ប្រទេសន័រវេស ៖ នៅលើភ្នំ Kjerag ក្នុងតំបន់ Rogaland ប្រទេសន័រវេស មានតំបន់ទេសចរណ៍មួយគួរឱ្យចាប់អារម្មណ៍សម្រាប់ភ្ញៀវទេសចរ គឺថ្ម «Kjeragbolten» ឬត្រូវបានគេស្គាល់ឈ្មោះថា «ថ្មតំណាងក្តីស្រឡាញ់» ។ ថ្មនេះបានកើតឡើងតាមធម្មជាតិមានលក្ខណៈប្លែក និងអស្ចារ្យយ៉ាងខ្លាំង ដោយសារវាស្ថិតនៅត្រង់ចំណុចកណ្តាលរបស់ថ្មធំៗ ។

ថ្មតំណាងក្តីស្រឡាញ់ «Kjeragbolten» បានក្លាយជាតំបន់ទេសចរណ៍ដ៏ពេញនិយមមួយសម្រាប់អ្នកចូលចិត្តដើរក្នុងព្រៃ និងអ្នកធ្វើដំណើរផ្សងព្រេងស្វែងរកភាពសប្បាយរីករាយ ដោយពួកគេអាចមកឈរនៅលើថ្ម ដែលមានទឹកល្ហល្ហេវនៅផ្នែកខាងក្រោម ។

ការធ្វើដំណើរមកកាន់ថ្ម Kjeragbolten ពុំមែនជាការងាយស្រួលប៉ុន្មានទេ ពីព្រោះអ្នកដំណើរត្រូវចំណាយពេលជាច្រើនម៉ោងក្នុងការដើរឆ្លងកាត់ព្រៃដ៏លំបាក ប៉ុន្តែអ្នកដំណើរទាំងនេះនឹងបានឃើញទិដ្ឋភាពដ៏អស្ចារ្យ និងបាត់ការនឿយហត់ពីក្នុងខ្លួន ពេលពួកគេបានឈរលើថ្ម ។ ហេតុនេះ ធ្វើឱ្យភ្ញៀវទេសចរជាច្រើនចង់ទទួលបានបទពិសោធន៍នេះ ។

ប្រវត្តិរបស់ថ្មនេះត្រូវបានគេលើកមកនិយាយភ្ជាប់ជាមួយរឿងតំណាលថា នៅទីនេះ គឺជានិមិត្តរូបតំណាងឱ្យក្តីស្រឡាញ់ និងការប្តេជ្ញាចិត្ត ។ គូស្នេហ៍ជាច្រើនតែងតែនាំគ្នាមកឈរលើថ្មនេះ ដើម្បីបង្ហាញក្តីផ្អែមល្ហែម ឬការស្មោះត្រង់ជាមួយគ្នា ព្រមទាំងថតរូបទុកជាអនុស្សាវរីយ៍ផងដែរ ទើបគេដាក់ឈ្មោះវាថា «ថ្មតំណាងក្តីស្រឡាញ់» ។ រីឯនៅបរិវេណជុំវិញថ្មនេះ ក៏មានមន្តស្នេហ៍ផងដែរ ដូចជា ៖ ច្រាំងថ្មភ្នំ, ទឹកជ្រោះ និងផ្ទៃទឹកសមុទ្រពណ៌ខៀវ ប្រកបដោយបរិយាកាសស្ងប់ស្ងាត់ ។

ភាពស្រស់ស្អាតដែលធម្មជាតិបង្កើតឡើងបានធ្វើឱ្យថ្មតំណាងក្តីស្រឡាញ់ ក្លាយជាតំបន់គោលដៅពុំគួរមើលរំលងសម្រាប់អ្នកស្រឡាញ់ធម្មជាតិ និងអ្នកផ្សងព្រេង ដែលចង់ស្រាវជ្រាវពីតំបន់ទេសចរណ៍ដ៏អស្ចារ្យរបស់ប្រទេសន័រវេស ។

