កុំភ្លេចដានប្រវត្តិសាស្ត្រ! ថ្ងៃនេះ ១ឆ្នាំមុន ថៃបានប្រើល្បិច «ចាប់ដៃដ៏គ្រោះថ្នាក់» បោ.កបញ្ឆោតទាហានខ្មែរ

មេរៀនប្រវត្តិសាស្ត្រដ៏ជូរចត់ដែលកូនខ្មែរគ្រប់រូបមិនត្រូវបំភ្លេចដាច់ខាត! អស់រយៈពេល ១ឆ្នាំមកហើយ ដែលព្រឹត្តិការណ៍បោ.កបញ្ឆោតសុំចាប់ដៃក្រោយបទឈប់បា.ញ់របស់យោធាថៃបានបំផ្លា.ញទឹកចិត្ត និងបន្សល់ស្លាកស្នាមលើបេះដូងខ្មែរ។ ឆ្លៀតនៅក្នុងឱកាសនេះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានផ្ញើសារដើម្បីដាស់តឿនកូនខ្មែរគ្រប់រូបឲ្យភ្ញាក់រលឹក និងចងចាំជានិច្ចនូវល្បិចកលពិសពុល ដែលភាគីថៃបានបន្លំចូលមកសុំចាប់ដៃបង្កើតភាពស្និទ្ធស្នាល ប៉ុន្តែបែរជាប្រែក្រឡាស់បញ្ចេញក្រញ៉ាំហ៊ំព័ទ្ធស្ទាក់ចាប់យោធិនខ្មែរធ្វើជាចំណាប់ខ្មាំងទាំងអយុត្តិធម៌បំផុត!

យោងតាមការចុះផ្សាយលើគណនីហ្វេសប៊ុកផ្លូវការរបស់ឯកឧត្តម នេត្រ ភក្ត្រា នាថ្ងៃទី២៨ ខែកក្កដា ឆ្នាំ២០២៦ នេះ លោកបានលាតត្រដាងពីព្រឹត្តិការណ៍ដ៏ជូរចត់កាលពីអំឡុងសង្រ្គាមថៃឈ្លានពានលើកទី១ថា ក្រោយពីបទឈប់បាញ់ដែលភាគីកម្ពុជា និងថៃបានឯកភាពគ្នា ចូលជាធរមាននៅវេលាម៉ោង ០០:០០ នាទី ថ្ងៃទី២៨ ខែកក្កដា ឆ្នាំ២០២៥ ប្រជាជនកម្ពុជា និងកងកម្លាំងជួរមុខសង្ឃឹមថា ការបង្ហូរឈាមនឹងត្រូវបញ្ចប់ ហើយសន្តិភាពនឹងចាប់ផ្តើមវិលត្រឡប់មកវិញ។

ឯកឧត្តមរដ្ឋមន្រ្តីបានបន្ថែមទៀតថា ប៉ុន្តែ នៅព្រឹកថ្ងៃដដែលនោះ មានការរាយការណ៍ថា ទាហានថៃបានចូលមកស្នើចាប់ដៃជាមួយទាហានកម្ពុជា បង្កើតបរិយាកាសដូចជាការផ្សះផ្សា និងការបញ្ចប់ការប្រឈមមុខដាក់គ្នា។ បន្ទាប់ពីនោះ ភាគីថៃបានធ្វើការលោមព័ទ្ធ និងចាប់ខ្លួនយោធិនកម្ពុជាតែម្តង។ ក្នុងចំណោមយោធិនកម្ពុជាចំនួន ២០ នាក់ មាន ១៨ នាក់ត្រូវបានចាប់ខ្លួន ម្នាក់បានស្លាប់ និងម្នាក់ទៀតអាចរួចផុតពីការចាប់ខ្លួន។ បន្ទាប់មក យោធិនទាំង ១៨ នាក់ត្រូវបានឃុំខ្លួនក្នុងនាមជា អ្នកទោសសង្គ្រាម (Prisoners of War – PoWs) រហូតដល់ថ្ងៃទី៣១ ខែធ្នូ ឆ្នាំ២០២៥ ទើបត្រូវបានដោះលែងវិញ ក្រោមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងសហគមន៍អន្តរជាតិ។

