ពេលនេះរឿងកាន់តែក្តៅគគុកហើយក្លិបអ្នកគាំទ្រចិនធំៗដែលគាំទ្រតារាសៀ.មពេលនេះប្រកាសផ្អាកការគាំទ្ររបស់ពួកគេបន្ទាប់ពីក្រុមហ៊ុន GMMTV ចេញលិខិតឆ្លើយតបរាក់កំភែលក្រោយបុគ្គលិកប្រើអំពើហិង្សាលើអ្នកគាំទ្រជនជាតិចិន។ លើសពីនេះទៅទៀតសិល្បករសៀ.មដែលមានវត្តមាននៅក្នុងកម្មវិធីនោះបានដាក់គណនីបណ្តាញសង្គមរបស់ខ្លួនជាលក្ខណៈឯកជន ស្របពេលស្ថានទូតចិនប្រចាំប្រទេសសៀ.មឡូកដៃចាំឃ្លាំងមើលរឿងនេះនិងឱ្យស៊ើបអង្កេតបន្ទាន់លើករណីនេះ។
ស្ថានទូតចិនប្រចាំប្រទេសសៀមបានប្រកាសថាខ្លួននឹងតាមដានយ៉ាងដិតដល់នូវករណីដែលកំពុងកើតឡើងដែលពាក់ព័ន្ធនឹងអ្នកគាំទ្រជនជាតិចិនម្នាក់ និងបុគ្គលិក GMMTV ម្នាក់ដែលត្រូវបានជួលឱ្យធ្វើការហើយបានប៉ះទង្គិចគ្នានៅឯកម្មវិធី។ នៅក្នុងសេចក្តីថ្លែងការណ៍ផ្លូវការមួយ ស្ថានទូតបានបញ្ជាក់ថាខ្លួនបានទទួលរបាយការណ៍ពីពលរដ្ឋចិនដែលពាក់ព័ន្ធនឹងហេតុការណ៍នេះ។ អ្នកគាំទ្ររូបនេះបានដាក់ពាក្យបណ្តឹងទៅប៉ូលិសបន្ទាប់ពីរងអំពើហិង្សាពីបុគ្គលិកកម្មវិធីខណៈពេលកំពុងចូលរួមព្រឹត្តិការណ៍នៅទីក្រុងបាងកកនៅថ្ងៃទី ២៥ ខែកក្កដា។
ស្ថានទូតចិនបានជំរុញឱ្យភាគីពាក់ព័ន្ធទាំងអស់បង្កើតការពិតឱ្យបានឆាប់តាមដែលអាចធ្វើទៅបាន និងដោះស្រាយករណីនេះឱ្យបានសមស្រប។ ស្ថានទូតបានបញ្ជាក់បន្ថែមទៀតថាខ្លួននឹងផ្តល់ជំនួយចាំបាច់ទាំងអស់ដល់អ្នកគាំទ្រ និងចាត់វិធានការសមស្របដើម្បីការពារសិទ្ធិ និងផលប្រយោជន៍ស្របច្បាប់របស់ពលរដ្ឋចិន។
ជុំវិញភាពចម្រូងចម្រាសនេះក្លិបអ្នកគាំទ្រចិនធំៗជាច្រើនបានប្រកាសពីផែនការរបស់ពួកគេក្នុងការផ្អាកគាំទ្រតារាសៀមនិងទាមទារឱ្យក្រុមហ៊ុនកម្សាន្ត GMMTV ចេញសូមទោស។
នៅក្នុងសេចក្តីថ្លែងការណ៍រួម ក្លិបអ្នកគាំទ្របានជំរុញឱ្យ GMMTV សូមទោសជាសាធារណៈចំពោះអ្នកគាំទ្រដែលពាក់ព័ន្ធ ពង្រឹងការត្រួតពិនិត្យបុគ្គលិកព្រឹត្តិការណ៍ទាំងក្នុង និងក្រៅប្រទេស និងកែលម្អពិធីសារសុវត្ថិភាព ដើម្បីធានាឱ្យមានការគោរពស្មើភាព និងការគោរពចំពោះអ្នកគាំទ្រមកពីគ្រប់ប្រទេស និងតំបន់។ ក្លិបអ្នកគាំទ្រទាំងអស់ដែលមានចំនួន១១ ( GeminiFourth CNFC, Gemini CNFC, Fourth CNFC, PondPhuwin CNFC, PPNaravit CNFC, JimmySea CNFC, PerthSanta CNFC, WinnySatang CNFC, WilliamEst CNFC, AouBoom CNFC និង KenPaul CNFC) បានសង្កត់ធ្ងន់ថាព្រឹត្តិការណ៍របស់អ្នកគាំទ្រអន្តរជាតិគួរតែត្រូវបានបង្កើតឡើងដោយគោរពនិងយោគយល់គ្នាទៅវិញទៅមក ដោយបញ្ជាក់ថាមិនមានអ្នកគាំទ្រណាម្នាក់មានអំពើហិង្សា ឬការប្រព្រឹត្តដោយអយុត្តិធម៌ក្នុងពេលចូលរួមសកម្មភាពផ្លូវការឡើយ។
ទន្ទឹមនឹងការផ្អាកគម្រោងគាំទ្ររបស់ពួកគេ ក្លិបអ្នកគាំទ្របានលើកទឹកចិត្តអ្នកគាំទ្រដែលចូលរួមក្នុងព្រឹត្តិការណ៍នៅក្រៅប្រទេសឱ្យកំណត់អាទិភាពសុវត្ថិភាពរបស់ពួកគេ រក្សាភស្តុតាងប្រសិនបើមានឧប្បត្តិហេតុកើតឡើង និងស្វែងរកជំនួយសមស្របនៅពេលចាំបាច់។ ងាកទៅកាន់សិល្បករសៀមដែលចូលរួមព្រឹត្តិការណ៍កាលពីថ្ងៃទី២៥ ខែកក្កដា នោះក៏បានកំណត់បណ្តាញសង្គមរបស់ខ្លួនទាំង Instagram និង X ជាលក្ខណៈឯកជនផងដែរ៕
