វ៉ាន់ នីឡា ហួសចិត្តក្រោយឮក្មេងនិយាយថា «មិនចង់ហូបបាយ ចង់ជ.ក់ថ្នាំ»

តារាចម្រៀង វ៉ាន់ នីឡា បានបង្ហាញការហួសចិត្តនិងស្លុតចិត្តមិនតិចនោះទេនៅពេលរូបនាងបានជួបនិងឮផ្ទាល់ត្រចៀកនៅពេលក្មេងម្នាក់បាននិយាយ «មិនចង់ហូបបាយ ចង់ជ.ក់ថ្នាំ» ដែលពាក្យនេះរងឥទ្ធិពលពីបណ្តាញសង្គម។ តារាចម្រៀងរូបនេះបានចាត់ទុកហេតុការណ៍នេះថាជាបញ្ហាមួយដែលឪពុកម្ដាយ និងអាណាព្យាបាលគួរយកចិត្តទុកដាក់ជាពិសេសចំពោះការប្រើប្រាស់បណ្ដាញសង្គមរបស់កុមារនៅពេលពួកគេមិនទាន់អាចបែងចែកអ្វីដែលជាខ្លឹមសារល្អ អ្វីដែលជាខ្លឹមសារមិនល្អ។

នៅយប់ថ្ងៃទី១១ ខែកញ្ញា វ៉ាន់ នីឡា បានចេញវីដេអូមួយដែលបង្ហាញពីសំណេររបស់នាង មុននោះដោយចង់ឱ្យឪពុកម្តាយមានការរឹតបណ្តឹងទាក់ទងនឹងបណ្តាញសង្គមទិកតុក ដែលឱ្យកូនយកទៅ scroll លេងដោយសេរី។ នាងមានការព្រួយបារម្ភពីព្រោះមានវីដេអូច្រើនទម្រង់ទាំងពាក្យសម្តីមិនសមរម្យ និងវីដេអូអាសអាភាសជាដើមមាននៅលើ Platform មួយនេះ។ តារាចម្រៀងនិងជាពិធីការិនីរូបនេះបន្ថែមថាការដែលខ្លួនលើកយកបញ្ហានេះមកនិយាយដោយសារតែនាងបានសង្កេតឃើញច្រើនដងនិងមានការទើសភ្នែកពេក។

វ៉ាន់ នីឡា បានរៀបរាប់ហេតុការណ៍ដែលឮផ្ទាល់ត្រចៀកនៅពេលទៅទិញរបស់ញុំាស្រាប់តែឮសំឡេងកូនក្មេងនិយាយថា «ខ្ញុំមិនចង់ញុំាបាយ ចង់ជក់ថ្នាំ» ជាច្រើនដង ដោយស្មានថាជាសំឡេងចេញពីទូរសព្ទប៉ុន្តែគឺជាសំឡេងផ្ទាល់របស់កូនស្រីអ្នកលក់ ដែលនិយាយតាមទិកតុក។ ដោយការហួសចិត្តពេក វ៉ាន់ នីឡា បាននិយាយដាក់អាណាព្យាបាលក្មេងស្រីនេះដោយនិយាយថា ការនិយាយបែបនេះមិនមែនជារឿងល្អនោះទេ គួរតែមានការវិធានការកុំបណ្តោយឱ្យក្មេងអាយុត្រឹមតែ៥ឆ្នាំនិយាយបែបនេះ។

វ៉ាន់ នីឡា ក៏បានទទួលស្គាល់ពីការមមាញឹករបស់ឪពុកម្តាយក្នុងការរកចំណូល យ៉ាងណាក៏ដោយពុំគួរបណ្តាយឱ្យកូនរបស់ខ្លួនទម្លាប់និយាយបែបនេះនោះទេ ហើយនាងហ៊ាននិយាយថាទិកតុកទោះបីជាមានផលល្អម្យ៉ាងតែវាគឺអាក្រក់បំផុតសម្រាប់ក្មេងៗដែលមិនទាន់ចេះថ្លឹងថ្លែងអ្វីល្អអ្វីអាក្រក់ដូចជាមនុស្សពេញវិញនោះទេ៕