អូជី ហ្គូលឌិន ផ្តាំទៅអ្នកទើសឱ្យបកទៅរៀនសីលធម៌ឡើងវិញ ក្រោយនៅប្រៀបធៀបខ្លួនជាមួយនឹង Ranngo

អូជី ហ្គូលឌិន បានបញ្ចេញប្រតិកម្មរបស់ខ្លួនទៅកាន់អ្នករិះគន់ មិនថាខ្លួនគេធ្វើអ្វីក៏ខុសមិនចេញចម្រៀងក៏ខុស ចេញចម្រៀងហើយក៏ខុស ហើយតែងតែប្រៀបធៀបនិងនិយាយថា Ranngo ស័ក្តិសមជាម្ចាស់ពាន។ អូជី ថាមនុស្សម្នាក់ៗមានចំណង់ចំណូលចិត្តរៀងៗខ្លួន ស្ទាយ៍ខុសគ្នា សមត្ថភាពខុសគ្នា។ អូជី ថាអ្នកមួយចំនួនគួរតែបកត្រឡប់ទៅរៀនសីលធម៌ឡើងវិញហើយបើលែងគាំទ្រខ្លួនក៏តាមនឹងចុះព្រោះពេលខ្លះបាក់ទឹកចិត្តមួយទំហឹងដែរ។

អូជី ហ្គូលឌិន បានក្លាយជាម្ចាស់ពានកម្មវិធីប្រលងចម្រៀងរ៉េបមួយរូប ប៉ុន្តែសកម្មភាពរបស់តារារ៉េបវ័យក្មេងរូបនេះជារឿយៗបង្កនូវភាពចម្រូងចម្រាសនៅលើបណ្តាញសង្គម។ ជាក់ស្តែងថ្មីៗនេះ អូជី បានបង្ហាញប្រតិកម្មតបតទៅកាន់អ្នករិះគន់ខ្លួនក្រោយពេលចេញចម្រៀងហើយនៅតែមានការមិនពេញ ខណៈនៅតែមានការប្រៀបធៀបជាមួយនឹង Ranngo មិនចេះចប់មិនចេះហើយ។

នៅថ្ងៃទី១០ សីហា អូជី ហ្គូលឌិន បានបង្ហោះសំណេរមួយថា «ខ្ញុំមានពាក្យមួយចង់និយាយថា.!! បើសិនជាគេមិនចូលខ្ញុំ ហើយ ខ្ញុំធ្វើអ្វីក៏ខុសដែល always គាត់គ្រប់គ្នាតែងយកខ្ញុំ ទៅប្រៀបធៀបជាមួយនឹង Ranngo ថា Ranngo ទើបស័ក្តិសមជាអ្នកទទួលពាន គ្រប់ពេលគឺពួកគាត់តែងនិយាយបែបនេះរហូត ប៉ុន្តែខ្ញុំចង់ប្រាប់រួចនិយាយថាមនុស្សម្នាក់ៗមានចំណង់ចំណូលចិត្តរៀងខ្លួននឹងខុសគ្នា Style ម្នាក់ៗមិនអាចដូចគ្នាបានទេ ហើយនឹងមួយទៀត ដែលអ្នកទើសក្បាលខ្ញុំម្នាក់នេះ ថាបទចេញមកអត់ឃើញ ផ្ទុះ វាគ្មានទេធ្វើ ១០ ២០បទផ្ទុះទាំង ១០ ២០ បទនឹងហ៍….សមត្ថភាពខុសគ្នា»។

ម្ចាស់ពានរូបនេះ បន្តទៀតថា «មនុស្សមានកម្រិតខុសៗគ្នា ក្នុងពិភពអ្នកប្រយុទ្ធតែងមាន អ្នកខ្លាំង អ្នកខ្សោយ ខ្ញុំនិយាយនេះគឺខ្ញុំចង់និយាយព្រោះ ខ្ញុំអត់ចេះលាក់ចរិតទេ ខ្ញុំចូលចិត្តត្រង់ចំកណ្តាលមុខជាំងៗ។ ខ្ញុំនិយាយមែនបើសិនថ្ងៃមុខទៅខ្ញុំមានគ្រួសារខ្ញុំមានកូន ខ្ញុំមិនបង្រៀនកូនខ្ញុំឱ្យធ្វើទង្វើបែបនេះទេខ្មាសគេណាស់។ និយាយមែនខ្ញុំនិយាយនេះសង្ឃឹមថាអស់លោកដែលគាត់បានរៀនតាំងពីថ្នាក់ទី១ ដល់ទី១២ និងសង្ឃឹមគាត់នឹងបកវិលត្រឡប់ទៅមើលសៀវភៅ សីលធម៌ ការនិយាយស្តី និងការគោរពម្តងទៀត»។

អូជី ហ្គូលឌិន ថាសារដែលលោកនិយាយនេះចង់ខឹងលោកក៏ខឹងចុះ ចង់លែងគាំទ្រក៏ចង់ចុះ ពេលខ្លះបាក់ទឹកចិត្តមួយទំហឹងដែលទប់អារម្មណ៍មកច្រើនហើយ.ចេញបទក៏ខុស អត់ចេញក៏ខុស៕