សហរដ្ឋអាមេរិក ៖ កាលពីថ្ងៃទី១៨ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា សាលារៀននៅទីក្រុង Los Angeles សហរដ្ឋអាមេរិក គ្រោងហាមឃាត់កូនសិស្សប្រើប្រាស់ទូរស័ព្ទស្មាតហ្វូនក្នុងសាលា ដើម្បីការពារកុំឱ្យកូនសិស្សញៀ.ន នឹងបណ្តាញសង្គមខ្លាំងពេក ។ ការប្រើប្រាស់បណ្តាញសង្គមច្រើននឹងធ្វើឱ្យពួកគេពុំអាចផ្តោតអារម្មណ៍លើការរៀនសូត្រ និងកើតជំងឺផ្លូវចិត្ត ។

សាលារៀននៅទីក្រុង Los Angeles សហរដ្ឋអាមេរិក មានគម្រោងហាមឃាត់កូនសិស្សយកទូរស័ព្ទស្មាតហ្វូនមកប្រើប្រាស់ក្នុងសាលា ហើយតម្រូវឱ្យកូនសិស្សទុកទូរស័ព្ទរបស់ខ្លួនក្នុងថតតុ ឬថតទូរគ្រប់ពេលវេលា ក្នុងអំឡុងពេលពួកគេចូលបន្ទប់រៀន ។ ការហាមឃាត់បែបនេះ គឺដើម្បីឱ្យកូនសិស្សបានផ្តោតអារម្មណ៍លើការរៀនសូត្រកាន់តែខ្លាំង ក៏ដូចជាការពារការកើតជំងឺផ្លូវចិត្ត ដោយសារការប្រើស្មាតហ្វូនច្រើន ។

ហេតុនេះ វានឹងធ្វើឱ្យកូនសិស្សមានអារម្មណ៍ក្នុងការរៀនសូត្រ និងចង់ចូលបន្ទប់រៀនផងដែរ ។ គេចាត់ទុកថា នេះជាការយកចិត្តទុកដាក់លើសុខភាពកូនសិស្សក្នុងសាលា ដូចគ្នានឹងការហាមឃាត់ការជក់បារីក្នុងសាលាផងដែរ ដែលនាយកសាលាត្រូវតែហាមឃាត់ជាដាច់ខាត ។

នៅទីក្រុង Los Angeles មានកូនសិស្សសរុបប្រមាណ៤២ម៉ឺន៩ពាន់នាក់ ហើយសាលានីមួយៗបានបញ្ជូនមន្ត្រីតំណាងទៅចូលរួមបោះឆ្នោតពាក់ព័ន្ធនឹងបម្រាមនេះ ក្នុងរយៈពេល១២០ថ្ងៃ ។ ប្រសិនបើមន្ត្រីតំណាងសាលានីមួយៗបោះឆ្នោតសម្រេចថា នឹងហាមឃាត់កូនសិស្សប្រើទូរស័ព្ទស្មាតហ្វូននោះ គឺសាលារៀននឹងចាប់ផ្តើមអនុវត្ត ចាប់ពីខែមករា ឆ្នាំ២០២៥ តទៅ ។

Nick Melvoy គឺជាគណៈកម្មការម្នាក់ក្នុងចំណោមគណៈកម្មការដែលបានស្នើគម្រោងហាមកូនសិស្សប្រើទូរស័ព្ទក្នុងសាលា និយាយថា ការប្រើប្រាស់ទូរស័ព្ទក្នុងសាលាគឺជាបញ្ហាមួយដែលគ្រូបង្រៀន និងអាណាព្យាបាលបារម្ភខ្លាំងបំផុត ពីព្រោះស្មាតហ្វូនធ្វើឱ្យសិស្សបាត់បង់ការផ្តោតអារម្មណ៍រៀនសូត្រ ខណៈកូនសិស្សមួយចំនួនមានទម្លាប់ផ្ញើសារ ឬមើលទូរស័ព្ទគ្រប់ពេលវេលា ។

