នេន ទុំ រងការរិះគ.ន់ពីទស្សនិកជនថាធ្វើឱ្យបាត់បង់តម្លៃសិល្បករជើងចាស់ ណូយ វ៉ាន់ណេត

មុននឹងចេញផ្សាយជាផ្លូវការដំណឹងដែលតារាចម្រៀង នេន ទុំ សហការសាជាថ្មីជាមួយនឹងលោក ណូយ វ៉ាន់ណេត បានធ្វើឱ្យមានការចាប់អារម្មណ៍និងរំពឹងទុកជាខ្លាំង។ ទោះយ៉ាងណាលទ្ធផលដែលទទួលបានគឺផ្ទុយស្រឡះកាលពីមុនដោយទទួលបានមតិរិះគន់ថា នេន ទុំ ធ្វើឱ្យបាត់បង់តម្លៃរបស់សិល្បករជើងចាស់។

«ចាស់នៅតែចាស់ ស្ទាវនៅតែស្ទាវ» គឺជាស្នាដៃថ្មីរបស់លោក នេន ទុំ និងលោក ណូយ វ៉ាន់ណេត ដែលបានចេញជាផ្លូវការនៅថ្ងៃទី ៤ ខែមេសា ឆ្នាំ២០២៦។ បទថ្មីនេះត្រូវបានទស្សនិកជនបញ្ចេញមតិចម្រុះជាច្រើនដោយរិះគន់តារាចម្រៀង នេន ទុំ ថាបានកែសម្រួលសំឡេងរបស់លោក ណូយ វ៉ាន់ណេត ខ្លាំងពេកធ្វើឱ្យបាត់បង់សំឡេងដើមរបស់សិល្បកររូបនេះ។

អត្ថន័យមួយចំនួននៅក្នុងចម្រៀងនេះក៏ផ្ទុះប្រតិកម្មដោយចោទប្រកាន់ថាមិនសមរម្យ ដូចឃ្លាចម្រៀង «ចាស់តែឈ្មោះតែក្រោមក្បាលពោះនៅរស់រវើក» ចំណែកឯឈុតឆាកកន្លែងខ្លះនៅក្នុង MV នេះក៏ធ្វើឱ្យមហាជនចាត់ទុកថាមិនសមរម្យដូចគ្នា។

បន្ទាប់រងនូវមតិប្រតិកម្មជាច្រើនតារាចម្រៀង នេន ទុំ បានធ្វើការបកស្រាយចេញពីសហរដ្ឋអាម៉េរិកថាលោកពុំបានកែសម្រួលសំឡេងរបស់លោក ណូយ វ៉ាន់ណេត នោះទេ។ តារាចម្រៀងរ៉េបរូបនេះបានអះអាងថាសំឡេងគឺមិនបានកែនោះទេតែមកពីចង្វាក់ និងMelodyថ្មី ទើបទស្សនិកជនស្តាប់ច្រឡំគិតថាកែ។ លោកបាននិយាយទៀតថាឆ្នាំ២០២៦ ហើយលោកមិនចង់ឱ្យមានរសជាតិដដែលនោះទេដោយបទនេះលោកចំណាយពេល១ខែដោយមានគោលគំនិតមិនឱ្យជាន់អ្នកណានោះទេទាំង ភ្លេង ប៉ារ៉ូល ហើយលោក ណូយ វ៉ាន់ណេត មិនត្រូវច្រៀងឱ្យដូចលោក ណូយ វ៉ាន់ណេត ដដែលនោះទេដោយបង្កើតស្ទាយ៍ថ្មី។

តារាចម្រៀងរូបនេះបានបកស្រាយទៀតថា ត្រង់ឃ្លាចម្រៀងដែលទស្សនិកជនគិតថាមិនសមរម្យនោះមិនមែនជាពាក្យឈ្លើយនោះទេ ប៉ុន្តែជាពាក្យនិយាយទូទៅ ហើយគ្រប់យ៉ាងដែលលោកធ្វើគឺគ្រាន់តែចង់ឱ្យមានរសជាតិថ្មីប្លែកខុសពីមុនប៉ុណ្ណោះពុំមែនដូចការចោទប្រកាន់ថាលោកយកសិល្បករជើងចាស់មកលេងសើចនោះទេ។

គួរបញ្ជាក់ផងដែរថាក្នុងឆ្នាំ២០១៩ តារារ៉េប នេន ទុំ និងលោក ណូយ វ៉ាន់ណេត បានចេញបទចម្រៀងរួមគ្នាមានចំណងជើងថា «កំលោះចាស់ប៉ះកំលោះស្ទាវ» ដោយទទួលបានសន្ទុះគាំទ្រយ៉ាងខ្លាំង។ មកទល់នឹងពេលនេះបទនេះមានអ្នកចូលស្តាប់លើស១៣លានដងនៅលើឆាណែលយូធូបរបស់ នេន ទុំ ផ្ទាល់ហើយក៏ជាបទចម្រៀងដែលល្បីមានអ្នកស្តាប់ច្រើនបំផុតនៅលើឆាណែលរបស់លោកផងដែរ។ ក្រៅពីបទនេះតារាចម្រៀងទាំងពីរដួងក៏បានសហការគ្នាតាមរយៈបទផ្សេងទៀតដូចជាបទ «ឈូករ័ត្នកំពត» ជាដើម៕