ប្រទេសកាណាដា ៖ សារព័ត៌មានបរទេសរាយការណ៍ថា នៅដើមខែមេសា ឆ្នាំ២០២៤ ប្រទេសកាណាដាបានសាកល្បងគម្រោងថ្មីឈ្មោះ «Pedestrian Brick Crossing System» ដោយឱ្យអ្នកថ្មើជើងកាន់ដុំឥដ្ឋនៅពេលពួកគេដើរឆ្លងផ្លូវ និងលើកឥដ្ឋថ្នមៗឱ្យរថយន្តបន្ថយល្បឿន ។ ការធ្វើបែបនេះ គឺដើម្បីឱ្យអ្នកបើកបររថយន្តយល់ដឹងអំពីសុវត្ថិភាពរបស់អ្នកថ្មើជើង ។

នៅពេលអ្នកថ្មើជើងកាន់ដុំឥដ្ឋដើរឆ្លងផ្លូវឃើញថា រថយន្តទាំងឡាយបានឈប់ឱ្យពួកគេឆ្លងផ្លូវយ៉ាងស្រួល ពីព្រោះអ្នកបើកបររថយន្ត និងម៉ូតូនៅទីក្រុង Vancouver ចូលចិត្តបើកបរក្នុងល្បឿនលឿន ជាពិសេស នៅចំណុចគំនូសសញ្ញាកាត់ទទឹងផ្លូវ ហើយវាអាចបង្កគ្រោះថ្នាក់ដល់អ្នកថ្មើជើងផងដែរ ។

នៅថ្ងៃ April’s Fools Day (ឬទិវាកុហកពិភពលោក) ស្ថាប័នមិនស្វែងរកប្រាក់ចំណេញឈ្មោះ Vision Zero Vancouver មានទីតាំងនៅទីក្រុង Vancouver បានបង្ហាញពីដំណោះស្រាយគួរឱ្យអស់សំណើចមួយក្នុងបណ្តាញសង្គម X (ឬ Twitter) ដើម្បីដោះស្រាយបញ្ហាអ្នកបើកបររថយន្តនៅតាមផ្លូវពុំព្រមបន្ថយល្បឿនរថយន្តឱ្យអ្នកថ្មើជើងឆ្លងផ្លូវនៅលើគំនូសសញ្ញាកាត់ទទឹងផ្លូវ ។

នៅពេលឆ្លងផ្លូវ អ្នកថ្មើជើងត្រូវកាន់ឥដ្ឋស្នោ ដែលដូចគ្នានឹងឥដ្ឋពិតប្រាកដ ហើយក្រោយការសាកល្បងឃើញថា ពលរដ្ឋកាណាដាគាំទ្រគំនិតនេះ ។ អ្នកបើកបរយានជំនិះនឹងចាប់អារម្មណ៍អ្នកថ្មើជើង និងធានាថា ការឆ្លងផ្លូវដ៏ពិបាក នឹងងាយស្រួលជាងមុន ហើយគ្មានជម្លោះកើតឡើង ។

ចំពោះលក្ខខណ្ឌកាន់ដុំឥដ្ឋឆ្លងផ្លូវនេះ ត្រូវអនុវត្តតាម៤ចំណុច រួមមាន ៖
១-«ចាប់ដុំឥដ្ឋ» នៅពេលចង់ឆ្លងផ្លូវ ត្រូវចាប់ដុំឥដ្ឋ១ដុំ
២-«សម្លឹង» សម្លឹងឆ្វេង-ស្តាំ មុនពេលឆ្លងផ្លូវ
៣-«លើកដៃជាសញ្ញា» លើកដុំឥដ្ឋឡើងលើក្នុងអំឡុងពេលឆ្លងផ្លូវ និង
៤-«ឆ្លងផ្លូវ» ដើរឆ្លងផ្លូវ និងសម្លឹងទៅយានជំនិះដើម្បីផ្តោតលើអ្នកបើកបរ ហើយពេលឆ្លងផ្លូវរួច ត្រូវទុកឥដ្ឋនៅចំណុចផ្លូវម្ខាងទៀត

បើទោះជាដុំឥដ្ឋទាំងនេះជាឥដ្ឋស្នោក្តី ប៉ុន្តែលទ្ធផលដែលទទួលបាន គឺលើសពីការរំពឹងទុក ពីព្រោះការកាន់ឥដ្ឋបានធ្វើឱ្យយានជំនិះជាច្រើនព្រមបន្ថយល្បឿនឱ្យអ្នកថ្មើជើង ។ វាជាគម្រោងសម្រាប់បង្កើតបរិយាកាសរីករាយដល់អ្នកធ្វើដំណើរគ្រប់រូប និងមិនបង្កអំពើហិង្សា ព្រមទាំងចង់ឱ្យអ្នកបើកបរយានជំនិះទាំងអស់គិតពីសុវត្ថិភាពអ្នកថ្មើជើង ។

