នាយ ព្រែក បានបង្កឱ្យអ្នកគាំទ្រវិស័យ K-Pop បញ្ចេញមតិវែកញែកយ៉ាងច្រើនបន្ទាប់ពីលោកបាននិយាយថាយកលុយរាប់ម៉ឺនដុល្លារ រាប់លានដុល្លារជួលតារាស្រុកគេ គេយកលុយទៅបាត់។ អ្នកគាំទ្រជាច្រើនបានរិះគន់សម្តី នាយ ព្រែក និងបានលើកឡើងថាមិនមើលស្រុកគេដើរដល់ណាហើយ។ ចំណែកមនុស្សមួយចំនួនទៀតលើកឡើងថាពាក្យសម្តីរបស់នាយ ព្រែក គ្រាន់តែស្មារតីជាតិនិយមប៉ុណ្ណោះ។

នាពេលបច្ចុប្បន្ន វិស័យ K-Pop បានរីកដុះដាលយ៉ាងខ្លាំងហើយប្រទេសកូរ៉េខាងត្បូងបានផ្សារភ្ជាប់វិស័យ K-Pop និង K-drama ទៅកាន់ពិភពលោកដែលបង្ហាញពីវប្បធម៌និងទាញយកវិស័យទេសចរណ៍និងប្រាក់ចំណូលជាតិបានយ៉ាងច្រើន។ នៅបណ្តាប្រទេសនានានៅពេលមានការប្រគំតន្រ្តី K-Pop តែងតែទទួលបានអត្ថប្រយោជន៍ជាច្រើនមានទាំងភ្ញៀវទេសចរ សណ្ឋាគារ ការធ្វើដំណើរ ភោជនីដ្ឋាន គឺរកចំណូលមិនតិចនោះទេ។

កន្លងមកនៅក្នុងប្រទេសកម្ពុជាមានក្រុមចម្រៀង Kpop និងតារា Kpop ល្បីៗមកសម្តែងនៅប្រទេសកម្ពុជាបានធ្វើឱ្យមានការចាប់អារម្មណ៍យ៉ាងខ្លាំងដូចគ្នា។ ទោះបីជាពេលនេះ Kpop ពេលនេះមានឥទ្ធិពលខ្លាំងក្តីប៉ុន្តែអ្នកមួយចំនួនតូចនៅមិនទាន់យល់ច្បាស់និងមានចិត្តចង្អៀតចង្អល់បន្តិចបន្តួចនិងមានការរិះគន់នៅលើបណ្តាញសង្គមជាដើម។ ជាក់ស្តែងថ្មីៗនេះមានក្រុមចម្រៀង Kpop ដ៏ល្បីបានក្លាយជា BA ប្រ៊េននៅស្រុកខ្មែរប៉ុន្តែបង្កឱ្យមានប្រតិកម្មចម្រុះផងដែរ។ ទន្ទឹមនឹងនេះពាក្យសម្តីរបស់ នាយ ព្រែក ដែលនិយាយនៅក្នុងកម្មវិធីមួយក៏ត្រូវអ្នកគាំទ្រវិស័យ Kpop បញ្ចេញមតិរិះគន់។

នាយ ព្រែក បាននិយាយថា ការយកលុយរាប់ម៉ឺនដុល្លារ រាប់លានដុល្លារជួលតារាស្រុកគេ គឺគេយកលុយទៅបាត់ហើយពុំបានជួយមកស្រុកខ្មែរនោះទេ។ ពាក្យសម្តីក្នុងន័យជួយគាំទ្រសិល្បករក្នុងស្រុក ស្របពេលរឿងប្រកាស BA ថ្មីៗនេះបានធ្វើឱ្យអ្នកគាំទ្របញ្ចេញមតិថា «ចង់ឱ្យគេស្គាល់កម្ពុជាចង់ឱ្យទេសចរណ៍កម្ពុជារីកចម្រើនតែមើលនិយាយ អត់មើលប្រទេសគេគេដល់ណាហើយ សូម្បីតែនាយរដ្ឋមន្រី្តថ្មីក៏គាត់ដឹងចំណុចហ្នឹងដែរ»។ អ្នកផ្សេងទៀតក៏បានបញ្ចេញមតិរិះគន់ផ្សេងៗផងដែរ។