ជារៀងរាល់ឆ្នាំ ការប្រើទូរស័ព្ទក្នុងសាលារបស់កូនសិស្ស បានធ្វើឱ្យគ្រូ និងអាណាព្យាបាលកាន់តែបារម្ភខ្លាំងឡើង ។ បើតាមលទ្ធផលការស្រាវជ្រាវផ្នែកវេជ្ជសាស្ត្របង្ហាញថា អ្នកដែលចំណាយពេលមើលបណ្តាញសង្គមស្មើជាង៣ម៉ោងក្នុង១ថ្ងៃ គឺប្រឈមនឹងការកើតជំងឺផ្លូវចិត្ត ហើយក្រុមយុវវ័យអាមេរិកបានចំណាយពេលជាមួយបណ្តាញសង្គម រហូតដល់ជាង៤ម៉ោងក្នុង១ថ្ងៃ ៕

ក្នុងនាមជាប្រទេសមួយនៅអាស៊ីអាគ្នេយ៍ ម៉ាឡេស៊ីមានទីតាំងយុទ្ធសាស្ត្រ និងអាកាសធាតុខ្យល់មូសុងត្រូពិចពេញមួយឆ្នាំ។ ប្រទេសនេះមានភាពល្បីល្បាញខ្លាំងដោយសារអត្តសញ្ញាណវប្បធម៌ចម្រុះរបស់ខ្លួន រួមទាំងអរិយធម៌ចំណាស់ជាងគេចំនួនបីនៅអាស៊ីដូចជា ម៉ាឡេ ចិន និងឥណ្ឌា។ ម៉ាឡេស៊ីមានរមណីយដ្ឋានទេសចរណ៍ជាច្រើន ដែលលាតសន្ធឹងរដ្ឋចំនួន ១៣ និងដែនដីសហព័ន្ធចំនួន ៣ ដែលលេចធ្លោបំផុតក្នុងប្រទេស។ ដូច្នេះប្រសិនបើអ្នកមានបំណងចង់ទៅកម្សាន្តនៅប្រទេសម៉ាឡេស៊ី មិនគួររំលងតំបន់ទេសចណ៍នេះឡើយ៖

១.ទីក្រុងគូឡាឡាំពួ៖ រដ្ឋធានីដ៏មមាញឹករបស់ម៉ាឡេស៊ីគឺជាគោលដៅដ៏ទាក់ទាញបំផុត ដោយសារទីក្រុងនេះមានភាពរីកចម្រើនខ្លាំង ក៏ដូចជាមានលក្ខណៈពិសេសនៃការរួមបញ្ចូលគ្នារវាងបុរាណ និងសម័យទំនើប។ ដូច្នេះភ្ញៀវទេសចរអាចមកទីក្រុងនេះដើម្បីទទួលយកបទពិសោធន៍ថ្មីៗ ដោយអាចចូលទៅទស្សនាសារមន្ទីរ Selfie ដែលជាសារមន្ទីរដំបូងគេក្នុងប្រទេសម៉ាឡេស៊ីដែលឧទ្ទិសដល់ ‘សិល្បៈ Selfie’ ជាមួយនឹងការរចនាដែលផ្តល់ឱ្យអ្នកទស្សនានូវបទពិសោធន៍ជាច្រើន ពីការមើលឃើញ ការប៉ះរហូតដល់រសជាតិ។ នៅក្នុងទីក្រុងនោះអ្នកក៏អាចទៅទស្សនា អគារភ្លោះ Petronas ដែលជាប៉មដ៏ល្បីល្បាញមួយរបស់ពិភពលោក និងជានិមិត្តសញ្ញាដ៏ល្បីល្បាញបំផុតរបស់ប្រទេស ក៏ដូចជាសួនសត្វជាតិ កញ្ចក់មេឃ និងផ្សារប៉ាសារី។