Vancouver គឺជាទីក្រុងធំលំដាប់ទី៣ របស់ប្រទេសកាណាដា ដែលអ្នកបើកបរយានជំនិះមិនសូវចាប់អារម្មណ៍នឹងអ្នកឆ្លងផ្លូវ ឬមិនបន្ថយល្បឿននៅចំណុចគំនូសសញ្ញាកាត់ទទឹងផ្លូវ ។ ពេលខ្លះ អ្នកបើកបរយានជំនិះទាំងនេះធ្វើពុតជាមើលមិនឃើញថា មានអ្នករង់ចាំឆ្លងផ្លូវ ។ បើទោះជាគម្រោងថ្មីនេះបានអនុវត្តនៅខែមេសា ក្នុងថ្ងៃ April’s Fools Day ប៉ុន្តែគេបានទទួលគំនិតថា គ្រប់គ្នាគួរតែដើរឆ្លងផ្លូវដោយសុវត្ថិភាព និងពុំចាំបាច់ប្រើប្រាស់វិធីកាន់ដុំឥដ្ឋ ៕

ជប៉ុន៖ បើយោងតាមការសិក្សាស្រាវជ្រាវថ្មីៗពីសាកលវិទ្យាល័យ Tokohu បានបង្ហាញថាប្រជាជនជប៉ុនអាចមាននាមត្រកូល Sato ដូចគ្នានៅឆ្នាំ ២៥៣១ ប្រសិនបើប្រទេសនេះមិនផ្លាស់ប្តូរច្បាប់ស្តីពីការផ្លាស់ប្តូរនាមត្រកូលនៅពេលរៀបការ។
នៅថ្ងៃទី៤ ខែមីនា យោងតាម BBC បានឱ្យដឹងថា ការស្រាវជ្រាវថ្មីនេះធ្វើឡើងដោយសាស្ត្រាចារ្យផ្នែកសេដ្ឋកិច្ច Hiroshi Yoshida នៃសាកលវិទ្យាល័យ Tokohu បានព្យាករណ៍ថា ប្រសិនបើប្រទេសជប៉ុននៅតែបន្តរក្សាលក្ខខណ្ឌដែលប្រពន្ធត្រូវប្តូរទៅជានាមត្រកូលរបស់ប្តីនៅពេលរៀបការនៅឆ្នាំ ២៥៣១ ប្រជាជនជប៉ុនទាំងអស់នឹងមានឈ្មោះដូចគ្នាគឺ សាតូ។

Sato គឺជានាមត្រកូលសាមញ្ញបំផុតនៅក្នុងប្រទេសជប៉ុនដែលមានមនុស្ស ១.៨៦ លាននាក់កាន់នាមត្រកូលនេះ (ស្មើនឹង ១.៥% នៃចំនួនប្រជាជន) ខណៈដែលនាមត្រកូល Suzuki ស្ថិតនៅលំដាប់ទីពីរដែលមានសមាជិក ១.៧៧ លាននាក់។ សាស្រ្តាចារ្យ Yoshida បានសារភាពថាការព្យាករណ៍នេះគឺផ្អែកលើការសន្មត់មួយចំនួន ប៉ុន្តែគាត់បាននិយាយថា លេខនេះត្រូវបានបោះពុម្ពដើម្បីឆ្លុះបញ្ចាំងពីផលប៉ះពាល់សក្តានុពលនៃបទប្បញ្ញត្តិការផ្លាស់ប្តូរនាមត្រកូលលើសង្គមជប៉ុន។ យោងតាមក្រមរដ្ឋប្បវេណីដែលបានបង្កើតឡើងនៅចុងទសវត្សរ៍ឆ្នាំ ១៨០០ គូស្នេហ៍ជនជាតិជប៉ុនទាំងអស់ត្រូវតែមាននាមត្រកូលដូចគ្នា ដោយបង្ខំឱ្យមនុស្សម្នាក់បោះបង់ចោលនាមត្រកូលចាស់របស់ខ្លួន។

លោកបានព្រមានថា ប្រសិនបើប្រជាជនជប៉ុនទាំងអស់មាននាមត្រកូល Sato មនុស្សនឹងត្រូវហៅគ្នាតាមលេខដូចជា “Sato 1”, “Sato 2” នៅពេលទំនាក់ទំនង។ យោងតាមការគណនារបស់គាត់សមាមាត្រនៃប្រជាជនជប៉ុនដែលមាននាមត្រកូល Sato នឹងកើនឡើង ១.០០៨៣ ដងក្នុងរយៈពេលមួយឆ្នាំគិតត្រឹមឆ្នាំ ២០២២-២០២៣។ ប្រសិនបើច្បាប់ស្តីពីនាមត្រកូលនៅតែមិនផ្លាស់ប្តូរទេនោះ ច្បាស់ណាស់នៅថ្ងៃខាងមុខប្រហែលពាក់កណ្តាលនៃប្រជាជនជប៉ុននឹងមាននាមត្រកូល Sato នៅឆ្នាំ ២៤៤៦ ហើយកើនឡើងដល់ ១០០% នៅឆ្នាំ ២៥៣១។

