បទចម្រៀងថ្មីរបស់ព្រះនាង នរោត្តម ចេណ្ណា មានចំណងជើងថា «សារភាពគ្មានន័យ» ទទួលបាននូវការគាំទ្រយ៉ាងខ្លាំងពីសំណាក់មិត្តយុវវ័យ។ មែនទែនទៅបទចម្រៀងនេះគឺល្បីខ្លាំងមុននឹងចេញចម្រៀងផ្លូវការទៅទៀតដោយសារមានបទភ្លេងពីរោះ មានចង្វាក់រាំដែលអាចលេងតៗគ្នារហូតល្បីកក្រើកពេញបណ្តាញសង្គមទិកតុក។
ក្រោយពីទន្ទឹងរង់ចាំជាយូរនូវបទចម្រៀងពេញ កាលពីថ្ងៃទី៦ ខែមករា ព្រះនាង ចេណ្ណា បានទម្លាក់បទថ្មីរបស់ខ្លួនមានចំណងជើងថា «សារភាពគ្មានន័យ» ជាមួយនឹងរូបភាពត្រជាក់ភ្នែកនៃការសម្តែងរបស់ទ្រង់ផ្ទាល់។ លើសពីនេះទៅទៀតបារ៉ូលនៃបទចម្រៀងនេះគឺជាស្នាដៃរបស់ព្រះនាង ចេណ្ណ ផងដែរ។ នៅលើបណ្តាញសង្គមយូធូបគេសង្កេតឃើញថាបទថ្មីរបស់ព្រះនាង ចេណ្ណា មិនត្រឹមតែឆាបឆក់បេះដូងទស្សនិកជនក្នុងស្រុកប៉ុណ្ណោះទេប៉ុន្តែអ្នកគាំទ្រអន្តរជាតិក៏ចាប់អារម្មណ៍និងចូលចិត្តបទថ្មីនេះដូចគ្នា។
មុននឹងបទ «សារភាពគ្មានន័យ» ចេញជាផ្លូវការបទចម្រៀងនេះគឺល្បីល្បាញខ្លាំងស្រាប់រួចទៅហើយ។ នៅវេទិកាទិកតុកក្រុមរាំ SPICY-NAMES បានបង្កើតក្បាច់រាំបទថ្មីរបស់ព្រះនាង ចេណ្ណា ហើយបន្ទាប់មក ក្បាច់រាំនោះបានក្លាយជា Trend នៅលើបណ្តាញសង្គមដោយមានការចូលរួមលេងជាច្រើនកុះករ។ ឃើញបទព្រះនាង ចេណ្ណា ល្បីល្បាញខ្លាំងបែបនេះជនជាតិសៀមមួយចំនួនថែមទាំងចោទប្រកាន់ថាបទរបស់ទ្រង់ចម្លងពីបទផ្សេងទៀតផងប៉ុន្តែត្រូវបានអ្នកគាំទ្របដិសេធជំនួស។
គួរកត់សម្គាល់ថារយៈពេលចុងក្រោយនេះព្រះនាង ចេណ្ណា មានបទចម្រៀងជាច្រើនបទដែលទទួលបានការគាំទ្រពីទស្សនិកជនដូចជាបទ «មែនឬលេង» «សូរិយា (អេតាស៊ីវិល)» ជាដើម៕
