ជា ស្រីនា និង ពេជ្រ វត្តីសារ៉ាវឌ្ឍី លើកទឹកចិត្តនិងផ្តល់កម្លាំងចិត្តទៅកាន់បេក្ខជនប្រលងបាក់ឌុប

ក្នុងឱកាសលទ្ធផលប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៦ ត្រូវបានប្រកាសទូទាំងប្រទេស Influencer ជា ស្រីនា និង ពេជ្រ វត្តីសារ៉ាវឌ្ឍី បានចូលរួមផ្ញើសារលើកទឹកចិត្ត និងផ្តល់កម្លាំងចិត្តដល់សិស្សានុសិស្សទាំងអស់មិនថាទទួលបានលទ្ធផលជាប់ឬមិនបានដូចបំណងក្តី។

អតីតសិស្សនិទ្ទេស A ជា ស្រីនា ដែលបច្ចុប្បន្នជា CEO បានសម្តែងការអបអរសាទរចំពោះប្អូនៗដែលប្រឡងជាប់ និងទទួលបាននិទ្ទេសដែលខ្លួនប្រាថ្នា។ ជាមួយគ្នានេះ ស្រីនា ក៏បានផ្ញើសារលើកទឹកចិត្តទៅកាន់ប្អូនៗដែលមិនទទួលបានលទ្ធផលដូចការរំពឹងទុកដោយស្នើឱ្យកុំបាក់ទឹកចិត្ត។

ជា ស្រីនា បានសរសេរនៅលើបណ្តាញសង្គមនៅថ្ងៃទី២ ខែកញ្ញាថា «អបអរសាទរចំពោះប្អូនៗដែលប្រលងជាប់បាក់ឌុប និងទទួលបាននិទ្ទេសដែលខ្លួនចង់បាន។ សម្រាប់ប្អូនៗដែលមិនសមបំណង សូមកុំបាក់ទឹកចិត្ត ជីវិតយើងនៅវែងឆ្ងាយទៀត។ ងើបឡើង រៀនពីកំហុសចាស់ ហើយបន្តទៅមុខទៀត។ ជីវិតដែលយើងចង់បានវាមិនចប់ទេ ដរាបណាយើងមិនបោះបង់វា។ ស៊ូៗ បន្តទៀតណា»។

ចំណែក ពេជ្រ វត្តីសារ៉ាវឌ្ឍី ក៏បានចូលរួមជូនពរ និងផ្ញើសារលើកទឹកចិត្តដល់បេក្ខជនប្រឡងបាក់ឌុបឆ្នាំ២០២៦ដូចគ្នា។ បវរកញ្ញារូបនេះបានសង្កត់ធ្ងន់ថាលទ្ធផលដែលទទួលបាន មិនថាជាប់ ឬធ្លាក់ គ្រាន់តែជាជំហានមួយក្នុងដំណើរជីវិតប៉ុណ្ណោះ ហើយមិនអាចកំណត់ជោគវាសនារបស់មនុស្សម្នាក់បានទាំងស្រុងឡើយ។

ពេជ្រ វត្តីសារ៉ាវឌ្ឍី បានបញ្ជាក់យ៉ាងដូច្នេះថា «លទ្ធផលថ្ងៃនេះចេញមកបែបណាក៏ដោយ ទោះជាប់ឬធ្លាក់ វាគ្រាន់តែជាកាំជណ្ដើរមួយកាំតែប៉ុណ្ណោះ។ វាមិនបានកំណត់ជោគវាសនាជីវិតប្អូនទាំងស្រុងឡើយ។ បន្តដំណើរជីវិតយើងទៅមុខទៀត ចំណេះ ជំនាញ និងឱកាសល្អៗកំពុងតែរង់ចាំប្អូនចាប់យក»។ «អនាគតយើងមិនបញ្ចប់ត្រឹមលទ្ធផលបាក់ឌុបប៉ុណ្ណឹងឡើយ»។

តាមរយៈសារខាងលើរបស់ ជា ស្រីនា និង ពេជ្រ វត្តីសារ៉ាវឌ្ឍី បានបង្ហាញពីការលើកទឹកចិត្ត និងការផ្តល់កម្លាំងចិត្តដល់យុវជន យុវត្តី កុំឱ្យអស់សង្ឃឹមក្នុងឆាកជីវិត ដោយលទ្ធផលប្រឡងគឺគ្រាន់តែជាជំហានមួយក្នុងជីវិត ខណៈផ្លូវទៅរកក្តីស្រមៃ និងភាពជោគជ័យនៅមានជម្រើស និងឱកាសជាច្រើនទៀត៕