២.កោះ Penang៖ Penang គឺជាកោះដ៏ល្បីល្បាញបំផុតមួយរបស់ប្រទេសម៉ាឡេស៊ី ដែលត្រូវបានគេស្គាល់ថាជាគុជនៃបូព៌ា។ កោះនេះមានស្ពានវែងជាងគេទីពីរនៅអាស៊ីអាគ្នេយ៍ និងមានអាគារស្ថាបត្យកម្មអាណានិគមលេចធ្លោក្នុងចំណោមអគារទំនើបៗក្នុងទីក្រុង George Town ដែលជាតំបន់បេតិកភណ្ឌពិភពលោករបស់អង្គការយូណេស្កូ ក៏ដូចជាមានរុក្ខជាតិ និងសត្វសម្បូរបែបនៅក្នុងឧទ្យានជាតិ Penang ។ នៅទីនេះគឺមានប្រាសាទកែកឡុកស៊ី ដែលជាប្រាសាទពុទ្ធសាសនាអាស៊ីអាគ្នេយ៍ដ៏ល្បីល្បាញស្ថិតនៅលើភ្នំខ្ពស់ មានចេតិយប្រាំបីជាន់ រចនាតាមបែបចិន រួមបញ្ចូលគ្នារវាងប្រទេសថៃ និងភូមា ជាមួយនឹងស្ថាបត្យកម្មដ៏អស្ចារ្យ។ លើសពីនេះក៏មានរមណីយដ្ឋានល្បីៗដូចជា សួនមេអំបៅ Entopia, ឆ្នេរ Batu Ferringhi, និងអាហារតាមផ្លូវ Gurney Drive។

៣.ទីក្រុង Melaka៖ ម៉ាឡាកាគឺជាទីតាំងពាណិជ្ជកម្មដ៏សំខាន់មួយនៅក្នុងប្រវត្តិសាស្រ្តដើមរបស់ប្រទេសម៉ាឡេស៊ី ហើយបានទាក់ទាញពាណិជ្ជករមកពីជុំវិញពិភពលោក។ បច្ចុប្បន្នកន្លែងនេះត្រូវបានអង្គការយូណេស្កូទទួលស្គាល់ថាជាទីក្រុងបេតិកភណ្ឌពិភពលោក។ រាជធានីនេះមានស្ថាបត្យកម្មបុរាណនៃអគារ ភាពចម្រុះនៃទំនៀមទម្លាប់ និងវប្បធម៌របស់ប្រជាជននៅក្នុងតំបន់។ ក្រៅពីទីក្រុង ក៏កន្លែងកម្សាន្តដ៏គួរឱ្យទាក់ទាញផ្សេងទៀតដូចជា សួនកម្សាន្ត ចម្ការផ្លែឈើ សួនធម្មជាតិ សួនសត្វ រមណីយដ្ឋាន និងផ្ទះសំណាក់ប្រណិតៗជាដើម។ ដូច្នេះប្រសិនបើអ្នកមកដល់ទីក្រុងនេះកុំភ្លេចទៅទស្សនា បន្ទាយ Fort A’Famosa, សារមន្ទីរព្រះបរមរាជវាំង Malaka, សាលាក្រុងសំណង់បុរាណ, និងផ្លូវដើរ Jonker ដ៏ល្បីល្បាញប្រចាំប្រទេស៕

ភ្នំដ៏ពិសិដ្ឋរបស់ទីបេ Kailash ឬ Kangringboqe គឺជាគោលដៅធម្មយាត្រាក្នុងក្តីស្រមៃសម្រាប់ពុទ្ធសាសនិក និងហិណ្ឌូរាប់ពាន់លាននាក់ ប៉ុន្តែគ្មាននរណាម្នាក់អាចឡើងទៅដល់កំពូលភ្នំនេះបានឡើយ។
ភ្នំ Kailash ឬ Kangringboqe មានទីតាំងនៅភាគនិរតីដាច់ស្រយាលនៃទីបេ ហើយត្រូវបានគោរពដោយពុទ្ធសាសនិក ហិណ្ឌូ និង Jains ច្រើនជាងមួយពាន់លាននាក់ គឺជាភ្នំដ៏ពិសិដ្ឋឈានមុខគេរបស់ពិភពលោក។ ហិណ្ឌូជឿថា ទីនេះជាកន្លែងស្នាក់នៅរបស់ព្រះសិវៈ ខណៈអ្នកផ្សេងទៀតជឿថា Kailash គឺជាភ្នំព្រះមេរុក្នុងរឿងព្រេងនិទាននៅក្នុងវប្បធម៌ឥណ្ឌា ដែលជាលំនៅឋានរបស់ព្រះ និងមានទីតាំងនៅកណ្តាលនៃសកលលោក។

