Zendaya ត្រូវបានគេរិះគ.ន់ក្នុងពេលមិនក្រោកឈរស្វាគមន៍ស្រ្តីទី១របស់បារាំង

តារាសម្តែងអាម៉េរិក Zendaya វ័យ៣០ឆ្នាំកំពុងទទួលបាននូវការរិះគន់យ៉ាងច្រើននៅលើបណ្តាញសង្គម បន្ទាប់ពីវីដេអូមួយបង្ហាញថានាងនៅតែអង្គុយខណៈពេលលោកស្រី ប៊្រីជីត ម៉ាក្រុង ( Brigitte Macron) អាយុ៧៣ឆ្នាំជាស្រ្តីទី១របស់បារាំងចូលមកស្វាគមន៍នាងក្នុងកម្មវិធីបង្ហាញម៉ូតនៅទីក្រុងប៉ារីសកាលពីថ្ងៃទី៦ ខែតុលា។

វីដេអូដែលត្រូវបានចែករំលែកយ៉ាងទូលំទូលាយនៅលើបណ្តាញសង្គមបង្ហាញថា Zendaya តួស្រីក្នុងរឿង«Spider-Man» កំពុងអង្គុយនៅជួរមុខ និងជជែកជាមួយភ្ញៀវម្នាក់។ នៅពេលលោកស្រី Brigitte Macron ដើរចូលមកជិតតារាសម្តែងរូបនេះបានងើបមុខឡើង ញញឹម និងចាប់ដៃស្វាគមន៍ ប៉ុន្តែមិនបានក្រោកឈរឡើយ។ ហេតុការណ៍នេះបានបង្កឱ្យមានមតិចម្រុះនៅលើបណ្តាញសង្គម។ អ្នកប្រើប្រាស់មួយចំនួនយល់ថា ការក្រោកឈរនៅពេលស្វាគមន៍មនុស្សដែលមានវ័យចំណាស់ ឬមានតួនាទីសាធារណៈ គឺជាសុជីវធម៌មួយ ខណៈអ្នកផ្សេងទៀតយល់ថាការមិនក្រោកឈររបស់ Zendaya មិនគួរត្រូវបានយកមកបកស្រាយថាជាការមិនគោរពនោះទេ។

អ្នកប្រើប្រាស់បណ្តាញសង្គម X បានចែករំលែកវីដេអូជាមួយសាររិះគន់ថា Zendaya គួរតែក្រោកឈរនៅពេលលោកស្រី Brigitte Macron ចូលមកស្វាគមន៍។ ការបង្ហោះនោះទទួលបានការចូលចិត្ត និងមតិយោបល់ជាច្រើន ដែលបង្ហាញពីការយល់ឃើញខុសៗគ្នារបស់អ្នកប្រើប្រាស់។ អ្នកផ្សេងក៏លើកឡើងដែរថា គួរតែក្រោកឈរឡើងដើម្បីស្វាគមន៍បុគ្គលដែលមានវ័យចំណាស់ ឬមានឋានៈខ្ពស់ជាង ជាពិសេសនៅពេលដែលអ្នកដែលមានវ័យចំណាស់ជាងនេះចូលទៅជិតពួកគេដោយសកម្ម។

អ្នកប្រើប្រាស់មួយចំនួនបានលើកឡើងថា Zendaya ក៏មិនបានក្រោកឈរនៅពេលលោក Bernard Arnault ប្រធាន និងនាយកប្រតិបត្តិ LVMH ដែលជាក្រុមហ៊ុនមេរបស់ Louis Vuitton ចូលមកស្វាគមន៍នាងផងដែរ។ ចំណុចនេះត្រូវបានអ្នកគាំទ្រខ្លះយកមកជាហេតុផលថា អាកប្បកិរិយារបស់ Zendaya ប្រហែលមិនមានគោលបំណងបង្ហាញការមិនគោរពចំពោះ Brigitte Macron ជាពិសេសនោះទេ។

ផ្ទុយទៅវិញ អ្នកគាំទ្រ Zendaya មួយចំនួនបានការពារតារាសម្តែងរូបនេះ ដោយលើកឡើងថា ការជួបគ្នានេះអាចជាការស្វាគមន៍ភ្លាមៗដែលមិនបានរៀបចំទុកជាមុន ហើយ Zendaya នៅតែបានញញឹម ចាប់ដៃ និងសន្ទនាជាមួយលោកស្រី Brigitte Macron ដោយភាពរួសរាយរាក់ទាក់។ Zendaya និងស្រ្តីទីមួយនៃប្រទេសបារាំងមិនបានធ្វើអត្ថាធិប្បាយលើភាពចម្រូងចម្រាសនេះទេ។

ហេតុការណ៍នេះបានបន្តបង្កការជជែកវែកញែកអំពីសុជីវធម៌ក្នុងការស្វាគមន៍ និងថាតើការក្រោកឈរគួរត្រូវបានចាត់ទុកជាកាតព្វកិច្ចក្នុងបរិបទសាធារណៈ ឬជាការគោរពដែលអាស្រ័យលើស្ថានភាព និងបរិបទនៃការជួបគ្នា៕