សហរដ្ឋអាមេរិក៖ កាលពីពេលថ្មីៗនេះ Elon Musk ដែលជាស្ថាបនិក និងជាប្រធាននាយកប្រតិបត្តិ SpaceX, Tesla និងបណ្តាញសង្គម X បានប្រកាសថា ក្រុមហ៊ុន xAI របស់ខ្លួន នឹងប្រែក្លាយ Grok chatbot ទៅជាបណ្តាញសង្គមថ្មីមួយ ដែលអ្នកគ្រប់គ្នាអាចចូលប្រើប្រាស់ដោយឥតគិតថ្លៃដើម្បីសាកល្បងបច្ចេកវិទ្យារបស់ក្រុមហ៊ុន នេះបើយោងតាម Business Insider ដែលបានរាយការណ៍នៅថ្ងៃទី១២ ខែមីនា ឆ្នាំ២០២៤។

បណ្តាញសង្គមថ្មីរបស់ Elon Musk គឺ AI Grok មិនត្រឹមតែជួយឱ្យមនុស្សគ្រប់គ្នាចូលប្រើប្រាស់ និងសាកល្បងបច្ចេកវិទ្យា AI ជំនាន់ថ្មីរបស់ xAI ដោយឥតគិតថ្លៃប៉ុណ្ណោះទេ ប៉ុន្តែវាថែមទាំងជួយឱ្យក្រុមហ៊ុនភ្ជាប់ជាមួយគំរូប្រភពបើកចំហផ្សេងទៀតដូចជា Meta ឬ Mistral ផងដែរ។ ទោះជាយ៉ាងណាក៏ដោយ កម្មវិធីនេះគ្រាន់តែជាគម្រោង មិនទាន់បង្កើតជាផ្លូវការនោះទេ។

បើយោងតាម WSJ ការផ្លាស់ប្តូរខាងលើអាចជួយឱ្យកម្មវិធី AI Grok ប្រើប្រាស់កាន់តែច្រើនដោយអ្នកស្រាវជ្រាវ និងអ្នកអភិវឌ្ឍន៍ភាគីទីបី ហើយសហគមន៍អាចផ្តល់មតិកែលម្អដើម្បីជួយកែលម្អ chatbot ។ ទោះជាយ៉ាងណា អ្នកជំនាញមួយចំនួនបានព្រមានថា គំរូ AI ប្រភពបើកចំហអាចត្រូវបានប្រើប្រាស់ដោយមនុស្សអាក្រក់ដើម្បីបង្កើតអាវុធ ឬសូម្បីតែអភិវឌ្ឍភាពវៃឆ្លាតហួសពីការគ្រប់គ្រងរបស់មនុស្ស បន្ថែមពីលើការទទួលបានអត្ថប្រយោជន៍ អត្ថប្រយោជន៍បច្ចេកវិទ្យាប្រភពបើកចំហក៏អាចជួយបង្កើនល្បឿនការបង្កើតថ្មីបានទៀតផង។

ពាក្យប្រភពបើកចំហបានបង្ហាញខ្លួនតាំងពីកំណើតនៃផ្នែកសូហ្វវែរ ដែលកូដប្រភពនៃប្រព័ន្ធត្រូវបានចេញផ្សាយជាសាធារណៈនៅលើវេទិកាចែករំលែក ដែលអាចចូលប្រើបានយ៉ាងទូលំទូលាយសម្រាប់នរណាម្នាក់ ហើយក៏អាចស្រាវជ្រាវ កែប្រែ និងអភិវឌ្ឍកម្មវិធីនៅលើវាបានផងដែរ។