ទោះជាយ៉ាងរហូតមកដល់ពេលនេះគឺមិនមាននរណាម្នាក់អាចឡើងដល់កំពូលភ្នំដ៏អស្ចារ្យនេះបានឡើយ មូលហេតុគឺដោយសារអាជ្ញាធរទីបេហាមឃាត់ការឡើងភ្នំ Kailash ព្រោះពួកគេខ្លាចថាសកម្មភាពខាងលើនឹងប៉ះពាល់ដល់ភាពបរិសុទ្ធ និងភាពពិសិដ្ឋនៃភ្នំ។ ជាការពិតណាស់ភ្នំនេះគឺបានទាក់ទាញការចាប់អារម្មណ៍យ៉ាងខ្លាំងចំពោះអ្នកដែលជឿលើជំនឿ ហើយក៏ជាក្តីស្រមៃសម្រាប់ពុទ្ធសាសនិក និងហិណ្ឌូរាប់ពាន់លាននាក់ ដើម្បីធ្វើធម្មយាត្រាឡើងដល់កំពូលភ្នំ ប៉ុន្តែត្រូវបានហាមឃាត់។ តាមរឿងព្រេងមានកាលមួយមានព្រះសង្ឃមួយអង្គព្រះនាម Milarepa បានឡើងដល់កំពូល ហើយត្រឡប់មកព្រមានមនុស្សកុំឱ្យឡើងរំខាននៅលើកំពូលភ្នំ ព្រោះនៅទីនេះគឺមានព្រះជាច្រើនរស់នៅ។

នៅឆ្នាំ ១៩២៦ វរសេនីយឯក RCWilson នៃកងទ័ពឥណ្ឌាបានរៀបចំបេសកកម្មជាក្រុមទៅកាន់កិច្ចប្រជុំនៅលើកំពូលភ្នំ ប៉ុន្តែព្រិលធ្លាក់ខ្លាំងបានធ្វើឱ្យកិច្ចខិតខំប្រឹងប្រែងនោះបរាជ័យ។ បន្ថែមពីលើជំនឿសាសនា ទេវកថា និងអាកាសធាតុដ៏អាក្រក់ ភ្នំ Kailash ក៏ “មិនអាចឡើងបានដែរ” ដោយសារតែបញ្ហាប្រឈមខាងរាងកាយរបស់វា។ Tibet Vista ដែលជាក្រុមហ៊ុនទេសចរណ៍នៅទីបេបានសរសេរនៅលើគេហទំព័ររបស់ខ្លួនថា “ភ្នំនេះមានរាងដូចពីរ៉ាមីត ជម្រាលគឺចោត ហើយព្រិលត្រូវបានគ្របដណ្ដប់ឥតឈប់ឈរ ដែលធ្វើឱ្យវាពិបាកខ្លាំងណាស់ក្នុងការឡើងដល់កំពូល” ។

ទោះជាយ៉ាងណាកន្លែងនេះនៅតែស្វាគមន៍អ្នកទេសចរឱ្យមកទស្សនា ប៉ុន្តែមិនអាចឡើងដល់កំពូលភ្នំបានឡើយ។ បើយោងតាមកាសែត Times of India ភ្ញៀវទេសចរអាចធ្វើដំណើរបានតែជុំវិញភ្នំ ឬឡើងភ្នំទាបៗប៉ុណ្ណោះ ហើយការធ្វើដំណើរត្រូវទាមទារភាពអត់ធ្មត់ ព្រោះមិនមានជើងហោះហើរត្រង់ រថភ្លើង ឬឡានក្រុងនៅក្បែរនោះទេ ដូច្នេះការធ្វើធ្វើដំណើរគឺរៀងពិបាក និងគ្រោះថ្នាក់បន្តិច។ យោងទៅតាម Wonders of Tibet អ្នកទេសចរគួរតែរៀបចំខ្លួនដើម្បីដើរ ១៥-២២ គីឡូម៉ែត្រក្នុងមួយថ្ងៃក៏ដូចជាអនុវត្តនៅផ្ទះបីខែជាមុនសិន។

