“ផ្ទះតាម៉ុក” គោលដៅទេសចរណ៍ដ៏សំខាន់ក្នុងខេត្តឧត្តរមានជ័យ

លោក ឈិន ជឿន ហៅតាម៉ុក គឺជាអតីត មេដឹកនាំខ្មែរក្រហមដ៏ខ្លាំង និងមានឥទ្ធិពលម្នាក់ ដែលគេស្គាល់ថា “បងធំទីប្រាំ”។

បន្ទាប់ពីការដួលរលំរបបកម្ពុជាប្រជាធិបតេយ្យ (ខ្មែរក្រហម) តាម៉ុក មិនដែលមានបំណងចុះចូលជាមួយរដ្ឋាភិបាលនោះទេ។

តាម៉ុកនៅតែមានអំណាចគ្រប់គ្រងតំបន់ភាគខាងជើង នៃទឹកដីដែលនៅសេសសល់ក្រោមការគ្រប់គ្រងរបស់ខ្មែរក្រហម គឺមូលដ្ឋានរបស់គាត់នៅ អន្លង់វែង នៃជួរភ្នំដងរែក។

តំបន់អន្លង់វែង ត្រូវបានគេស្គាល់ថា ជាអតីតមូលដ្ឋានដ៏រឹងមាំចុងក្រោយរបស់ ក្រុមតស៊ូខ្មែរក្រហម ដែលអតីតមេដឹកនាំខ្មែរក្រហមជាន់ខ្ពស់ដូចជា ប៉ុល ពត នួនជា សុទ្ធសឹងតែធ្លាប់រស់នៅទីនោះ។

នៅចន្លោះឆ្នាំ១៩៩៦ ដល់ឆ្នាំ១៩៩៨ មេដឹកនាំខ្មែរក្រហមជាច្រើនបានចុះចូលជាមួយរដ្ឋាភិបាល តែតាម៉ុក បដិសេធមិនចុះចូល ដោយធ្វើសង្គ្រាមជាមួយរដ្ឋាភិបាល។

លុះដល់ឆ្នាំ១៩៩៩ តាម៉ុក ត្រូវបានចាប់ខ្លួនដោយកងទ័ពរាជរដ្ឋាភិបាលកម្ពុជា នៅក្បែរព្រំដែនកម្ពុជា-ថៃ។ ក្រោយមក តាម៉ុក បានស្លាប់នៅក្នុងមន្ទីរពេទ្យយោធាក្នុងរាជធានីភ្នំពេញ នៅថ្ងៃទី២១ ខែកក្កដា ឆ្នាំ២០០៦ ក្នុងជន្មាយុ៨០ឆ្នាំ។

ដោយធ្លាប់ជាមេទ័ព មានកេរ្តិ៍ឈ្មោះមួយរូប ផ្ទះតាម៉ុក នៅភូមិអភិវឌ្ឍន៍ ឃុំអន្លង់វែង ស្រុកអន្លង់វែង ខេត្តឧត្តរមានជ័យ ត្រូវបានក្លាយជាសារមន្ទីរផ្ទះ និងជារមណីយដា្ឋនទេសចរណ៍ប្រវត្តិសាស្ត្រមួយ នៅខេត្តឧត្តរមានជ័យ ក្នុងឆ្នាំ២០០០៕