BTS អាចនឹងខកខានកម្មវិធី Coachella 2027

ក្រុមចម្រៀង K-pop លំដាប់ពិភពលោក BTS អាចនឹងមិនបានបង្ហាញខ្លួនជាតារាសំខាន់នៅក្នុងមហោស្រពតន្ត្រី Coachella 2027 បន្ទាប់ពីការចរចាររវាងក្រុមនិងអ្នករៀបចំកម្មវិធីត្រូវបានរាយការណ៍ថាមិនអាចឈានដល់កិច្ចព្រមព្រៀងបាន។

តាមប្រភពព័ត៌មានបរទេស Goldenvoice ដែលជាអ្នករៀបចំ Coachella បានព្យាយាមចរចាជាបន្តបន្ទាប់ដើម្បីអញ្ជើញ BTS ឱ្យក្លាយជាតារាសំខាន់សម្រាប់ព្រឹត្តិការណ៍ឆ្នាំ ២០២៧។ ទោះជាយ៉ាងណា ការពិភាក្សាចុងក្រោយត្រូវបានរាយការណ៍ថាបានបរាជ័យ ហើយភាគីទាំងពីរមិនអាចឈានដល់កិច្ចព្រមព្រៀងរួមគ្នាបានឡើយ។

ប្រភពដដែលបានឱ្យដឹងថាលោក Paul Tollett ប្រធាន និងជានាយកប្រតិបត្តិរបស់ Goldenvoice បានចាប់អារម្មណ៍យ៉ាងខ្លាំងចំពោះការនាំ BTS មកសម្តែងនៅ Coachella។ លោកថែមទាំងបានទៅទស្សនាការសម្តែងរបស់ BTS នៅទីលាន Gwanghwamun ក្នុងទីក្រុងសេអ៊ូលកាលពីខែមីនាបន្ទាប់ពីសមាជិកក្រុមបញ្ចប់កាតព្វកិច្ចយោធា។ បន្ទាប់ពីការចរចាមិនទទួលបានលទ្ធផល មានសេចក្តីរាយការណ៍ថា Coachella កំពុងពិចារណាសិល្បករផ្សេងទៀតដូចជា Drake និងអ្នកផ្សេងជាជម្រើសជំនួស BTS។

កន្លងមកសិល្បករ K-pop ជាច្រើនបានឡើងឆាក Coachella។ Epik High គឺជាសិល្បករកូរ៉េដំបូងដែលបានសម្តែងនៅមហោស្រពនេះក្នុងឆ្នាំ ២០១៦។ បន្ទាប់មកមានក្រុមដូចជា BLACKPINK, aespa, LE SSERAFIM, ATEEZ, ENHYPEN និង BIGBANG ជាដើម។

ជាពិសេស ក្នុងឆ្នាំ២០២៣ BLACKPINK បានក្លាយជាក្រុម K-pop ដំបូងគេដែលឡើងជាតារា Headliner របស់ Coachella។
ទោះបី BTS អាចនឹងខកខាន Coachella 2027 ក៏ដោយក៏ក្រុមនេះនៅតែមានអំណាចខ្លាំងក្នុងទីផ្សារប្រគំតន្ត្រីពិភពលោក។ តាមទិន្នន័យដែលបានរាយការណ៍ ដំណើរទេសចរណ៍ «ARIRANG» របស់ BTS បានទាក់ទាញអ្នកទស្សនាសរុបជាង ២.៣១ លាននាក់ ពីការសម្តែងចំនួន ៣៨ លើក និងរកចំណូលប្រមាណ ៤៦៥.៨ លានដុល្លារ។

សម្រាប់ BTS ការមិនចូលរួម Coachella ក៏ប្រហែលមិនមែនជាការខាតបង់ធំដុំនោះទេ។ តាមរយៈគម្រោង «The City» ក្រុមនេះបានពង្រីកការប្រគំតន្ត្រីរបស់ខ្លួនឱ្យក្លាយជាព្រឹត្តិការណ៍វប្បធម៌ និងកម្សាន្តទ្រង់ទ្រាយធំ ដែលមានសកម្មភាពជាច្រើននៅជុំវិញទីក្រុងដែលពួកគេទៅសម្តែង។ ដូច្នេះការខកខាន Coachella 2027 ប្រសិនបើកើតឡើងពិតមែន មិនមានន័យថា BTS កំពុងបាត់បង់ឥទ្ធិពលនៅលើឆាកអន្តរជាតិនោះទេ។ ផ្ទុយទៅវិញ ក្រុមនេះនៅតែមានសមត្ថភាពទាក់ទាញអ្នកគាំទ្រ និងបង្កើតព្រឹត្តិការណ៍តន្ត្រីទ្រង់ទ្រាយធំដោយខ្លួនឯង៕