សាស្ត្រាចារ្យព្រមានថា “ប្រទេសជប៉ុននិងក្លាយជាប្រទេសសាតូដោយសារប្រជាជននាពេលអនាគតសុទ្ធតែមាននាមត្រកូលនេះដូចគ្នា” មិនត្រឹមតែមានភាពរអាក់រអួលប៉ុណ្ណោះទេ ថែមទាំងប៉ះពាល់ដល់អត្តសញ្ញាណផ្ទាល់ខ្លួនរបស់មនុស្សម្នាក់ៗ ក៏ដូចជាក្រុមគ្រួសារ និងបេតិកភណ្ឌក្នុងតំបន់ទៀតផង។ ប្រទេសជប៉ុន គឺជាប្រទេសតែមួយគត់ដែលមានច្បាប់តម្រូវឱ្យប្តីប្រពន្ធប្រើនាមត្រកូលដូចគ្នា។ ដូច្នេះ ៩៥% នៃស្ត្រីនៅក្នុងប្រទេសនេះត្រូវតែប្តូរនាមត្រកូលរបស់នាងឱ្យដូចនាមត្រកូលប្តីបន្ទាប់ពីរៀបការ។

ទោះជាយ៉ាងណា បច្ចុប្បន្នប្រជាជនជប៉ុនកាន់តែច្រើនឡើងកំពុងស្នើសុំឱ្យរដ្ឋាភិបាលផ្លាស់ប្តូរច្បាប់ដើម្បីអនុញ្ញាតឱ្យប្តីប្រពន្ធរក្សានាមត្រកូលរបស់ពួកគេរៀងៗខ្លួន។ រដ្ឋាភិបាលជប៉ុនបានអនុញ្ញាតឱ្យមនុស្សសរសេរនាមត្រកូលចាស់ និងថ្មីនៅលើលិខិតឆ្លងដែន ប័ណ្ណបើកបរ និងឯកសារស្នាក់នៅ ប៉ុន្តែសមាជិកអភិរក្សនិយមនៃគណបក្សប្រជាធិបតេយ្យសេរី (LDP) ដែលកំពុងកាន់អំណាចបាននិយាយថា ការផ្លាស់ប្តូរច្បាប់នឹងប៉ះពាល់ដល់តម្លៃប្រពៃណី ធ្វើឱ្យសាមគ្គីភាពក្នុងគ្រួសារចុះខ្សោយ និងធ្វើឱ្យកុមារយល់ច្រឡំ៕

ប្រទេសឥណ្ឌូណេស៊ី ៖ អាជ្ញាធរប្រចាំកោះ Batam របស់ប្រទេសឥណ្ឌូណេស៊ី បានចាប់ផ្តើមដំណើរការដឹកជញ្ជូនទំនិញចេញពីកំពង់ផែ Batam ទៅកាន់ទីក្រុង Guangzhou និងទីក្រុង Shenzhen របស់ចិនជាផ្លូវការ កាលពីថ្ងៃទី៣១ ខែមីនា ឆ្នាំ២០២៤ ។ វានឹងជួយជំរុញពាណិជ្ជកម្មរវាងប្រទេសឥណ្ឌូណេស៊ី និងចិន និងជាការដឹកទំនិញត្រង់ទៅប្រទេសចិន ដោយពុំចាំបាច់ឆ្លងកាត់ប្រទេសសិង្ហបុរី ។

ការផ្តល់សេវាកម្មដឹកជញ្ជូនទំនិញត្រង់ទៅប្រទេសចិននេះ គឺដំណើរការដោយក្រុមហ៊ុនឈ្មោះ Persero Batam និង The Batam Concession Agency សហការជាមួយក្រុមហ៊ុនដឹកជញ្ជូននៅទីក្រុងហុងកុង ឈ្មោះ SITC International Holdings ។

Arham S. Torik ជានាយកក្រុមហ៊ុន Persero Batam បានលើកឡើងថា ការផ្តល់សេវាកម្មដឹកជញ្ជូនទំនិញត្រង់ទៅប្រទេសចិន នឹងប្រើប្រាស់កប៉ាល់សម្រាប់ដឹកជញ្ជូន ហើយកប៉ាល់នឹងចេញដំណើរនៅរៀងរាល់ថ្ងៃអាទិត្យ គឺស្មើនឹង៤ជើងក្នុង១ខែ ។

