ដ្បិតថាកន្លងមកការជួយយ៉ាងសស្រាក់សស្រាំងរបស់ ហេង វិសាល និង ជា ស្រីនា រងការចោ.ទប្រកាន់លួចកិបកេងស្បៀងបានធ្វើឱ្យអ្នកទាំងពីរស្រងាកចិត្តក្តីប៉ុន្តែនៅពេលពលរដ្ឋខ្មែរជួយទុក្ខលំបាកអ្នកទាំងពីរក៏មិនឱបដៃឈរមើលដូចគ្នាទោះបីជាមិនបានទៅជួយដោយផ្ទាល់ដូចលើកមុន ប៉ុន្តែក៏បានជួយទៅតាមសប្បុរសជនផ្សេងៗ។ ជាក់ស្តែងកាលពីពេលថ្មីៗនេះ(១២ វិច្ឆិកា) ពលរដ្ឋខ្មែរត្រូវបានយោធាថៃវាយប្រហារមានទាំងរបួសនិងស្លាប់ និងជនភៀសសឹកលោកក៏បានជូនជាថវិកាសរុប១៧០០ដុល្លារ។
តាមការបង្ហោះរបស់ ហេង វិសាល នាយប់ថ្ងៃទី១៣ ខែវិច្ឆិកា បានឱ្យដឹងថាថ្ងៃដែលយោធាថៃវាយប្រហារមកលើពលរដ្ឋខ្មែរនៅភូមិព្រៃចាន់គឺជាថ្ងៃដែលឈឺចាប់របស់បងប្អូនខ្មែរយើងទាំងអស់ដែលសុខៗប្រទេសថៃបានបើកការវាយប្រហារមកលើប្រទេសកម្ពុជា រហូតដល់មានបងប្អូនខ្មែរស្លូតត្រង់ចំនួន៥នាក់គ្រោះថ្នាក់ ១នាក់បានស្លាប់ ៣នាក់របួសធ្ងន់ និង១នាក់របួសស្រាល។ លោកបានតំណាងឱ្យបងប្អូនខ្មែរទាំងអស់បានជូនថវិកា៥០០ដុល្លារទៅកាន់គ្រួសារសព ២០០ដុល្លារជូនទៅកាន់អ្នករងរបួសធ្ងន់ និង១០០ដុល្លារទៅកាន់អ្នករងរបួសស្រាលតាមរយៈ តាំង គីមឡេង។
មិនត្រឹមតែជូនជាថវិកាទាំងគ្រួសារសព អ្នករងរបួសធ្ងន់ស្រាលប៉ុណ្ណោះទេប៉ុន្តែ ហេង វិសាល ក៏បានជូនជាថវិកាចំនួន៥០០ដុល្លារចូលរួមធ្វើម្ហូបដល់អ្នកភាសសឹកតាមរយៈលោក Benly Cooking។ ជាមួយគ្នានេះដែរ Influencer ល្បីឈ្មោះរូបនេះបានអះអាងថាលោកបានចាត់ចែងនិងទុកដាក់ប្រាក់មូលនិធិដែលសប្បុរសជនចូលរួមតាមរយៈលោកដោយយកចិត្តទុកដាក់ តាមរយៈលទ្ធផលនេះទើបឥឡូវនេះនៅសល់ប្រាក់ដើម្បីអាចបន្តជួយនៅកាលទេសៈដែលចាំបាច់ និងសំខាន់ដូចជាក់ស្តែងដោយមិនចាំបាច់រៃអង្គាសម្តងទៀត។ 
មិនត្រឹមតែប៉ុណ្ណោះ ហេង វិសាល ក៏បានបង្ហាញតួលេខដែលទទួលបាននិងតួលេខដែលចំណាយនិងបង្កើត Channel Telegram ដើម្បីបង្ហោះរាល់ការប្រើប្រាស់លុយផងដែរ៕
