈ្មោះ Setoh Pepe និងជាប្រធានក្រុមស្រាវជ្រាវរបស់សាកលវិទ្យាល័យបច្ចេកវិទ្យាណានយ៉ាង លើកឡើងថា ៖ «ការចិញ្ចឹមកូនដោយពាក្យកុហក វាជាការងាយស្រួល ព្រោះឪពុក-ម្តាយមិនចាំបាច់ចំណាយពេលពន្យល់ការពិតដ៏ស្មុគស្មាញឱ្យកូនស្តាប់ទេ ។ ផ្ទុយទៅវិញ ឪពុក-ម្តាយគួរតែបង្រៀនកូនឱ្យក្លាយជាមនុស្សស្មោះត្រង់ និងមិនត្រូវធ្វើជាគំរូអាក្រក់ឱ្យកូនយកតម្រាប់តាម» ៕

ភ្នំដ៏ស្រស់ស្អាតមួយនៅឯប្រទេសចិន ឥឡូវនេះគឺបានសាងសង់ជណ្តើរយន្តឡើងភ្នំដែលមានប្រវែងរាប់រយគីឡូមែត្ររួចរាល់ហើយ ដែលភ្ញៀវទេសចរណ៍ទាំងអស់អាចជិះជណ្តើរយន្តនេះឡើងដល់ខាងលើកំពូលភ្នំ ប្រកបដោយភាពងាយស្រួលនិងចំណេញពេលវេលាបំផុត។

ភ្នំ Tanyu ក្នុងតំបន់ Chun’an នៃខេត្ត Zhejiang ជាភ្នំដ៏ស្រស់ស្អាតមួយក្នុងចំណោមភ្នំស្រស់ស្អាតទាំងអស់របស់ប្រទេសចិន។ ភ្នំនេះគឺមានកម្ពស់ត្រឹមតែ ៣៥០ ម៉ែត្រប៉ុណ្ណោះ ប៉ុន្តែដោយសារដោយសារតែកាលៈទេសៈផ្លូវមិនល្អ ក៏ដូចជាអ្នកឡើងភ្នំត្រូវធ្វើដំណើរវែងឆ្ងាយដើម្បីឡើងដល់កំពូលភ្នំនេះ ទើបធ្វើឲ្យមានការលេចចេញនូវគ្រោងការសាងសង់ជណ្តើរយន្តទំនើបដើម្បីឡើងភ្នំតែម្តង។

ជណ្តើរយន្តនេះបានផ្តល់នូវលក្ខណៈងាយស្រួល ជាពិសេសក្មេងៗនិងមនុស្សចាស់ អាចឡើងដល់លើកំពូលភ្នំដ៏ស្រស់ស្អាតបានដូចគ្នាដោយពុំចាំបាច់ហត់ឡើយ។ អ្នកឡើងភ្នំទាំងអស់ចំណាយពេលត្រឹមតែប្រមាណ១០នាទីតែប៉ុណ្ណោះ នឹងបានទៅដល់លើកំពូលភ្នំហើយប្រកបដោយសុវត្ថិភាពខ្ពស់។

ថ្វីបើការជិះជណ្តើរយន្តឡើងភ្នំធ្វើគឺជាមធ្យោបាយដ៏ងាយស្រួលក៏ពិតមែន ប៉ុន្តែក៏មានមនុស្សមួយចំនួនដែលយល់ឃើញថាការធ្វើបែបនេះនឹងមិនទទួលបានបទពិសោធន៍ពិតៗពីការឡើងភ្នំតាមរបៀបធម្មតានោះទេ។ វានឹងធ្វើឲ្យបាត់បង់នូវតម្លៃទាំងនោះ ហើយមនុស្សម្នាគឺនឹងកាន់តែខ្ជិលទៅៗ។

ទោះជាយ៉ាងណា វីដេអូដែលបានដាក់បង្ហោះឲ្យបានឃើញជណ្តើរយន្តកម្ពស់ ៣៥០ ម៉ែត្រនៅភ្នំ Tanyu ប្រទេសចិនថ្មីៗនេះបានទទួលនូវការចាប់អារម្មណ៍យ៉ាងខ្លាំង។ នេះក៏មិនមែនជាភ្នំតំបូងគេដែលមានជណ្តើរយន្តទំនើបសម្រាប់ឡើងនោះទេ ព្រោះថាតំបន់ទេសចរណ៍ Shenxianju នៅ Taizhou ក៏មានជណ្តើរយន្តប្រវែង ១០៤ ម៉ែត្រដែលត្រូវបានគេស្គាល់ថាជា South Sky Ladder ដែលត្រូវបានដំឡើងកាលពី ៣ ឆ្នាំមុនផងដែរ៕