បច្ចុប្បន្ននេះ មានក្រុមហ៊ុននាំចេញបានប្រើប្រាស់សេវាកម្មដឹកជញ្ជូនទំនិញត្រង់ ចំនួន៥ក្រុមហ៊ុន ។ រីឯមូលហេតុដែលក្រុមហ៊ុននាំចេញទំនិញទាំងនេះជ្រើសរើសសេវាកម្មដឹកជញ្ជូនត្រង់ ដោយសារពួកគេអាចកាត់បន្ថយការចំណាយដើមទុនក្នុងការដឹកជញ្ជូន រហូតដល់៦០០ដុល្លារអាមេរិក បើធៀបនឹងការដឹកជញ្ជូននាពេលកន្លងមក គឺពួកគេត្រូវផ្លាស់ប្តូរកប៉ាល់នៅប្រទេសសិង្ហបុរី ។

ចំណែក Muhammad Rudi ជាប្រធានគណៈកម្មការអភិវឌ្ឍន៍ប្រចាំកោះ Batam បាននិយាយថា នាថ្ងៃអនាគត កោះ Batam របស់ប្រទេសឥណ្ឌូណេស៊ី នឹងក្លាយជាកន្លែងដឹកជញ្ជូនទំនិញដ៏ល្អ ហើយក្រុមហ៊ុនទាំងអស់នៅកោះ Batam នឹងអាចប្រើប្រាស់ប្រយោជន៍ពីការដឹកជញ្ជូនទំនិញត្រង់ទៅប្រទេសចិន ៕

ប្រទេសថៃ ៖ សារព័ត៌មានថៃរាយការណ៍ថា កាលពីព្រឹកថ្ងៃទី៤ ខែមេសា ឆ្នាំ២០២៤ មានហេតុការណ៍ដ៏ រន្ធ.ត់ មួយបានកើតឡើងនៅសមុទ្រក្បែរកោះតៅ ស្ថិតនៅឃុំកោះតៅ ស្រុកកោះផាក់ង៉ាន់ ខេត្តសុរ៉ាជថានី គឺភ្លើងបានឆាបឆេះនាវាទេសចរណ៍១គ្រឿង ដែលមានភ្ញៀវទេសចរជិះពេញនាវា ។ ហេតុការណ៍នេះបានបណ្តាលឱ្យភ្ញៀវទេសចរភ័.យ ស្លន់ស្លោ និងត្រៀមលោតចុះទឹកដើម្បីគេចពីសេចក្តី ស្លា.ប់ ។

បើតាមវីដេអូបង្ហាញថា មានផ្សែងខ្មៅយ៉ាងខ្លាំងចេញពីនាវាទេសចរណ៍ ហើយភ្ញៀវទេសចរទាំងអស់ដែលជិះនៅលើនាវា មានអារម្មណ៍ភ័យតក់ស្លុតយ៉ាងខ្លាំង ដោយពួកគេត្រៀមលោតចុះក្នុងទឹក ដើម្បីរត់គេចពីសេចក្តីស្លាប់ ។ នាវាទេសចរណ៍នេះមានអ្នកជិះសរុបចំនួន៩០នាក់ ហើយក្រៅពីដឹកភ្ញៀវទេសចរ នាវានេះក៏បានដឹករថយន្ត, ម៉ូតូ និងរថយន្តដឹកសម្ភារៈសំណង់ផងដែរ ។

ក្នុងអំឡុងពេលកើតហេតុ នាវាខាងលើបានសុំការជួយអន្តរាគមន៍ពីអាជ្ញាធរប្រចាំកោះតៅ និងអាជ្ញាធរប្រចាំកោះនៅក្បែរគ្នា ។ ក្រោយមក គេក៏បញ្ជូននាវាតូចៗជាច្រើនគ្រឿងដែលមានការសហការពីផ្នែកឯកជន បើកសំដៅទៅកាន់នាវាទេសចរណ៍ និងជួយជម្លៀសភ្ញៀវទេសចរ ព្រមទាំងបុគ្គលិកនាវាមកកាន់ច្រាំង ។

ក្រោយកើតហេតុប្រមាណ១ម៉ោង អាជ្ញាធរក៏អាចគ្រប់គ្រងស្ថានការណ៍បាន និងបញ្ជូនភ្ញៀវទេសចរដែលឈ្លក់ផ្សែងនៅលើនាវា ទៅកាន់មន្ទីរពេទ្យកោះតៅ ។ ហេតុការណ៍នេះ គ្មានអ្នកណាម្នាក់រងរបួស ឬស្លាប់ទេ ខណៈទ្រព្យសម្បត្តិផ្សេងៗនៅលើនាវាទេសចរណ៍ខូចខាតស្ទើរទាំងអស់ ពីព្រោះនាវាត្រូវបានភ្លើងឆេះទាំងស្រុង ។ ជំហានដំបូង អាជ្ញាធរសន្និដ្ឋានថា ភ្លើងឆេះនេះអាចបណ្តាលមកពីបន្ទប់តូចនៅបាតនាវា ហើយអាជ្ញាធរនឹងរង់ចាំការពិសោធន៍យ៉ាងលម្អិតម្តងទៀត ។

