ថៃត្រៀម​សង់លេណដ្ឋាន និងជម្រកការពារ ១,៦៦៩ កន្លែង តាមបណ្តោយព្រំដែនជាមួយកម្ពុជា

គណៈរដ្ឋមន្ត្រីថៃបានអនុម័តកញ្ចប់ថវិកាសង្គ្រោះបន្ទាន់ចំនួន ៤៣៣.៥ លានបាត ដើម្បីពង្រឹងការការពារ និងសាងសង់ជម្រកការពារខ្លួនរួមទាំងលេណដ្ឋានសរុបជាង ១,៦០០កន្លែង តាមខេត្តជាប់ព្រំដែនកម្ពុជាទាំង៧ ដែលគម្រោងនេះរួមមានការសាងសង់ជម្រក និងលេណដ្ឋានសុវត្ថិភាពចំនួន ១,៦៦៩កន្លែង, ប៉មផ្សព្វផ្សាយដំណឹងអាសន្ន ១៤៣កន្លែង ក្នុងបំណងការពារអាយុជីវិតពលរដ្ឋ និងមន្ត្រីថៃ ក្នុងករណីមានការប៉ះទង្គិចគ្នា។
_______________
 
ត្រៀមលក្ខណៈធ្វើសង្គ្រាម ឬយ៉ាងណា? គណៈរដ្ឋមន្ត្រីថៃ អនុម័តកញ្ចប់ថវិកាសង្គ្រោះបន្ទាន់ ៤៣៣.៥ លានបាត (ប្រហែលជាង ១២ លានដុល្លារអាមេរិក) ដើម្បីពង្រឹងការត្រៀមខ្លួន និងសាងសង់ជម្រកការពារខ្លួនរួមទាំងលេណដ្ឋានសរុបជាង ១,៦០០កន្លែង នៅតាមបណ្តោយខេត្តជាប់ព្រំដែនកម្ពុជាទាំង៧ ក្នុងទិសដៅការពារអាយុជីវិតប្រជាពលរដ្ឋ និងមន្ត្រីរបស់ខ្លួន ប្រសិនបើមានការផ្ទុះអាវុធប៉ះទង្គិចគ្នាជាថ្មីកើតឡើងជាយថាហេតុ។
 
យោងតាមការចុះផ្សាយរបស់សារព័ត៌មាន​​ថៃ Khaosod បានអះអាងនៅថ្ងៃទី១៨ ខែសីហា ឆ្នាំ២០២៦ ថា គណៈរដ្ឋមន្ត្រីថៃបានអនុម័តថវិកាបន្ទាន់ចំនួន ៤៣៣.៥ លានបាត (ជាង ១២ លានដុល្លារអាមេរិក)។ កញ្ចប់ថវិការង្វង់រាប់រយលាននេះ នឹងត្រូវយកទៅប្រើប្រាស់ដើម្បីពង្រឹងការត្រៀមខ្លួននៅក្នុងខេត្តចំនួន ៧ តាមបណ្តោយព្រំដែនថៃ-កម្ពុជា។ ថវិកានេះរួមមានការសាងសង់ជម្រកការពារ និងលេណដ្ឋានចំនួន ១,៦៦៩ កន្លែង, ប៉មឧបករណ៍បំពងសំឡេងសាធារណៈនៅតាមភូមិចំនួន ១៤៣ កន្លែង និងការធ្វើឱ្យប្រសើរឡើងនូវប្រព័ន្ធទំនាក់ទំនងវិទ្យុឌីជីថល ដើម្បីបង្កើនប្រសិទ្ធភាពក្នុងការជូនដំណឹងអំពីអាសន្ន និងការសម្របសម្រួលសង្គ្រោះបន្ទាន់ដល់ប្រជាពលរដ្ឋមូលដ្ឋាន។
​
តាមប្រភពព័ត៌មានក្នុងស្រុករបស់ថៃ បានបន្តថា វិធានការទាំងនេះមានគោលបំណងការពារប្រជាពលរដ្ឋ និងមន្ត្រីរបស់ខ្លួន នៅក្នុងករណីដែលមានការប៉ះទង្គិច ឬការគំរាមកំហែងអាសន្នផ្សេងៗ ដូចដែលធ្លាប់បានកើតឡើងយ៉ាងធ្ងន់ធ្ងរកាលពីអំឡុងពេលមានជម្លោះផ្ទុះអាវុធកន្លងទៅ។ ទន្ទឹមនឹងការបង្ការគ្រោះថ្នាក់សង្គ្រាម គម្រោងហេដ្ឋារចនាសម្ព័ន្ធយោធាទាំងនេះ ក៏នឹងរួមចំណែកគាំទ្រដល់ការឆ្លើយតបចំពោះ បទល្មើសឆ្លងដែនខុសច្បាប់, ការរត់ពន្ធទំនិញ, ការជួញដូរគ្រឿងញៀន និងការទប់ស្កាត់សកម្មភាពរបស់ឧក្រិដ្ឋជនឆ្លងដែននានាជាដើម ដើម្បីធានាបាននូវសន្តិសុខ និងសណ្តាប់ថ្រាប់ពេញលេញនៅតាមបន្ទាត់ព្រំដែន។
​
ជារួមមក ចំណាត់ការបោះទុនរាប់រយលានបាតរបស់រដ្ឋាភិបាលថៃ ដើម្បីសាងសង់ជម្រកសុវត្ថិភាព និងលេណដ្ឋានជាង ១,៦០០កន្លែងនៅពេលនេះ គឺស្តែងឱ្យឃើញពីការព្រួយបារម្ភ និងការត្រៀមលក្ខណៈការពារសន្តិសុខផ្ទៃក្នុងយ៉ាងម៉ឺងម៉ាត់។ ទោះបីជាបច្ចុប្បន្ន ស្ថានភាពព្រំដែនស្ថិតក្នុងភាពស្ងប់ស្ងាត់បណ្តោះអាសន្នក៏ដោយ ប៉ុន្តែការសាងសង់រចនាសម្ព័ន្ធការពារខ្លួនទាំងនេះ បង្ហាញថាកម្តៅ និងភាពមិនច្បាស់លាស់នៅតាមបន្ទាត់ព្រំដែនកម្ពុជា-ថៃ នៅតែជាបញ្ហាដុតដៃដុតជើង ដែលទាមទារឱ្យមានការប្រុងប្រយ័ត្នខ្ពស់គ្រប់ពេលវេលា៕