បើទោះជាថ្មនេះស្ថិតនៅចំណុចគ្រោះថ្នាក់ក្តី ប៉ុន្តែវាពុំបានធ្វើឱ្យភ្ញៀវទេសចរភ័យខ្លាចឡើយ ផ្ទុយទៅវិញ ទីតាំងរបស់វាមានភាពខុសប្លែកបែបនេះបានធ្វើឱ្យភ្ញៀវទេសចរលើពិភពលោក ចង់ធ្វើដំណើរមកទីនេះបានម្តងក្នុងមួយជីវិត ។ ពេលមកដល់ទីនេះ ពួកគេបានថតរូបជាសកម្មភាពផ្សេងៗ ខ្លះលោត និងខ្លះទៀតយកសម្ភារៈមកជាមួយដែរ ។

ភ្ញៀវទេសចរម្នាក់ដែលធ្លាប់មកឈរលើថ្មនេះ និយាយថា បើនៅខាងក្រៅវិញ វាមានទំហំធំជាងរូបថតទៅទៀត ហើយបើយើងជាន់លើថ្មខុសតែ១ជំហាន ឬ២ជំហាន មុខជាធ្លាក់ទៅខាងក្រោមមិនខាន ។ ប៉ុន្តែអ្វីគួរឱ្យចាប់អារម្មណ៍ គឺគ្មានអ្នកណាម្នាក់ធ្លាក់ទៅក្រោមទេ ។

ភ្ញៀវទេសចររូបនេះបន្តថា ៖ «បើទោះជាមនុស្សភាគច្រើនគិតថា ពិបាកធ្វើដំណើរមកកាន់ទីនេះ ប៉ុន្តែខ្ញុំគិតថា យើងអាចធ្វើដំណើរមកដល់ទីនេះដោយគ្មានការលំបាក និងពុំចាំបាច់ប្រើប្រាស់ឧបករណ៍ឡើងភ្នំ» ៕

សហរដ្ឋអាមេរិក ៖ កាលពីថ្ងៃទី២៦ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុន Tesla បានប្រកាសប្រមូលរថយន្តម៉ាក Cybertruck ជាង១ម៉ឺនគ្រឿងមកវិញ ដែលវាជាការប្រមូលរថយន្តពីអតិថិជន លើកទី២ នៅឆ្នាំ២០២៤ ។

ចំណែកមូលហេតុដែលធ្វើឱ្យក្រុមហ៊ុនប្រកាសបែបនេះ គឺដើម្បីជួសជុលផ្លិតទឹក និងធ្វើការតុបតែងផ្នែកមួយចំនួន ពីព្រោះឧបករណ៍ទាំងនេះអាចធ្លាក់ក្នុងអំឡុងពេលបើកបរនៅតាមផ្លូវ ។

បើតាមរបាយការណ៍ចំនួន២ច្បាប់ ដែលផ្សព្វផ្សាយក្នុងបណ្តាញសង្គម កាលពីថ្ងៃទី២៥ ខែមិថុនា ឆ្នាំ២០២៤ របស់ការិយាល័យសុវត្ថិភាពចរាចរណ៍ផ្លូវជាតិសហរដ្ឋអាមេរិកឱ្យដឹងថា ក្រុមហ៊ុនផលិតរថយន្ត Tesla បានប្រកាសប្រមូលរថយន្តប្រភេទដឹកទំនិញ Cybertruck មកវិញ ចំនួន១១.០០០គ្រឿង ដើម្បីធានាសុវត្ថិភាពដល់អតិថិជន ។

ប៉ុន្តែក្រុមហ៊ុន Tesla បានវាយតម្លៃថា មានរថយន្តត្រឹមតែ២% ប៉ុណ្ណោះមានបញ្ហាខូចផ្លិតទឹក ក្នុងចំណោមរថយន្តដែលប្រមូលមកវិញទាំងអស់ និងមានរថយន្តត្រឹមតែ១% ប៉ុណ្ណោះ ដែលមានបញ្ហាពាក់ព័ន្ធនឹងឧបករណ៍តុបតែង ។