លោក ភីភិត ឆ័យឈួយ ជាប្រធានកំពង់ផែ បានបញ្ជាឱ្យបង្កើតគណៈកម្មការត្រួតពិនិត្យរកមូលហេតុច្បាស់លាស់ ដែលធ្វើឱ្យភ្លើងឆេះនៅបន្ទប់បាតនាវា ។ លោកបញ្ជាក់ថា តាំងពីពេលចូលឆ្នាំសកល រហូតមកដល់ខែមីនា ឆ្នាំ២០២៤ លោកបានឱ្យក្រុមការងាររឹតបន្តឹងលើសុវត្ថិភាពអ្នកដំណើរ ជាពិសេស ផ្តោតលើឧបករណ៍ជួយសង្គ្រោះជីវិត និងសភាពនាវា ។

លោក ភីភិត ឆ័យឈួយ បន្តថា ក្នុងអំឡុងពេលថ្ងៃចូលឆ្នាំថ្មីខាងមុខនេះ លោកក៏បានឱ្យក្រុមការងារធ្វើការត្រួតពិនិត្យនៅតាមកំពង់ផែផ្សេងៗ ដើម្បីការពារសុវត្ថិភាពភ្ញៀវទេសចរផងដែរ ៕

សូរ្យគ្រាសដ៏គួរឲ្យភ្ញាក់ផ្អើលមួយនឹងកើតឡើងនៅថ្ងៃទី ៨ ខែមេសា ឆ្នាំ ២០២៤នេះ ស្របពេលអ្នកវិទ្យាសាស្រ្តក៏បានព្រមានថា ភពផែនដីយើងនឹងអាចកើតមានបាតុភូតមួយទៀតគឺ ព្យុះព្រះអាទិត្យ ឬ solar flare បណ្តាលឲ្យដាច់ចរន្តអគ្គិសនីនិងអ៊ីនធើណែត បង្ករភាពចលាចលទូទាំងពិភពលោក។ ស្របពេលដែលសហរដ្ឋអាមេរិកបានចេញនូវសេចក្តីប្រកាសបិទសាលារៀនមួយចំនួនក្នុងអំឡុងពេលថ្ងៃសូរ្យគ្រាសផងដែរ។

ទាក់ទងនឹងបាតុភូត «ព្យុះព្រះអាទិត្យ ឬ solar flare» នេះដែរ លោកយាយ Baba Vanga កើតក្នុងឆ្នាំ ១៩១១ ដែលជាហោរាសាស្រ្តដ៏ល្បីល្បាញម្នាក់ អាចទស្សន៍ទាយដឹងអំពីព្រឹត្តិការណ៍អាចកើតមានឡើងនៅពេលអនាគតក៏បានលើកឡើងអំពីរឿងនេះដែរ។ នៅអាយុ១២ឆ្នាំ លោកយាយបានកើតឧបត្តវហេតុមួយដែលបណ្តាលភ្នែកទាំងសងខាងងងឹតឈឹងតែម្តង។ បន្ទាប់ពីនោះមក លោកយាយក៏បានក្លាយជាមនុស្សម្នាក់ដែលអាចទាយពីរឿងរ៉ាវនៅអនាគតកាល ហើយរឿងដែលលោកយាយបានទាយភាគច្រើនក៏បានក្លាយជាការពិតផងដែរ។ ជាមួយគ្នានេះ លោកយាយ ក៏ទាយអំពីព្យុះព្រះអាទិត្យ អាចនឹងកើតមានឡើងលើភពផែនដី ចន្លោះឆ្នាំ២០២៣និង២០២៤។ ព្យុះព្រះអាទិត្យគឺអណ្តាតភ្លើងរបស់ព្រះអាទិត្យ ដែលនឹងបញ្ជូនមកកាន់ភពផែនដី ក្នុងនោះគឺផ្ទុកនូវបន្ទុកអគ្គីសនី ដែនម៉ាញេទិច និងវិទ្យុសកម្មខ្លាំង បង្កនូវផលប៉ះពាល់យ៉ាងធ្ងន់ធ្ងរជាពិសេសគឺមនុស្សជាតិ។

