«ទេពធីតាយុត្តិធម៌» ជាស្នាដៃចុងក្រោយរបស់លោក Benz Hui

«ទេពធីតាយុត្តិធម៌»ឬ«Themis» ជារឿងភាគរបស់ TVB ដែលកំពុងតែធ្វើការចាក់ផ្សាយតាមបណ្តាញសង្គមយូធូបកម្ពុជានិងកំពុងទទួលបានការចាប់អារម្មណ៍យ៉ាងច្រើនពីទស្សនិកជន។ យ៉ាងណាក៏ដោយអ្វីដែលធ្វើឱ្យអ្នកគាំទ្រមានការនឹករលឹកនោះគឺថាខ្សែភាពយន្តនេះជាស្នាដៃលើកចុងក្រោយរបស់សិល្បករជើងចាស់ Benz Hui ហៅលោកបងហួនស៊ី។

«ទេពធីតាយុត្តិធម៌» បានចាក់ផ្សាយជាផ្លូវការនៅថ្ងៃទី៥ ខែតុលា ឆ្នាំ២០២៦ នៅលើឆាណែលយូធូប TVB Cambodia Drama ។ ខ្សែភាពយន្តនេះមានតួសំខាន់ៗដូចជា Charmaine Sheh , Patrick Tam, Alice Chan រួមទាំងលោក Benz Hui ផងដែរ។ រឿងភាគ TVB មួយនេះកំពុងទទួលបាននូវការចាប់អារម្មណ៍ពីទស្សនិកជនកម្ពុជាពីព្រោះសាច់រឿងបានបង្ហាញពីដំណើរការផ្លូវច្បាប់ ការស៊ើបអង្កេតរឿងក្តីទាក់ទងនឹងបទល្មើសទៅលើក្មេងដែលមិនទាន់គ្រប់អាយុ។

ទន្ទឹមនឹងការចាប់អារម្មណ៍ខ្សែភាពយន្តទស្សនិកជនក៏បង្ហាញក្តីនឹករលឹកមកកាន់លោក Benz Hui ពីព្រោះ «ទេពធីតាយុត្តិធម៌» គឺស្នាដៃចុងក្រោយរបស់លោកដែលបន្សល់ទុកឱ្យទស្សនិកជនបានទស្សនាកម្សាន្ត។ ក្នុងរឿងនេះលោកដើរតួជាប្រធានចៅក្រមសាលាដំបូងមានឈ្មោះថា ហុង សឺអ៊ី (Hung Si Yi)។ បន្ទាប់ពីទស្សនារឿងនេះបានប៉ុន្មានភាគនិងបានឃើញការសម្តែងរបស់លោក Benz Hui ធ្វើឱ្យអ្នកទស្សនាបង្ហាញថាសិល្បករជើងចាស់រូបនេះហាក់ដូចជាមិនទៅណាឆ្ងាយពីទស្សនិកជនឡើយទោះបីជាលោកចែកឋានហើយក្តី។

គួរឱ្យដឹងថាតារាសម្ដែងហុងកុង Benz Hui ឬទស្សនិកជនស្គាល់ថាលោកបង ហួនស៊ី ដែលល្បីក្នុងខ្សែភាពយន្តជាច្រើនរបស់ស្ថានីយទូរទស្សន៍TVB បានទទួលមរណភាពក្នុងជន្មាយុ ៧៦ ឆ្នាំដោយសារជំងឺមហារីកនៅព្រឹកថ្ងៃទី ២៨ ខែតុលា ឆ្នាំ២០២៥។ មរណភាពរបស់លោកបន្សល់នូវទុក្ខសោកនិងសេចក្តីអាឡោះអាល័យជាពន់ពេកពីអ្នកក្នុងចង្កោមសិល្បៈរួមទាំងទស្សនិកជនទាំងក្នុងនៅក្រៅប្រទេស៕