Content Creator ល្បីឈ្មោះ Chom Srey Pach ជាមេចុងភៅចំណាប់ចំណួនក្នុងការធ្វើម្ហូបខ្មែរគ្រប់មុខ និងទទួលបានការកោតសរសើរពីមហាជនស្ទើរតែគ្រប់ៗរូបតាមរយៈវីដេអូមុខម្ហូបរបស់នាងនីមួយៗ។ ទោះជាយ៉ាងណា កាលពីពេលថ្មីៗ បន្ទាប់ពីនាងបានធ្វើការបង្ហោះមុខម្ហូបសម្លរហ៊ីងក៏បានទទួលរងនូវមតិរិះ.គន់ភ្លាមៗ ខណៈក៏មានអ្នកគាំទ្រ។

ស្របពេលរដូវរស្សាបានឈានចូលមកដល់និងមានភ្លៀងធ្លាក់ជាបន្តបន្ទាប់ និងជារដូវហ៊ីងកំពុងមានការកើនឡើងផងដែរ។ កាលពីពេលថ្ងៃទី១៥ ខែឧសភានេះ ការចែកចាយវីដេអូពីរបៀបនៃការធ្វើសម្លរម្ជូរហ៊ីងរបស់ស្រីផាច កំពុងតែទទួលបានចំណាប់អារម្មណ៍ខ្លាំងជាធម្មតានៅលើបណ្តាញសង្គម។ តាមរយៈវីដេអូ នាងគឺបានរៀបរាប់ពីដំណើរការនៃការធ្វើម្ហូប រាប់ចាប់ពីដើរបេះបន្លែ លៀងសម្អាតសត្វហ៊ីង ការផ្សំគ្រឿងសម្លររបស់នាង រហូតដល់ការញ៉ាំមើលទៅទំនងខ្លាំងមែនទែន សឹងតែស្រក់ទឹកមាត់ភ្លាមៗបន្ទាប់ពីទស្សនាវីដេអូរបស់នាងក្នុងចំណោមអ្នកដែលចូលចិត្តសត្វមួយប្រភេទនេះ។

ទោះជាយ៉ាងណា បន្ទាប់ពីវីដេអូខាងលើបានចែកចាយរួចមកក៏មានទាំងអ្នកពេញចិត្តនិងមិនពេញចិត្តចំពោះម្ហូបមួយមុខនេះ ព្រោះថានៅតំបន់ខ្លះគឺមិនដែលមានការបរិភោគសត្វហ៊ីងនោះទេ ទើបបណ្តាលឲ្យពួកគេមួយចំនួនមានការខ្លាចរអារ។

គណនីដែលមានឈ្មោះថា Kong NaRah គឺបានបញ្ចេញមតិថា «សូមជំនាញពាក់ព័ន្ធដើម្បីអភិរក្ស សូមមានវិធានការផង សត្វកំពុងពងបែបនេះ រលាយរលត់អស់ហើយ (សូមអ្នកកំពុងបរិភោគនឹងមានខួរក្បាលផង ដឹងថាកំពុងបំផ្លាញទំហំប៉ុនណាទេ) សោកស្តាយណាស់»។ អ្នកខ្លះថា «ខ្ញុំអ្នកជនបទដែរ មិនដែលញាំទេ ឃើញញញើតណាស់»។ អ្នកខ្លះថា«ខ្ញុំធ្លាប់គាំទ្រវីដេអូរអូនក្នុងការធ្វើម្ហូបផ្សេងៗ តែសំរាប់មុខម្ហូបមួយនេះ ខ្ញុំមិនគាំទ្រទេ មើលទៅបែបគួរអោយ អាសូរនឹងសង្វេគណាស់»។

អ្នកខ្លះថា«ខ្ញុំក៏ចេះហូបដែរបងតែសត្វបែបហ្នឹងបរទេសគេខ្លាចគេខ្ពើមណាស់។ អញ្ចឹងវីដេអូបងមិនមែនមើលតែក្នុងស្រុកទេ។ វីដេអូបងបរទេសក៏មើលដែរអញ្ចឹងគេប្រាកដជាគិត មិនល្អមកលើយើងហើយ។បើវីដេអូផ្សេងៗខ្ញុំគាំទ្រ បង្ហោះ។តែវីដេអូម្ហូបបែបនេះខ្ញុំមិនគាំទ្រឱ្យបងបង្ហោះទេ។ នេះខ្ញុំគ្រាន់តែជូនជាយោបល់ទៅកាន់បង»។

