បរទេស៖ ស្ត្រីជនជាតិនេប៉ាល់អាយុ ៣០ ឆ្នាំម្នាក់ឈ្មោះ Phunjo Lama បានបំបែកកំណត់ត្រាពិភពលោកសម្រាប់ការឡើងដល់កំពូលភ្នំ Everest កម្ពស់ជាង ៨,៨០០ ម៉ែត្រ ក្នុងរយៈពេលត្រឹមតែ ១៤ ម៉ោង ៣១ នាទីប៉ុណ្ណោះ នេះបើយោងតាមការចុះផ្សាយរបស់ CBS News កាលពីពេលថ្មីៗនេះ។

ភ្នំ Everest ត្រូវបានគេស្គាល់ថាជាភ្នំខ្ពស់ជាងគេបំផុតលើលោក ដោយអ្នកឡើងភ្នំតែងតែចំណាយពេលជាច្រើនថ្ងៃដើម្បីយកឈ្នះលើគោលដៅនេះ ខណៈមានអ្នកខ្លះត្រូវឈប់មួយយប់នៅជំរុំផ្សេងៗដើម្បីសម្រាក និងសម្របខ្លួន។ ប៉ុន្តែសម្រាប់ Lama ដែលជាស្ត្រីតែម្នាក់គត់បានជំនះឡើងភ្នំដោយមិនឈប់សម្រាកទាល់តែសោះ ដោយនាងបានចំណាយពេលត្រឹមតែ ១៤ ម៉ោង ៣១ នាទីដើម្បីឡើងភ្នំ Everest កាលពីថ្ងៃទី២៣ ខែឧសភា ពោលគឺលើសពីកំណត់ត្រាដែលនាងបានកំណត់ក្នុងឆ្នាំ ២០១៨ គឺ ៣៩ ម៉ោង ៦ នាទីទៅទៀត ដែលនេះបានធ្វើឱ្យនាងក្លាយជាស្ត្រីដំបូងគេដែលបានបំបែកឯតទគ្គកម្មឡើងភ្នំ Everest លឿនបំផុតក្នុងពិភពលោក។

ប្រធានការិយាល័យវាលនៃក្រសួងទេសចរណ៍ក្នុងប្រទេសនេប៉ាល់ លោក Khim Lal Gautam បាននិយាយថា Lama បានទៅដល់កំពូលភ្នំ Everest នៅម៉ោង ៦:២៣ នាទីព្រឹកនៅថ្ងៃទី២៣ ខែឧសភា ឆ្នាំ២០២៤ ខណៈដែលនាងបានចេញដំណើរនៅម៉ោង ៣:៥២ រសៀលកាលថ្ងៃទី២២ ឧសភា។ អ្នកឡើងភ្នំម្នាក់បាននិយាយថាអំពីឡាម៉ាថា៖ «នាងពិតជាក្លាហាន និងពូកែតាំងចិត្ត ហ្វឹកហាត់យ៉ាងខ្លាំងដើម្បីឡើងដល់កំពូល»។ កំណត់ត្រារបស់ឡាម៉ាក៏ត្រូវបានចាត់ទុកថាជាការបំផុសគំនិតសម្រាប់អ្នកឡើងភ្នំស្រីនៅប្រទេសនេប៉ាល់ផងដែរ។

គួរបញ្ជាក់ដែរថា Lama បានឈ្នះកំណត់ត្រា Guinness សម្រាប់ “ស្ត្រីលឿនបំផុតលើពិភពលោកដើម្បីឡើងភ្នំ Everest” នៅក្នុងឆ្នាំ ២០១៨ ដែលកំណត់ត្រានេះក៏ត្រូវបានបំបែកនៅឆ្នាំ ២០២១ ដោយ Ada Tsang Yin hung មកពីទីក្រុងហុងកុង ប្រទេសចិន ដែល Ada បានចាកចេញពី Base Camp នៅម៉ោង ១:២០ ព្រឹក ថ្ងៃទី ២២ ខែឧសភា ឆ្នាំ ២០២១ ហើយបានយកឈ្នះភ្នំ Everest នៅថ្ងៃបន្ទាប់។ នៅឆ្នាំ ២០០៣ អ្នកឡើងភ្នំជនជាតិនេប៉ាល់ម្នាក់ឈ្មោះ Lhakpa Gelu Sherpa ក៏ធ្លាប់ទទួលបានកំណត់ត្រា Guinness ថាជាមនុស្សលឿនបំផុតដែលអាចយកឈ្នះលើភ្នំ Everest ផងដែរ។