បរទេស៖ ក្មេងប្រុសជនជាតិចិនអាយុ ៩ ឆ្នាំម្នាក់មានគ្រួសក្នុងតម្រងនោមចំនួន ៥៦ ដុំ ដោយគ្រូពេទ្យបាននិយាយថា មូលហេតុដែលបណ្តាលឱ្យមានគ្រួសក្នុងតម្រង់នោមបែបនេះ គឺមកពីទម្លាប់នៃការញ៉ាំជាតិកាល់ស្យូមច្រើនពេក។

នៅថ្ងៃទី៩ ខែមករា យោងតាមប្រភពព័ត៌មានបរទេសមួយបានរាយការណ៍ថា ករណីកុមារដែលមានគ្រួសក្នុងតម្រងនោមចំនួន ៥៦ ដុំគឺបណ្តាលមកពីទម្លាប់នៃការទទួលទានអាហារមិនសមរម្យនិងមានជាតិកាល់ស្យូមលើសកំណត់។ ទាក់ទងនឹងអាហារ ការទទួលទានវីតាមីនច្រើនមិនប្រាកដថាល្អសម្រាប់សុខភាពឡើយ ម្យ៉ាងវិញទៀតបើយើងទទួលទានលើសកម្រិត វានឹងជះឥទ្ធិពលអាក្រក់ដល់រាងកាយធ្វើឱ្យយើងត្រូវចំណាយប្រាក់ដ៏ច្រើនក្នុងការព្យាបាល។

នេះបើយោងតាមសមាគមវេជ្ជសាស្ត្រស្ត្រីនៅប្រទេសចិន បានចេញផ្សាយរូបភាពនៃការវះកាត់គ្រួសក្នុងតម្រងនោមពីអ្នកជំងឺម្នាក់អាយុ ៩ ឆ្នាំនៅមន្ទីរពេទ្យក្នុងទីក្រុង Tianjin បានឱ្យដឹងថា កុមារនោះគឺមានការឈឺចាប់ខ្លាំងនៅតំបន់ក្រលៀន។ ហើយគ្រូពេទ្យបានរកឃើញថា មានដុំថ្មតូចៗជាច្រើននៅក្នុងក្រលៀន នៅក្នុងឆ្អឹងអាងត្រគាក ដោយហេតុផលនេះ គ្រូពេទ្យបានធ្វើការវះកាត់ និងរកឃើញថាកុមារនោះមានគ្រួសក្នុងតម្រងនោមចំនួន ៥៦ ដុំ។

ដំណឹងនេះធ្វើឱ្យម្តាយរបស់កុមារនោះមានការតក់ស្លុតយ៉ាងខ្លាំង ទោះជាយ៉ាងណាក៏ដោយ បច្ចុប្បន្នកុមារវ័យ ៩ ឆ្នាំនោះបានធូរស្បើយពីការវះកាត់ហើយ ប៉ុន្តែមិនទាន់ចេញពីមន្ទីពេទ្យទេ ដោយត្រូវព្យាបាលរយៈពេល ២ បន្ថែមទៀត។ ទោះជាយ៉ាងណា បន្ទាប់ពីធូរស្បើយ គ្រូពេទ្យបានប្រាប់ម្តាយរបស់ក្មេងប្រុសនោះឱ្យកាត់បន្ថយអាហារដែលមិនមានសុខភាពល្អដូចជា មាន់បំពង ដំឡូងបំពង ហតដក ក៏ដូចជាភេសជ្ជៈផ្សេងៗ និងអាហារដែលមានជាតិកាល់ស្យូមចូលទៅក្នុងរបបអាហាររបស់កូន រួមទាំងណែនាំកុមារផឹកទឹកឱ្យបានច្រើន គេងឱ្យបានគ្រប់គ្រាន់ និងហាត់ប្រាណឱ្យបានទៀងទាត់៕

ប្រទេសចិន ៖ បច្ចុប្បន្ន អ្នកស្រាវជ្រាវនៅប្រទេសចិនបានបង្កើតពូជពោតថ្មីមួយប្រភេទ ដែលផ្តល់លក្ខណៈងាយស្រួលដល់កសិករក្នុងការដាំដុះ ។ អ្នកស្រាវជ្រាវលើកឡើងថា ពូជពោតថ្មីនេះងាយស្រួលដាំដុះ, ពុំត្រូវការស្រោចទឹកច្រើន, ប្រឆាំងនឹងសត្វល្អិតបំផ្លាញ ហើយវាផ្តល់នូវទិន្នផលច្រើន បើធៀបនឹងពោតធម្មតា ។

នៅអគារស្រាវជ្រាវពីគ្រាប់ពូជដំណាំមួយកន្លែងស្ថិតនៅខេត្ត Shaanxi ប្រទេសចិន គេបានឃើញអ្នកជំនាញផ្នែកការដាំដុះគ្រាប់ពូជដំណាំបាននាំគ្នាស្រាវជ្រាវ និងបង្កើតពូជពោតប្រភេទថ្មី ។ ពូជពោតថ្មីនេះអាចផ្តល់នូវទិន្នផលខ្ពស់ ព្រមទាំងធន់នឹងជំងឺផ្សេងៗផងដែរ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣១ ខែធ្នូ ឆ្នាំ២០២៣ ។

