តួឯកប្រុស Shawn Dou និងភរិយាជាកូនស្រីមហាសេដ្ឋីកាស៊ីណូទំនងចែកផ្លូវគ្នាមែនទែនហើយ

កាលពីថ្ងៃទី១១ ខែតុលា ប្រព័ន្ធផ្សព្វផ្សាយចិនបានរាយការណ៍ថា ថ្មីៗនេះ Laurinda Ho បានបង្ហាញវិមានប្រណីតថ្មីទំហំ ៧៦០ម៉ែត្រការ៉េរបស់នាងនៅក្នុងទីក្រុងហុងកុង។ ផ្ទះដ៏ប្រណីតមានបណ្តុំវត្ថុបុរាណ ស្នាដៃសិល្បៈដ៏កម្រ អាងហែលទឹកឯកជន និងកន្លែងហាត់ប្រាណផ្ទាល់ខ្លួន។ ប្រភពបានអះអាងថា Laurinda បានផ្លាស់ទៅលំនៅដ្ឋានថ្មីរួចហើយ និងរៀបចំពិធីជប់លៀងជាច្រើននៅទីនោះប៉ុន្តែតារាសម្តែង Shawn Dou ដែលជាស្វាមីបានអវត្តមានគួរឱ្យកត់សម្គាល់ពីគ្រប់ព្រឹត្តិការណ៍។ កាលពីមុនចំណងអាពាហ៍ពិពាហ៍អ្នកទាំងពីរក៏មានពាក្យចចាមអារ៉ាមថាបែកគ្នាផងដែរ។

យោងតាមប្រព័ន្ធផ្សព្វផ្សាយហុងកុង Laurinda អ្នកស្នងមរតកកាស៊ីណូបានលុបរូបភាព Shawn Dou ពីជីវិតរបស់នាងអស់រយៈពេលជិតមួយឆ្នាំ។ នាងបានរស់នៅតែម្នាក់ឯងក្នុងទីក្រុងហុងកុង ដោយបានកាត់ផ្តាច់ទំនាក់ទំនងសាធារណៈជាមួយស្វាមីទាំងស្រុងដោយមិនមានរូបថតរួមគ្នា គ្មានការប្រាស្រ័យលើបណ្តាញសង្គម និងគ្មានការជួបជុំគ្រួសារ។ សូម្បីតែក្នុងអំឡុងពេលព្រឹត្តិការណ៍គ្រួសារសំខាន់ៗក៏ដោយ Laurinda Ho មិនបាននាំ Shawn Dou មកផ្ទះដើម្បីចូលរួមនោះទេដោយនាំឱ្យមានការលើកឡើងថាទំនាក់ទំនងប្តីប្រពន្ធមួយគូនេះទំនងជាបញ្ចប់ហើយ។

អ្នកក្នុងឧស្សាហកម្មបានបង្ហាញថាអាពាហ៍ពិពាហ៍របស់ពួកគេហួសពីការជួសជុលតាំងពីខែឧសភា មកទោះជាព្យាយាមផ្សះផ្សាគ្នាក៏ដោយ ក៏អ្នកទាំងពីរបានបរាជ័យក្នុងការកសាងទំនាក់ទំនងឡើងវិញ។ តាមសេចក្តីរាយការណ៍ថា Laurinda Ho ថែមទាំងបានបណ្តេញ Shawn ចេញពីផ្ទះវីឡាអាពាហ៍ពិពាហ៍នៅទីក្រុងប៉េកាំង ដែលជាអំណោយអាពាហ៍ពិពាហ៍ពីម្តាយរបស់នាង។ ដោយសារតែទ្រព្យសម្បត្តិមិនដែលត្រូវបានផ្ទេរជាផ្លូវការនាងរក្សាសិទ្ធិអំណាចពេញលេញក្នុងការសម្រេចចិត្តថាតើអ្នកណាអាចរស់នៅទីនោះបាន។ គ្រួសារ Laurinda ត្រូវបានគេរាយការណ៍ថាមិនមានការរំខានលើជម្លោះប្តីប្រពន្ធនេះទេព្រោះគូស្នេហ៍ទាំងពីរមិនដែលបានចុះបញ្ជីអាពាហ៍ពិពាហ៍ដោយស្របច្បាប់។ នេះមានន័យថា នៅក្នុងព្រឹត្តិការណ៍នៃការបែកបាក់ Shawn Dou នឹងមិនមានសិទ្ធិទទួលបានផ្នែកណាមួយនៃទ្រព្យសម្បត្តិដ៏ច្រើនរបស់គ្រួសារនោះទេ។ ម្តាយក្មេករបស់តារាសម្តែងប្រុសរូបនេះក៏បានរារាំង លោក ពីការចូលរួមក្នុងកម្មវិធីខួបកំណើត ការជួបជុំគ្រួសារ និងព្រឹត្តិការណ៍ទាំងអស់ទាក់ទងនឹងអាជីវកម្មរបស់គ្រួសារ Ho។

ខណៈពេលដែល Laurinda បន្តរស់នៅក្នុងរបៀបរស់នៅដ៏សម្បូរបែប របាយការណ៍បានបង្ហាញថា Shawn Dou កំពុងជួបការលំបាកផ្នែកហិរញ្ញវត្ថុ។ បន្ទាប់ពីចំណាយប្រាក់ជិត ១០លានដុល្លារ លើថ្លៃរៀបការ និងថ្លៃបណ្ណាការ ក្នុងពិធីមង្គលការ នៅកោះបាលី ដ៏ថ្លៃថ្លា តារាប្រុសរូបនេះ ត្រូវបានគេនិយាយថា មិនសូវមានថវិកា រស់នៅក្រៅសណ្ឋាគារ និងផ្ដោតតែលើការងារ ដើម្បីរក្សាកេរ្តិ៍ឈ្មោះ និងស្ថិរភាពហិរញ្ញវត្ថុ។ ដោយគ្មានការចុះបញ្ជីអាពាហ៍ពិពាហ៍ ការបែកគ្នារវាង Shawn Dou និង Laurinda Ho នឹងមិនពាក់ព័ន្ធនឹងការចែកទ្រព្យសម្បត្តិណាមួយឡើយ។ បច្ចុប្បន្ននេះទ្រព្យសម្បត្តិសុទ្ធរបស់ Laurinda Ho ត្រូវបានគេប៉ាន់ប្រមាណថាប្រហែល ៤០ពាន់លានហុងកុង ដែលធ្វើឱ្យនាងក្លាយជាស្ត្រីដែលមានបំផុតម្នាក់នៅក្នុងរង្វង់កម្សាន្តហុងកុង-ម៉ាកាវ៕