យ៉ាងណាមិញ ទន្ទឹមនឹងពាក្យសម្តីរិះគន់អ្នកមួយចំនួនបានបញ្ចេញថា ពាក្យសម្តីរបស់ នាយព្រែក គ្រាន់តែស្មារតីជាតិនិយមគាំទ្រសិល្បករក្នុងស្រុកប៉ុណ្ណោះពុំគួរវិនិច្ឆ័យជេរប្រមាថ ជាន់ខ្មែរគ្នាឯងឡើយ។ មកទល់នឹងព្រឹកថ្ងៃទី១៩ ខែមករា នាយ ព្រែក ពុំទាន់ចេញបកស្រាយឬតបតនឹងការរិះគន់របស់អ្នកគាំទ្រ Kpop ឡើយ៕

ថ្មីៗនេះអ្នកគាំទ្រមានការចាប់អារម្មណ៍យ៉ាងខ្លាំងបន្ទាប់ពីតារាចម្រៀងជើងចាស់ដ៏មានឈ្មោះបោះសំឡេងមិនចេះរីងស្ងួតលោក ណូយ វ៉ាន់ណេត បានបង្ហោះរូបជាមួយនឹងតារារ៉េប វណ្ណដា។ ក្រោយឃើញបែបនេះអ្នកគាំទ្របង្ហាញអារម្មណ៍រំភើបចិត្តយ៉ាងខ្លាំងនិងចង់ឱ្យតារាចម្រៀងទាំងពីរដួងសហការគ្នាហើយនោះក៏ជាបំណងប្រាថ្នារបស់ វណ្ណដា ដែរ។

នៅថ្ងៃទី១៩ ខែមករា លោក ណូយ វ៉ាន់ណេត បានបង្ហោះរូបភាពប៉ុន្មានសន្លឹកជាមួយនឹងតារារ៉េប វណ្ណដា ដោយភ្ជាប់មកជាមួយនឹងសំណេរថា «ថ្ងៃនេះបានជួបក្មួយវណ្ណដាពិតហើយពុកម៉ែបងប្អូននៅបាយ័នTVបឹងស្នោរ អរគុណក្មួយវណ្ណដា»។ ឃើញរូបភាពនិងការបង្ហោះរបស់តារាចម្រៀងជើងចាស់ដ៏មានប្រជាប្រិយភាពរូបនេះហើយបានធ្វើឱ្យអ្នកគាំទ្រជាច្រើនរំភើបចិត្តយ៉ាងខ្លាំង។

ការបង្ហោះរបស់លោក ណូយ វ៉ាន់ណេត ទៀតសោតបានជំរុញទឹកចិត្តឱ្យអ្នកគាំទ្រដាក់ក្តីរំពឹងថាតារាចម្រៀងទាំងពីរដួងអាចមានការសហការគ្នាបង្កើតប្រវត្តិសាស្រ្តជាមួយគ្នាជាតន្រ្តីបុរាណលាយសម័យ។ ការរំពឹងទុករបស់អ្នកគាំទ្រដោយសារតែកាលពីកន្លងទៅ វណ្ណដា ក៏ធ្លាប់បង្ហាញដំរួយនេះដូចគ្នា។

គេចាំបានថាកាលពីខែវីច្ឆិកា ឆ្នាំ២០២៤ ស្របពេលដែលបទ «សង្ក្រាន្តស្គាល់ស្នេហ៍» របស់ វណ្ណដា មានភាពល្បីរន្ធឺខ្លាំង តារាចម្រៀង ណូយ វ៉ាន់ណេត បានបកស្រាយចម្រៀងនេះនៅក្នុងវីដេអូកំប្លែងរបស់ នាយ ព្រែក ជាហេតុធ្វើឱ្យទស្សនិកជនមានការចាប់អារម្មណ៍យ៉ាងខ្លាំង។ ក្រោយពីឃើញរៀមច្បងក្នុងវិស័យសិល្បៈដែលគោរពស្រលាញ់ជាយូរមកហើយច្រៀងបទចម្រៀងរបស់ខ្លួន វណ្ណដា បានបង្ហាញអារម្មណ៍រំភើបចិត្តខ្លាំង ថែមទាំងទម្លាយទៀតថាសុបិនរបស់លោកគឺចង់មានការសហការជាមួយលោក ណូយ វ៉ាន់ណេត៕