អ្នកស្រាវជ្រាវបញ្ជាក់ថា គេអាចដាំដុះពោតប្រភេទថ្មីនេះនៅលើផ្ទៃដីធំទូលាយ ដូចជា ៖ នៅតំបន់ឦសាន, តំបន់ខាងជើងប្រទេសចិន និងតំបន់ខ្វះខាតទឹកស្រោច ។ កសិករអាចដាំពោតប្រភេទថ្មីនេះ ព្រមទាំងដាក់ជីតាមធម្មតា ពីព្រោះវាមានឫសធំចាក់ទៅក្នុងដី ។ ហេតុនេះ វាជួយឱ្យកសិករអាចសន្សំសំចៃទឹកក្នុងការស្រោចស្រព ប៉ុន្តែកសិករទទួលបានផលច្រើនជាងពោតធម្មតា ។

ចាប់តាំងពីឆ្នាំ២០២១ រហូតមកដល់បច្ចុប្បន្ន (ឆ្នាំ២០២៤) អ្នកជំនាញផ្នែកកសិកម្មចិនបានព្យាយាមស្រាវជ្រាវ និងអភិវឌ្ឍន៍ឧស្សាហកម្មគ្រាប់ពូជដំណាំផ្សេងៗជាបន្តបន្ទាប់ ។ ពួកគេទទួលបានជោគជ័យលើការស្រាវជ្រាវពាក់ព័ន្ធនឹងបច្ចេកទេសកសិកម្មជាច្រើនប្រភេទ ដូចជា ៖ ការអភិរក្សធនធានគ្រាប់ពូជរុក្ខជាតិ, ការច្នៃប្រឌិតផ្នែកបច្ចេកវិទ្យា និងការបង្កើតទីតាំងដាំដុះគ្រាប់ពូជដំណាំលំដាប់ប្រទេស ៕

បរទេស៖ ឧក្រិដ្ឋជនមួយក្រុមបានកាន់ប្រដាប់អាវុធវាយប្រហារស្ថានីយទូរទស្សន៍មួយក្នុងប្រទេសអេក្វាឌ័រ នៃទ្វីបអាមេរិកឡាទីន ស្របពេលកំពុងផ្សាយផ្ទាល់ ដោយគម្រាមកំហែងបុគ្គលិកនៅទីនោះឱ្យក្រាបនិងលត់ជង្គង់។

យោងតាមគេហទំព័រអន្តរជាតិ BBC ដែលបានរាយការណ៍នៅថ្ងៃទី១០ ខែមករាថា ស្ថានភាពនៅក្នុងប្រទេសអេក្វាឌ័រនាពេលថ្មីៗនេះគឺមានភាពវឹកវរជាខ្លាំង ដោយប្រធានាធិបតី Daniel Nobua បានប្រកាសដាក់ប្រទេសក្នុងភាពអាសន្នកាលពីប៉ុន្មានថ្ងៃមុន ដោយសារមេដឹកនាំឧក្រិដ្ឋជនគ្រឿងញៀនដ៏ធំម្នាក់ឈ្មោះ José Adolfo Macias ឬគេហៅថា “Fito” បានរត់ចេញពីគុក ខណៈពេលដែលកំពុងជាប់ពន្ធនាគាររយៈពេល ៣៤ ឆ្នាំ។

ហេតុការណ៍ដែលធ្វើឱ្យមេដឹកនាំឧក្រិដ្ឋជនគ្រឿងញៀនដ៏ធំម្នាក់នេះ រត់ចេញពីគុកបាន គឺដោយសារការផ្ទេរគាត់ទៅតំបន់ផ្សេងទៀតនៅក្នុងពន្ធនាគារសន្តិសុខអតិបរមាដូចគ្នា។ ដូច្នេះហើយ ការរត់គេចរបស់ Fito បានបង្កឱ្យមានភាពចលាចលពេញប្រទេស ដោយថ្មីៗនេះក្រុមឧក្រិដ្ឋជនជាច្រើនបានចាប់ជំរិតប៉ូលីស និងធ្វើការបះបោរនៅក្នុងពន្ធនាគារផ្សេងទៀត ក៏ដូចជាមានទាំងប្រដាប់អាវុធដូចជា កាំភ្លើង និងគ្រាប់បែក ពាក់របាំងមុខអុកឡុកពេញទីក្រុង ដែលធ្វើឱ្យរដ្ឋាភិបាលសម្រេចដាក់ប្រទេសក្នុងភាពអាសន្ន។