ការប្រកាសប្រមូលរថយន្តម៉ាក Cybertruck របស់ក្រុមហ៊ុន Tesla លើកនេះ គឺជាលើកទី២ ក្នុងឆ្នាំ២០២៤ ពីព្រោះក្រុមហ៊ុន Tesla ធ្លាប់បានប្រមូលរថយន្ត Cybertruck ជិតស្មើ៣.៩០០គ្រឿងរួចមកហើយ កាលពីខែមេសា ឆ្នាំ២០២៤ ។ ការប្រមូលរថយន្តលើកទី១ គឺដោយសារមានបញ្ហាធូររលុងហ្វ្រាំង និងអាចធ្វើឱ្យរថយន្តបង្កើនល្បឿនទៅបុកមនុស្ស ដោយពុំបានតាំងចិត្ត ។

ទោះយ៉ាងណា ក្រុមហ៊ុន Tesla បានត្រួតពិនិត្យឃើញបញ្ហាទាំងពីរនេះ តាំងពីកុម្ភៈ ឆ្នាំ២០២៤ មកម៉្លេះ ហើយក្រុមហ៊ុនក៏បានសហការជាមួយ Suppliers ដើម្បីធ្វើការវិភាគពីឧបករណ៍ផ្សេងៗដែលបំពាក់ក្នុងរថយន្ត ព្រមទាំងប្រញាប់ដោះស្រាយបញ្ហានេះឱ្យបានឆាប់បំផុត ៕

ប្រទេសថៃ ៖ កាលពីថ្ងៃទី២០ ខែមិថុនា ឆ្នាំ២០២៤ សារព័ត៌មានថៃឈ្មោះ ថានសេតតាគីច (thansettakij) រាយការណ៍ថា ក្នុងរយៈពេល៥ខែដំបូងនៃឆ្នាំ២០២៤ រោងចក្រនៅប្រទេសថៃបានបិទទ្វាររហូតដល់៥៦១កន្លែង ជាពិសេស រោងចក្រក្នុងឧស្សាហកម្មដែក និងលោហៈ បិទទ្វារច្រើនជាងគេ ។ ការបិទទ្វាររោងចក្រជាបន្តបន្ទាប់នេះ ពុំមែនទើបតែកើតឡើងនៅឆ្នាំ២០២៤ ទេ គឺរោងចក្រនៅថៃបានបិទទ្វារបន្តកន្ទុយគ្នា តាំងពីឆ្នាំ២០២១ មកម៉្លេះ ។

សហព័ន្ធឧស្សាហកម្មថៃទទួលស្គាល់ថា បើការចំណាយដើមទុនផលិតទំនិញនៅតែខ្ពស់ ដូចជា ៖ ថាមពល, ការដឹកជញ្ជូន និងការប្រាក់ នឹងធ្វើឱ្យរោងចក្រនៅថៃបិទទ្វារបន្ថែមទៀត ហើយសហព័ន្ធនេះបានណែនាំឱ្យរដ្ឋាភិបាលប្រញាប់ស្វែងរកវិធានការដោះស្រាយបន្ថែម ដើម្បីជួយរោងចក្រទាំងនេះ ។ លោក ពីកថង ថងញ៉ៃ អនុប្រធានសហព័ន្ធឧស្សាហកម្មថៃ និយាយថា សហព័ន្ធឧស្សាហកម្មថៃបានតាមដានស្ថានការណ៍បិទរោងចក្រជាបន្តបន្ទាប់នៅថៃ ។

យោងតាមទិន្នន័យរបស់នាយកដ្ឋានឧស្សាហកម្មបង្ហាញថា ក្នុងរយៈពេល៥ខែដំបូងនៃឆ្នាំ២០២៤ (គឺចាប់ពីខែមករា ដល់ខែឧសភា) រោងចក្រនៅថៃបានបិទទ្វារចំនួន៥៦១កន្លែង ហើយធ្វើឱ្យកម្មករបាត់បង់ការងារ ចំនួន១៥.៣៤២នាក់ ឬបាត់បង់ការងារជាមធ្យម ស្មើនឹង៣.០០០នាក់ក្នុង១ខែ ។ រីឯរោងចក្របិទទ្វារច្រើនបំផុត គឺរោងចក្រក្នុងឧស្សាហកម្មផ្លាស្ទិក ចំនួន១២, ឧស្សាហកម្មលោហៈ ចំនួន១១ និងឧស្សាហកម្មឈើ ចំនួន៨ ។