មួយថ្ងៃមុនពេល Lama បង្កើតកំណត់ត្រាជាអ្នកឡើងភ្នំស្រីលឿនបំផុតដើម្បីយកឈ្នះលើភ្នំ Everest នៅលើពិភពលោក មគ្គុទ្ទេសក៍ភ្នំដ៏ល្បីល្បាញម្នាក់ទៀតគឺ Kami Rita ក៏បានបង្កើតឯតទគ្គកម្មឡើងភ្នំ Everest ច្រើនជាងគេបំផុតក្នុងពិភពលោកចំនួន ៣០ ដងផងដែរ៕

Ila de Quemada Grande គឺជាកោះមួយស្ថិតនៅប្រទេសប្រេស៊ីល និងនៅឆ្ងាយពីឆ្នេរសមុទ្រ Sao Paulo ប្រមាណ២៣គីឡូម៉ែត្រ ។ កោះនេះត្រូវបានគេដាក់ឈ្មោះថា កោះពស់ (Snake Island) មានន័យថា ជាកោះសម្បូរទៅដោយសត្វពស់មានពិសយ៉ាងច្រើនមហាសាល និងគ្រោះថ្នា.ក់ បំផុតនៅលើពិភពលោក ហើយបច្ចុប្បន្ន គ្មានមនុស្សណាម្នាក់ហ៊ានមកកាន់ទីនេះទេ ក្រៅពីអ្នកស្រាវជ្រាវ ។

អ្នកធ្វើដំណើរទៅកាន់កោះនេះនឹងបានឃើញការបិទស្លាកសរសេរថា «ហាមចូល» ប៉ុន្តែពុំមានភ្ញៀវទេសចរណាម្នាក់ចង់មកលេងនៅកោះនេះទេ ពីព្រោះវាជាកន្លែងសម្បូរទៅដោយពស់តូច-ធំ ហើយភាគច្រើនសុទ្ធតែមានពិសទាំងអស់ ។ កន្លងមក រដ្ឋាភិបាលប្រេស៊ីលបានអនុញ្ញាតឱ្យក្រុមអ្នកវិទ្យាសាស្ត្រមកសិក្សាស្រាវជ្រាវនៅលើកោះពស់ ។

នៅពេលដឹងថា កោះ Ila de Quemada Grande សម្បូរសុទ្ធតែពស់បែបនេះ គ្មានពលរដ្ឋប្រេស៊ីលណាម្នាក់ធ្វើដំណើរមកកាន់ទីនេះទេ ដោយពួកគេនិយាយថា បើទោះជាអាជ្ញាធរពុំបានបិទស្លាក «ហាមចូល» ក្តី ក៏ពួកគេពុំចូលដែរ ។ កោះនេះមានសត្វពស់រស់នៅច្រើនបំផុត និងស្មើជាង១.០០០ពូជដែលបានបង្កើតកូនចៅនៅទីនេះ ហើយក្នុងចំណោមពស់ទាំងនេះ មានពស់ជាច្រើនមានពិសខ្លាំង និងអាចផ្តាច់ជីវិតមនុស្សទៀតផង ។