គួរបញ្ជាក់ដែថា ការប្រកាសនេះបានធ្វើឡើង បន្ទាប់ពីនាយកប្រតិបត្តិ Tesla បានដាក់ពាក្យបណ្តឹងប្រឆាំងនឹង OpenAI សម្រាប់ការបោះបង់ចោលគំរូដើមមិនរកប្រាក់ចំណេញ ហើយងាកទៅរកប្រាក់ចំណេញវិញ មានន័យថា ភាគីទាំងពីរកាលពីមុនបាននិយាយគ្នាថា នឹងបង្កើតកម្មវិធីរួមគ្នាដោយមិនរកប្រាក់ចំណេញ និងរក្សា AI ឱ្យមានសុវត្ថិភាពសម្រាប់មនុស្សជាតិ ប៉ុន្តែផ្ទុយទៅវិញ OpenAI ស្រាប់តែចង់បង្កើតកម្មវិធីដើម្បីរកប្រាក់ចំណេញទៅវិញ៕

ប្រទេសឥណ្ឌា ៖ សារព័ត៌មានបរទេសបានរាយការណ៍ពីហេតុការណ៍កំពុងល្បីល្បាញក្នុងបណ្តាញសង្គមប្រទេសឥណ្ឌា ហើយវីដេអូបង្ហាញថា ឪពុក-ម្តាយជាច្រើននាក់នាំគ្នាឡើងលើជញ្ជាំងសាលា ដើម្បីបោះព្រុយយ៉ុងឱ្យកូនដែលកំពុងអង្គុយប្រឡងក្នុងបន្ទប់ ។ ចំណែកគ្រូអនុរក្ស និងអាជ្ញាធរលើកឡើងថា តើពួកគេទទួលបានវិញ្ញាសាប្រឡងមកពីណា ឬមានអ្នកខាងក្នុងផ្តល់ឱ្យ ។

ហេតុការណ៍នេះបានកើតឡើងនៅសាលារៀនចាន់ដ្រាវ៉ាត ស្ថិតក្នុងទីក្រុងហានយ៉ាណាក់ រដ្ឋហ័រយ៉ាណា ប្រទេសឥណ្ឌា ។ ឪពុក-ម្តាយសិស្សជាច្រើននាក់បាននាំគ្នាឡើងលើជញ្ជាំងសាលាដើម្បីបោះព្រុយយ៉ុងឱ្យកូន ដោយសារពួកគេទទួលបានវិញ្ញាសាប្រឡងមុន ។ ចំណែកអ្នកខ្លះទៀតបានស្រែកប្រាប់ចម្លើយតាមចន្លោះប្រហោងខ្យល់បន្ទប់ ដើម្បីឱ្យកូនដែលកំពុងអង្គុយប្រឡងសរសេរតាម ។

សាលារៀនចាន់ដ្រាវ៉ាត បានតម្រូវឱ្យកូនសិស្សប្រឡងមុខវិជ្ជាភាសាឥណ្ឌា ដើម្បីឡើងថ្នាក់ទី១០ ។ មុននេះ មានកូនសិស្សម្នាក់ត្រូវបានអាជ្ញាធរចាប់ខ្លួន ករណីធ្វើឱ្យបែកធ្លាយវិញ្ញាសាប្រឡងទៅក្នុងបណ្តាញសង្គម ។ ការបែកធ្លាយវិញ្ញាសានេះ មិនមែនកើតឡើងតែនៅសាលារៀនចាន់ដ្រាវ៉ាត មួយទេ វិញ្ញាសាប្រឡងរបស់សាលារៀនផ្សេងទៀត ក៏បានបែកធ្លាយដូចគ្នាដែរ ។

សមត្ថកិច្ចនិយាយថា នៅថ្ងៃប្រឡង ពួកគេបានដើរត្រួតពិនិត្យតាមសាលារៀនជាច្រើនកន្លែង និងឃើញឪពុក-ម្តាយសិស្សជាច្រើននាក់មករង់ចាំកូននៅមណ្ឌលប្រឡងថ្នាក់ទី១២ សាលារៀន MSD ក្នុងទីក្រុងថារូ ។ ហេតុនេះ សមត្ថកិច្ចបានព្យាយាមបំបែកហ្វូងមនុស្សដើម្បីរៀបចំសណ្តាប់ធ្នាប់ក្នុងមណ្ឌលប្រឡង ហើយមានក្រុមយុវវ័យអាយុប្រមាណ២០ឆ្នាំ រត់គេចពីសមត្ថកិច្ច ។ សមត្ថកិច្ចបានចាប់ខ្លួនបុរសម្នាក់បញ្ជូនទៅកាន់ស្ថានីយប៉ូលិស ព្រមទាំងរឹបអូសកង់ចំនួន៨គ្រឿង និងសម្ភារៈផ្សេងទៀត ។