ជាមួយគ្នានោះ តុក្កតា Simpson ជាគំនូរជីវចលបរទេសដែលផលិតឡើងតាំងពីឆ្នាំ ១៩៨៩មកម្លេះ មានជាច្រើនវគ្គ ដែលវគ្គនីមួយៗគឺសុទ្ធតែបានឆ្លុះបញ្ចាំងអំពីការទស្សន៍ទាយពីអនាគតកាល។ ខណៈសាច់រឿងនៃវគ្គមួយរបស់តុក្កតា Simpson នេះក៏បានលេងអំពីបាតុភូតសូរ្យគ្រាស ហើយបន្ទាប់មកក៏បានលេចនូវបាតុភូតមួយទៀតគឺ ព្យុះព្រះអាទិត្យ បណ្តាលឲ្យដាច់ចរន្តអគ្គីសនីនិងអ៊ីនធើណែត បង្ករភាពចលាចលពេញពិភពលោកតាមរយៈខ្សែភាពយន្ត ហើយដូចទៅនឹងអ្វីដែលអ្នកវិទ្យាសាស្រ្តបានព្រមានកាលពីថ្មីៗនេះ។ ទោះជាយ៉ាងណាទាំងនេះគ្រាន់តែជាសាច់រឿង ចំណែកការពិតជាក់ស្តែងយ៉ាងណានោះ គឺមានតែរងចាំមើលទាំងអស់គ្នា នៅថ្ងៃទី៨ ខែមេសានេះ។

គួរបញ្ជាក់ថា សូរ្យគ្រាស គឺជាការដែលព្រះច័ន្ទ ដើរឆ្លងកាត់រវាងព្រះអាទិត្យនិងផែនដី ហើយនៅក្នុងរយៈពេលខ្លី វានឹងបិទមុខព្រះអាទិត្យទាំងស្រុង។ ខណៈនៅពេលដែលព្រះអាទិត្យត្រូវបានគ្របដណ្ដប់ដោយព្រះច័ន្ទទាំងស្រុង ភ្លាមនោះពន្លឺថ្ងៃដ៏ក្តៅចែស នឹងប្រែទៅជាពន្លឺយប់ងងឹតដ៏គួរឱ្យភ័យខ្លាច ក្នុងរយៈពេលត្រឹមតែប៉ុន្មានវិនាទីប៉ុណ្ណោះ។ មនុស្សម្នានឹងអាចមើលឃើញសូរ្យគ្រាសឆ្នាំ២០២៤ នេះនៅក្នុងតែប្រទេសម៉ិកស៊ិក សហរដ្ឋអាមេរិកនិង ភាគខាងកើតនៃប្រទេសកាណាដាប៉ុណ្ណោះ បើយោងតាមការការចេញផ្សាយរបស់អង្គការ NASA។

យ៉ាងណាមិញ ការព្រួយបារម្ភមួយទៀតបានលេចឡើងថា ការដែលមើលសូរ្យគ្រាសនេះ ដោយភ្នែកទទេរ គ្មានឧបករណ៍បច្ចេកទេសគ្រប់គ្រាន់ គឺអាចនឹងបណ្តាលឲ្យងងឹតភ្នែកមួយជីវិតផងដែរ៕

ប្រទេសរុស្ស៊ី ៖ មន្ត្រីក្រសួងការពារជាតិរុស្ស៊ីឱ្យដឹងថា ពលរដ្ឋរុស្ស៊ីបានមកចុះឈ្មោះធ្វើយោធា រហូតដល់ជាង១សែននាក់ បើគិតចាប់ពីខែមករា រហូតដល់ខែមីនា ឆ្នាំ២០២៤ ។ រីឯរយៈពេល១០ថ្ងៃ ក្រោយកើតហេតុការណ៍ បា.ញ់ នៅកន្លែងប្រគំតន្ត្រីក្នុងទីក្រុងមូស្គូ មានពលរដ្ឋរុស្ស៊ីមកចុះឈ្មោះធ្វើយោធា ចំនួន១ម៉ឺន៦ពាន់នាក់ ។

មន្ត្រីក្រសួងការពារជាតិរុស្ស៊ីបានបញ្ជាក់ក្នុងសេចក្តីថ្លែងការណ៍ កាលពីថ្ងៃទី៣ ខែមេសា ឆ្នាំ២០២៤ ថា ៖ «ក្នុងអំឡុងពេលសម្ភាសន៍រយៈពេល១សប្តាហ៍ នៅតាមទីក្រុងផ្សេងៗនៅប្រទេសរុស្ស៊ី គឺអ្នកមកចុះឈ្មោះធ្វើយោធាភាគច្រើនប្រាប់ថា ពួកគេចង់សងសឹកឱ្យអ្នកស្លាប់នៅកន្លែងប្រគំតន្ត្រី កាលពីថ្ងៃទី២២ ខែមីនា ឆ្នាំ២០២៤» ។