បន្ទាប់មកនៅថ្ងៃទី៩ ខែមករា ក្រុមបុរសប្រដាប់អាវុធទាំងអស់នោះក៏បានចូលទៅក្នុងស្ថានីយ៍ទូរទស្សន៍ TC នៅ Guayaquil ខេត្ត Guayas នៃប្រទេសអេក្វាឌ័រ ដោយបាញ់កាំភ្លើងទៅលើជញ្ជាំង ដើម្បីគម្រាមកំហែងបុគ្គលិកនៅទីនោះឱ្យក្រាបនិងលត់ជង្គង់។ មិនយូរប៉ុន្មានក្រុមឧក្រិដ្ឋជនទាំងនោះក៏ត្រូវបានសមត្ថកិច្ចឡោមព័ទ្ធ និងចាប់ខ្លួនបានផងដែរ ខណៈបុគ្គលិកត្រូវបានជម្លៀសចេញពីស្ថានីយទូរទស្សន៍ដោយសុវត្ថិភាពហើយ។ ទោះជាយ៉ាងណាក៏ដោយ បច្ចុប្បន្នអាជ្ញាធរនូវមិនទាន់រកឃើញទីតាំងដែលមេដឹកនាំឧក្រិដ្ឋជនគ្រឿងញៀនដ៏ធំម្នាក់នោះរត់គេចខ្លួននោះទេ៕

តៃវ៉ាន់គឺជាកោះមួយដែលស្ថិតនៅលើដែនសមុទ្ររបស់ប្រទេសចិន ហើយតៃវ៉ាន់ក៏បានប្រកាសខ្លួនពីលិទ្ធប្រជាធិតេយ្យ និងគ្រប់គ្រងទឹកដីដោយរដ្ឋាភិបាលផ្ទាល់ខ្លួន។ កោះតៃវ៉ាន់អាចឈរជើងមកដល់បច្ចុប្បន្ននេះបានគឺដោយសារតែមានការជួយជ្រុំជ្រែងពីសហរដ្ឋអាមេរិក ប៉ុន្តែក៏នៅតែមានការគំរាមកំហែងពីចិន។ តើរឿងរ៉ាវនេះ វាចាប់ផ្តើមដោយរបៀបណា?

កោះតៃវ៉ាន់គឺបានគ្រប់គ្រងដោយអធិរាជចិនអស់រយៈពេលជាង២០០ឆ្នាំមកហើយ ចន្លោះឆ្នាំ១៦៨៣ ដល់ ១៨៩៥។ បន្ទាប់ចាប់ពីពេលនោះមក ចិនបានចាញ់សង្គ្រាមជាមួយជប៉ុន ក៏ត្រូវបានជប៉ុនត្រួតត្រាកោះនេះជំនួសវិញអស់រយៈពេល៥០ឆ្នាំ។ ក្នុងឆ្នាំ ១៩៤៥ ក្រោយពីជប៉ុនបានចាញ់លោកលើកទី២និងបានថមថយឥទ្ធិពលរបស់ខ្លួន កោះនេះក៏ធ្លាក់មកស្ថិតក្រោមការគ្រប់គ្រងរបស់ចិនវិញ។ ប៉ុន្តែអំឡុងនោះផងដែរ ប្រទេសចិនក៏បានកើតមានសង្គ្រាមស៊ីវិល រវាងម្ខាងជាបក្សកម្មុស្សន្តរបស់លោកម៉ៅ សេទុង គ្រប់គ្រងចិនដីគោក (ខាងប្រទេសចិនបច្ចុប្បន្ន) និងម្ខាងទៀតក្រុមអ្នកជាតិនិយម Chiang kai shek ដែលបានរត់គេចខ្លួនទៅលើកោះតៃរ៉ាន់។ ក្នុងឆ្នាំ ១៩៤៩ ប្រទេសចិនក៏បានបែងចែកជា២គឺ ប្រទេសចិន(គេហៅថាចិនដីគោក)និងតៃវ៉ាន់(ចិនដែនទឹក)នេះឯង។

បច្ចុប្បន្ន តៃវ៉ាន់មានឈ្មោះជាផ្លូវការថា «សាធារណៈរដ្ឋចិន» ខណៈប្រទេសចិនវិញគឺមានឈ្មោះជាផ្លូវការថា «សាធារណៈរដ្ឋប្រជាមានិតចិន»។

រីឯសហរដ្ឋអាមេរិកវិញ ដូចដែលយើងបានដឹងហើយថានេះ គឺជាប្រទេសដែលមានលិទ្ធិប្រជាធិបតេយ្យ ក៏បានប្រកាន់នូវគោលជំហរគាំទ្រប្រទេសសេរីដូចគ្នា ដូចជាតៃវ៉ាន់ជាដើម ហើយក៏ឃើញថាសហរដ្ឋអាមេរិកតែងតែឧបត្ថម្ភគាំទ្រកោះនេះយ៉ាងពេញទំហឹង ព្រមទាំងដាក់មូលដ្ឋានទ័ពខ្លួននៅលើកោះតៃវ៉ាន់នេះទៀតផង។ ទោះជាយ៉ាងណា ប្រទេសចិនគឺនៅតែទាមទារដោយប្រកាសយ៉ាងមុតមាំថា ខ្លួននឹងបង្រួបបង្រួមនិងយកតៃវ៉ាន់មកវិញឲ្យទាល់តែបាន ហើយអាចនឹងប្រើកម្លាំងទៅលើកោះនេះតែម្តង ប្រសិនបើមានភាពចាំបាច់។

