ទទួលបាននូវពាក្យជេរប្រមាថជាច្រើនជុំវិញទំនាក់ទំនងផ្ទាល់ខ្លួន តាំង សេងហួរ បានប្រកាសចាត់វិធានការតាមផ្លូវច្បាប់ដោយចេញលិខិតជូនដំណឹងពីមេធាវីទៅកាន់គណនីមួយចំនួន។ លោកបានសារភាពថាការឈានដល់ចំណុចនេះគឺលោកធ្វើតាម Vinmart ខណៈមិនចង់ឱ្យមនុស្សមួយចំនួនបានចិត្ត។
អ្នកតាមដានបណ្តាញសង្គមមួយចំនួនជ្រាបមកហើយថា តាំង សេងហួរ ដែលជាបុគ្គលជោគជ័យលើវិស័យ Trader និងអាជីវកម្មបានរងនូវការរិះគន់ និងពាក្យសម្តីជេរប្រមាថជាច្រើនពីអ្នកលេងបណ្តាញសង្គមមួយចំនួនក្រោយពីបែកបាក់គូស្នេហ៍ដែលបានរួមដំណើរគ្នាអស់រយៈពេល១០ឆ្នាំ។ ដើមឡើយ តាំង សេងហួរ បានចេញតបតពាក្យសម្តីតាមរយៈការបង្ហោះ ក៏ដូចជាចូលទៅឆ្លើយតបទៅនឹងមតិរិះគន់មួយចំនួនប៉ុន្តែរឿងរ៉ាវចម្រូងចម្រាសរបស់លោកនៅតែបន្តកើតមាន។
បន្ទាប់ពីរឿងរ៉ាវ Bully របស់ Vinmart បានរីកសាយភាយហើយនាងក៏បានចាត់វិធានការតាមផ្លូវច្បាប់ឱ្យបុគ្គលនោះចេញសូមទោស តាំង សេងហួរ បានយកដំណើរការនេះមកដោះស្រាយចំពោះខ្លួនដូចគ្នា។ គណនីទី១ដែល អ្នកជួញដូររូបនេះបានចាត់វិធានការមានឈ្មោះថា « San SoPhorn» ដោយទុកពេលឱ្យ៤៨ម៉ោងក្នុងការចេញសូមទោសលោកជាសាធារណៈ។ មិនយូរប៉ុន្មានគណនីនេះបានចេញវីដេអូសូមទោសចំពោះការប្រើពាក្យសម្តីមិនសមរម្យមកកាន់ តាំង សេងហួរ ផងដែរ។
ក្រោយឃើញគណនីខាងលើចេញមុខសូមទោស និងទទួលបានមតិយោបល់ជាច្រើន តាំង សេងហួរ បាន Add Story សម្រេចដកពាក្យបណ្ដឹងបិទបញ្ចប់រឿងនេះ។ ជាមួយគ្នានេះ សេងហួរក៏យល់ព្រមឱ្យគណនី «San SoPhorn» អាចលុបវីដេអូសូមទោសនេះចេញវិញបាន បន្ទាប់ពីបានបង្ហោះជាសាធារណៈគ្រប់ ២៤ ម៉ោង។ តាំង សេងហួរ បានបញ្ជាក់ថាលោក មិនមានគំនុំ ឬការស្អប់ខ្ពើមឡើយហើយមិនចង់ឱ្យអ្នកដទៃទៅវាយប្រហារឬជេរគណនី San SoPhorn ដូចគ្នាដោយជំរុញឱ្យរូបគេរៀនសូត្រពីរឿងនេះហើយដើរទៅមុខរៀងៗខ្លួនដោយសន្តិវិធី។
ក្រៅពីប្រកាសចាត់វិធានការទៅលើគណនីខាងលើ តាំង សេងហួរ ក៏កំពុងដំណើរទៅលើគណនីផ្សេងទៀតដែលបានជេរប្រមាថលោក៕