ហេតុការណ៍បាញ់ប្រហារនៅកន្លែងប្រគំតន្ត្រី Crocus City Hall នាពេលកន្លងមក បានធ្វើឱ្យមនុស្សស្លាប់មិនក្រោម១៤៤នាក់ ។ វាជាទង្វើរបស់ក្រុមប្រដាប់អាវុធរដ្ឋអីស្លាម (IS) ហើយពួកគេក៏បានប្រកាសថា នឹងទទួលខុសត្រូវចំពោះទង្វើរបស់ខ្លួន ។

ទោះយ៉ាងណា ប្រទេសរុស្ស៊ីនៅតែជឿថា ក្រុមជនបង្កហេតុនេះ គឺជាប់ពាក់ព័ន្ធនឹងប្រទេសអ៊ុយក្រែន ។ ប៉ុន្តែទីក្រុងកៀវរបស់អ៊ុយក្រែន បានបដិសេធយ៉ាងខ្លាំងថា មិនពាក់ព័ន្ធនឹងការបាញ់ប្រហារនេះទេ ខណៈសហរដ្ឋអាមេរិកនិយាយថា វាជាគំនិតឥតប្រយោជន៍ ។

ហេតុនេះ ប្រទេសរុស្ស៊ីត្រូវតែជ្រើសរើសកម្លាំងយោធាថ្មីជាបន្តបន្ទាប់ ដើម្បីបន្តគោលដៅធ្វើសង្គ្រាមនៅអ៊ុយក្រែន ។ សង្គ្រាមនេះបានអូសបន្លាយពេលអស់ជាច្រើនឆ្នាំ តាំងពីរុស្ស៊ីបានបើកឆាកឈ្លានពានអ៊ុយក្រែន កាលពីខែកុម្ភៈ ឆ្នាំ២០២២ ។

កាលពីឆ្នាំ២០២២ ប្រធានាធិបតីរុស្ស៊ី លោក វ៉្លាឌីមៀ ពូទីន ធ្លាប់បានបញ្ជាឱ្យជ្រើសរើសបុរសរុស្ស៊ីចូលបម្រើយោធា ចំនួន៣សែននាក់ ។ ប៉ុន្តែលើកនេះ មេដឹកនាំរុស្ស៊ីនិយាយថា វាពុំចាំបាច់ទេ ដោយសារមានមនុស្សជាច្រើននាក់ស្ម័គ្រចិត្តចុះឈ្មោះធ្វើយោធា ។

ផ្ទាំងឃោសនាបានសរសើរយោធារុស្ស៊ី ដែលស្ម័គ្រចិត្តទៅប្រយុទ្ធនឹងអ៊ុយក្រែនថា «ជាអ្នកស្នេហាជាតិ» និង «ជាវីរបុរស» ត្រូវបានគេយកទៅបិទនៅតាមទីក្រុងផ្សេងៗទូទាំងប្រទេសរុស្ស៊ី ។ ក្រៅពីនេះ ប្រទេសរុស្ស៊ីបានលើកទឹកចិត្តដល់អ្នកមកចុះឈ្មោះធ្វើយោធា ដោយការផ្តល់ប្រាក់ខែឱ្យខ្ពស់ជាងប្រាក់ខែការងារធម្មតា ។

ចំណែកលោក Sergei Shoigu រដ្ឋមន្ត្រីក្រសួងការពារជាតិរុស្ស៊ី បានលើកឡើងកាលពីខែមីនា ឆ្នាំ២០២៤ ថា ទីក្រុងមូស្គូ នឹងពង្រឹងកងកម្លាំងយោធាឱ្យកាន់តែរឹងមាំ នៅចុងឆ្នាំ២០២៤ នេះ ៕

ជាធម្មតាបើនិយាយអំពីពេជ្រ គឺវាពិតជាល្បីខ្លាំងណាស់ក្នុងការប្រើប្រាស់ជាគ្រឿងអលង្ការមានតម្លៃដូចជា ចិញ្ចៀន ខ្សែក ខ្សែដៃជាដើម ប៉ុន្តែតាមពិតទៅ ៨០ ភាគរយនៃគ្រាប់ពេជ្រទាំងអស់ ដែលគេជីកយកពីរ៉ែនៅជុំវិញពិភពលោក គឺត្រូវបានប្រើប្រាស់សម្រាប់វិស័យសិក្សាស្រាវជ្រាវ និងឧស្សហកម្មទៅវិញទេ ដោយសារតែពួកវាជាវត្ថុរឹងជាងគេបំផុតលើផែនដី។ ពេជ្រត្រូវគេនិយមប្រើប្រាស់សម្រាប់ការកាត់ សំលៀង ឬខួងត្ថុធាតុរឹងៗដទៃទៀត នៅក្នុងការងារឧស្សាហកម្ម និងស្រាវជ្រាវ ក្រៅពីការយកទៅច្នៃជាគ្រឿងអលង្ការ។ ដូច្នេះហើយ តើអ្នកដឹងទេថា ប្រទេសណាខ្លះដែលសម្បូរពេជ្រច្រើនជាងគេបំផុតនៅលើពិភពលោក?

