ងួន សុបិន កំពុងរងការរិះគន់ ខណៈ ស្រីអ៊ីត លើកឡើងចំៗបែបនេះ

លោក ងួន សុបិន ដែលជាអ្នកនិពន្ធបទចម្រៀង បានធ្វើឱ្យសាធារណជនប្រើប្រាស់បណ្តាញសង្គមបញ្ចេញមតិរិះគន់យ៉ាងខ្លាំងបន្ទាប់ពីនិយាយថាប្រសិនជាប្រពន្ធផ្តល់ធ្វើឱ្យប្តីគ្រប់គ្រាន់ ប្តីមិនអាចទៅមានអ្នកផ្សេង។ មិនត្រឹមតែមហាជនប៉ុណ្ណោះទេដែលបញ្ចេញប្រតិកម្ម តារាកំប្លែងស្រីអ៊ីត បានលើកឡើងចំៗទៅកាន់លោក ងួន សុបិន និងមនុស្សប្រុសមួយចំននួទៀត។

នៅថ្ងៃទី១៤ ខែសីហា នេះ លោក ងួន សុបិន ដែលជាសិល្បករពហុជំនាញ ទាំងជាអ្នកចម្រៀង អ្នកនិពន្ធ ពិធីករ រួមទាំងការសម្តែងក្នុងវីដេអូខ្លី បានក្លាយជាប្រធានបទក្តៅគគុកនៅលើបណ្តាញសង្គមបន្ទាប់ពីនិយាយនៅក្នុងកម្មវិធីផតខាស់មួយ។ ក្នុងវីដេអូដែលរីករាលដាលលោក ងួន សុបិន បាននិយាយថាមនុស្សប្រុសទោះបីជាមានប្រពន្ធស្អាតយ៉ាងណានៅតែមាននាយអាយ ប៉ុន្តែបើសិនជាសេចក្តីសុខនៅក្នុងគ្រួសារមិនអាចបំពេញឱ្យបុរសនោះបានតើឱ្យបុរសនោះរកអ្នកផ្សេងឬអត់។

លោកបន្តទៀតថា ប្រសិនជាប្រពន្ធធ្វើឱ្យប្តីគ្រប់គ្រាន់ ប្តីនឹងមិនអាចទៅមានអ្នកផ្សេងបានទៀតនោះទេ។ ត្រង់ចំណុចនេះលោក ងួន សុបិន បានពន្យល់ថា ពាក្យថាគ្រប់គ្រាន់មិនមែនសំដៅតែទៅលើរឿងលើគ្រែឡើយ តែទាក់ទងនឹងផ្លូវកាយ ផ្លូវចិត្ត ផ្លូវអារម្មណ៍ ដែលប្រពន្ធបំពេញសេចក្តីឱ្យប្តីបានគឺប្តីនឹងមិនអាចបែកឆ្វេងបានឡើយ។ ក្នុងការនិយាយខាងលើនេះលោក ងួន សុបិន បានដឹងក្នុងចិត្តហើយថានឹងមាននារីជាច្រើនខឹងសម្បារជេរស្តីលោក។

មិនខុសពីការគិតរបស់លោក ងួន សុបិន ទេនៅពេលនេះអ្នកលេងបណ្តាញសង្គមជាច្រើនសូម្បីតែបុរសមួយចំនួនក៏បានបញ្ចេញមតិរិះគន់លោកយ៉ាងចាស់ដៃផងដែរដែលចាត់ទុកសម្តីរបស់អ្នកសិល្បៈរូបនេះមិនសមហេតុផលឡើយ។ អ្នកលេងបណ្តាញសង្គមខ្លះបានបញ្ចេញមតិដែរថាមិនមែនកំហុសខាងប្រពន្ធនោះទេតែមកពីបុរសជាប្តីមិនចេះឆ្អែតឆ្អន់ខ្លួនឯង។

លើសពីនេះទៅទៀត មិនត្រឹមតែមហាជនប៉ុណ្ណោះទេដែលរិះគន់ពាក្យសម្តីរបស់លោក ងួន សុបិន តារាកំប្លែងស្រីអ៊ីត ក៏បានបញ្ចេញមតិប្រតិកម្មរបស់ខ្លួនដូចគ្នា។ តារាកំប្លែងរូបនេះបានលើកឡើងថា «មិនមែនមកពីមិនគ្រប់គ្រាន់ទេបងគឺជាអារម្មណ៍ ចរិតរបស់មនុស្សប្រុសចំនួនតូចៗដែលចង់សាក ចង់ថ្មី ចង់មិនដដែលៗ។ ពាក្យថាប្រពន្ធគឺចង់មានក្ដីសុខ សុភមង្គលក្នុងគ្រួសារណាស់ ខ្ញុំនិយាយមិនខុសទេតែមកពីប្ដីចង់មានថ្មីម៉ង»៕