Rick Kh និងពលរដ្ឋខ្មែរបង្ហាញការឈឺចាប់យ៉ាងខ្លាំងចំពោះជនស.ង្ស័យដែលបានក្ប.ត់ប្រទេសជាតិ

អ្នកបង្កើតមាតិកាល្បីឈ្មោះ Rick Kh និងពលរដ្ឋខ្មែរជាច្រើនបានបង្ហាញការឈឺចាប់អមដោយក្តីខឹងសម្បារទៅលើជនសង្ស័យដែលបានក្បត់ប្រទេសជាតិខ្លួនលួចរាយការណ៍ទៅកាន់ប្រទេសថៃ។ អម្រែកដ៏ឈឺចាប់របស់គ្រួសារកងទ័ពជួរមុខ ជនភៀសសឹក និងពលរដ្ឋខ្មែរដទៃ រួមទាំង Rick Kh ស្នើឱ្យរាជរដ្ឋាភិបាលដាក់ទោសជនក្បត់ជាតិឱ្យស័ក្តិសមនូវទង្វើអាត្មានិយមរបស់ជនក្បត់ជាតិមួយក្តាប់តូច។

នៅយប់ថ្ងៃទី២៧ កក្កដា អ្នកបង្កើតមាតិកា Rick Kh បានចេញវីដេអូជាង៣នាទីដោយបានដាក់ចំណងជើងថា «សូមរដ្ឋាភិបាលដាក់ទោសឱ្យសមនឹងសម្រែកឈឺចា.ប់របស់ពួកយើង មនុស្សស្លា.ប់និងជម្លៀសរាប់ម៉ឺននាក់ ដោយសារពួក.តិរច្ឆា.ននេះឯង»។ ក្នុងវីដេអូនេះ Rick Kh បានបង្ហាញការឈឺចាប់របស់ខ្លួនយ៉ាងខ្លាំងទៅលើជនក្បត់ជាតិដែលលួចយកការណ៍ទៅឱ្យចោរសៀមដែលចូលឈ្លានពានទឹកដីខ្មែរ។

ដោយក្តីឈឺចាប់ខ្លាំងពេកនិងមិនធ្លាប់ជេរអ្នកដទៃនោះទេប៉ុន្តែ Rick Kh បានប្រើសម្តីធ្ងន់ៗយ៉ាងខ្លាំងទៅលើជនដែលសង្ស័យថាក្បត់ជាតិទាំងនោះមិនត្រឹមតែចុះនរក១៨ជាន់ទេត្រូវជាប់គុកអស់មួយជីវិត។ Rick Kh ថាប្រសិនជានៅសម័យអង្គរវិញគេសម្លាប់៧គ្រួសារ យកទៅព្យួរកទាល់តែស្លាប់។ លោកថាមិននឹកស្មានថាខ្មែរមានជនថោកទាបដល់ថ្នាក់នេះទេមនុស្សស្លាប់ជាច្រើនដោយសារតែដង្កូវក្នុងសាច់។

នៅព្រឹកថ្ងៃទី២៨ កក្កដា Rick Kh ក៏បានបង្ហោះសំណេរមួយទៀតថា «ជូនចំពោះជនត្រៀមក្បត់ជាតិខ្មែរបើដឹងខ្លួនឯងកំពុងលក់ខួ.រក្បាលឱ្យសត្រូវហើយ ចូរដុត GPS និង អេកូមចោលទៅ ដុតផែនទីសម្រាប់ចាប់ទីតាំងឃ្លាំងអាវុធខ្មែរចោលទៅ ឈប់លក់បេះដូងឱ្យសត្រូវទៅ មិនទាន់ហួសពេលទេ។ ការភ្ញាក់ខ្លួនពេលនេះ អាចផ្តល់ជីវិតថ្មីដល់អ្នក គ្មានមនុស្សអាក្រក់រូបណាមិនអាចប្រែមកល្អបានឡើយ គ្រប់គ្នាសុតតែអាចបញ្ឈប់បាបកម្មបាន សូម្បីតែអង្គលីមារទំលាក់ដាវ មកបួសជាសង្ឃរួចសន្សំកុសលវិញដែរ។ មនុស្សច្រើនណាស់កំពុងរងរបួស ជម្លៀសខ្លួន បាត់បង់ឪពុក ម្តាយជរា គ្មានម្ហូបអាហារ រងផលពិបាកទាំងហូរទឹកភ្នែកសប្រែជាក្រហម សូមពិចារណារផង យើងជាខ្មែរកើតលើទឹកដីខ្មែរដូចគ្នា កុំបំផ្លាញប្រទេសជាតិយើងទៀតអី »។

គួរបញ្ជាក់ផងដែរថា Rick Kh គឺបានដុតដៃដុតជើងយ៉ាងខ្លាំងជួយទៅដល់ជនភៀសសឹក ដែលរងគ្រោះពីអំពើជនឈ្លានពានសៀម៕