ជាមួយនឹងការបញ្ចេញមតិបែបវិជ្ជមានទៅលើវីដេអូស្រីផាច ម្នាក់ក្នុងចំណោមនោះ លោក វ៉ាត វ៉ាន់ ក៏បានលើកឡើងថា «ធ្វើដូចមិនដែលហូបពងត្រី បើចឹង ពងមាន់ ពងទាកុំហូប។ កុំរើសអើងសត្វផ្សេង បើអភិរក្ស មិនបាច់ហូបទាំងអស់»។ អ្នកខ្លះថា«ហេតុអីត្រូវអភិរក្ស ព្រោះសត្វហ៊ីង មិនមែនជាប្រភេទ សត្វកំរឯណា ? ខែភ្លៀងសំបូរសឹងអីហើយ ហើយសត្វ វាពងជារឿងធម្មតា តាមស្រុកឃុំ ភូមិស្រុក គេហូប គ្រប់តែគ្នា បើល្អពូកែចឹង ជួយអភិរក្សសត្វឆ្កែផង កុំ អោយលក់ជាសាធារណៈ ពិបាកភ្នែកណាស់»។

អ្នកខ្លះទៀតថា «នៅក្នុងវីដេអូខាងលើនេះគឺបានឃើញថាគាត់បាន សុំទោសទុកជាមុនរួចហើយ។ពីព្រោះសត្វហ៊ីងនេះមាន អ្នកខ្លះក៏គេហូបហើយអ្នកខ្លះក៏មិនហ៊ានហូប ដោយសារតែវាជាម្ហូបនៅតាមតំបន់ផ្សេងៗគ្នា។ ដូច្នេះហើយក៏សូមចិត្តបងប្អូនមួយចំនួនដែលមិនចូលចិត្ត ឬក៏មិនហ៊ានហូបសូមខមិនដោយមានទំនួលខុសត្រូវ បញ្ញាក់ (ខ្ញុំក៏មិនចេះហូបដែរ)៕