បើតាមការបញ្ជាក់ពីអាជ្ញាធរប្រេស៊ីលឱ្យដឹងថា ពស់ពូជ Golden Bear Head គឺជាពូជកម្រមួយ ហើយពស់ប្រភេទនេះរស់នៅតែលើកោះ Ila de Quemada Grande មួយប៉ុណ្ណោះ គឺស្មើចាប់ពី២.០០០ក្បាល ទៅ៤.០០០ក្បាល ។ រីឯពិសរបស់វាវិញត្រូវបានគេស្គាល់ថា ជាពិសសាហាវបំផុតនៅលើពិភពលោក ។

កោះនេះសម្បូរពស់មានពិសេសយ៉ាងច្រើនមហាសាល ហើយគ្រាន់តែបរិវេណតូចមួយមានពស់រស់នៅរហូតដល់៥ក្បាល ។ ហេតុនេះ គ្រាន់តែឃើញឈ្មោះកោះធ្វើឱ្យពលរដ្ឋប្រេស៊ីល និងភ្ញៀវទេសចរបរទេសពុំហ៊ានធ្វើដំណើរមកកាន់ទីនេះទេ ។ មហាជនឆ្ងល់ថា តើពស់ទាំងនេះនាំគ្នាទៅប្រមូលផ្តុំនៅលើកោះដោយរបៀបណា? ហើយនៅលើកោះមានចំណីច្រើនសម្រាប់ឱ្យពួកវាស៊ីដែរឬទេ?

កាលពីមុន កោះ Ila de Quemada Grande ធ្លាប់មានផ្ទៃដីជាប់គ្នាជាមួយផ្ទៃដីធំ ប៉ុន្តែដោយសារកម្រិតទឹកកើនឡើងខ្ពស់ ទើបធ្វើឱ្យផ្ទៃដីកោះទាំងមូលត្រូវចែកដាច់ពីផ្ទៃដីធំ ។ រីឯអត្ថន័យរបស់ឈ្មោះកោះ Ila de Quemada Grande បានន័យថា ជាការរុះរើ និងការដុត ព្រោះគេបានព្យាយាមដុតសម្លាប់ពស់ទាំងអស់នៅលើកោះឱ្យផុតពូជ ប៉ុន្តែការព្យាយាមទទួលបរាជ័យ ។

ហេតុនេះ រដ្ឋាភិបាលប្រេស៊ីលបានសម្រេចចិត្តសាងសង់បង្គោលថ្មដ៏ធំមួយ ដើម្បីដាស់តឿនដល់នាវាតូច-ធំ កុំឱ្យបើកមកក្បែរកោះ ។ ប៉ុន្តែមានតែអ្នកជំនាញប៉ុណ្ណោះដែលទទួលការអនុញ្ញាតឱ្យធ្វើដំណើរមកកោះនេះ ដើម្បីស្រាវជ្រាវផ្នែកវិទ្យាសាស្ត្រ ៕

ប្រទេសកូរ៉េខាងត្បូង ៖ មនុស្សភាគច្រើនស្ត្រេសក្នុងការងារ ឬតានតឹងផ្លូវចិត្តខ្លាំងជាមួយបញ្ហាផ្សេងៗដែលចេះតែកើតឡើងក្នុងជីវិត រហូតដល់ពេលខ្លះ ពួកគេគ្មានវិធីដោះស្រាយទេ ។ ហេតុនេះ គុ.ក ក្លែងក្លាយត្រូវបានគេបង្កើតឡើងដើម្បីដោះស្រាយបញ្ហានេះ និងអាចជួយសម្រួលផ្លូវចិត្តផងដែរ បើទោះជាវិធីនេះប្លែកបន្តិច ប៉ុន្តែវាបានកើតឡើងរួចហើយនៅប្រទេសកូរ៉េខាងត្បូង ។

ប្រទេសកូរ៉េខាងត្បូងបានបង្កើតគុកក្លែងក្លាយមួយឈ្មោះថា «គុកសេរីភាព» ដែលអ្នកជាប់គុកនៅទីនេះនឹងទទួលបានការផ្តល់សេវាកម្មប្លែកៗ ហើយធានាថា ពេលចេញពីគុកវិញ ពួកគេនឹងអាចកាត់បន្ថយការតានតឹងផ្លូវចិត្តអស់ជាមិនខាន ថែមទាំងទទួលបានវិញ្ញាបនបត្រទៀតផង ។

