យូហៃ បង្ហាញពីដំណើរជីវិតលើអាជីពសិល្បៈនិងអរគុណទៅកាន់អ្នកគាំទ្រ

តារារ៉េប យូហៃ បានបង្ហាញអារម្មណ៍របស់ខ្លួនយ៉ាងកម្រដើម្បីរំលឹកពីដំណើររបស់ខ្លួនក្នុងវិស័យតន្ត្រី និងថ្លែងអំណរគុណដល់អ្នកដែលបានគាំទ្រនិងនៅក្បែរលោកប៉ុន្មានឆ្នាំមកនេះ។

ថ្មីៗនេះ យូហៃ បានបង្ហោះសំណេរនៅលើ Story របស់ខ្លួនជាភាសាអង់គ្លេសដែលមានអត្ថន័យថា «សូមអនុញ្ញាតឱ្យខ្ញុំឆ្លៀតពេលបន្តិចដើម្បីថ្លែងអំណរគុណដល់អ្នកទាំងអស់គ្នាដែលបានឃើញដំណើរជីវិតរបស់ខ្ញុំក្នុងរយៈពេលប៉ុន្មានឆ្នាំចុងក្រោយនេះ។ ខ្ញុំមានអារម្មណ៍ថាខ្លួនឯងបានឆ្លងកាត់ព្យុះភ្លៀងជាច្រើន ពីក្មេងម្នាក់ដែលស្រឡាញ់តន្ត្រី និងចូលចិត្តសិល្បៈនៃការបញ្ចេញអារម្មណ៍តាមរយៈតន្ត្រី ដោយមិនដែលនឹកស្មានថាខ្លួនអាចមកដល់ចំណុចនេះបានឡើយ។ តាំងពីថ្ងៃដំបូងមក ខ្ញុំគ្រាន់តែព្យាយាមយកឈ្នះការភ័យខ្លាចក្នុងការឡើងឆាក ប៉ុន្តែអ្នកទាំងអស់គ្នាបានផ្តល់ក្តីស្រឡាញ់មកខ្ញុំយ៉ាងច្រើនលើសលប់ ដែលលើសពីអ្វីដែលខ្ញុំផ្តល់ឱ្យខ្លួនឯងទៅទៀត។ វាពិតជាពរជ័យដ៏អស្ចារ្យមួយដែលបានទទួលអារម្មណ៍បែបនេះ។ ប្រសិនបើអ្នកកំពុងអានសារនេះហើយវាអាចជួយជំរុញទឹកចិត្តអ្នកបានខ្លះ ខ្ញុំពិតជាមានអំណរគុណយ៉ាងខ្លាំង។

ម្ចាស់ពាន The Rapper Cambodia បានរំលឹកថាក្តីស្រឡាញ់ដែលទទួលបានពីអ្នកគាំទ្រ មានន័យយ៉ាងខ្លាំងសម្រាប់លោក ហើយជួយឱ្យលោកបន្តដំណើរមកដល់ចំណុចដែលខ្លួនកំពុងឈរនាពេលបច្ចុប្បន្ន។ លោកក៏បានលើកឡើងថា មានពេលខ្លះដែលខ្លួនមានអារម្មណ៍ឯកោ សោកសៅ និងធ្លាក់ទឹកចិត្ត ប៉ុន្តែបទពិសោធន៍ទាំងនោះបានក្លាយជាផ្នែកមួយនៃផ្លូវជីវិត ដែលនាំលោកទៅរកអ្វីដែលធំជាងមុន។
អ្វីដែលធ្វើឱ្យម្ចាស់បទ «ស្ទាវជ័រ» មានអារម្មណ៍ជ្រាលជ្រៅ គឺការដែលមានមនុស្សមួយចំនួនបានប្រាប់ថា ស្នាដៃសិល្បៈរបស់លោកបានជួយពួកគេនៅពេលកំពុងឆ្លងកាត់ដំណាក់កាលដ៏ងងឹតក្នុងជីវិត។ ចំពោះ យូហៃ ការដឹងថាស្នាដៃរបស់ខ្លួនអាចផ្តល់អ្វីមួយដែលមានប្រយោជន៍ដល់អ្នកដទៃគឺជារឿងដែលលោកពេញចិត្ត និងមានន័យយ៉ាងខ្លាំង។

តារារ៉េបរូបនេះបញ្ជាក់ក្នុងសារថាក្តីសុបិនរបស់លោកកាន់តែធំ ចិត្តកាន់តែរឹងមាំ ហើយទស្សនៈចំពោះជីវិតក៏កាន់តែភ្លឺស្វាង។ ទន្ទឹមនឹងនេះ លោកក៏បានបង្ហាញពីការជ្រើសរើសធ្វើជាខ្លួនឯង និងបន្តរក្សាអត្តសញ្ញាណរបស់ខ្លួន។ យូហៃ ក៏មិនភ្លេចថ្លែងអំណរគុណដល់អ្នកគាំទ្ររបស់លោក រួមទាំងអ្នកដែលធ្លាប់រិះគន់ ឬមិនពេញចិត្តចំពោះលោកផងដែរ។ លោកបានចាត់ទុកមនុស្សគ្រប់រូបដែលបានចូលរួមក្នុងដំណើររបស់លោកជាផ្នែកមួយនៃការធ្វើឱ្យលោកក្លាយជាមនុស្សដែលលោកជានាពេលបច្ចុប្បន្ន។

នៅចុងបញ្ចប់ យូហៃ ក៏ភ្លេចថ្លែងអំណរគុណជាពិសេសដល់ផលិតកម្មបារមីនិងអ្នកគ្រប់គ្នាដែលបាននៅជាមួយលោកតាំងពីថ្ងៃដំបូង ខណៈតារារ៉េបរូបនេះបញ្ជាក់ថាលោកនៅតែបន្ត រៀន បន្តរស់នៅ និងរីករាយជាមួយនឹងការបន្តដំណើររបស់ខ្លួនក្នុងវិស័យសិល្បៈ៕