ខាំមាត់សង្កត់ចិត្តអស់រយៈពេលជាច្រើនថ្ងៃពេលនេះតារារ៉េប វណ្ណដា បានចេញចម្រៀង Diss Track ទាំងព្រឹកព្រលឹមទៅកាន់ថៃដោយបានហៅថាជាចោរតជំនាន់ ដើម្បីតែអំណាចធ្វើបាបជនស្លូតត្រង់ ជាទមិឡ មានសាសនាតែធ្វើដូចឡប់។
ប្រជាជនស្លូតត្រង់ជាច្រើននាក់នៅខេត្តកោះកុងត្រូវនាំគ្នារត់ភៀសខ្លួននៅម៉ោង២រំលងអធ្រាត្រឈានចូលថ្ងៃទី១៣ ខែធ្នូ នេះក្រោយយោធាថៃបានបាញ់ចូលតំបន់កោះយ៉ នៅភូមិសាស្ត្រខេត្តកោះកុង។ ក្រោយផ្ទុះអាវុធលោកជំទាវ ឈី វ៉ា អភិបាលថ្មីខេត្តកោះកុងបានណែនាំឱ្យប្រជាពលរដ្ឋជម្លៀសខ្លួនទៅកាន់ទីតាំងសុវត្ថិភាពនៅស្រុកកោះកុង បូទុមសាគរ និងស្រុកស្រែអំបិល។
ការរំលោភបំពានមិនឈប់មិនឈររបស់ថៃបានធ្វើឱ្យតារារ៉េប វណ្ណដា បានទម្លាក់ចម្រៀង Diss Track ទៅកាន់ប្រទេសសៀមទាំងព្រឹកព្រលឹមអមជាមួយរូបភាពរបស់បងប្អូនប្រជាពលរដ្ឋខ្មែរនៅខេត្តកោះកុងរត់ភៀសខ្លួន។ ក្នុងចម្រៀងនេះ វណ្ណដា បានច្រៀងសំឡេងមុតៗថាខ្មែរថែដីខ្មែរអត់ត្រូវការឱ្យនរណាមកថែជំនួស ហើយពួកចោរឈ្លានពានបើមិនងាប់ក៏អាចរងរបួស។
តារារ៉េប វណ្ណដា បានហៅប្រទេសសៀមជាចោរតជំនាន់ស្រែកឃ្លាននិងភ្លើងសង្គ្រាមដើម្បីតែអំណាច។ លើសពីនេះទៅទៀត វណ្ណដា ថាថៃសុទ្ធតែជាពួកទមិឡបាញ់ជនស៊ីវិលជាចរិតថៃធ្វើបាបចាស់ៗ មានអំណាចលើទាហានហើយលេងល្ខោនឱ្យគេមើល។ បទដ៏មុតស្រួលពុំទាន់មានចំណងជើងនេះ វណ្ណដា បាននិយាយថាថៃជាពួកមានល្បិចសុទ្ធតែជាក្រពើ ជាប្រទេសកំប្លែងនៅអាស៊ី។ ពួកចោរដែលឈ្លានពានទឹកដីកម្ពុជា វណ្ណដា ក៏បានលើកឡើងពីទាហានថៃដែលស្លាប់នៅលើទឹកដីខ្មែរផងដែរ។
ជាមួយនឹងសំឡេងម៉ាត់ៗរៀបរាប់ពីសន្តានរបស់សៀមជាចោរតជំនាន់នេះ វណ្ណដា ក៏បានជំរុញឱ្យខ្មែរសាមគ្គីគ្នា ហើយលោកមានឈាមជ័រជាខ្មែរ ថែដូនតាដល់ទីបញ្ចប់ ខណៈ តារារ៉េបរូបនេះថាថៃមានសាសនាដែរតែធ្វើខ្លួនដូចឡប់៕
