ភ្លេចៗខ្លួនទើបស្វាគមន៍កូនដំបូងប៉ុន្មានខែមុនពេលនេះ Goofy និងគូស្នេហ៍ បានប្រកាសពីការទទួលបានសមាជិកថ្មីម្នាក់ទៀត។ ក្នុងការពរពោះយ៉ាងឆាប់រហ័សបែបនេះគូស្នេហ៍ Goofy ដឹងថាពួកគេអាចនឹងរកនូវមតិវែកញែកតែរូបនាងមិនចង់លាក់នោះទេដោយសារតែទទួលបានបទពិសោធពីមុន ខណៈលើកនេះជាការពរពោះលើកចុងក្រោយ។
នៅយប់ថ្ងៃទី១ ខែកញ្ញា Cha Kvai ដែលគេដឹងថាជាគូស្នេហ៍របស់តារារ៉េប Goofy បានប្រកាសពីការពរពោះកូនទី៣របស់នាង និងជាកូនទី២របស់នាងជាមួយនឹងតារារ៉េបរូបនេះ។ Cha Kvai បានទាយទុកជាមុនថាវីដេអូដែលចេញទៅនេះនឹងមានការរិះគន់ និងជជែកវែកញែកតែនាងចង់បង្ហាញឱ្យបានម្តងពីព្រោះនេះជាលើកចុងក្រោយដែលនាងមានកូន ខណៈនាងមានបំណងចង់បានកូនចំនួន៤នាក់ ប៉ុន្តែដោយសារតែសុខភាពមិនអំណោយផលទើបអាចយកបានតែ៣ប៉ុណ្ណោះ។ 
គូស្នេហ៍ Goofy បានបញ្ជាក់ពីមូលហេតុដែលចង់បង្ហាញពីការពរពោះនេះដោយសារតែកន្លងមកខ្លាចមានមតិវែកញែកចំពោះការមានកូន តែលើកនេះនាងមិនខ្លាចទៀតនោះទេដោយកូនទី១&២ នាងទទួលបានការវែកញែកទាំងអស់ ហើយបន្ទាប់ពីសម្រាលកូនរួចគឺជាថ្ងៃដែលនាងពិបាកចិត្តលាយឡំនឹងការសប្បាយចិត្តដូច្នេះលើកនេះនាងមិនចង់ពិបាកចិត្តទៀតទើបបានជាបង្ហាញទៅកាន់សាធារណជន។
ការដែលមានកូនញឹកនិងមិនបានឆ្លងកាត់ប្រពៃណី Cha Kvai បានពន្យល់ថានាងជាមនុស្សដែលគិតពីអនាគតច្រើនជាងបច្ចុប្បន្ន នៅពេលនាងចង់បានអ្វី ចង់ធ្វើអ្វី គឺនាងចង់មានកូនហើយនៅពេលចាស់ទៅនៅពេលមានពិធីបុណ្យទានចង់ឃើញកូនៗ និងចៅៗមកលេង។ គូស្នេហ៍ Goofy បន្ថែមថា កូនគឺជារបស់ដែលមានតម្លៃ លើសពីលុយនិងលើសពីអ្វីទាំងអស់ ជាកម្លាំងចិត្តឱ្យនាងតស៊ូដោះស្រាយបញ្ហាមានជីវិតបន្ត។
ក្នុងពេលដែលចាប់ដៃសាងជីវិតគ្រួសារដែលពុំទាន់ត្រៀមលក្ខណៈរួចរាល់ តារារ៉េប Goofy បាននិយាយថាលោកមិនចង់ផ្តល់ជាគំរូទៅកាន់អ្នកផ្សេងទៀតដែលមិនទាន់មានគ្រួសារនោះទេ។ ជាមួយគ្នានេះក្នុងការដែលមានកូនទីពីរនៅក្នុងពោះ Goofy ក៏មានការគិតគូរទៅលើការរៀបចំទៅតាមប្រពៃណីដូចគ្នា តែចង់មានទំនួលខុសត្រូវលើកូនជាជាងមានកូនហើយយកកូនទៅផ្លុងចោលដែលវាជាគំរូមិនល្អឡើយ។
គួរឱ្យដឹងថា Goofy បានស្វាគមន៍កូនដំបូងកាលពីខែកញ្ញា ឆ្នាំ២០២៥ ខណៈ Cha Kvai មានកូនម្នាក់មុននឹងសាងគ្រួសារជាមួយតារារ៉េបរូបនេះ៕