មន្ត្រីក្រសួងអប់រំឥណ្ឌាលើកឡើងថា ខាងក្រសួងអប់រំបានជ្រាបពីហេតុការណ៍នេះហើយ ហើយក្រសួងនឹងសហការជាមួយសមត្ថកិច្ចដើម្បីចាត់វិធានការអ្នកពាក់ព័ន្ធតាមច្បាប់ ។ ក្រៅពីនេះ ក្រសួងនឹងបង្កើនសុវត្ថិភាពនៅតាមសាលារៀនផងដែរ ក្នុងអំឡុងពេលកូនសិស្សប្រឡង ។

ចំណែកមន្ត្រីមន្ទីរអប់រំនៅតាមតំបន់និយាយថា មន្ទីរនឹងលុបចោលការប្រឡងលើកនេះ ព្រមទាំងចាប់ខ្លួនអ្នកធ្វើឱ្យបែកធ្លាយវិញ្ញាសាមកដាក់ទោសឱ្យបាន ពីព្រោះវាជាទង្វើដ៏ហួសចិត្ត និងធ្វើឱ្យប៉ះពាល់ដល់ប្រព័ន្ធអប់រំជាតិ ៕

ប្រទេសនូវែលសេឡង់ ៖ សារព័ត៌មានបរទេសរាយការណ៍ថា យន្តហោះដឹកអ្នកដំណើររបស់ក្រុមហ៊ុនអាកាសចរណ៍ LATAM Airlines បានជួបបញ្ហាបច្ចេកទេស ពេលយន្តហោះនេះកំពុងធ្វើដំណើរចាកចេញពីទីក្រុងស៊ីតនី ប្រទេសអូស្ត្រាលី ទៅកាន់ទីក្រុងអូកឡិន ប្រទេសនូវែលសេឡង់ កាលពីថ្ងៃទី១១ ខែមីនា ឆ្នាំ២០២៤ ។ ហេតុការណ៍នេះបានធ្វើឱ្យយន្តហោះកន្ត្រាក់យ៉ាងខ្លាំង ហើយយន្តហោះបានធ្លាក់ចុះមកក្រោមបន្តិច ដែលបណ្តាលឱ្យអ្នកដំណើរខ្ទាតមកប៉ះនឹងផ្នែកខាងលើ រងរបួសជាង៥០នាក់ ។

ក្រុមហ៊ុនអាកាសចរណ៍ LATAM Airlines បានបញ្ជាក់ក្នុងសេចក្តីថ្លែងការណ៍ថា កំហុសផ្នែកបច្ចេកទេសបានកើតឡើងក្នុងអំឡុងពេលយន្តហោះ Boeing Dreamliner ជើងហោះហើរលេខ LA800 កំពុងធ្វើដំណើរបណ្តាលឱ្យកើតការបម្លាស់ទីយ៉ាងខ្លាំង ។ ក្រុមហ៊ុននេះក៏បានបង្ហាញការសោកស្តាយចំពោះហេតុការណ៍ខុសប្រក្រតី ប៉ុន្តែពួកគេពុំបានបញ្ជាក់លម្អិតថា មានអ្វីកើតឡើងច្បាស់លាស់ទេ ។

នៅទីបំផុត ជើងហោះហើរលេខ LA800 បានធ្វើដំណើរមកដល់អាកាសយានដ្ឋាននៅទីក្រុងអូកឡិន ប្រទេសនូវែលសេឡង់ តាមការកំណត់ ។ នៅអាកាសយានដ្ឋាន មានរថយន្តពេទ្យជាច្រើនគ្រឿងបានមករង់ចាំទទួលអ្នកដំណើររងរបួសប្រមាណ៥០នាក់ រួមទាំងបុគ្គលិកបម្រើការក្នុងយន្តហោះ ចំនួន៣នាក់ទៀត ។ ក្នុងចំណោមអ្នករងរបួសទាំងនេះ មានអ្នកដំណើរម្នាក់រងរបួសធ្ងន់ រីឯអ្នកដំណើរផ្សេងទៀតរងរបួសស្រាល ។

