ឡៃ ថៃចាន់ ថារឿងតារាទុកឱ្យគេដោះស្រាយអ្វីដែលត្រូវតាមដានគឺរឿង «ប្រទេសជាតិ»

តារាសម្តែង និងជា Influencer ឡៃ ថៃចាន់ បានបញ្ចេញវីដេអូមួយដោយបង្ហាញពីទស្សនៈរបស់លោកចង់ឱ្យសាធារណជនយកចិត្តទុកដាក់បញ្ហាពាក់ព័ន្ធនឹង «ប្រទេសជាតិ» ដើម្បីកុំឱ្យកូនចៅជំនាន់ក្រោយស្តីបន្ទោសជាជាងចាត់ទុករឿងឯកជនភាពរបស់តារាសំខាន់។

នៅព្រឹកថ្ងៃទី១៦ ខែកញ្ញា អ្នកបង្កើតមាតិកា ឡៃ ថៃចាន់ បានបង្ហោះវីដេអូមួយដោយភ្ជាប់មកជាមួយនឹងចំណងជើងថា «រឿងស្នេហារបស់តារាទុកឱ្យតារាគេដោះស្រាយទៅបងប្អូន រឿងជាតិបានជារឿងដែលយើងទាំងអស់គ្នាត្រូវតាមដាន»។

លោកបានចោទជាសំណួរថាដែលមានការភ័យខ្លាចថាបាត់បង់ទឹកដី វប្បធម៌ សម្បត្តិដូនតាបន្សល់ទុកឱ្យ ឬអ្នកជំនាន់ក្រោយស្តីបន្ទោសដែរឬទេ?។ លោកបង្ហាញថាអ្នកមួយចំនួននឹងមានការភ័យខ្លាចដូចជាលោកដែរប៉ុន្តែក្នុងនោះលោកក៏សង្កេតឃើញថាអ្នកមួយចំនួនហាក់ដូចជាបណ្តែតបណ្តោយស្ថានភាពជាតិទុកជារឿងធម្មតា។

ឡៃ ថៃចាន់ បន្តទៀតថាអ្នកមួយចំនួនយករឿងឯកជនភាពតារាសិល្បករធ្វើជារឿងធំដុំដោយរឿងជាតិមិនមានការស៊ែរនោះទេប៉ុន្តែរឿងផ្សេងបែរជាមានការចែករំលែកច្រើន។ អ្នកបង្កើតមាតិការូបនេះបានបង្ហាញពីការខិតខំរបស់ថ្នាក់ដឹកនាំ ឡើងដោះស្រាយតឹងសរសៃក និងមានការទាមទារគ្រប់បែបយ៉ាងអ្វីដែលបាត់បង់ត្រឡប់មកវិញ តែងាកមកពលរដ្ឋវិញហាក់ដូចជាព្រងើយកន្តើយ ហាក់ដូចជាមិនចាប់អារម្មណ៍ទៅវិញ។

វីដេអូរយៈពេល២នាទីរបស់ ឡៃ ថៃចាន់ បានធ្វើឱ្យមហាជនចាប់អារម្មណ៍ជាពិសេសព្រោះលោកបង្ហាញពីការបែងចែករវាងរឿងរ៉ាវក្នុងជីវិតឯកជនរបស់តារា និងបញ្ហាដែលមានសារៈសំខាន់ចំពោះសង្គម និងប្រទេសជាតិដែលពលរដ្ឋគួរតាមដាន។ សាររបស់តារាប្រុសរូបនេះក៏អាចមើលឃើញថាជាការអំពាវនាវឱ្យប្រជាពលរដ្ឋយកចិត្តទុកដាក់ទៅលើរឿងប្រទេសជាតិជាសំខាន់ដែលសង្គមមិនគួរមើលរំលង៕