ប្រិយមិត្តមួយចំនួនអាចនឹងស្គាល់ ហ្វាហ្វា ជាតារាស្រីមួយរូបដែលនិយមលេងខ្លួនស៊ិចស៊ី តាមរយៈការបង្ហោះរូបភាពនានានៅលើបណ្តាញសង្គម រួមទាំងការសម្តែងឈុតរោលរាលជាដើម។ ទោះបីជាមានរសនិយមជាតារាស្រីស៊ិចស៊ីមែនពិត ហ្វាហ្វា ថានាងមិនដែលភ្លេចប្រពៃណីវប្បធម៌ខ្មែរនោះទេ ជាក់ស្តែងរាល់ពេលមានកម្មវិធីជាតិផ្សេងៗនាងតែងលេចមុខញឹកញាប់ហើយនេះជាការស្រលាញ់មួយរបស់នាងដោយមិនចង់បានផលតបស្នងមកវិញឡើយ។
គេចាំបានថាកាលពីចុងឆ្នាំ២០២២ តារាស្រី ហ្វាហ្វា បានធ្វើឱ្យមានការចាប់អារម្មណ៍យ៉ាងខ្លាំងពីទស្សនិកជនបន្ទាប់ពីសម្តែងក្នុងរឿង «ស្នេហា ល្ងង់+ល្ងង់» របស់ ផលិតកម្ម សាស្ត្រាហ្វៀម ដែលសម្តែងជាតួអង្គ ស្កាយ។ ទន្ទឹមនឹងហ៊ានសម្តែងឈុតស្នេហារោលរាលនេះដែរងាកទៅលើរូបថតនៅលើបណ្តាញសង្គមរបស់តារាស្រីរូបនេះតែងតែនិយមលេងខ្លួនស៊ិចស៊ីទោះបីជាត្រូវរងនូវមតិអវិជ្ជមានខ្លះក្តី។ ជារឿយៗរូបនាងក៏បង្ហាញពីចេតនារបស់ខ្លួនដែរថាតម្លៃរបស់មនុស្សមិនស្ថិតទៅលើការស្លៀកពាក់ស៊ិចស៊ីនោះទេ។
នាពេលថ្មីៗនេះផងដែរនៅក្នុងកម្មវិធី «តាម Trend» ស្រីស្រស់ ហ្វាហ្វា បាននិយាយរឿងរ៉ាវជាច្រើនរបស់ខ្លួនជាមនុស្សស្រីម្នាក់ដែលចង់ជ្រោមជ្រែងគ្រួសារឱ្យងើបផុតពីភាពក្រីក្រដោយសារតែគ្រួសាររបស់នាងមានជីវភាពលំបាកខ្លាំងចង់ឱ្យអ្នកមានគុណរស់នៅក្នុងស្ថានភាពសមរម្យមួយ។ ជាមួយគ្នានេះ ហ្វាហ្វា ក៏បានលើកឡើងពីបញ្ហានៃការស្លៀកពាក់ស៊ិចស៊ីរបស់ខ្លួនដូចគ្នា។
ស្រីស្អាតរាងស្រឡូនរូបនេះបាននិយាយថា ការស្លៀកពាក់ស៊ិចស៊ីរបស់ខ្លួនរងនូវមតិអវិជ្ជមានគឺមានភាគតិចប៉ុណ្ណោះដែលមិនអាចទទួលយកបាន ហើយនាងក៏មិនអាចបង្ខំអ្នកទាំងនោះឱ្យបញ្ចេញមតិល្អឡើយ។ ហ្វាហ្វា ថាការទទួលបានមតិមិនល្អសួរថានាងបារម្ភឬអត់គឺបារម្ភហើយប៉ុន្តែនាងដឹងថានាងកំពុងធ្វើអ្វី។នាងទទួលប្រម៉ូតផលិតផលដូច្នេះតម្រូវឱ្យនាងស្លៀកពាក់ស៊ិចស៊ីដូច្នេះនាងមិនអាចស្លៀកពាក់តាមអារម្មណ៍តាមអំពើចិត្តបាននោះទេព្រោះមុននឹងថតសុទ្ធតែឆ្លងជាម្ចាស់ផលិតផល។
ហ្វាហ្វា ថានាងមិនអាចបង្ខំឱ្យទទួលយកនាងនោះទេ ប៉ុន្តែនាងមិនធ្វើអ្វីដែលលើសខ្លាំងនោះទេនឹងព្យាយាមកាន់តែលើកកាន់តែបង្ហាញថែរក្សាវប្បធម៌ប្រពៃណីរបស់ខ្មែរនឹងកាន់តែចង់ផ្សព្វផ្សាយវប្បធម៌ខ្មែរកាន់តែខ្លាំង។ ស្រីស្អាតស៊ិចស៊ីរូបនេះបានលើកឡើងទៀតថា កម្មវិធីក្រសួងភាគច្រើនគឺមានវត្តមាននាង ហើយនាងមិនដែលចង់បានអ្វីពីក្រសួងនោះទេទោះបីជាហត់យ៉ាងណាក៏ដោយ ព្រោះវាជាក្តីស្រលាញ់ការពេញចិត្តរបស់នាងក្នុងនាមជាកូនខ្មែរ ជាសិល្បការិនីជំនាន់ក្រោយ។
ហ្វាហ្វា ថានាងនឹងព្យាយាមសិក្សាឈ្វេងយល់ពីវប្បធម៌ ប្រពៃណី ដើម្បីផ្សព្វផ្សាយការពារពីប្រទេសជិតខាងមិនដែលភ្លេចពីវប្បធម៌របស់ខ្លួននោះទេហើយនាងពិតជាសូមទោសទស្សនិកជនដែលមិនអាចបំពេញតម្រូវចិត្តសុភាពបាននោះទេ៕