ហេតុការណ៍នេះបានបង្កឱ្យមានសំណួរមួយចោទឡើងថា៖ ប្រសិនបើបទឈប់បាញ់បានចូលជាធរមានរួចហើយ ហើយការប្រយុទ្ធបានបញ្ឈប់ តើការចាប់ខ្លួនយោធិនដែលស្ថិតនៅក្នុងតំបន់ដែលកម្ពុជាចាត់ទុកថាជាទឹកដីរបស់ខ្លួន អាចត្រូវបានចាត់ទុកជាការចាប់អ្នកទោសសង្គ្រាមដែរឬទេ? សម្រាប់កម្ពុជា ហេតុការណ៍នេះត្រូវបានមើលឃើញថា មិនមែនជាការចាប់ខ្លួនក្នុងស្ថានភាពប្រយុទ្ធទៀតទេ ប៉ុន្តែជាការប្រើប្រាស់ភាពជឿទុកចិត្តក្រោមបរិយាកាសបទឈប់បាញ់ ដើម្បីនាំទៅដល់ការចាប់ខ្លួនយោធិនកម្ពុជា។ ការឃុំខ្លួនរយៈពេលជាងប្រាំខែ បានបន្សល់ទុកនូវស្នាមរបួសផ្លូវចិត្តដល់យោធិន ក្រុមគ្រួសារ និងសង្គមកម្ពុជាទាំងមូល។

«ការចាប់ដៃ» គួរតែជានិមិត្តរូបនៃសន្តិភាព និងការជឿទុកចិត្ត។ ប៉ុន្តែបើការចាប់ដៃត្រូវបានប្រើជាមធ្យោបាយនាំទៅរកការចាប់ខ្លួន វានឹងក្លាយជានិមិត្តរូបនៃការបាត់បង់ទំនុកចិត្ត ដែលអាចប៉ះពាល់យ៉ាងខ្លាំងដល់ការកសាងសន្តិភាព និងការជឿជាក់រវាងភាគីនាពេលអនាគត។ ហេតុការណ៍នេះនៅតែជាប្រធានបទដែលទាមទារការបំភ្លឺដោយតម្លាភាព ការពិនិត្យដោយឯករាជ្យ និងការទទួលខុសត្រូវ ដើម្បីធានាថា ការអនុវត្តបទឈប់បាញ់ និងការការពារយោធិននឹងត្រូវបានគោរពស្របតាមច្បាប់មនុស្សធម៌អន្តរជាតិ និងដើម្បីកុំឱ្យហេតុការណ៍បែបនេះកើតឡើងម្ដងទៀត។

សរុបជារួមមក សារដាស់តឿនស្មារតីរបស់ឯកឧត្តម នេត្រ ភក្ត្រា គឺជាការដាស់រំលឹកកូនខ្មែរគ្រប់រូបឱ្យយល់ច្បាស់ថា សន្តិភាព និងបូរណភាពទឹកដី មិនមែនបានមកដោយសារការជឿជាក់លើសម្តីផ្អែមល្ហែម ឬការចាប់ដៃរបស់អ្នកដទៃនោះទេ ប៉ុន្តែវាបានមកដោយសារភាពរឹងមាំ និងការភ្ញាក់រលឹករបស់ប្រជាជាតិខ្មែរខ្លួនឯង។ ការចងចាំនូវការឈឺចាប់ប្រវត្តិសាស្ត្រនៅតាមខ្សែបន្ទាត់ព្រំដែនកម្ពុជា-ថៃមួយនេះ នឹងក្លាយជាខែលការពារស្មារតីដ៏មានតម្លៃ ក្នុងការថែរក្សាការពារអធិបតេយ្យភាពជាតិឱ្យបានគង់វង្ស និងរឹងមាំជារៀងរហូត៕