លោក ពីកថង ថងញ៉ៃ អនុប្រធានសហព័ន្ធឧស្សាហកម្មថៃបារម្ភថា បើការចំណាយដើមទុនផលិតទំនិញនៅតែខ្ពស់ ដូចជា ៖ ថាមពល, ការដឹកជញ្ជូន និងការប្រាក់ នឹងធ្វើឱ្យរោងចក្រនៅថៃបិទទ្វារកាន់តែច្រើនថែមទៀត ។ ហេតុនេះ រដ្ឋាភិបាលគួរតែប្រញាប់ស្វែងរកវិធានការជួយសហគ្រិន ហើយសហគ្រិនខ្លួនឯងក៏ត្រូវប្រញាប់សម្របខ្លួន និងគ្រប់គ្រងកាត់បន្ថយការចំណាយផងដែរ ។

រយៈពេល២ឆ្នាំកន្លងមក ទំនិញមានតម្លៃថោកៗបានចូលមកលុកលុយក្នុងទីផ្សារថៃ និងធ្វើឱ្យមានការប្រកួតប្រជែងខ្ពស់ ។ រីឯសហរដ្ឋអាមេរិក និងអឺរ៉ុបបានបិទច្រកពាណិជ្ជកម្មទាំងអស់ពីចិន ប៉ុន្តែចិននៅតែពុំព្រមកាត់បន្ថយការផលិតទំនិញ ។ ដូច្នេះ ទំនិញចិនទាំងនេះត្រូវបានបញ្ជូនមកលក់នៅថៃជំនួស ទើបធ្វើឱ្យថៃពិបាកប្រកួតប្រជែង ។

បើតាមទិន្នន័យបង្ហាញថា រោងចក្រនៅថៃបានបិទទ្វារជារៀងរាល់ឆ្នាំ ដូចជា ៖
-នៅឆ្នាំ២០២១ រោងចក្របិទទ្វារ ចំនួន ៦៧៨កន្លែង
-នៅឆ្នាំ២០២២ រោងចក្របិទទ្វារ ចំនួន ៩៩៧កន្លែង
-នៅឆ្នាំ២០២៣ រោងចក្របិទទ្វារ ចំនួន ១.៣៣៧កន្លែង កើនឡើង៦០% បើធៀបនឹងឆ្នាំ២០២២
-រយៈពេល៥ខែដំបូងនៃឆ្នាំ២០២៤ រោងចក្របិទទ្វារ ចំនួន ៥៦១កន្លែង ។

លោក ណាវ៉ា ចាន់ថាណាក់ស៊ូរ៉ាឃុន មន្ត្រីសហព័ន្ធឧស្សាហកម្មថៃនិយាយថា លោកព្រួយបារម្ភពីស្ថានភាពសេដ្ឋកិច្ចថៃនាពេលបច្ចុប្បន្ន ហើយវានឹងធ្វើឱ្យរោងចក្រនៅថៃបន្តបិទទ្វារបន្ថែមទៀត ឬបិទដំណើរការច្រើនជាង២ឆ្នាំមុន ដោយសារសង្គ្រាមពាណិជ្ជកម្មដែលអាមេរិក និងសហភាពអឺរ៉ុបនាំគ្នាប្រឆាំងជាមួយចិន ។

លើសពីនេះ ការផលិតទំនិញរបស់ចិននៅតែស្មើដើម ទើបធ្វើឱ្យទំនិញចិនមានតម្លៃថោកៗហូរចូលមកតំបន់អាស៊ាន រហូតដល់ឧស្សាហកម្មក្នុងប្រទេសអាស៊ានត្រូវកាត់បន្ថយការផលិតទំនិញ ដោយសារឧស្សាហកម្មទាំងនេះបានចំណាយដើមទុនខ្ពស់ជាងចិន ៕