១.ប្រទេសរុស្ស៊ី៖ ប្រទេសដ៏ធំមួយនេះអាចនិយាយបានថាជាកន្លែងស្តុកធនធានពេជ្រធំជាងគេលើលោក។ រុស្ស៉ីមានទីតាំងអណ្តូងរ៉ែចំហធំៗច្រើនជាង ១០ កន្លែង ដោយប្រទេសនេះបានចាប់ផ្តើមការជីករករ៉ែពេជ្រនៅឆ្នាំ ១៩៤៧ ហើយឥលូវជាប្រទេសសម្បូរពេជ្រច្រើនបំផុត និងជាប្រទេសដែលនាំចេញពេជ្រមិនទាន់ច្នៃក្នុងបរិមាណច្រើនជាងគេបំផុតលើលោកផងដែរ ដូច្នេះប្រទេសរុស្ស៊ីមានពេជ្រសរុបទាំងអស់ ៤១ លានការ៉ាត់។

២.ប្រទេសបុតស្វាណា៖ ក្នុងនាមជាប្រទេសផលិតពេជ្រច្រើនគេនៅទ្វីបអាហ្រ្វិក បុតស្វាណាឈរនៅលេខរៀងទី ២ លើពិភពលោក។ ចាប់តាំងតែពីទសវត្សឆ្នាំ ១៨៧០ មកគ្រាប់ពេជ្រមានគុណភាព និងតម្លៃខ្ពស់ ដែលអាចយកទៅច្នៃជាគ្រឿងអលង្ការបាន ភាគច្រើនបានមកពីទ្វីបអាហ្រិ្វកនេះឯង រួមទាំងដុំពេជ្រធំជាងគេលើលោកឈ្មោះថា ឃូលីណាន់ (Cullinan) ផងដែរ។ ការរុករកពេជ្របានចាប់ផ្តើមដំបូងនៅក្នុងប្រទេសបុតស្វាណា កាលពីទសវត្សឆ្នាំ ១៩៥០ ហើយវាមានលក្ខណៈជាប្រតិបត្តិការផ្លូវការនៅឆ្នាំ១៩៧១ ដូច្នេះគិតមកដល់ឆ្នាំ ២០២៤ នេះប្រទេសដែលស្ថិតក្នុងទ្វីបអាហ្រ្វិកនេះមានពេជ្រសរុបទាំងអស់ ២៤ លានការ៉ាត់។

៣.ប្រទេសកាណាដា៖ ការរុករកពេជ្រនៅកាណាដាបានចាប់ផ្តើមដំបូងនៅឆ្នាំ ១៩៩៨ ហើយអណ្តូងរ៉ែឈ្មោះ អីកាទី (Ekati) ជាអណ្តូងរ៉ែពេជ្រដែលបានធ្វើប្រតិបត្តិការដំបូងបង្អស់នៅក្នុងប្រទេសកាណាដា។ វាបានជួយត្រួសត្រាយផ្លូវឱ្យមានការបង្កើតអណ្តូងរ៉ែពេជ្រជាបន្តបន្ទាប់ទៀត ដែលរុញច្រានឱ្យកាណាដាក្លាយជាប្រទេសផលិតពេជ្រលំដាប់លេខ ៣ នាពេលបច្ចុប្បន្ន។ ហេតុនេះហើយប្រទេសកាណាដា មានពេជ្រសរុបទាំងអស់ ១៦ លានការ៉ាត់។

៤.ប្រទេសកុងហ្គោ៖ សាធារណរដ្ឋប្រជាធិបតេយ្យកុងហ្គោ (DRC) ជាប់ចំណាត់ថ្នាក់លេខ ៤ នៃប្រទេសកំពូលៗខាងផលិតពេជ្រ។ ក្នុងប្រទេសអាហ្រ្វិកមួយនេះ មានក្រុមហ៊ុនរុករកពេជ្រផ្លូវការតែមួយប៉ុណ្ណោះ ដែលជាការសហការរវាងរដ្ឋាភិបាល និងក្រុមហ៊ុនមួយរបស់ប៊ែលហ្ស៉ិក។ កាលពីឆ្នាំ ២០១៨ ការផលិតពេជ្រនៅក្នុងប្រទេសកុងហ្គោមានចំនួនជិត ១៦.៤ លានការ៉ាត់ ដែលគិតជាតម្លៃស្មើនឹង ១៣៦.‌១ លានដុល្លារអាមេរិក។ ទោះជាយ៉ាងណា គិតមកដល់ឆ្នាំ ២០២៤ នេះបរិមាណពេជ្រនៅក្នុងប្រទេសនេះបានធ្លាក់ចុះសល់ត្រឹមតែ ៩ លានការ៉ាត់ប៉ុណ្ណោះ៕