ទីក្រុងសេអ៊ូល ប្រទេសកូរ៉េខាងត្បូង ៖ ក្រុមហ៊ុន WorldBridge Group ដែលជាក្រុមហ៊ុនពហុពាណិជ្ជកម្មរបស់អ្នកឧកញ៉ា សៀ ឫទ្ធី នៅថ្ងៃទី១៧ ខែឧសភា បានប្រកាសពីការចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយក្រុមហ៊ុន Daewoo Engineering & Construction Co., Ltd. (Daewoo E&C) ដែលជាក្រុមហ៊ុនសំណង់ និងវិស្វកម្មដ៏លេចធ្លោរបស់កូរ៉េខាងត្បូង ដើម្បីស្វែងរកឱកាសសហប្រតិបត្តិការវិនិយោគលើគម្រោងអភិវឌ្ឍន៍នៅក្នុងប្រទេសកម្ពុជា។
ការចុះហត្ថលេខាលើអនុស្សរណៈនៃការយោគយល់គ្នានេះ ធ្វើឡើងក្នុងពិធីជួបជុំអាហារពេលព្រឹករបស់មេដឹកនាំធុរកិច្ចកម្ពុជា-កូរ៉េ កាលពីថ្ងៃទី១៦ ខែឧសភា មានការអញ្ជើញចូលរួមដោយឯកឧត្ដម ស៊ុន ចាន់ថុល ឧបនាយករដ្ឋមន្ត្រី និងជាលេខាទីមួយនៃក្រុមប្រឹក្សាអភិវឌ្ឍន៍កម្ពុជា (CDC) រួមជាមួយនឹងការផ្លាស់ប្តូរលើអនុស្សរណៈនៃការយោគយល់គ្នា (MoU) ដែលមានការអញ្ជើញចូលរួមដ៏ខ្ពង់ខ្ពស់បំផុតពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ធ្វើជាសាក្សី ក្នុងវេទិកាធុរកិច្ចកម្ពុជា-កូរ៉េ។
នៅក្នុងឱកាសនោះ លោក JUNG Wonju ប្រធានក្រុមហ៊ុន Daewoo E&C និងអ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាល WorldBridge Group ក៏បានអញ្ចើញចូលជួបជាមួយសម្តេចមហាបវរធីបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាផងដែរ ដើម្បីពិភាក្សាអំពីសារៈសំខាន់នៃការចុះអនុស្សរណៈនៃការយោគយល់គ្នារវាងក្រុមហ៊ុនទាំងពីរ និងផលប្រយោជន៍របស់ក្រុមហ៊ុន Daewoo E&C សម្រាប់ការវិនិយោគនៅព្រះរាជាណាចក្រកម្ពុជា។
ទំនាក់ទំនងជាយុទ្ធសាស្ត្រនេះបានបង្កើនភាពរឹងមាំ និងជំនាញរបស់ក្រុមហ៊ុនទាំងពីរ ដើម្បីស្វែងរកកិច្ចសហការដ៏មានសក្តានុពលនៅក្នុងគម្រោងអភិវឌ្ឍន៍ផ្សេងៗនៅប្រទេសកម្ពុជា។ បទពិសោធន៍យ៉ាងទូលំទូលាយរបស់ក្រុមហ៊ុន Daewoo E&C ក្នុងការអភិវឌ្ឍទីក្រុង ហេដ្ឋារចនាសម្ព័ន្ធ និងសំណង់ រួមផ្សំជាមួយនឹងការយល់ដឹងយ៉ាងស៊ីជម្រៅរបស់ក្រុមហ៊ុន WorldBridge Group អំពីទីផ្សារក្នុងស្រុក និងការទំនាក់ទំនង បានឆ្លុះបញ្ចាំងឲ្យឃើញពីការរួមបញ្ចូលគ្នាដ៏គួរឱ្យទាក់ទាញមួយ សម្រាប់ការឈានទៅសម្រេចបាននូវការបណ្តាក់ទុនដ៍សំខាន់នាពេលអនាគត។
បន្ថែមពីនេះ ការចុះអនុស្សរណៈនៃការយោគយល់គ្នានេះ គឺធ្វើឡើងស្របជាមួយនឹងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការទាក់ទាញការវិនិយោគផ្ទាល់ពីបរទេស និងជំរុញការអភិវឌ្ឍប្រកបដោយចីរភាព។
អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាល WorldBridge Group បានមានប្រសាសន៍ថា ” យើងពិតជាមានក្ដីសោមន្សរីករាយណាស់ ដែលបានធ្វើការជាមួយក្រុមហ៊ុន Daewoo E&C ។ ហើយយើងមានទំនុកចិត្តថា សមត្ថភាពរួមរបស់ក្រុមហ៊ុនទាំងពីរ នឹងបើកគម្រោងថ្មី ដែលនឹងរួមចំណែកដល់ការអភិវឌ្ឍបន្តរបស់ប្រទេសជាតិ»។
គួរបញ្ជាក់ថា ការចុះហត្ថលេខាលើអនុស្សរណៈយោគយល់គ្នានេះ ធ្វើឡើងបន្ទាប់ពីមានការពិភាក្សាជាបន្តបន្ទាប់រវាងអ្នកអ្នកឧកញ៉ា សៀ ឫទ្ធី និងលោកប្រធាន Jung Won-ju នៃក្រុមហ៊ុន Daewoo E&C ក្នុងដំណើរបំពេញទស្សនកិច្ចនៅកម្ពុជាកាលពីខែធ្នូឆ្នាំ ២០២៣ ។ កិច្ចពិភាក្សាទាំងនេះបានដាក់មូលដ្ឋានគ្រឹះសម្រាប់ការស្វែងរកការរួមសហការ និងកំណត់តំបន់សក្តានុពលនៃការសហការផងដែរ។
ផលប័ត្រចម្រុះរបស់ក្រុមហ៊ុន WorldBridge Group និងកំណត់ត្រាជោគជ័យក្នុងការអភិវឌ្ឍអចលនទ្រព្យ រួមទាំងគម្រោងដូចជា The Peak និង The Bridge ធ្វើឱ្យក្រុមហ៊ុននេះ ក្លាយជាដៃគូដ៏ល្អសម្រាប់ការពង្រីកកិច្ចសហប្រតិបត្តិការរបស់ក្រុមហ៊ុន Daewoo E&C មកកាន់ទីផ្សារកម្ពុជា។ ក្រុមហ៊ុនទាំងពីរនឹងធ្វើការរួមគ្នាដើម្បីកំណត់នូវឱកាសដែលមានអត្ថប្រយោជន៍ទៅវិញទៅមកក្នុងការអភិវឌ្ឍទីក្រុងថ្មី អចលនទ្រព្យ ឧស្សាហកម្ម និងវិស័យហេដ្ឋារចនាសម្ព័ន្ធ។
ក្រុមហ៊ុនទាំងពីរទន្ទឹងរង់ចាំកិច្ចសហការប្រកបដោយផ្លែផ្កា ដែលនឹងផ្តល់អត្ថប្រយោជន៍ដល់ស្ថាប័នទាំងពីរ និងជះផលជាវិជ្ជមានយូរអង្វែងសម្រាប់ប្រជាជនកម្ពុជានាពេលអនាគតដ៏ខ្លីខាងមុខនេះ ។
ក្រុមហ៊ុន WorldBridge Group គឺជាក្រុមហ៊ុនឈានមុខគេក្នុងប្រទេសកម្ពុជាដែលត្រូវបានបង្កើតឡើងក្នុងឆ្នាំ 1992។ ជាមួយនឹងផលប្រយោជន៍ចម្រុះក្នុងវិស័យភស្តុភារ អចលនទ្រព្យ ហិរញ្ញវត្ថុ បដិសណ្ឋារកិច្ច និងជាច្រើនទៀត ក្រុមហ៊ុនបានដើរតួយ៉ាងសំខាន់ក្នុងកំណើនសេដ្ឋកិច្ច និងការអភិវឌ្ឍន៍របស់កម្ពុជា។ ក្រុមហ៊ុន WorldBridge Group ប្តេជ្ញាក្នុងការផ្តល់នូវឧត្តមភាព ការច្នៃប្រឌិត និងតម្លៃប្រកបដោយនិរន្តរភាពដល់ភាគីពាក់ព័ន្ធ និងសហគមន៍របស់ខ្លួន។
Daewoo Engineering & Construction Co., Ltd. គឺជាក្រុមហ៊ុនសំណង់ និងវិស្វកម្មដ៏ល្បីល្បាញរបស់កូរ៉េខាងត្បូង ដែលមានវត្តមានទូទាំងពិភពលោក។ ក្រុមហ៊ុនមានកំណត់ត្រាផ្លូវមួយដែលបង្ហាញឱ្យឃើញពីការចែកចាយគម្រោងខ្នាតធំនៅទូទាំងវិស័យផ្សេងៗ រួមទាំងហេដ្ឋារចនាសម្ព័ន្ធ វិស្វកម្មសំណង់ស៊ីវិល និងការសាងសង់អគារ។ Daewoo E&C ប្តេជ្ញាចិត្តក្នុងការច្នៃប្រឌិត និរន្តរភាព និងការបង្កើតតម្លៃសម្រាប់អតិថិជន និងដៃគូរបស់ខ្លួន។