ក្រុមចម្រៀង Lacima Cartel បានធ្វើឱ្យអ្នកគាំទ្រជ្រួលច្របល់បន្ទាប់ពីបង្ហោះវីដេអូជាមួយនឹងសំណេរថាចាកចេញពីអ្នកគាំទ្រនិងអរគុណអ្នកគាំទ្រសម្រាប់រយៈពេលកន្លងមក។ នេះបានជំរុញឱ្យមានការសង្ស័យថាតើនេះជាការបំបែកក្រុមរបស់ពួកគេ ឬមួយគ្រាន់តែជាការ Prank ?។ ទោះយ៉ាងណា ការបង្ហោះមិនអស់សេចក្តីដោយមិនមានពាក្យថា «បំបែកក្រុម» នៅតែធ្វើឱ្យអ្នកគាំទ្រសង្ស័យនិងសង្ឃឹមថាពួកគេនៅតែបន្តទៅមុខ។

នៅរសៀលថ្ងៃទី១៩ ខែមករា ក្រុមចម្រៀង Lacima បានបង្ហោះវីដេអូដោយភ្ជាប់ជាមួយនឹងចំណងជើងថា «រយៈពេលជិត ៦ ឆ្នាំហើយ ដែលពួកយើងបានដើរនៅលើផ្លូវជាមួយគ្នា… ហើយ Cartel ក៏ដល់ពេលដែលត្រូវចាកចេញពីអ្នកគាំទ្រទាំងអស់ដូចគ្នា។ អរគុណ Falcons សម្រាប់រយៈពេលកន្លងមកនេះ »។ សមាជិកក្នុងក្រុមទាំង៧នាក់បាននិយាយរៀបរាប់ថា ពួកគេពិតជាអរគុណអ្នកគាំទ្រមែនទែនសម្រាប់ការគាំទ្រ ហើយការគាំទ្រនេះគឺពិតជាធ្វើឱ្យពួកគេសប្បាយចិត្តនិងជំរុញទឹកចិត្តពួកយើងឱ្យបន្ត។

Lacima ថាអ្នកគាំទ្របានផ្តល់អនុសាវរីយ៍ល្អៗជាមួយ Lacima Cartel តាំងពីដំបូងឬអ្នកគាំទ្រដែលស្គាល់ថ្មីៗដោយសង្ឃឹមថានឹងនៅតែបន្តគាំទ្រពួកគេបន្តទៀត ហើយពួកគេពិតជាសប្បាយចិត្តរាល់ពេលដែលបទចម្រៀងពួកគេធ្វើក្លាយជាផ្នែកមួយដែលធ្វើឱ្យទស្សនិកជនសប្បាយចិត្តភ្លេចទុក្ខកង្វល់។ នេះក៏ជាផ្នែកមួយដែលធ្វើឱ្យពួកគេបន្តទៅមុខទៀត ហើយដល់ពេលដែល Cartel ចាកចេញពីអ្នកទាំងអស់គ្នា ខណៈអលជ្ជី បានលើកដៃ bye bye លាអ្នកគាំទ្រ។

ក្រុមចម្រៀង Lacima Cartel បានធ្វើឱ្យទស្សនិកជនជាអ្នកគាំទ្រជ្រួលច្របល់និងមានសំណួរជាច្រើនថា ពួកគេបំបែកក្រុមឬយ៉ាងណា ដោយសារតែពួកគេមិនបានប្រាប់ចំៗនោះទេដោយគ្រាន់តែលាអ្នកគាំទ្រប៉ុណ្ណោះ។ អ្នកមួយចំនួនថែមទាំងគិតថាក្រុមចម្រៀងនេះអាចថា Prank អ្នកគាំទ្រដោយមានការប្រកាសអ្វីថ្មីប៉ុណ្ណោះ ស្របពេលដែលសមាជិកនីមួយៗបង្ហោះរូបភាពពណ៌សដូចគ្នា។

