គ្រូបង្វឹកក្រុមជម្រើសជាតិកូរ៉េ រងការគំរា.មសម្លា.ប់ក្រោយដឹកនាំក្រុមឲ្យធ្លាក់ចេញពី World Cup

ឥទ្ធិពលកំហឹងរបស់អ្នកគាំទ្រ! ពេលនេះអតីតគ្រូបង្វឹកក្រុមបាល់ទាត់ជម្រើសជាតិកូរ៉េខាងត្បូង Hong Myung-bo បាននាំយកទាំងក្រុមគ្រួសាររត់ភៀសខ្លួនក្រៅប្រទេសយ៉ាងប្រញាប់ប្រញាល់ បន្ទាប់ពីទទួលបានការរើសអើង ជេរប្រមា.ថ និងការគំរា.មកំហែ.ងដល់អាយុជីវិតយ៉ាងធ្ងន់ធ្ងរពីពលរដ្ឋកូរ៉េ ដែលមិនអាចទទួលយកការបរាជ័យរបស់ក្រុមជម្រើសជាតិបាននៅក្នុងការប្រកួត World Cup 2026 ។

យោងតាមការចុះផ្សាយរបស់ប្រភពព័ត៌មានកីឡាអន្តរជាតិ រលកនៃការផ្ទុះកំហឹងនេះបានកើតឡើងភ្លាមៗ បន្ទាប់ពីក្រុមជម្រើសជាតិកូរ៉េខាងត្បូងត្រូវខ្ទាតចេញពីព្រឹត្តិការណ៍ World Cup ត្រឹមវគ្គជម្រុះតាមពូល ដោយសារលទ្ធផលមិនសមប្រកប។ ទោះបីជាលោក Hong បានប្រកាសលាលែងពីតំណែងដើម្បីទទួលខុសត្រូវរួចហើយក្តី ប៉ុន្តែសាធារណជនកូរ៉េហាក់មិនព្រមលើកលែងទោសឱ្យឡើយ។

អាជីវកម្មក្នុងស្រុកជាច្រើន រួមមាន ហាងអាហារ ហាងកាហ្វេ និងសេវាកម្មដឹកជញ្ជូន បានរួមគ្នាបិទផ្លាកសញ្ញា “បដិសេធមិនស្វាគមន៍លោក Hong Myung-bo” ពាសពេញទីក្រុង។ ស្ថានភាពកាន់តែអាក្រក់ខ្លាំង នៅពេលដែលមានការបង្ហោះសារគំរាមសម្លាប់រូបលោក និងក្រុមគ្រួសារតាមបណ្តាញសង្គម ហូតបង្ខំឱ្យសមត្ថកិច្ចត្រូវដាក់ពង្រាយកម្លាំងការពារសន្តិសុខយ៉ាងតឹងរ៉ឹងនៅព្រលានយន្តហោះ Incheon ពេលលោកធ្វើដំណើរត្រឡប់មកដល់ស្រុកកំណើត។

ដើម្បីស្វែងរកសុវត្ថិភាព និងគេចចេញពីសម្ពាធផ្លូវចិត្តដ៏ធ្ងន់ធ្ងរ លោក Hong Myung-bo បានសម្រេចចិត្តចាកចេញពីប្រទេសកូរ៉េខាងត្បូងឆ្ពោះទៅកាន់ទីក្រុង Los Angeles សហរដ្ឋអាមេរិក ដើម្បីទៅរស់នៅជួបជុំជាមួយភរិយា និងកូនៗរបស់លោក។ យ៉ាងណាមិញ ស្រមោលអាក្រក់នៃកំហឹងនេះហាក់ដូចជានៅតែបន្តតាមលងបន្លាចរូបលោកដដែល។ យោងតាមរបាយការណ៍ចុងក្រោយ រលកនៃការធ្វើពហិការនេះបានរីករាលដាលទៅដល់សហគមន៍ជនជាតិកូរ៉េនៅអាមេរិក (Korean-Americans) ដោយមានហាងអាហាររបស់ជនជាតិកូរ៉េមួយចំនួននៅទីក្រុង Los Angeles បានបន្តបិទផ្លាកមិនលក់អាហារ និងមិនស្វាគមន៍រូបលោកដដែល ដែលបង្ហាញពីឥទ្ធិពលដ៏កាចសាហាវនៃបណ្តាញសង្គម និងកំហឹងអ្នកគាំទ្រដែលគ្មានព្រំដែន។

រឿងរ៉ាវដ៏ជូរចត់របស់លោក Hong Myung-bo បានស្តែងឱ្យឃើញពីឥទ្ធិពលដ៏គួរឱ្យខ្លាចនៃសម្ពាធមហាជន និងការរើសអើងហួសហេតុក្នុងសង្គមកូរ៉េខាងត្បូង។ ពីវីរបុរសបាល់ទាត់ដែលធ្លាប់នាំកិត្តិយសជូនជាតិ បែរជាត្រូវរត់ភៀសខ្លួនដូចជាឧក្រិដ្ឋជន ត្រឹមតែដោយសារលទ្ធផលចាញ់ឈ្នះនៅលើទីលានប្រកួត។ ករណីនេះបានក្លាយជាមេរៀន និងជាការដាស់តឿនមួយដល់ពិភពលោកអំពីព្រំដែនរវាង «ក្តីស្រឡាញ់ចំពោះកីឡា» និង «ការបំពានសិទ្ធិរស់រានមានជីវិតរបស់មនុស្សជាតិ» ដែលមិនគួរឱ្យកើតមានឡើងទាល់តែសោះ៕