គុកសេរីភាពនេះស្ថិតនៅទីក្រុង Hongcheon ដែលបង្កើតឡើងដើម្បីជួយសង្គ្រោះមនុស្សម្នាទាំងឡាយដែលកំពុងតែអស់សង្ឃឹមក្នុងជីវិត, ចុះចាញ់, ធុញទ្រាន់ និងអស់ថាមពលធ្វើការ ដើម្បីធ្វើឱ្យពួកគេមានអារម្មណ៍ស្ងប់ និងដោះស្រាយបញ្ហាក្នុងជីវិតឡើងវិញ ។

នៅផ្នែកខាងក្នុងគុកសេរីភាពនេះ គឺមានបន្ទប់ឃុំឃាំងសរុបចំនួន២៨បន្ទប់ ហើយបន្ទប់នីមួយៗមានទំហំតូចល្មម និងមានបន្ទប់ទឹកក្នុងនោះផងដែរ ។ ប៉ុន្តែបន្ទប់ឃុំឃាំងទាំងនេះគ្មានកញ្ចក់ និងគ្មាននាឡិកាទេ ។

ក្នុងបន្ទប់ឃុំឃាំងរបស់គុកសេរីភាព គឺមានលក្ខណៈដូចគ្នានឹងគុកពិតប្រាកដដែរ ដូចជា ៖ មានត្រឹមតែតុតូចមួយ, សៀវភៅសរសេរ, កាំសៀវឆុងទឹកតែ និងកម្រាលសម្រាប់សម្រាក ។ រីឯម្ហូបអាហារនៅក្នុងគុកនេះវិញ គឺសមរម្យ និងសាមញ្ញ ដូចជា ៖ ដំឡូងចំហុយ និងនំផ្លែចេក ។

បើទោះវាជាគុកក្លែងក្លាយក្តី ប៉ុន្តែអ្នកទោសនៅទីនេះត្រូវតែគោរពច្បាប់យ៉ាងតឹងរ៉ឹង គឺគ្រប់គ្នាត្រូវស្លៀកពាក់ឯកសណ្ឋានអ្នកទោសជានិច្ច ។ លើសពីនេះ ពួកគេគ្មានសិទ្ធិលេងទូរស័ព្ទដៃ និងហាមជជែកជាមួយអ្នកទោសផ្សេងទៀតដាច់ខាត ។ នេះអាចនិយាយបានថា បើបានជាប់គុកនៅទីនេះ អ្នកនឹងបានចំណាយពេលវេលាជាមួយខ្លួនឯងយ៉ាងពេញលេញបំផុត ។

នៅពេលដល់ថ្ងៃដោះលែងឱ្យចេញពីគុក អ្នកទោសគ្រប់រូបនឹងទទួលបានវិញ្ញាបនបត្រទុកដាស់តឿនសតិថា ពេលមួយ ពួកគេធ្លាប់បាននៅដាច់ដោយឡែកពីសង្គម ដែលសម្បូរទៅដោយភាពរញ៉េរញ៉ៃ ។ ពលរដ្ឋកូរ៉េខាងត្បូងដែលបានសាកល្បងជាប់គុកនៅទីនេះប្រាប់ថា ពួកគេទទួលបាននូវបទពិសោធន៍ថ្មីមួយ ហើយការធ្វើជាអ្នកទោសអាចល្អប្រសើរជាងការអង្គុយធ្វើការពេញមួយថ្ងៃ បើទោះជាមន្ត្រីគុកបានប្រមូលទូរស័ព្ទដៃពីពួកគេក្តី ៕

