ថ្មីៗនេះ Huang Zitao អតីតសមាជិកក្រុម EXO បានបង្ហាញខ្លួននៅក្នុងកម្មវិធីកម្សាន្តអនឡាញមួយរបស់កូរ៉េខាងត្បូង ដោយចែករំលែកអំពីជីវិត និងគម្រោងបច្ចុប្បន្នរបស់ខ្លួន។ Huang Zitao និយាយជាភាសាកូរ៉េដោយបង្ហាញពីការរៀបការរបស់ខ្លួនប្រកបដោយ អាកប្បកិរិយាធូរស្រាលនិងវិជ្ជមាន។
នៅក្នុងកម្មវិធីនេះ Huang Zitao បានបញ្ជាក់ថាលោកកំពុងពង្រីកអាជីវកម្មនៅក្នុងប្រទេសចិនហើយផលិតផលសំខាន់របស់លោកគឺ «សំឡីអនាម័យ»។លោកបានបញ្ជាក់ថា មូលហេតុដែលលោកចូលទីផ្សារផលិតផលស្ត្រី គឺដោយសារលោកចង់ឱ្យស្ត្រីអាចប្រើប្រាស់ផលិតផលដែលមានសុវត្ថិភាពដោយមិនមានការព្រួយបារម្ភ ឬការថប់បារម្ភ។ Zitao បានសង្កត់ធ្ងន់ថា សុវត្ថិភាពផលិតផលគឺជាស្នូលនៃទស្សនវិជ្ជាអាជីវកម្មរបស់លោកហើយចង់បង្កើតអ្វីមួយដែលស្ត្រីអាចទុកចិត្តបាន។ ក្នុងពេលជាមួយគ្នានេះ Zitao បានបញ្ជាក់ថា ដំណើរការផលិតអាចត្រូវបានត្រួតពិនិត្យនៅពេលណាក៏បាន ដើម្បីធានាបាននូវគុណភាព និងអនាម័យ តម្លាភាព និងសុវត្ថិភាពគឺមានសារៈសំខាន់ជាងប្រាក់ចំណេញរយៈពេលខ្លី។
នៅក្នុងកិច្ចសម្ភាសន៍ននេះ Huang Zitao បានបង្ហាញថា សំឡីអនាម័យប្រមាណ ១៥០លានដុំពីម៉ាក Domyway របស់លោកត្រូវបានលក់ចេញ ដែលបង្កើតប្រាក់ចំណូលប្រហែល ៣១.៦ ពាន់លានវ៉ុនប្រហែល២០លានដុល្លារអាម៉េរិក។
បើទោះបីជាមានតួលេខគួរឱ្យចាប់អារម្មណ៍ក៏ដោយ Zitao បានទទួលស្គាល់ដោយស្មោះត្រង់ថាអាជីវកម្មនេះមិនទាន់មានប្រាក់ចំណូលគ្រប់គ្រាន់នៅឡើយទេ ហើយប្រាក់ចំណេញសុទ្ធនៅតែមានកម្រិតមធ្យម។ ដំបូងឡើយ Huang Zitao បានវិនិយោគប្រហែល ២៧៥ លានយ័ន ដោយរោងចក្រនេះមានខ្សែសង្វាក់ផលិតកម្មចំនួន ៦ ដែលខ្សែសង្វាក់ផលិតកម្មនីមួយៗមានតម្លៃជាង ២០លានយ័ន។ Huang Zitao បានបញ្ជាក់ថាការសម្រេចចិត្តដាក់ឱ្យដំណើរការម៉ាកយីហោនេះគឺកើតចេញពីអារម្មណ៍នៃការទទួលខុសត្រូវសង្គម មិនមែនគ្រាន់តែមកពីគោលដៅពាណិជ្ជកម្មនោះទេ។ប្រភពដើមរបស់ម៉ាកនេះមានទំនាក់ទំនងជាមួយរឿងអាស្រូវដ៏ធំមួយនៅក្នុងប្រទេសចិន ជាកន្លែងដែលក្រុមហ៊ុនផលិតជាច្រើនត្រូវបានគេរកឃើញថាកំពុងកែច្នៃ និងលក់បន្តទំនិញដែលប្រើរួច។
យោងតាមព័ត៌មានលេចធ្លាយ Huang Zitao បានចាប់ផ្តើមថតកម្មវិធីនេះនៅក្នុងខែសីហា ឆ្នាំ ២០២៥ នៅពេលដែលម៉ាកយីហោ Domyway បានដំណើរការត្រឹមតែ ៣ ខែប៉ុណ្ណោះ ដូច្នេះវាអាចទស្សន៍ទាយបានថាពួកគេមិនទាន់ទទួលបានប្រាក់ចំណេញពីការវិនិយោគរបស់ពួកគេនៅឡើយទេ៕