គួរបញ្ជាក់ដែរថា នៅតំបន់ភ្នំនេះគឺមានពិធីបុណ្យដែលប្រារព្ធព្រឹត្តិការណ៍សំខាន់ៗចំនួនបីក្នុងជីវិតរបស់ព្រះពុទ្ធសក្យមុនី គឺការប្រសូត ត្រាស់ដឹង និងបរិនិព្វាន ដែលចាប់ផ្តើមនៅដើមខែឧសភា និងបញ្ចប់នៅខែមិថុនា ដោយអ្នកទេសចរអាចចូលរួមបានក្នុងការធ្វើធម្មយាត្រាជុំវិញភ្នំបីដង ហើយត្រូវតែមានអាយុ ១៨ ឆ្នាំឡើងទៅ។ មនុស្សជាច្រើនជឿថាការធ្វើធម្មយាត្រាជុំវិញភ្នំបីដងនឹងជួយលុបបំបាត់អំពើបាបទាំងអស់ក្នុងមួយជីវិតរបស់ពួកគេ៕

ប្រទេសឥណ្ឌា ៖ គ្រូទាយឥណ្ឌាដ៏ល្បីឈ្មោះម្នាក់ និងត្រូវបានគេដាក់ឈ្មោះថា «គឺជាលោក Nostradamus ថ្មី» បានទស្សន៍ទាយថា ពិភពលោកនឹងកើតសង្គ្រា.ម លោក លើកទី៣ នាចុងខែមិថុនា ឆ្នាំ២០២៤ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៨ ខែមិថុនា ឆ្នាំ២០២៤ ។

គេហទំព័រ NDTV រាយការណ៍ថា លោក Kushal Kumar គឺជាគ្រូទាយជនជាតិឥណ្ឌា ដែលកំពុងទទួលបានការចាប់អារម្មណ៍យ៉ាងខ្លាំងពីសំណាក់មហាជន ក្រោយពីលោកទស្សន៍ទាយថា នាថ្ងៃខាងមុខឆាប់ៗនេះ នឹងកើតសង្គ្រាមលោកលើកទី៣ ហើយលោកក៏បានបញ្ជាក់ពីថ្ងៃខែកើតសង្គ្រាមលោក យ៉ាងច្បាស់លាស់ផងដែរ ។

លោក Kushal Kumar ទស្សន៍ទាយថា ពិភពលោកនឹងកើតសង្គ្រាមលោក លើកទី៣ នាពេលឆាប់ៗ ។ លោកអះអាងថា ក្បួនហោរាសាស្ត្ររបស់លោកមានប្រភពពីវប្បធម៌ហិណ្ឌូ ហើយការទស្សន៍ទាយនេះផ្អែកទៅលើភពនានា និងផ្កាយព្រះសុក្រ ។

លោកបាននិយាយយ៉ាងមានទំនុកចិត្តថា ៖ «នៅថ្ងៃអង្គារ ទី១៨ ខែមិថុនា ឆ្នាំ២០២៤ អាចនឹងផ្ទុះសង្គ្រាមលោកលើកទី៣ ខ្លាំងបំផុត ប៉ុន្តែបើសង្គ្រាមពុំផ្ទុះចំថ្ងៃទី១៨ ខែមិថុនា ទេ វាអាចផ្លាស់ប្តូរទៅថ្ងៃទី២៩ ខែមិថុនា ឆ្នាំ២០២៤ ហើយវាក៏ជាថ្ងៃដែលពិភពលោកកើតហេតុការណ៍វិនាសផងដែរ» ។