បច្ចុប្បន្ននេះ ដោយសង្កេតឃើញកំណើនជនរង.គ្រោះដោយសារតែការវិនិយោគទទួលបានប្រាក់ចំណេញនៅក្នុងប្រទេសកម្ពុជាបាននឹងកំពុងកើនឡើងជាលំដាប់ មិនថាជាការវិនិយោគដោយផ្ទាល់និងតាមប្រព័ន្ធអនឡាញនោះទេ។ ស្របពេលសេដ្ឋកិច្ចពិភពលោកនូវតែបន្តធ្លាក់ដុន.ដាប វាក៏បានក្លាយទៅជាទុក្ខ.លំបាកទ្វេដងទៅកាន់ប្រជាពលរដ្ឋដែលជាជនរង.គ្រោះ។ ដោយជ្រោលជ្រាបអំពីបញ្ហានេះ ទេសាភិបាលធនាគារជាតិនៃកម្ពុជា ក៏បានធ្វើការលើកឡើងពីគន្លឹះនៃការឆបោក និងជាការក្រើនរំលឹកទៅកាន់សាធារណៈជនទូទៅ។

គំរូនៃការឆបោកមួយតាមប្រព័ន្ធអនឡាញមានសណ្ឋានដូចតទៅ៖ «នេះជាប្រព័ន្ធដែលវាដំណើរការ៖ កិច្ចសន្យាដែលត្រូវបានប្រតិបត្តិគឺ * 3 HOURS * ដែលដើមទុននិងប្រាក់ចំណេញត្រូវបានត្រឡប់មកវិញជាមួយគ្នា… ឧទាហរណ៍ចូលរួម USD 250 ថ្ងៃនេះសូមរងចាំ 3 ម៉ោងដើម្បីរំលាយ / បញ្ចប់កិច្ចសន្យា។ ប៉ាន់ស្មានប្រសិនបើអ្នក ចូលរួម USD 250 អ្នកនឹងទទួលបាន USD 3,000 = សរុបនេះរួមបញ្ចូលដើមទុននិងប្រាក់ចំណេញ»។

ចំណែកគំរូនៃការឆបោកមួយទៀតតាមប្រព័ន្ធអនឡាញគឺ៖
-«ឧទាហរណ៍នៃការវិនិយោគ: ប្រសិនបើអ្នកវិនិយោគ ១០០០ដុល្លារ ថ្ងៃនេះ ក្នុងរយៈពេល ៣ ម៉ោង ប្រាក់នឹងចូលក្នុងគណនីរបស់អ្នកមានតម្លៃ ៧៥០០ដុល្លារ
-ឧទាហរណ៍នៃការចែករំលែកប្រាក់ចំណេញ: ដើមទុន ១០០០ដុល្លារ លទ្ធផលគឺ ៧៥០០ដុល្លារ ប្រាក់ចំណូល ៧៥០០ដុល្លារ ចែកនឹង ៣០% និង ៧០% (មានន័យថាក្រុមហ៊ុន ៣០% = ២២៥០ ដុល្លារ, វិនិយោគិន ៧០% = ៥២៥០ ដុល្លារ, ធានាចំណេញ ៩៩% និងខាត ១% ប៉ុណ្ណោះ)
ឆាប់ឡើង!!! វិនិយោគរួមគ្នា មើលអត្ថប្រយោជន៍សម្រាប់ខ្លួនអ្នក ចាប់អារម្មណ៍ចូលរួម ជជែកជាមួយអ្នកគ្រប់គ្រង»។

