បញ្ហាច្រើនពេក! អនុទីន ស្រាប់តែបោះសម្ដីបែបមិនខ្វល់ហាក់ចង់រត់ចោលរដ្ឋាភិបាលថៃ

ទំនងហត់នឿយនឹងបញ្ហាជុំទិសនៅក្នុងប្រទេស ដែលកំពុងដោះស្រាយមិនចេញផង ក្រពុ.លមុខនឹងការទាមទាររបស់គណបក្សប្រឆាំងផង លោក អនុទីន ឆាន់វិរៈគុល បានបោះពាក្យសម្ដីថា «សូមកុំបន្ទោសលោកឲ្យសោះ ប្រសិនបើនៅសល់បញ្ហាជាច្រើនមិនទាន់បានដោះស្រាយក្រោយពេលរំលាយសភា» ដែលធ្វើឲ្យគេយល់ថា នាយករដ្ឋមន្រ្តីរូបនេះកំពុងតែត្រៀមរៀបចំឥវ៉ាន់រត់ចោលរដ្ឋាភិបាលថៃហើយ។

យោងតាមការចុះផ្សាយរបស់សារព័ត៌មាន Khaosod នៅថ្ងៃសុក្រទី២១ ខែវិច្ឆិកា បានចុះផ្សាយពីការថ្លែងរបស់លោក អនុទីន នៅក្នុងវេទិកាធុរកិច្ចមួយថា ស្ថានភាពនយោបាយបច្ចុប្បន្នបានឈានដល់ចំណុចមួយដែល «យើងមិនអាចបន្តទៅមុខទៀតបានទេ» ដោយទទួលស្គាល់ថា រដ្ឋបាលចប្ចុប្បន្នរបស់លោក គឺជារដ្ឋាភិបាលដែលទទួលបានសម្លេងគាំទ្រភាគតិច។ លោកបានបន្ថែមទៀតថា «មិនចាំបាច់មានការជជែកដេញដោលពីភាពគ្មានទំនុកចិត្តអ្វីទេ ព្រោះយើងនឹងចាញ់ស្រាប់ហើយទោះយ៉ាងណាក៏ដោយ»។

ដោយឡែកជុំវិញបញ្ហាពាក់ព័ន្ធនឹងការរំលាយសភាថៃ លោក អនុទីន បានលើកឡើងថា «ខ្ញុំបញ្ជាក់ហើយថា សភានឹងត្រូវរំលាយនៅថ្ងៃទី៣១ ខែមករា ឆ្នាំ២០២៦។ ប្រសិនបើគណបក្សប្រឆាំងមិនអាចរង់ចាំបានទេ ខ្ញុំត្រៀមខ្លួនរួចជាស្រេចដើម្បីរំលាយវានៅថ្ងៃទី១២ ខែធ្នូ ឆ្នាំ២០២៥»។ «ប៉ុន្តែប្រសិនបើមានរឿងជាច្រើនដែលមិនទាន់បានដោះស្រាយ ត្រូវស្តីបន្ទោសអ្នកដែលទទួលខុសត្រូវចំពោះរឿងនោះ កុំមកបន្ទោសខ្ញុំ»។

ពាក្យសម្ដីខាងលើរបស់លោក អនុទីន ត្រូវបានគេយល់ឃើញថា អាចបណ្ដាលមកពីបញ្ហាសម្ពាធការងារដែលត្រូវទទួលបន្ទុកដោះស្រាយបញ្ហាច្រើនពេក ការទាមទាររបស់គណបក្សប្រឆាំង និងការមិនពេញចិត្តរបស់ប្រជាជនមួយភាគធំ បានធ្វើឲ្យលោកអស់កម្លាំងចិត្តក្នុងការសម្ដែងជានាយករដ្ឋមន្រ្តីតទៅទៀត ខណៈបានដឹងយ៉ាងច្បាស់ហើយថារដ្ឋាភិបាលរបស់លោកនឹងបាត់បង់ប្រជាប្រិយភាពដើម្បីយកឈ្នះក្នុងការបោះឆ្នោតនៅឆ្នាំក្រោយ។

ការប្រកាសដោយបើកចំហរបែបនេះ ក៏បាននាំមកនូវមតិរិះគ.ន់មួយទំហឹងពីសមាជិកសភាថៃផងដែរ។ លោក Panusaya សមាជិកសភាបញ្ជីគណបក្ស និងជាអ្នកនាំពាក្យរបស់គណបក្សប្រជាជនរបស់ថៃ បាននិយាយថា ពាក្សសម្ដីមិនចង់ទទួលខុសត្រូវរបស់លោក អនុទីន ជុំវិញការរំលាយសភានៅថ្ងៃទី១២ ខែធ្នូនេះ ប្រៀបដូចជាអ្នកម៉ៅការ ដែលបោះបង់ចោលការងារ ឬបិទអាជីវកម្មដើម្បីរត់គេចខ្លួនពីការត្រួតពិនិត្យអញ្ចឹង។

លោក Panusaya បន្ថែមថា ប្រសិនបើនាយករដ្ឋមន្ត្រីមិនរំលាយសភាត្រឹមថ្ងៃទី ៣១ ខែមករា ឆ្នាំ ២០២៦ ទេ យើងនឹងដាក់ញត្តិមិនទុកចិត្ត ព្រោះវាបានរំលោ.ភលើអនុស្សរណៈនៃការយោគយល់គ្នា ហើយមិនមែនតែគណបក្សប្រជាជនមួយទេ គណបក្សដទៃទៀតក៏មានសិទ្ធិស្របច្បាប់ក្នុងការពិចារណាដាក់ញត្តិ ក្រោមមាត្រា ១៥១ តាមលក្ខខណ្ឌផ្ទាល់ខ្លួនរបស់ពួកគេផងដែរ។

យ៉ាងណាក៏ដោយ ខណៈពេលដែលមានការជជែកវែកញែកអំពីរបៀបដែលច្បាប់នឹងត្រូវបានបកស្រាយ លោក Panusaya ជឿថា ទាក់ទងនឹងការទទួលខុសត្រូវផ្នែកនយោបាយ ប្រសិនបើនាយករដ្ឋមន្ត្រីសម្រេចចិត្តរំលាយសភា វានឹងមិនប៉ះពាល់ជាវិជ្ជមានដល់ទស្សនៈរបស់សាធារណជនចំពោះគាត់ទេ ជាពិសេសនៅក្នុងការបោះឆ្នោតនាពេលខាងមុខ៕