គួរបញ្ជាក់ថា បទចម្រៀងរបស់ក្រុម La Cima Cartel ដែលទទួលបានការគាំទ្រខ្លាំងពីទស្សនិកជនរួមមាន បទ «កម្រ», «អូនសីតា», «ស្រាមួយកែវ» និងបទ «10» ជាដើម៕

ប្រិយមិត្តមួយចំនួនប្រាកដជាជ្រាបមកហើយថា ដេវិដ អ៊ឹងហាវ ត្រូវបានតារាចម្រៀងប្រុសម្នាក់មើលងាយជីវិតភាពជិះឡានថោកជាងខ្លួនដែលបង្កឱ្យមានការជែកវែកញែកយ៉ាងក្តៅគគុក។ ក្រៅពីទម្លាយរឿងនេះភាគីម្ខាងទៀតបានរក្សាភាពស្ងៀមស្ងាត់ខណៈ ដេវិដ អ៊ឹងហាវ បាននិយាយថាមនុស្សម្នាក់នោះអាក្រក់ទាំងខាងក្នុងអាក្រក់ទាំងខាងក្រៅ។

នៅយប់ថ្ងៃទី១៨ ខែមករា តារាប្រុសដ៏ស្រស់សង្ហាសម្បូរមុនស្នេហ៍ ដេវិដ អ៊ឹងហាវ បានបង្ហោះសំណេរថា «នៅមានរឿងពិសពុលជាច្រើនទៀត ខ្ញុំអត់ដែលមានបញ្ហាឬក៏ទៅប៉ះពាល់ជាមួយអ្នកណាមុនទេ តែនេះវាហួសហេតុពេក មនុស្សនេះមិនមែនត្រឹមតែជាមនុស្សមិនល្អធម្មតាទេគឺអាក្រក់ទាំងក្នុងទាំងក្រៅតែម្តង។ នៅស្ងាត់អ៊ីចឹងទៅ តែបើចេញមកបកស្រាយចេញមក ខ្ញុំចាំស្ដាប់តែបើចេញមកបកស្រាយហើយមិនទទួលអ្វីដែលខ្លួនបានធ្វើឬបាននិយាយទេ ប្រយ័ត្នខ្ញុំហៅសាក្សីរបស់ខ្ញុំចេញមកទាំងអស់»។

តារាម៉ូដែលរូបនេះ បានបង្ហោះសំណេរបន្តទៀតដោយមានខ្លឹមសារបណ្តាញសង្គមរបស់លោកថ្មីៗនេះពោរពេញដោយអវិជ្ជមានប៉ុន្តែដោយសារតែមានរឿងច្រើនពេកពីមួយរឿងទៅមួយរឿង។ ដេវិដ អ៊ឹងហាវ បញ្ជាក់ទៀតថា ការដែលលោកនិយាយរឿងទាំងអស់នេះព្រោះលោកមិនចង់ឱ្យអ្នកណាម្នាក់ដើរតាមគន្លងរបស់មនុស្សម្នាក់នោះ គ្មានប្រយោជន៍អ្វីដល់សង្គមឡើយ។

អ្វីដែលកាន់តែចាប់អារម្មណ៍បន្ថែមទៀត ដេវិដ អ៊ឹងហាវ បានលាតត្រដាងទៀតថាមានមនុស្សស្រីម្នាក់ទទួលបានពាក្យថា « ខ្ញុំមានជាងអ្ហែង អ្ហែងក្រទេ កុំធ្វើចរិតខ្លាំងពេក» ចេញពីមាត់របស់តារាចម្រៀងប្រុសម្នាក់នោះ។ ដេវិដ អ៊ឹងហាវ ក៏បានលាតត្រដាងទៀតថា ព្រឹត្តិការណ៍ និងការងារទាំងអស់ដែលលោកចូលរួមនៅក្រៅប្រទេសត្រូវបានបុគ្គលជាតារាចម្រៀងនោះនិយាយថាដោយសារតែលោក «សុំ» ប្រ៊េនទាំងនោះឱ្យលោកទៅ។ តួឯកប្រុសក្នុងរឿង «កំហឹងធ្មប់» បន្តថាពេលលោកទំនេរលោកនឹងព្យាយាមថតរូបការអញ្ជើញទាំងអស់ដែលមានឈ្មោះលោកហើយ Tag ទៅកាន់អ្នកនិយាយថាលោកសុំគេទៅ៕