ជាមួយគ្នានេះ បើយោងតាមការបង្ហោះនៅលើគណនីផ្លូវការរបស់លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា កាលពីថ្ងៃទី២៣ ខែឧសភា ឆ្នាំ២០២៤ នេះបានឲ្យភ្ជាប់មកជាមួយនឹងរូបភាពប៉ុន្មានសន្លឹក អមជាមួយនឹងសារដាស់តឿនទៅកាន់ប្រជាពលរដ្ឋខ្មែរ ដែលមានខ្លឹមសារថា៖ «វិនិយោគ១០០០ដុល្លារ បានមកវិញ ៧៥០០ដុល្លារ ។ ធានាចំណេញ ៩៩% ។ នេះជាការផ្សព្វផ្សាយបោកប្រាស់ តាម គ្រុប តេលេក្រាម telegram ។ សូមបងប្អូនប្រុងប្រយ័ត្ន មុននឹងជឿគេ។ បើងាយៗយ៉ាងនេះ លែងមានអ្នកធ្វើការ រកស៊ីអីទៀតហើយ។ ពួកគេប្រមូលរូប បង់លុយតាមប្រព័ន្ធធនាគារ ដើម្បីជានុយឲ្យឃើញថាមានគេវិនិយោគជាមួយពួកគេ។ តែបើពិនិត្យឲ្យច្បាស់អ្នកទទួលប្រាក់នីមួយៗមានឈ្មោះខុសៗគ្នាទាំងអស់។ បានន័យថាលុយមិនចូលក្រុមហ៊ុនបោកប្រាស់នោះទេ គឺគ្រាន់តែលួចរូបគេមកប្រើ ដោយពេលខ្លះម្ចាស់ខ្លួនមិនទាំងដឹងខ្លួនផង»៕

ប្រទេសចិន ៖ កាលពីឆ្នាំ២០២២ រដ្ឋាភិបាលចិនបានប្រកាសឱ្យបង្កើតសាកលវិទ្យាល័យជាតិសម្រាប់ពលរដ្ឋអាយុច្រើន ហើយការប្រកាសនេះធ្វើឱ្យអ្នកជំនាញជឿថា រដ្ឋាភិបាលមានគោលបំណងដោះស្រាយបញ្ហាកំណើនពលរដ្ឋវ័យចំណាស់ និងផ្តល់ការបណ្តុះបណ្តាលចំណេះដឹងអស់មួយជីវិតដល់ពួកគេ ។ ការមករៀននៅសាកលវិទ្យាល័យធ្វើឱ្យពលរដ្ឋចាស់ៗមានឱកាសបានរៀនសូត្រនូវជំនាញផ្សេងៗដែលពួកគេធ្លាប់បាត់បង់ឱកាស និងមានកម្លាំងចិត្តតស៊ូក្នុងជីវិតបន្តទៀត ។

សាកលវិទ្យាល័យមនុស្សចាស់នឹងរួមបញ្ចូលជាមួយសាកលវិទ្យាល័យទូទៅនៅប្រទេសចិន ហើយមិនត្រឹមតែជាស្ថាប័នអប់រំប៉ុណ្ណោះទេ ប៉ុន្តែជាប្រព័ន្ធការសិក្សាផ្តល់ចំណេះដឹងគ្រប់ផ្នែកទាំងនៅទីក្រុង និងជនបទផងដែរ ។ សាកលវិទ្យាល័យមនុស្សចាស់នឹងទទួលនិស្សិតចាប់ពីអាយុ៦០ឆ្នាំឡើងទៅ ដោយបង្រៀនមុខវិជ្ជាផ្សេងៗ ដូចជា ៖ ជំនាញកុំព្យូទ័រ, តន្ត្រី, ការរាំ, ការថតរូប, ការគូរគំនូរ, កីឡា, ការចម្អិនអាហារ រហូតដល់ការងារសិប្បកម្ម និងជំនាញផ្សេងៗ ។

លោកតាស៊ុន និយាយថា ៖ «អាយុកើនឡើងមិនគួរឱ្យខ្លាចទេ ប៉ុន្តែអ្វីដែលគួរឱ្យខ្លាចនោះ គឺការយល់ព្រមចុះចាញ់ក្នុងជីវិត, ឈប់ដើរទៅមុខ និងបាត់បង់ក្តីសង្ឃឹម» ។ លោកតាបានលើកទឹកចិត្តឱ្យពលរដ្ឋវ័យចំណាស់ផ្សេងទៀតមកចុះឈ្មោះចូលរៀននៅសាកលវិទ្យាល័យ ដើម្បីចូលរួមសកម្មភាពក្នុងសង្គមឱ្យបានច្រើន ។