កោះតៃវ៉ាន់ បើទោះបីជាដែនដ៏តូចមួយក៏ពិតមែន ប៉ុន្តែសក្តានុពលរបស់វាពិតជាមហិមា ដោយហេតុថា កោះនេះគឺជាទីតំាងយុទ្ធសាស្រ្តដ៏សំខាន់មួយក្នុងតំបន់អាស៊ីប៉ាស៊ីហ្វិក ក្នុងការទាញយកនូវផលប្រយោជន៍ផ្នែកសេដ្ឋកិច្ច-ពាណិជ្ជកម្មដ៏ធំ ក៏ដូចភាពអំណោយផលនៃធនធានក្រោមនិងលើមហាសមុទ្រនៃកោះនេះទៀតសោត គឺពិតជាមានតម្លៃមហាសាល។

ភាពជាដៃគូរពាណិជ្ជកម្មជាមួយនឹងកោះតៃវ៉ាន់នេះពិតបានផ្តល់នូវផលប្រយោជន៍ជាច្រើនទៅកាន់សហរដ្ឋអាមេរិក ចំណេញទាំងផ្នែកសេដ្ឋកិច្ច នយោបាយ និងស្ថេរភាពនៅក្នុងតំបន់ ហើយជាពិសេសជាងនេះទៅទៀតនោះ គឺដើម្បីទប់ទល់និងបន្ថយឥទ្ធិពលរបស់ចិនដែលជាគូរប្រជែងរបស់ខ្លួន។

ប៉ុន្តែទោះជាណា មានហេតុផលមួយចំនួនដែលប្រទេសចិនក៏នៅតែអាចនឹងមានឱកាសបង្រួបបង្រួមជាមួយនឹងតៃវ៉ាន់វិញបាន តាមរយៈបញ្ចុះបញ្ចូលទំនាក់ទំនងការទូតជាផ្លូវការជាមួយនឹងតៃវ៉ាន់ ដោយប្រើយុទ្ធនាការណ៍ «ប្រទេសតែមួយ ក្រោមក្បាលម៉ាស៊ីនដឹកនាំ២» ដែលជាវិធីសាស្រ្តដ៏មានប្រសិទ្ធភាពមួយក៏ធ្លាប់បានប្រើជាមួយនឹងហុងកុងផងដែរ។ ម៉្យាងវិញទៀត ប្រទេសចិនគឺអាចព្យាយាមដាក់សម្ពាធផ្នែកពាណិជ្ជកម្ម ឬ ធ្វើសមយុទ្ធយោធា ការបញ្ជូនត្រូន នាវាឆ្មាំសមុទ្រទៅគ្លាំមើលកោះនេះ ដើម្បីបំភិតបំភ័យតៃវ៉ាន់ជាដើម។

ជាថ្នូរត្រឡប់មកវិញជុំវិញករណីនេះគឺនៅតែមានភាពស្រពិចស្រពិលនៅឡើយនោះទេ ដោយមានតែរងចាំមើល ជាពិសេសគឺនៅថ្ងៃទី១៣ ខែមករា ឆ្នាំ២០២៤ខាងមុខនេះ គឺជាដំណើរការនៃការបោះឆ្នោតរបស់តៃវ៉ាន់ ថាតើក្រោយពេលជាប់ឆ្នោតរដ្ឋាភិបាលថ្មីនេះមានទំនោរទៅរកមហាអំណាចចិនឬអាមេរិកជាង? ការកក្រើកនៃភូមិសាស្រ្តនយោបាយប្រាកដជានឹងកើតមានឆាប់ៗ!

ប្រទេសឥណ្ឌា ៖ សារព័ត៌មានបរទេសបានចុះផ្សាយពីរឿងរ៉ាវរបស់បុរសម្នាក់ឈ្មោះ Purkharam អាយុ៤២ឆ្នាំ រស់នៅក្នុងភូមិ Bhadwa ប្រទេសឥណ្ឌា ។ បុរសរូបនេះបានកើតជំងឺចម្លែកម្យ៉ាង ហៅថា Axis Hypersomnia ឬជំងឺងងុយដេកខុសធម្មតា ។ តាំងពីគាត់កើតជំងឺនេះមក គាត់ពុំអាចប្រកបរបររកស៊ី ឬធ្វើការដូចមនុស្សធម្មតាបានទេ ហើយក្រុមគ្រួសាររបស់គាត់ ត្រូវមកអង្គុយបញ្ចុកអាហារទៀតផង ។