គ្រូទាយឥណ្ឌារូបនេះ ក៏បានលើកឡើងពីការទស្សន៍ទាយនាពេលកន្លងមកថា ការវាយប្រហារភេរវកម្មនៅជួរភ្នំហិម៉ាល័យ បានធ្វើឱ្យអ្នកទៅសន្សំកុសលជនជាតិហិណ្ឌូស្លាប់អស់ចំនួន៩នាក់ និងរងរបួស៣៣នាក់ទៀត ។ លើសពីនេះ ស្ថានការណ៍ឆ្លងដែនខុសច្បាប់របស់ទាហានកូរ៉េខាងជើងចូលមកកូរ៉េខាងត្បូង គឺវាដូចគ្នានឹងការទស្សន៍ទាយរបស់លោក ។

ចំណែកស្ថានការណ៍ប្រយុទ្ធគ្នាយ៉ាងខ្លាំងក្លានៅប្រទេសអ៊ីស្រាអែល និងការធ្វើសមយុទ្ធរបស់ចិននៅក្បែរតៃវ៉ាន់នាពេលបច្ចុប្បន្ន ក៏ដូចនឹងការទស្សន៍ទាយរបស់លោកដែរ ។ ក្រោយពីគ្រូទាយឥណ្ឌាដ៏ល្បីខាងលើទស្សន៍ទាយបែបនេះ វាបានធ្វើឱ្យមហាជនចាប់អារម្មណ៍យ៉ាងខ្លាំង និងរង់ចាំមើលថា តើនៅចុងខែមិថុនា ឆ្នាំ២០២៤ ពិភពលោកនឹងកើតសង្គ្រាមលោកលើកទី៣ ដែរឬទេ?

គួរបញ្ជាក់ថា លោក Nostradamus គឺជាហោរាសាស្ត្របុរាណជនជាតិបារាំង និងជាអ្នកបោះពុម្ភសៀវភៅឈ្មោះ «Les Propheties ឬ The Prophecies» ។ លោកបានទស្សន៍ទាយពីថ្ងៃអនាគតថា នៅឆ្នាំ២០២៤ ពិភពលោកនឹងប្រឈមជាមួយអាកាសធាតុអាក្រក់ខ្លាំង និងកើតជម្លោះនៅទូទាំងពិភពលោក ។ ក្រៅពីនេះ ក៏មានការប្រយុទ្ធគ្នាតាមផ្លូវទឹក និងការផ្លាស់ប្តូរខ្សែរាជវង្សរបស់ប្រទេសមួយចំនួនផងដែរ ៕

ថ្មីៗនេះយោងតាមលទ្ធផលស្ទាបស្ទង់តម្លៃនៃការរស់នៅឆ្នាំ ២០២៤ របស់ក្រុមហ៊ុនប្រឹក្សាពិភពលោកដែលមានអាយុកាលជិត ៨០ ឆ្នាំ Mercer កាលពីថ្ងៃទី១៦ ខែមិថុនា បានឱ្យដឹងថា ទីក្រុងហុងកុងគឺជាទីក្រុងដែលមានស្តង់ដាររស់នៅខ្ពស់បំផុតក្នុងពិភពលោកសម្រាប់ភ្ញៀវអន្តរជាតិ ដោយជាប់ចំណាត់ថ្នាក់លេខ ១ ខណៈសិង្ហបុរីជាប់ចំណាត់ថ្នាក់លេខ ២ និងស្វីសជាប់លេខ ៣។ ដូច្នេះទីក្រុងដែលមានស្តង់ដាររស់នៅខ្ពស់បំផុតក្នុងលោកសម្រាប់ឆ្នាំ ២០២៤ រួមមាន៖
១.ទីក្រុងហុងកុង (ប្រទេសចិន)
២.សិង្ហបុរី
៣.ទីក្រុង Zurich (ប្រទេសស្វីស)
៤.ទីក្រុង Geneva (ប្រទេសស្វីស)
៥.ទីក្រុង Basel (ប្រទេសស្វីស)
៦.ទីក្រុង Bern (ប្រទេសស្វីស)
៧.ទីក្រុង New York (សហរដ្ឋអាមេរិក)
៨.ទីក្រុង Los Angeles (សហរដ្ឋអាមេរិក)
៩.ទីក្រុងឡុង (ប្រទេសអង់គ្លេស)
១០.ទីក្រុង Nassau នៃរដ្ឋធានី Bahamas។