លោកយាយ ស៊ីន ជៀនឡុង អាយុ៦៥ឆ្នាំ បានសិក្សានៅសាកលវិទ្យាល័យមនុស្សចាស់នៅទីក្រុងអាន់ស៊ីវ ដែលសាកលវិទ្យាល័យនេះបើកតាំងពីឆ្នាំ២០០៤ និយាយថា ៖ «ជីវិតក្រោយពេលចូលនិវត្តន៍របស់ខ្ញុំស្រស់ថ្លាណាស់ ដោយសារខ្ញុំបានមកចូលរៀននៅសាកលវិទ្យាល័យមនុស្សចាស់នេះ» ។

លោកយាយមិនព្រមនៅផ្ទះមើលចៅទេ ហើយលោកយាយបានមករៀនរាំ និងច្រៀងចម្រៀងនៅសាកលវិទ្យាល័យមនុស្សចាស់ ដោយលោកយាយប្រាប់ក្រុមគ្រួសារថា គាត់ចង់ស្វែងរកអ្វីដែលចូលចិត្ត ។ បើទោះជាចូលចិត្តការងារសិល្បៈតាំងពីក្មេងក្តី ប៉ុន្តែលោកយាយគ្មានឱកាសបានរៀនផ្នែកនេះទេ ហើយពេលសាកលវិទ្យាល័យមនុស្សចាស់ដំណើរការ ក៏ក្លាយជាឱកាសរបស់គាត់បានរៀនផ្នែកសិល្បៈដែលខ្លួនស្រមៃយូរមកហើយ ។ បច្ចុប្បន្ន លោកយាយជានិស្សិតគោរពវិន័យមកដល់ថ្នាក់មុនគេ និងត្រឡប់ទៅផ្ទះចុងក្រោយគេជានិច្ច ។

បើតាមទិន្នន័យរបស់ការិយាល័យស្ថិតិជាតិបញ្ជាក់ថា នៅឆ្នាំ២០២១ ប្រទេសចិនមានពលរដ្ឋអាយុចាប់ពី៦០ឆ្នាំឡើងទៅ ស្មើជាង២៦៧លាននាក់ ឬស្មើនឹង១៨,៩% នៃពលរដ្ឋសរុប ។ គណៈកម្មការសុខភាពចិនរំពឹងថា ប្រទេសចិននឹងឈានចូលសង្គមមនុស្សចាស់នៅឆ្នាំ២០២៤ និងក្លាយជាសង្គមមនុស្សចាស់ទាំងស្រុងនៅឆ្នាំ២០៣៥ ។

អ្នកជំនាញជឿជាក់ថា ការបង្កើតសាកលវិទ្យាល័យមនុស្សចាស់ គឺជាការដោះស្រាយបញ្ហាកំណើនពលរដ្ឋអាយុច្រើននៅប្រទេសចិន ដោយមនុស្សចាស់នឹងអាចរៀនសូត្រមុខវិជ្ជាផ្សេងៗដោយរីករាយ ព្រមទាំងអភិវឌ្ឍន៍ជំនាញ ឬអាជីពផងដែរ ។

ទោះយ៉ាងណា នេះមិនមែនជាលើកទី១ទេ ដែលចិនបានព្យាយាមបង្កើតសាកលវិទ្យាល័យមនុស្សចាស់ ព្រោះកន្លងមក សាកលវិទ្យាល័យនៅតាមទីក្រុងផ្សេងៗរបស់ចិន ក៏បានបង្រៀនមុខវិជ្ជាសម្រាប់មនុស្សចាស់ផងដែរ ។ ប្រទេសចិនមានសាកលវិទ្យាល័យមនុស្សចាស់ ស្មើជាង៧៦.០០០កន្លែងនៅទូទាំងប្រទេស និងមាននិស្សិតចុះឈ្មោះចូលរៀនស្មើជាង១៤លាននាក់ ៕