អ្នកដំណើរជាច្រើននាក់បាននិយាយមកកាន់សារព័ត៌មាននូវែលសេឡង់ថា នៅពេលយន្តហោះកំពុងតែហោះខ្ពស់ ស្រាប់តែវាធ្លាក់ចុះមកក្រោមយ៉ាងខ្លាំង ហើយធ្វើឱ្យអ្នកដំណើរដែលមិនបានពាក់ខ្សែក្រវ៉ាត់ការពារសុវត្ថិភាពខ្ទាតទៅប៉ះផ្នែកខាងលើរហូតដល់រងរបួស ។ រីឯអ្នកដំណើរផ្សេងទៀតភ័យខ្លាចយ៉ាងខ្លាំងក្រោយពីជួបហេតុការណ៍នេះ ហើយពួកគេបានផ្តាំទៅអ្នកជិះយន្តហោះថា ត្រូវតែពាក់ខ្សែក្រវ៉ាត់ជានិច្ចដើម្បីការពារសុវត្ថិភាព ពីព្រោះគ្រោះថ្នាក់ផ្សេងៗអាចកើតឡើងគ្រប់ពេលវេលា ៕

ជប៉ុន៖ អ្នកវិទ្យាសាស្ត្រជប៉ុន បានបង្កើតវិធីសាស្ត្រថ្មីមួយដើម្បីស្តារសមត្ថភាពថ្មលីចូម-អ៊ីយ៉ុងដែលខូចគុណភាព ឱ្យត្រឡប់មកដំណើរការឡើងវិញ តាមរយៈការចាក់បញ្ចូលកោសិការបស់ថ្មជាមួយនឹងសារធាតុគីមី រហូតដល់ ៨០ ភាគរយនៃសមត្ថភាពដើមរបស់វា។

អាគុយលីចូម-អ៊ីយ៉ុង គឺជាប្រភេទថ្មសាកដែលពេញនិយមបំផុត ដែលផ្តល់ថាមពលសម្រាប់យានជំនិះ និងរបស់របរប្រើប្រាស់ប្រចាំថ្ងៃ ដូចជារថយន្តអគ្គិសនី កុំព្យូទ័រយួរដៃ និងស្មាតហ្វូនជាដើម។ ប៉ុន្តែយូរៗទៅ ថ្មទាំងនេះនឹងបាត់បង់សមត្ថភាព ដោយសារវដ្តនៃការសាកថ្មច្រើនដង ដែលធ្វើឱ្យពួកវាបាត់បង់ភាគល្អិតដែលសាក ឬអ៊ីយ៉ុងដែលជួយរក្សាទុក និងបញ្ចេញថាមពលនៅក្នុងថ្ម។

ទោះជាយ៉ាងណាក៏ដោយ បើយោងតាម Market Screener កាលពីថ្ងៃទី១១ ខែមីនា ឆ្នាំ២០២៤ បានឱ្យដឹងថា ក្រុមអ្នកជំនាញនៅមន្ទីរពិសោធន៍ស្រាវជ្រាវ និងអភិវឌ្ឍន៍កណ្តាលរបស់ក្រុមហ៊ុនតូយ៉ូតាក្នុងប្រទេសជប៉ុនបានរកឃើញវិធីថ្មីមួយដើម្បីបំពេញបន្ថែមអ៊ីយ៉ុងទាំងនេះ និងស្ដារឡើងវិញនូវសមត្ថភាពដើមរបស់ថ្មយ៉ាងសំខាន់។ ជាពិសេស ពួកគេបានចាក់សារធាតុពិសេសមួយហៅថា សារធាតុស្តារឡើងវិញទៅក្នុងថ្ម។

