ខន សូរិយា ត្រូវគេនិយាយបង្ខូចកេរ្តិ៍ឈ្មោះថា «មានអ្នកចិញ្ចឹម»

តារាសម្តែង ខន សូរិយា ត្រូវបានគេលាបពណ៌យ៉ាងចាស់ដៃនិយាយដើមនាងថា «មានអ្នកចិញ្ចឹម»។ ការចោទប្រកាន់នេះបានធ្វើឱ្យអតីត Miss Would Cambodia 2026 ចេញមកបញ្ជាក់ជាសាធារណៈដោយទទួលស្គាល់ថានាងមានអ្នកចិញ្ចឹមពិតមែនប៉ុន្តែនោះគឺម្តាយឪពុកនាង។

នៅថ្ងៃទី២៧ ខែកក្កដា កញ្ញា ខន សូរិយា បានចេញវីដេអូមួយនៅលើបណ្តាញសង្គមព្រមទាំងទម្លាយថានាងបានឮជាយូរមកហើយពីពាក្យសម្តីដែលគេនិយាយថានាងមានអ្នកចិញ្ចឹម។ ព្យាយាមមិនចង់តបតប៉ុន្តែថ្មីៗនេះ ខន សូរិយា ថានាងក៏បានឮពាក្យនេះម្តងទៀតដូច្នេះទើបចេញជាវីដេអូមកបញ្ជាក់តែម្តង។ ខន សូរិយា ថានាងគ្មានអ្នកចិញ្ចឹមនោះទេ បើមានអ្នកចិញ្ចឹមគឺជាម៉ាក់ប៉ារបស់នាង។

តារាសម្តែងរូបនេះបានផ្តាំផ្ញើទៅបុគ្គលដែលនិយាយពាក្យមិនពិតឱ្យបញ្ឈប់សកម្មភាពរបស់ខ្លួន ពីព្រោះការដែលដើរនិយាយបង្ខូចកេរ្តិ៍ឈ្មោះរបស់គេគឺបាបណាស់។ សូរិយា បញ្ជាក់ទៀតថានាងក៏ជូនពរប្រសិនជាមានឡានទំនើបជិះ មានផ្ទះវីឡា King ឬ Queen មានលុយចាយរាប់ម៉ឺនដុល្លារក្នុង១ខែ។ យ៉ាងណា សូរិយា ថាឆ្នាំរបស់នាងកើតមកគឺត្រូវតែស៊ូខិតខំធ្វើការបើមិនដូច្នេះទេគឺគ្មានលុយចាយនោះទេ ហើយក៏គ្មានអ្នកណាទំនេរបោះលុយមកចិញ្ចឹមនាងដែរ។

ក្រោយពី ខន សូរិយា ចេញមកបញ្ជាក់ថាគ្មានអ្នកចិញ្ចឹមនេះបានធ្វើឱ្យអ្នកលេងបណ្តាញសង្គមជាច្រើនលើកឡើងថាហេតុអ្វីអ្នកមួយចំនួនចូលចិត្តគិតអ៊ីចឹងម្ល៉េះទៅលើមនុស្សស្រី។ ចំណែកមតិខ្លះទៀតក៏និយាយថា សូរិយាស្អាតឆ្លាតពូកែដោយមានសមត្ថភាពហេតុអីបានគិតថាឱ្យតែស្រីស្អាតមានគេចិញ្ចឹម៕