អតីតតារាសម្តែង អូនផ្កាយ និងប្តី ដែលធ្វើឱ្យមុខរបរ «បាញ់ត្រាង» ល្បីកក្រើកពេញប្រទេសបានធ្វើឱ្យអ្នកទស្សនាកាន់តែជ្រួលជ្រាបពីទំហំនៃការតស៊ូរបស់អ្នកទាំងពីរដែលខិតខំចាប់ដៃគ្នារកស៊ីមានទាំងការបរាជ័យនិងជោគជ័យជាមួយគ្នា។ មកទល់ពេលនេះគូស្នេហ៍នេះមានកូនពីរនាក់ជាមួយគ្នាផងដែរ។
តាមរយៈបទសម្ភាសន៍នៅក្នុងកម្មវិធីរបស់ ខេ លោក ឡាយ ដេវីដស្មីត ដែលជាប្តីរបស់ អូនផ្កាយ បានបង្ហាញប្រាប់ពីរឿងរ៉ាវជាច្រើនចាប់តាំងពីអ្នកទាំងពីរមានទំនាក់ទំនងរហូតកសាងគ្រួសារនិងបង្កើតមុខរបរជាមួយគ្នា។ លោកបានបង្ហាញថា លោកបានស្គាល់ អូនផ្កាយ នៅក្នុងក្លិបកម្សាន្តដោយជួបគ្នាដំបូងគឺហ៊ានសុំលេខទូរសព្ទតែម្តងនិងបានហៅនាងថា «ចែ»។ ទោះយ៉ាងណា លោក ឡាយ ដេវីដស្មីត បានបញ្ជាក់ថាបើលោកដឹងមុនថា អូនផ្កាយ ជាអ្នកសម្តែងនោះលោកនឹងមិនភ្ជាប់ទំនាក់ទំនងឡើយ។.png)
បន្ទាប់ពីមានទំនាក់ទំនងជាមួយគ្នាក្នុងនាមជាគូស្នេហ៍ អ្នកទាំងពីរបានចាប់ផ្តើមបង្កើតមុខរបរជាមួយគ្នាជាច្រើន។ តាមការបញ្ជាក់របស់ប្តី អូនផ្កាយ តាំងពីអ្នកទាំងពីរស្គាល់គ្នាមកធ្លាប់បង្កើតមុខរបរដូចជាលក់ ពន្លៃ ជ្រក់ជើងមាន់ បើកហាងសាឡន ធ្វើជាគ្រីមលាបមុខជាម្ចាស់ប្រ៊េនដោយខ្លួនឯង លក់បាញ់ត្រាង ដែលជាមុខរបរល្បីកក្រើកកាលពីមុន រួមទាំងការបើកហាង។ លោក ឡាយ ដេវីដស្មីត បានបញ្ជាក់ថាអ្វីដែលធ្វើឱ្យខាតបង់ធំបំផុតសម្រាប់ពួកគេក្នុងការរកស៊ី គឺជាការបើកហាង Best In World ដោយការចំណាយដើមទុន៨ម៉ឺនដុល្លារ ត្រូវខាតបង់អស់ត្រឹមមួយពព្រិចភ្នែក។
ប្តីអូនផ្កាយ បានបន្ថែមថាហាងមួយនេះបានធ្វើឱ្យអ្នកទាំងពីរជូរចត់យ៉ាងខ្លាំងពីព្រោះជាកម្លាំងញើសឈាមរបស់ពួកគេដែលខំប្រឹងតស៊ូរយៈពេលកន្លងមកនេះ។ 
លោក ឡាយ ដេវីដស្មីត ក៏បានបញ្ជាក់ដែរថាមកទល់ពេលនេះលោកនិងអូនផ្កាយ មានទំនាក់ទំនងជាមួយគ្នាប្រមាណ៦ឆ្នាំមកហើយដោយក្នុងទំនាក់ទំនងរយៈពេលប្រហែល១ឆ្នាំអ្នកទាំងពីរក៏មានកូនដំបូងរួមគ្នា។ ដោយសារតែមិនទាន់បានរៀបការតាមប្រពៃណី ប៉ុន្តែក្នុងនាមលោកជាមនុស្សប្រុសក៏មានទំនួលខុសត្រូវដោយចាស់ទុំទាំងសងខាងបានជួបនិយាយគ្នាផងដែរ។
មកទល់នឹងពេលនេះ អ្នកទាំងពីរ បង្កើតចំណងដៃមានកូនស្រីពីរនាក់នៅក្នុងគ្រួសារ ហើយពួកគេក៏កំពុងដំណើរការលក់បាញ់ត្រាងឡើងវិញនិងកំពុងទទួលបានការចាប់អារម្មណ៍ជាច្រើនពីអ្នកទស្សនា។ ការតស៊ូរបស់ អូនផ្កាយ និងប្តី ក៏បានធ្វើឱ្យអ្នកលេងបណ្តាញសង្គមជាច្រើនកោតសរសើរមកកាន់គូស្នេហ៍នេះផងដែរពីព្រោះពួកគេឃើញជាក់ស្តែងថាមួយគូនេះពិតជាខិតខំជាមួយគ្នាពិតមែន៕