មនុស្សទូទៅនឹងសម្រាកលក់ ចាប់ពី៦ម៉ោង ទៅ៨ម៉ោងក្នុង១ថ្ងៃ ប៉ុន្តែលោក Purkharam បានសម្រាកលក់ម្តងរហូតដល់២៥ថ្ងៃ ទើបលោកភ្ញាក់វិញ ។ ហេតុនេះ គ្រូពេទ្យបានធ្វើរោគវិនិច្ឆ័យថា គាត់កើតជំងឺចម្លែក និងកម្រមានអ្នកណាកើតជំងឺនេះណាស់ ។ គាត់បានកើតជំងឺចម្លែកនេះតាំងពី២៣ឆ្នាំមុន ហើយចាប់ពីពេលនោះមក ជំងឺនេះបានធ្វើឱ្យប៉ះពាល់ដល់ការរស់នៅប្រចាំថ្ងៃរបស់គាត់យ៉ាងខ្លាំង ។

ចំណុចសំខាន់ នៅពេលគាត់បានសម្រាកលក់ហើយ គាត់ពិបាកនឹងភ្ញាក់ឡើងវិញណាស់ ហើយគាត់ក៏មិនអាចហាមឃាត់ខ្លួនឯងកុំឱ្យសម្រាកលក់យូរថ្ងៃបែបនេះដែរ ។ ហេតុនេះ ពេលសម្រាកលក់ម្តងៗ គាត់មិនអាចភ្ញាក់មកប្រកបរបររកស៊ី ឬធ្វើការងារដូចមនុស្សធម្មតាបានទេ ។

ក្រុមគ្រួសាររបស់លោក Purkharam ប្រាប់ថា ពេលដំបូង លោក Purkharam បានសម្រាកលក់ចាប់ពី៧ថ្ងៃ ទៅ៨ថ្ងៃ ទើបភ្ញាក់ម្តង ។ ប៉ុន្តែរយៈពេលក្រោយមក រោគសញ្ញានេះកាន់តែធ្ងន់ធ្ងរខ្លាំងឡើង រហូតដល់បច្ចុប្បន្ន គាត់បានសម្រាកលក់ចាប់ពី២០ថ្ងៃ ទៅ២៥ថ្ងៃឯណោះ ទើបភ្ញាក់ឡើងវិញ ។ ហេតុនេះ ក្រុមគ្រួសារបានរកវិធីបញ្ចុកអាហារ និងងូតទឹកឱ្យគាត់ ពេលគាត់កំពុងដេកលក់ ។ រយៈពេលជាច្រើនឆ្នាំកន្លងមក ជំងឺនេះធ្វើឱ្យប៉ះពាល់ដល់ការប្រកបររបររកស៊ី និងការរស់នៅប្រចាំថ្ងៃយ៉ាងខ្លាំង ។

ក្រុមគ្រូពេទ្យពុំទាន់មានវិធីព្យាបាលជំងឺដេកលក់យូរថ្ងៃរបស់គាត់ទេ ហើយបើទោះជាគាត់បានព្យាយាមព្យាបាលខ្លួនឯងអស់រយៈពេលជាច្រើនឆ្នាំក្តី ប៉ុន្តែវាមានផលប៉ះពាល់ច្រើន ដូចជា ៖ ឈឺក្បាលខ្លាំង និងអស់កម្លាំង ។ ទោះជាគាត់ត្រូវប្រឈមមុខនឹងជំងឺនេះក្តី ប៉ុន្តែក្រុមគ្រួសារ និងខ្លួនគាត់នៅតែសង្ឃឹមថា នៅថ្ងៃណាមួយ គាត់នឹងជាសះស្បើយពីជំងឺនេះ ហើយអាចរស់នៅតាមធម្មតាដូចគេឯងមិនខាន ៕

តារាថៃម្នាក់ និងមានឈ្មោះក្នុងហ្វេសប៊ុកថា ផីមប្រាផា «Pimprapa» បានថតវីដេអូបង្ហោះក្នុងបណ្តាញសង្គម ដើម្បីចែករំលែកពីហេតុការណ៍បាត់សម្ភារៈក្នុងកាបូបធ្វើដំណើររបស់នាង នៅអាកាសយានដ្ឋានក្នុងទីក្រុងមូស្គូ ប្រទេសរុស្ស៊ី ។ នាងនិយាយថា វាជាបទពិសោធន៍ដ៏អាក្រក់បំផុតនៅប្រទេសរុស្ស៊ី គឺនាងត្រូវបានគេលួចសម្ភារៈក្នុងកាបូបធ្វើដំណើរ ដែលមានតម្លៃរហូតដល់ជាង២សែនបាត ។