សារធាតុនេះបង្កឱ្យមានប្រតិកម្មគីមីដែលផលិតអេឡិចត្រុង និងអ៊ីយ៉ុងលីចូមកាន់តែច្រើន ដែលវាជាភាគល្អិតសាកថ្មពីរប្រភេទ ជួយឱ្យថ្មផ្ទុកថាមពលកាន់តែច្រើន។ ដោយការបន្ថែមភាគល្អិតទាំងនេះ ក្រុមស្រាវជ្រាវអាចបញ្ច្រាសដំណើរការខូចទ្រង់ទ្រាយរបស់ថ្ម និងស្ដារឡើងវិញ ៨០% នៃសមត្ថភាពដើមរបស់វា ហើយថ្មដែលបានស្ដារឡើងវិញនឹងអាចរក្សាដំណើរការបានរហូតដល់ ១០០ វដ្តនៃការបញ្ចូលថ្ម។

ក្រុមស្រាវជ្រាវក៏បានសាកល្បងវិធីសាស្ត្រថ្មីនេះទៅលើប្រភេទថ្មជាច្រើនប្រភេទ ទាំងធំ និងតូច រួមទាំងថ្មដែលប្រើសម្រាប់រថយន្តផងដែរ។ លោក Nobuhiro Ogihara អ្នកវិទ្យាសាស្ត្រនាំមុខគេនៃការសិក្សាបាននិយាយថា “ឥទ្ធិពលត្រូវបានផ្ទៀងផ្ទាត់មិនត្រឹមតែជាមួយថ្មតូចៗនៅក្នុងមន្ទីរពិសោធន៍ប៉ុណ្ណោះទេ ប៉ុន្តែថែមទាំងជាមួយថ្មធំដែលប្រើក្នុងរថយន្តផងដែរ”។

វិធីសាស្រ្តថ្មីនេះអាចពន្យារអាយុជីវិតរបស់អាគុយលីចូម-អ៊ីយ៉ុង ដែលអនុញ្ញាតឱ្យពួកវាប្រើឡើងវិញក្នុងរថយន្តអគ្គិសនី ឬឧបករណ៍ផ្សេងទៀត ជំនួសឱ្យការបោះចោល ឬឆ្លងកាត់ដំណើរការបំបែក និងកែច្នៃដ៏ស្មុគស្មាញ។ នេះជួយសន្សំសំចៃថ្លៃដើម និងធនធាន ខណៈពេលដែលការពារបរិស្ថាន ដោយសារថ្មលីចូម-អ៊ីយ៉ុងមានផ្ទុកលោហធាតុកម្រដូចជា cobalt និងនីកែល ដែលជារឿយៗត្រូវបានជីកយករ៉ែក្នុងវិធីដែលមិនស្ថិតស្ថេរ។

ទោះជាយ៉ាងណាក៏ដោយ វិធីសាស្ត្រថ្មីនេះមិនអាចអនុវត្តបានចំពោះប្រភេទថ្មដែលខូចទ្រង់ទ្រាយទាំងអស់នោះទេ ប៉ុន្តែវាមានប្រសិទ្ធភាពសម្រាប់តែថ្មដែលបាត់បង់អ៊ីយ៉ុងដោយសារតែការសាកថ្មម្តងហើយម្តងទៀតប៉ុណ្ណោះ។ មិនមែនសម្រាប់ថ្មដែលមានការខូចខាតរចនាសម្ព័ន្ធ ឬទម្រង់នៃការរិចរិលផ្សេងទៀតនោះទេ លើសពីនេះវិធីសាស្រ្តនៃការធ្វើរោគវិនិច្ឆ័យយ៉ាងត្រឹមត្រូវអំពីស្ថានភាពថ្មគឺត្រូវការជាចាំបាច់ ដើម្បីសម្រេចថាតើពួកវាស័ក្តិសមសម្រាប់ការចាក់ថ្នាំគីមីដែរឬទេ៕