លោក Jim Farley ដែលបច្ចុប្បន្នគឺជានាយកប្រតិបត្តិក្រុមហ៊ុន Ford ដោយពីអតីតកាលលោកគ្រាន់តែជាបុគ្គលិកទីផ្សាររបស់ក្រុមហ៊ុននេះប៉ុណ្ណោះ។ កាលពីថ្ងៃទី២៦ ខែមិថុនា ឆ្នាំ២០២៤ លោកបានផ្តល់បទសម្ភាសនៅក្នុងកម្មវិធីមួយ ដោយរៀបរាប់ពីអតីតកាលតស៊ូរបស់លោក។ Jim Farley បាននិយាយថា លោកគឺជាមនុស្សម្នាក់ដែលស្រឡាញ់ និងចូលចិត្តរថយន្ត Ford ខ្លាំងបំផុត ដោយចំណង់ចំណូលចិត្តរបស់លោកគឺចូលចិត្តបើកបរខ្លួនឯង។

Jim Farley បានបន្តទៀតថា នៅពេលដែលលោកជាបុគ្គលិកទីផ្សារ លោកធ្លាប់បានបញ្ចាំផ្ទះដើម្បីទិញ Ford Shelby Cobra ដែលជារថយន្តបុរាណមួយរបស់សហរដ្ឋអាមេរិក ក្នុងតម្លៃ ១០ ម៉ឺនដុល្លារ។ មិនត្រឹមតែប៉ុណ្ណោះលោកក៏ធ្លាប់បានទិញរថយន្តស្ព័ររបស់ក្រុមហ៊ុន Mazda, Porsche និង Toyota ទៀតផង។ ក្នុងអំឡុងពេលនៃការសន្ទនាមានរយៈពេលជាងមួយម៉ោង នាយកប្រតិបត្តិបានបង្ហាញពីព័ត៌មានលម្អិតគួរឱ្យចាប់អារម្មណ៍ជាច្រើនជុំវិញអាជីពរបស់លោក។

ជាការពិតណាស់ នៅពេលដែលអ្នកស្រឡាញ់អ្វីមួយត្រូវតែតាំងចិត្តសម្រេចវាឱ្យបាន ទោះបីវាចំណាយពេលយូរបន្តិចក្តី ក៏អ្នកមិនអាចបោះបង់ក្តីស្រម៉ៃរបស់អ្នកបានឡើយ ហេតុនេះអ្នកត្រូវមានគោលដៅជីវិតឱ្យបានច្បាស់លាស់ មានមហិច្ឆតាខ្ពស់ ទើបអ្នកអាចទទួលបានភាពជោគជ័យនៅថ្ងៃអនាគត នេះបើយោងតាមសម្តីរបស់នាយកប្រតិបត្តិក្រុមហ៊ុន Ford ដែលបានផ្តល់បទសម្ភាសក្នុងកម្មវិធី Smoking Tire។

ទោះជាយ៉ាងណា រឿងខាងលើនេះគឺបានកើតឡើងមុនពេលលោក Jim Farley ក្លាយជានាយកប្រតិបត្តិក្រុមហ៊ុន Ford ដោយបច្ចុប្បន្ន CEO ម្នាក់នេះគឺបានកាន់កាប់ភាគហ៊ុនរាប់រយលានដុល្លារឯណោះ។ ការសន្ទនារបស់ CEO ក៏បានលើកឡើងពីទិសដៅទូទៅរបស់ក្រុមហ៊ុន Ford និងគម្រោងអនាគតដ៏មានសក្តានុពលមួយចំនួនផងដែរ។ កត្តាដែលគួរឱ្យកត់សម្គាល់បំផុតក្នុងចំណោមកត្តាទាំងនេះគឺថាក្រុមហ៊ុនបច្ចុប្បន្នកំពុងធ្វើឱ្យប្រសើរឡើងជាបណ្តើរៗនូវត្រកូលរបស់ខ្លួនដើម្បីកាត់បន្ថយវត្តមាននៅក្នុងផ្នែករថយន្តតម្លៃទាប ហើយកំណត់គោលដៅជាបណ្តើរៗទៅកាន់ផ្នែកតម្លៃខ្ពស់ដូចជាអ្វីដែលស្មាតហ្វូន F-Series កំពុងធ្វើជាដើម៕