តារាស្រី និងជាអ្នកចម្រៀងនៅប្រទេសថៃ អ្នកនាង ផីមប្រាផា (Pimprapa) រៀបរាប់ថា ហេតុការណ៍នេះបានកើតឡើងនៅទីក្រុងមូស្គូ ប្រទេសរុស្ស៊ី ។ នាងបានធ្វើដំណើរជាមួយក្រុមហ៊ុនអាកាសចរណ៍ អ៊ែរ៉ូសហ្វត ដោយចេញដំណើរពីទីក្រុងមូម៉ាន់ មកកាន់ទីក្រុងមូស្គូ ។ នៅពេលនាងធ្វើដំណើរមកដល់អាកាសយានដ្ឋានក្នុងទីក្រុងមូស្គូ អ្នកធ្វើដំណើរផ្សេងទៀតបានទទួលកាបូបធ្វើដំណើរគ្រប់ៗគ្នា លើកលែងតែនាងម្នាក់ ហើយនាងបានរង់ចាំយ៉ាងយូរ នៅតែពុំឃើញកាបូបរបស់នាង ។

សរុបមក កាបូបរបស់នាងមិនបានស្ថិតនៅកន្លែងទទួលសម្ភារៈទេ ហើយទីបំផុត នាងបានរកឃើញកាបូបរបស់ខ្លួននៅកន្លែងទទួលរបស់បាត់ ។ ពេលនោះ ស្លាកសម្គាល់នៅលើកាបូបបានបាត់ ធ្វើឱ្យនាងពុំអាចទទួលបានកាបូបភ្លាមៗទេ ហើយនាងត្រូវទៅបញ្ជាក់ជាមួយបុគ្គលិកអាកាសយានដ្ឋានទៀត ទម្រាំទទួលបានកាបូបមកវិញ ។

ពេលទទួលបានកាបូប នាងឃើញថា កាបូបនេះត្រូវបានគេបើកមើល ហើយភ្លាមនោះ នាងក៏បើកកាបូបដើម្បីពិនិត្យមើលសម្ភារៈនៅខាងក្នុង ។ អ្វីដែលនាងគិតនោះបានកើតឡើងមែន គឺសម្ភារៈផ្សេងៗក្នុងកាបូបបានបាត់ ដែលមានតម្លៃសរុបជាង២សែនបាត ។ ហេតុនេះ នាងមានអារម្មណ៍តក់ស្លុត និងសោកស្តាយខ្លាំងណាស់ ។ សំណាងល្អ ដែលនាងអាចតាំងស្មារតីបាន នាងក៏បានថតវីដេអូទុកជាភស្តុតាង ព្រោះសម្ភារៈដែលបាត់ទៅនោះធ្វើឱ្យប៉ះពាល់ដល់ផ្លូវចិត្តនាងយ៉ាងខ្លាំង ។

បន្ទាប់មក នាងក៏ដើរទៅសុំជំនួយពីក្រុមហ៊ុនអាកាសចរណ៍ AEROFLOT ភ្លាមៗ ប៉ុន្តែបុគ្គលិកក្រុមហ៊ុននេះមិនជួយដោះស្រាយទេ គ្រាន់តែនិយាយថា វាមិនមែនជាតួនាទីរបស់ខ្លួន ។ នារីជាបុគ្គលិកក្រុមហ៊ុន AEROFLOT រូបនេះបានប្រាប់ឱ្យនាងទៅរកសមត្ថកិច្ចឱ្យជួយ និងបានដើរគេចពីនាង ។

ហេតុនេះ នាងក៏ធ្វើដំណើរទៅប្តឹងនៅស្ថានីយប៉ូលិស ហើយពេលនាងទៅដល់ ស្រាប់តែឃើញសមត្ថកិច្ចរុស្ស៊ីកំពុងលេងហ្គេម ។ នាងពិបាកទំនាក់ទំនងជាមួយសមត្ថកិច្ចរុស្ស៊ីណាស់ ហើយនាងត្រូវប្រើប្រាស់កម្មវិធី Google Translate ដើម្បីបកប្រែភាសា ដោយសារតែសមត្ថកិច្ចមិនអាចនិយាយភាសាអង់គ្លេសបាន ។ បន្ទាប់មក ពួកគេក៏បើកមើលក្នុងកាមេរ៉ាសុវត្ថិភាព ។

សមត្ថកិច្ចសន្និដ្ឋានថា បុគ្គលិកបម្រើការនៅអាកាសយានដ្ឋានក្នុងទីក្រុងមូម៉ាន់ បាននាំគ្នាលួចសម្ភារៈក្នុងកាបូបរបស់នាង ហើយសម្ភារៈទាំងនេះមិនបានបាត់នៅអាកាសយានដ្ឋានក្នុងទីក្រុងមូស្គូទេ ។ ពេលនោះ នាងបានស្នើឱ្យសមត្ថកិច្ចជួយដោះស្រាយរឿងនេះ ប៉ុន្តែពួកគេពុំព្រមជួយនាងទេ ថែមទាំងជេរនាងទៀតផង ។