សហរដ្ឋអាមេរិក ៖ កាលពីថ្ងៃទី១០ ខែមីនា ឆ្នាំ២០២៤ សារព័ត៌មានបរទេសរាយការណ៍ថា បុរសម្នាក់បានទិញត្រីមកពីផ្សារ ហើយគាត់ក៏បានវះពោះត្រីបម្រុងធ្វើម្ហូប ស្រាប់តែឃើញដុំថ្មតូចៗនៅក្នុងនោះ ។ គាត់នឹកស្មានថា អាជីវករលក់ត្រីលួចញាត់ដុំថ្មចូលពោះត្រី ប៉ុន្តែនៅពេលគាត់ពិនិត្យឱ្យច្បាស់ ស្រាប់តែគាត់សប្បាយចិត្តមួយរំពេច ព្រោះការពិត វាជាវត្ថុដ៏មានតម្លៃ ។

គេហទំព័រ docnhanh បានចុះផ្សាយពីរឿងរ៉ាវរបស់បុរសម្នាក់ឈ្មោះ Jerry អាយុ៤៣ឆ្នាំ ដែលបច្ចុប្បន្ននេះ គាត់រស់នៅរដ្ឋអាឡាស្កា សហរដ្ឋអាមេរិក ថា គាត់ជាបុរសម្នាក់ដែលមានសំណាងជាងគេ ដោយសារតែគាត់បានឃើញវត្ថុដ៏មានតម្លៃនៅក្នុងពោះត្រី ។

សារព័ត៌មានបរទេសរាយការណ៍ថា លោក Jerry បានទិញត្រីមកពីផ្សារ ហើយនៅពេលគាត់យកត្រីមកផ្ទះដើម្បីធ្វើម្ហូប ស្រាប់តែគាត់ចម្លែកចិត្តយ៉ាងខ្លាំង ពីព្រោះមានអ្វីរឹងៗនៅក្នុងពោះត្រី ។ នៅពេលគាត់វះពោះត្រីឃើញថា វាស្រដៀងគ្នានឹងដុំថ្មដែរ ហើយមានច្រើនដុំទៀតផង ។

ពីដំបូង គាត់មានអារម្មណ៍ខឹងខ្លាំងណាស់ ពីព្រោះគិតថា វាជាល្បិចកលរបស់អាជីវករដើម្បីធ្វើឱ្យត្រីកាន់តែមានទម្ងន់ធ្ងន់ និងអាចលក់ត្រីឱ្យអតិថិជនក្នុងតម្លៃខ្ពស់ ។ ប៉ុន្តែពេលគាត់យកដុំថ្មតូចៗទាំងនេះមកពិនិត្យមើលឱ្យច្បាស់លាស់ទើបដឹងថា វាមិនដូចអ្វីដែលគាត់គិតនោះទេ ។

បើទោះមើលទៅវាដូចថ្មធម្មតាក្តី ប៉ុន្តែវាដូចជាគុជខ្យង និងមានពន្លឺភ្លឺចែងចាំងយ៉ាងស្រស់ស្អាត ទើបធ្វើឱ្យគាត់ចាប់ផ្តើមមានទំនុកចិត្តថា ថ្មទាំងនេះគឺជាគ្រាប់ត្បូងដ៏មានតម្លៃ ។ ក្រោយមក គាត់ក៏បានយកវាទៅឱ្យអ្នកជំនាញជួយពិនិត្យមើល អ្នកជំនាញបញ្ជាក់ថា វាជាត្បូងកណ្តៀង ហើយវាមានតម្លៃថ្លៃ ។ ហេតុនេះ លោក Jerry មានឱកាសប្រមូលប្រាក់ចំណូលយ៉ាងច្រើន ដោយសារតែត្បូងក្នុងពោះត្រី ។

ទោះយ៉ាងណា គេមិនដឹងច្បាស់ថា ហេតុអ្វីបានជាគ្រាប់ត្បូងទាំងនេះទៅនៅក្នុងពោះត្រីទៅវិញ? មនុស្សភាគច្រើនសន្និដ្ឋានថា ត្រី១ក្បាលនេះអាចរស់នៅក្នុងទន្លេដែលសម្បូរទៅដោយសារធាតុរ៉ែ ហើយវាក៏លេបត្បូងមានតម្លៃទាំងនេះទៅក្នុងពោះដោយចៃដន្យ ៕