ប្រទេសចិន ៖ ស្ពាន Haoji មានប្រវែងសរុបស្មើនឹង១.៨១៣គីឡូម៉ែត្រ ហើយត្រូវបានគេចាត់ទុកថា វាជាស្ពានផ្លូវរថភ្លើងវែងបំផុតនៅលើពិភពលោក ដែលប្រើប្រាស់សម្រាប់ការដឹកជញ្ជូនធ្យូងថ្មពីភាគខាងជើងទៅភាគខាងត្បូងប្រទេសចិន ។ ស្ពានផ្លូវរថភ្លើងនេះបានចាប់ផ្តើមបើកដំណើរការដំបូង កាលពីថ្ងៃទី២៨ ខែកញ្ញា ឆ្នាំ២០១៩ ។

ចំណែកការចំណាយប្រាក់សម្រាប់សាងសង់ស្ពានដ៏វែងនេះ គឺស្មើប្រមាណ២៨ពាន់លានដុល្លារអាមេរិក ។ គេសាងសង់ស្ពាននេះឡើង គឺទុកសម្រាប់ដឹកជញ្ជូនធ្យូងថ្ម ចំនួន២០០លានតោន ពីតំបន់ម៉ុងហ្គោលីខាងក្នុង និងសានស៊ី មកកាន់បណ្តាខេត្តនៅភាគខាងត្បូងប្រទេសចិន ។

ក្រៅពីនេះ វាជាស្ពានផ្លូវរថភ្លើងសម្រាប់ដឹកជញ្ជូនធ្យូងថ្មឆ្លងកាត់ពីភាគខាងជើងទៅភាគខាងត្បូងដំបូងគេនៅចិនផងដែរ ។ ការសាងសង់ស្ពានផ្លូវរថភ្លើងនេះ ក្នុងគោលបំណងចៀសវាងការដឹកជញ្ជូនធ្យូងថ្មតាមផ្លូវរថភ្លើងចាស់ៗ ដែលត្រូវឆ្លងកាត់ទីក្រុងឆ្នេរសមុទ្រតាមនាវា ។

ការដឹកជញ្ជូនធ្យូងថ្មតាមស្ពានខាងលើបានជួយកាត់បន្ថយពេលវេលានៅសល់ត្រឹមតែ៣ថ្ងៃប៉ុណ្ណោះ ខណៈការដឹកជញ្ជូនធ្យូងថ្មតាមសមុទ្របានចំណាយពេលរហូតដល់២០ថ្ងៃ ។ លើសពីនេះ ស្ពានផ្លូវរថភ្លើងក៏បានតភ្ជាប់ជាមួយបណ្តាញផ្លូវរថភ្លើងជាច្រើនតំបន់ទៀត ដើម្បីងាយស្រួលថែទាំផ្លូវរថភ្លើងរួមគ្នា ។ រីឯល្បឿនដែលប្រើប្រាស់សម្រាប់ស្ពានផ្លូវរថភ្លើង គឺស្មើនឹង១២០គីឡូម៉ែត្រក្នុង១ម៉ោង ។

ស្ពានផ្លូវរថភ្លើងនេះបានដំណើរការដោយក្រុមហ៊ុន China Railway និងទទួលបានការអនុម័តវិនិយោគកាលពីឆ្នាំ២០១៤ ក្នុងទឹកប្រាក់ចំនួន២៧ពាន់លានដុល្លារអាមេរិក ។ រីឯទឹកប្រាក់វិនិយោគផ្សេងទៀត គឺជារបស់ក្រុមហ៊ុន China Railway និងក្រុមហ៊ុនរុករកធ្យូងថ្មធំៗជាច្រើន ។

គេចាត់ទុកថា វាជាភាពជោគជ័យ និងជាសមិទ្ធិផលដ៏អស្ចារ្យមួយទៀតរបស់ប្រទេសចិន ក្នុងផ្នែកការអភិវឌ្ឍហេដ្ឋារចនាសម្ព័ន្ធដឹកជញ្ជូនថាមពល ៕