រីឯទីក្រុងដែលមានស្តង់ដាររស់នៅទាបបំផុតទាំង ១០ ក្នុងលោកសម្រាប់ឆ្នាំ ២០២៤ វិញរួមមាន៖
១.ទីក្រុង Abuja (ប្រទេសនីហ្សេរីយ៉ា)
២.ទីក្រុង Lagos (ប្រទេសនីហ្សេរីយ៉ា)
៣.ទីក្រុង Islamabad (ប្រទេសប៉ាគីស្ថាន)
៤.ទីក្រុង Karachi (ប្រទេសប៉ាគីស្ថាន)
៥.ទីក្រុង Bishkek (ប្រទេសម៉ាឡាវី)
៦.ទីក្រុង Kyrgyzstan (ប្រទេសម៉ាឡាវី)
៧.ទីក្រុង Blantyre (ប្រទេសម៉ាឡាវី)
៨.ទីក្រុង ហាវ៉ាណា (ប្រទេសគុយបា)
៩.ទីក្រុង Durban (អាហ្វ្រិកខាងត្បូង)
១០.ទីក្រុង Windhoek (ប្រទេសណាមីប៊ី)។

គួរបញ្ជាក់ដែរថា ការស្ទង់មតិតម្លៃនៃការរស់នៅប្រចាំឆ្នាំរបស់ Mercer បានដាក់ចំណាត់ថ្នាក់ទីក្រុងចំនួន ២២៦ ដែលតំណាងឱ្យប្រទេស និងដែនដី ដើម្បីផ្តល់នូវនិន្នាការ និងព័ត៌មានសម្រាប់អ្នកដែលរៀបចំសម្រាប់ការធ្វើដំណើរអន្តរជាតិ។ ចំណាត់ថ្នាក់គឺផ្អែកលើតម្លៃនៃទំនិញ និងសេវាកម្មសំខាន់ៗមួយចំនួនក្នុងជីវិតប្រចាំថ្ងៃ ដូចជាតម្លៃស៊ុត ប្រេងឆា កាហ្វេមួយពែង សាំង និងសម្លៀកបំពាក់។ ជាមធ្យមតម្លៃផលិតផលទាំងអស់នេះបានកើនឡើងនៅឆ្នាំនេះ ដែលការកើនឡើងគួរឱ្យកត់សម្គាល់បំផុតគឺតម្លៃប្រេងឆា។

យោងតាមក្រុមហ៊ុន Mercer អតិផរណា និងការប្រែប្រួលអត្រាប្តូរប្រាក់កំពុងជះឥទ្ធិពលដោយផ្ទាល់ទៅលើប្រាក់ចំណូល និងការសន្សំរបស់ប្រជាជន។ ការប្រែប្រួលសេដ្ឋកិច្ច ការកើនឡើងភូមិសាស្ត្រនយោបាយ ជម្លោះ និងភាពអាសន្ននៅក្នុងប្រទេសជាច្រើន ក៏បណ្តាលឱ្យតម្លៃប្រែប្រួលក្នុងតំបន់នីមួយៗផងដែរ។ នៅក្នុងគោលដៅអភិវឌ្ឍន៍ដូចជាហុងកុង សិង្ហបុរី និងហ្ស៊ូរីច តម្លៃផ្ទះគឺថ្លៃ រួមទាំងតម្លៃនៃថ្លៃដឹកជញ្ជូន និងតម្លៃសេវាកម្ម ក៏ដូចជាទំនិញផ្សេងៗសុទ្ធតែឡើងខ្ពស់ទាំងអស់ ដែលរួមចំណែកធ្វើឱ្យថ្លៃរស់កាន់តែខ្ពស់។ ផ្ទុយទៅវិញ នៅក្នុងទីក្រុង Islamabad, Lagos និង Abuja តម្លៃនៃការរស់នៅគឺទាបជាងមួយផ្នែកដោយសារការធ្លាក់ថ្លៃរូបិយប័ណ្ណ៕