នាង ផីមប្រាផា បញ្ជាក់ថា សម្ភារៈដែលបាត់នោះ គឺជាកាដូថ្ងៃកំណើតដែលមនុស្សជាទីស្រឡាញ់របស់នាងផ្តល់ឱ្យ ហើយនាងស្រឡាញ់វាខ្លាំងណាស់ ។ នេះជាលើកចុងក្រោយហើយ ដែលនាងធ្វើដំណើរមកប្រទេសរុស្ស៊ី ។ វាមិនមែនជាកំហុសរបស់នាងទេ ពីព្រោះនាងមិនបានទុកកាបូធ្វើដំណើរចោល ហើយនាងក៏មិនបានភ្លេចដែរ ៕

បរទេស៖ ក្រុមហ៊ុនកសិកម្មមួយក្នុងខេត្ត Jiangxi ប្រទេសចិនបានរៀបចំពិធីប្រគល់រង្វាន់ជាសាច់ប្រាក់សម្រាប់កសិករ ដែលមានតម្លៃសរុប ១១.៦៩ លានយ័ន (ប្រមាណ ១.៦៤ លានដុល្លារអាមេរិក) បន្ទាប់ពីប្រមូលផលបានមួយឆ្នាំ។

កាលពីថ្ងៃទី ៨ ខែមករាប្រធានពិធីចែកប្រាក់រង្វាន់របស់ក្រុមហ៊ុន Green Agriculture នៅស្រុក An Nghi ខេត្ត Jiangxi បានផ្តល់រង្វាន់ឱ្យកសិកររាប់រយនាក់ ដើម្បីលើកទឹកឱ្យកសិករប្រឹងប្រែងធ្វើការឱ្យល្អបន្ថែមទៀត។ ពលរដ្ឋដែលធ្វើការឱ្យក្រុមហ៊ុន Green Agriculture បាននិយាយថា នេះគឺជាឆ្នាំទី ១៣ ជាប់គ្នាហើយដែលក្រុមហ៊ុនបានចែកប្រាក់បំណាច់ឆ្នាំដល់កសិករ។

លោក La Ke Ha ដែលជាប្រធានក្រុមហ៊ុនកសិកម្ម Green Agriculture បាននិយាយថា កាលពី ១០ ឆ្នាំមុនគាត់មានផ្ទៃដីត្រឹមតែ ៤ ពាន់ហិចតាប៉ុណ្ណោះ ប៉ុន្តែបច្ចុប្បន្នវាកើនឡើងរហូតដល់ទៅ ៦ ម៉ឺនហិចតាដោយសារតែការខិតខំប្រឹងប្រែងរបស់កសិករ។ ដោយឆ្នាំនេះ ប្រាក់រង្វាន់បំណាច់ឆ្នាំសម្រាប់កសិករក៏បានកើនឡើងពីជាង ៥០០,០០០ យន់ ទៅរាប់លានយន់ ជាមួយនឹងចំនួនសរុប ៥៤ លានយន់ (ប្រមាណ ៧.៦ លានដុល្លារអាមេរិក) ផងដែរ។ ប្រធានក្រុមហ៊ុនកសិកម្មរូបនេះក៏បានបន្តទៀតថា «ឆ្នាំនេះលោកមានគម្រោងបង្កើនផ្ទៃដីដាំដុះ ៦០០០ ហិចតាបន្ថែមទៀតដែលនាំឱ្យកសិករកាន់តែច្រើនធ្វើកសិកម្មជាមួយគ្នា»។

ក្រុមហ៊ុនក៏បានបន្តកែលម្អបច្ចេកទេស ប្រើប្រាស់ពូជស្រូវថ្មីដែលផ្តល់ទិន្នផលខ្ពស់ ធ្វើឱ្យប្រសើរឡើងនូវគ្រឿងចក្រ និងឧបករណ៍ លើកកម្ពស់ស្តង់ដារវាល ព្រមទាំងសហការជាមួយទីភ្នាក់ងារស្រាវជ្រាវ និងបញ្ជូនបុគ្គលិកទៅបណ្តុះបណ្តាលបច្ចេកទេស និងបណ្តុះបណ្តាលដល់កសិករជំនាន់ថ្មីផងដែរ។ បច្ចុប្បន្នក្រុមហ៊ុនបានសហការជាមួយកសិករជាង ៣០០ នាក់ ដោយក្រុមហ៊ុនបានបែងចែកដីស្រែជាដីឡូតិ៍ឱ្យទៅកសិករនីមួយៗដើម្បីកាន់កាប់ ចំពោះប្រាក់ខែគោលវិញគឺ ៥,០០០ យន់ (ប្រមាណ ៧០០ ដុល្លារអាមេរិក) ក្នុងមួយខែ រីឯប្រាក់រង្វាន់នឹងត្រូវប្រគល់ឱ្យនៅចុងឆ្នាំដោយផ្អែកលើទិន្នផលលើសពីផែនការ៕