នៅពេលនិយាយពីស្ពានដែលវែងជាងគេបំផុតនៅក្នុងប្រទេសកម្ពុជាយើងប្រិយមិត្តប្រាកដជាគិតថា ជាស្ពាននាក់លឿង ស្ពានកោះកុង ឬស្ពានមេគង្គហើយ។ ជាការពិតណាស់ស្ពានទាំងនេះគឺជាស្ពានដែលវែងជាងគេបំផុតក្នុងប្រទេសកម្ពុជាយើងនាពេលបច្ចុប្បន្ននេះ ទោះជាយ៉ាងណាប្រិយមិត្តមួយចំនួនប្រហែលជាមិនសូវស្គាល់ស្ពានបុរាណដែលធ្លាប់ជាប់ឈ្មោះជាស្ពានវែងជាងគេ ចំណាស់ជាងគេ និងធំជាងគេក្នុងប្រទេសយើងកាលពីសម័យមុននោះទេ។ ដូច្នេះក្នុងអត្ថបទនេះ KBN News នឹងនាំប្រិយមិត្តមកស្គាល់ស្ពានបុរាណដែលវែងជាងគេបំផុតនៅក្នុងប្រទេសកម្ពុជាយើង៖

១.ស្ពានកំពង់ក្តី ឬស្ពានព្រះទិស៖ គឺជាស្ពានបុរាណដ៏វែងបំផុតមួយក្នុងប្រទេសកម្ពុជាក្នុងសម័យអង្គរ។ ស្ពាននេះមានប្រវែង ៨៦ ម៉ែត្រ ទទឹង ១៦ ម៉ែត្រ និងកម្ពស់ ១១ ម៉ែត្រ ត្រូវបានសាងសង់ឡើងក្នុងសតវត្សរ៍ទី ១២ ក្នុងរជ្ជកាលព្រះបាទជ័យវរ្ម័នទី ៧។ វាធ្វើអំពីថ្មបាយក្រៀម និងថ្មភក់ ហើយមាន ២១ វិសាលភាព។ ស្ពានកំពង់ក្តី មានទីតាំងនៅជិតផ្សារកំពង់ក្តី ឃុំកំពង់ក្តី ស្រុកជីក្រែង ខេត្តសៀមរាប។

២.ស្ពានទ័ព ឬស្ពានអូរជីក៖ ស្ពាននេះក៏ជាប់ឈ្មោះជាស្ពានបុរាណវែងជាងគេ និងធំជាងគេបង្អស់នៅស្រុកខ្មែរផងដែរ ដែលបានបន្សល់ទុកតាំងពីសម័យចក្រភពអង្គរ នេះបើយោងតាមមរតកកម្ពុជា។ ស្ពានទ័ព ឬស្ពានអូរជីក មានទីតាំងស្ថិតនៅភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ ដែលមានទីតាំងជាប់នឹងព្រំប្រទល់នៃខេត្តសៀមរាប។ ស្ពាននេះជាស្ពានចាស់បុរាណមួយដែលធ្វើពីថ្មបាយក្រៀមស្ទើរតែទាំងអស់ លើកលែងតែបង្កាន់ដៃនាគ និងជើងទម្រដែលធ្វើពីថ្មភក់។ សព្វថ្ងៃនេះបង្កាន់ដៃនាគ និងជើងទម្រនៅសល់តែផ្នែកខ្លះៗតែប៉ុណ្ណោះ ចំណែកឯសរសរជើងស្ពានខ្លះទទួលការសឹករិចរឹលខ្លាំង។

ស្ពានទ័ព ឬស្ពានអូរជីកនេះមានបណ្តោយប្រវែងប្រមាណជា ១៤៩ ម៉ែត្រ ទទឹងប្រមាណជា ១៥,៥០ ម៉ែត្រ កម្ពស់ប្រហែល ១០ ម៉ែត្រពីផ្ទៃដី និងរន្ធបង្ហូរទឹកចំនួន ៣៥ ដែលបានកសាងឡើងក្នុងរជ្ជកាលព្រះបាទជ័យវរ័ន្មទី ៧ ក្នុងចន្លោះសតវត្សទី ១២ និងទី ១៣ នៃគ.ស។ ស្ពាននេះ ត្រូវបានចាត់ទុកថាមានប្រវែងវែងជាងគេបង្អស់ នៅក្នុងចំណោមស្ពានបុរាណនានាជាង ១០០ ដែលគេបានស្រាវជ្រាវរកឃើញនៅក្នុងប្រទេសកម្ពុជា៕

មហាជនហាក់ងើយឆ្ងល់ និងភាគច្រើនបានសម្តែងនូវការមិនពេញចិត្តទាក់ទងនឹងការលើកឡើងរបស់បុរសម្នាក់នៅលើបណ្តាញសង្គម ដែលនិយាយអំពីគុណវិបត្តិនៃការដាំដំណាំរបស់ដូនតាខ្មែរមួយប្រភេទ គឺដំណាំត្នោត។

យោងតាមការបង្ហោះដោយគណនីមួយដែលមានឈ្មោះថា Sakoun Sok កាលពីពេលថ្មីៗនេះគឺបានបង្កឲ្យមានការវែកញែកជាខ្លាំង ទៅលើប្រធានបទដែលលោកបានលើកឡើងថា «ដាំអីមិនដាំ ទៅខំដាំត្នោត ដែលឫសវែង ហើយបំផ្លាញជីវជាតិដីឲ្យខាតសម្រាប់ដំណាំ ពេលខ្លីនានា»។ បន្ថែមពីលើការបញ្ចេញមតិ គណនីខាងលើក៏បានភ្ជាប់មកជាមួយនឹងរូបថតមួយសន្លឹក ដែលបង្ហាញពីសកម្មភាពរបស់មនុស្សមួយក្រុមកំពុងតែបណ្តុះគ្រាប់ត្នោតផងដែរ។