តារាចម្រៀង អាយរីស បានបង្ហាញខ្លួនលើកដំបូងក្នុងកម្មវីធីប្រគំតន្រ្តីសប្បុរសធម៌បន្ទាប់ពីក្លាយជាអ្នកចម្រៀងពេញសិទ្ធិក្នុងផលិតកម្ម GenMusix ។ ការបង្ហាញខ្លួននេះក៏សម្គាល់ពីការវិលត្រឡប់មកវិញរបស់នាងបន្ទាប់ពីមានភាពចម្រូងចម្រាសទាក់ទងនឹងបទចម្រៀងស្រដៀងគ្នានឹងបទវៀតណាម។

កាលពីថ្ងៃទី១៧ ខែកម្មវិធី សិល្បករ សិល្បការិនីជាច្រើនរួមទាំងកញ្ញា អាយរីស បានបង្ហាញវត្តមានក្នុងកម្មវិធី Cambodia Charity Concert តន្រ្ដី១ពាន់លានរៀល ដើម្បីប្រមូលថវិកាក្នុងការជួយទៅដល់ការអភិវឌ្ឍការសិក្សារបស់កុមារកម្ពុជាក៏ដូចជាការជួយជុសជុល ការកសាងសាលារៀនដែលរងការខូចខាតនៅតាមតំបន់ព្រំដែន។ នៅថ្ងៃទី១៩ ខែមករា អាយរីស បានបង្ហោះនៅលើបណ្តាញសង្គមទិកតុកថា «នេះជាឆាកលើកដំបូងដែលនាងខ្ញុំ Iris-អាយរីសឡើង perform នៅកម្មវីធី តន្រ្ដី ១ពាន់លានរៀល អរគុណសម្រាប់ការគ្រាំទ្រពីអ្នកកំពង់ត្រាចផងណា»។

គួរកត់សម្គាល់ថាការបង្ហាញខ្លួនរបស់ អាយរីស លើឆាកតន្រ្តីមិនត្រឹមតែលើកដំបូងតែនេះក៏ជាការវិលត្រឡប់មកវិញរបស់នាងបន្ទាប់ពីស្ងប់ស្ងាត់មួយរយៈនៅលើបណ្តាញសង្គមក្នុងរយៈពេលជិត១ខែ។ ការស្ងប់ស្ងាត់នេះគឺដោយសារតែ អាយរីស រងភាពចម្រូងចម្រាសទាក់ទងនឹងការចេញបទចម្រៀងរបស់នាងមួយបទដែលមនុស្សជាច្រើនរិះគន់ថាមានភាពស្រដៀងគ្នាដូចទៅនឹងបទវៀតណាម។ បន្ទាប់មកនាងបានសម្រេចចិត្តលុបបាត់នោះចេញពីគ្រប់បណ្តាញសង្គមផ្ទាល់ខ្លួនប៉ុន្តែ អាយរីស ពុំមានការបកស្រាយអ្វីឡើយ។

អាយរីស បានធ្វើឱ្យទស្សនិកជនចាប់អារម្មណ៍ខ្លាំងដោយសារតែមានរូបសម្រស់ស្រស់ស្អាតនិងមានទឹកដមសំឡេងពីរោះរណ្តំ។ តារាចម្រៀងរូបនេះបានសហការជាមួយនឹងរៀមច្បង អ្នកនាង ម៉េង កែវពេជ្ជតា តាមរយៈបទចម្រៀងដ៏មានអត្ថន័យរវាងម្តាយហើយនិងកូន ខណៈបទចម្រៀងនោះទទួលបានការគាំទ្រយ៉ាងខ្លាំងពីទស្សនិកជន៕