តាមរយៈការបង្ហោះខាងលើ មហាជនខ្មែរជាច្រើនក៏បានចូលទៅបញ្ចេញមតិព្រាតដោយអ្នកខ្លះបានលើកឡើងថា «ដើមត្នោតជាដំណាំអត្តសញ្ញាណជាតិខ្មែរ និងផ្តល់អត្ថប្រយោជន៍ច្រើនណាស់ដល់ជីវភាពប្រជាពលរដ្ឋ ព្រំដីដែលទំនេរ យើងត្រូវតែដាំដើមត្នោតឬសត្នោតចាក់ជ្រៅទៅក្នុងដី មិនប៉ះពាល់ដល់គុណភាពដីទេ សូម្បីតែស្មៅឬរុក្ខជាតិផ្សេងៗអាចរស់នៅក្រោមដើមត្នោតបានទាំងអស់។ ពេលត្នោតឲ្យផល នឹងផ្តល់ផលយូរអង្វែងណាស់ ហូបរាប់តំណរតកូនតចៅ»។

អ្នកខ្លះថា «គេដាំលើដីដែលជាកន្លែងដែលមិនត្រូវធ្វើស្រែឬចំការ ដូចជាតាមផ្លូវលំនៅតាមជនបទ តាមទំនប់ប្រឡាយ ហើយគេក៏មិនដាំជាចំការ ដូចដាំពោត ដំឡូង ដូង ក្រូច។ល។ នោះទេ»។

អ្នកខ្លះថា «ពិតជាមិនដឹងពីអត្ថប្រយោជន៍ដើមត្នោត? ស្ករត្នោត ស្ករផែនត្នោត បង្អែមផ្លែត្នោត កំពីងត្នោត ចានត្នោត ស្លាបព្រាត្នោត សមត្នោត ទូកត្នោត ឆ្លាក់ក្បាច់ត្នោត គ្រឿងសង្ហារឹមត្នោត ស្លឹកប្រក់ផ្ទះត្នោត ទឹកខ្មេះត្នោត ទឹកត្នោតផ្អែម ស្រាត្នោត លំអម្លប់ដើមត្នោត ខ្សែវេញ ត្នោត កន្ទេលត្នោត។ល។»

ទោះជាយ៉ាងណា បើយោងតាមការសិក្សាស្រាវជ្រាវធំៗនានាទាក់ទងគុណវិបត្តិនៃរុក្ខជាតិត្នោតមួយប្រភេទនេះនូវមិនទាន់មានការលើកឡើងនៅឡើយនោះទេ។ ផ្ទុយទៅវិញ គឺមានតែការលើកឡើងពីអត្ថប្រយោជន៍នៃដើមត្នោត ដែលបានដើរតួនាទីយ៉ាងសំខាន់សម្រាប់ទាំងបរិស្ថាននិងសុខភាពមនុស្ស ខណៈដែលវិទ្យាសាស្ត្រជាច្រើនបាននឹងកំពុងសិក្សាស្រាវជ្រាវលើរុក្ខជាតិប្រភេទនេះជាហូរហែរ។ សក្ដានុពលរបស់ត្នោតគឺជាប្រភពជីវឥន្ធនៈ ត្នោតជួយពង្រឹងគុណភាពដី និងមានសារៈប្រយោជន៍ជាច្រើនទៀតដែលមិនអាចកាន់ថ្លៃបាន។

ជាមួយគ្នានេះ ដើមត្នោតក៏បានលេចវត្តមាននៅឯប្រទេសអាស៊ីជាច្រើនទៀត ហើយសម្រាប់ក្នុងប្រទេសកម្ពុជាទាំងមូល ប្រជាជនខ្មែរក៏បានចាត់ទុកថាត្នោតមានកេរតំណែលតាំងពីបុរាណកាលមក ជាដួងព្រលឹងរបស់អ្នកស្រែចម្ការគ្រប់រូប រហូតដល់មានមតិខ្លះលើកឡើងថា ដើមត្នោត គឺជា និមិត្តរូបនៃព្រះរាជាណាចក្រកម្ពុជា។ ប្រជាជនខ្មែរគ្រប់ៗរូបតែងចងចងពាក្យមួយឃ្លាដែលគេនិយាយយ៉ាងសាមញ្ញថា ៖« ទីណាមានដើមត្នោត ទីនោះគឺជាដែនដីខ្មែរ » ៕