ទោះកំពុងនៅក្រៅប្រទេសតែ ជី ដេវីត តាមដានស្ថានការណ៍ជាប់ និយាយផាំងៗលះល្អមិនខ្លាចបាត់ផេក

ទន្ទឹមនឹងស្ថានការតានតឹងមានសង្គ្រាមនៅតាមព្រំដែនចាប់តាំងពីព្រឹកថ្ងៃទី២៤ ខែកក្កដា មក ប្រជាពលរដ្ឋបានបង្ហាញការយកចិត្តទុកដាក់តាមដានស្ថានការជាប់ទោះបីជាមិនបានឈរនៅសមរភូមិមុខក្តី។ ងាកមកកាន់តារាចម្រៀងល្បីឈ្មោះ ជី ដេវីត និង ទេព បូព្រឹក្ស វិញទោះបីជាពេលនេះអ្នកទាំងពីរពុំស្ថិតនៅប្រទេសកំណើតជាប់បំពេញការងារនៅក្រៅប្រទេសក្តីប៉ុន្តែតាមដានជាប់ជានិច្ច ជាពិសេសគឺបានប្រើប្រាស់សំឡេងរបស់ខ្លួនដើម្បីបង្ហាញថាប្រទេសថៃជាអ្នកចាប់ផ្តើមសង្គ្រាមមុន។

នៅយប់ថ្ងៃទី២៤ កក្កដា ជី ដេវីត បានបង្ហោះរូបភាពនិងអមមកជាមួយពាក្យពេចន៍ថា «ថ្ងៃនេះខ្ញុំសោកស្តាយមិនបាននៅក្នុងប្រទេសជាមួយបងប្អូនដោយខ្ញុំនិងភរិយាបានមកបំពេញភារកិច្ចកាងារនៅក្រៅប្រទេសហើយក៏ទើបនឹងបានបញ្ចប់ការថតមុននេះបន្តិចប៉ុន្តែទោះជាយ៉ាងណាក៏ Account Facebook និង ទូរស័ព្ទមិនបានឃ្លាតពីដៃទេទំនេរជេរចោរជាធម្មតា។ ខ្ញុំនិងភរិយាសម្រាប់ជាតិមាតុភូមិ និង វប្បធម៌ពួកយើងនឹងតស៊ូជាមួយបងប្អូនរួមឈាមខ្មែរ សម្លេងមួយនឹងបែកចេញជាមួយលានចាប់ផ្តើមពីយើងទាំងអស់គ្នា តស៊ូជាមួយគ្នាដល់ទីបញ្ចប់»។

នៅថ្ងៃទី២៥ កក្កដា នេះ ជី ដេវីត ក៏បានបង្ហោះសំណេរមួយទៀតថា «ខ្លាចស្អីពួកអាអស់ហ្នឹង? បងប្អូនកងទ័ពបូជាឈាមបូជាសាច់ជាមួយនឹងគ្រាប់ជាមួយរំសេវជាមួយសត្រូវ ដាក់ជីវិតធ្វើដើមទុនដើម្បីទឹកដីដើម្បីសន្តិភាពបែកពីគ្រួសារមិនស្តាយសូម្បីជីវិតហើយយើងស្អីមកស្តាយ Page ? ស្តាយហ្វេនចោរ ខ្លាចវាBanឈប់ឱ្យទៅជិះទូកហិតទឹកលូវាមែន ? ខ្ញុំរាប់អានមិត្តច្រើនជាតិសាសន៍តែអាណាប៉ះខ្មែរដោយប្រដាប់អាវុធ ប៉ះពាល់អាយុជីវិតកងទ័ពនិងប្រជាជនខ្មែរ អញទះហ្អែងអោយបែកមាត់ មកReport មកអាសត្វ ។ រឿងទឹកដី រឿងសង្គ្រាមការពារដែនដី កុំភ្លើខុសរបៀបប្រយ័ត្នអនាគតកូនសួរ អត់ស្អីនិយាយប្រាប់កូន»។

ជុំវិញកងកម្លាំងប្រដាប់អាវុធរបស់ថៃប្រើប្រាស់កាំភ្លើងធំ និងការទម្លាក់គ្រាប់បែក ពីលើអាកាសបានធ្វើឱ្យប៉ះពាល់និងបំផ្លិចបំផ្លាញទីតាំងជុំវិញ និងរចនាសម្ព័ន្ធផ្ទាល់របស់ប្រាសាទព្រះវិហារ តារាចម្រៀង ជី ដេវីត គឺបានប្រើសំឡេងរបស់ខ្លួនអំពាវនាវឱ្យអង្គការយូណីស្កូ ជួយអន្តរាគមន៍ផងដែរ។

មិនត្រឹមតែបង្ហោះនៅលើផេកដែលមានអ្នកតាមដានជាង៣លាននាក់ប៉ុណ្ណោះទេ ងាកទៅកាន់បណ្តាញសង្គមផ្ទាល់ខ្លួនវិញ ជី ដេវីត បានបង្ហោះនិងចែករំលែកបន្តជាច្រើនព្រមទាំងសរសើរយុទ្ធិសាស្រ្តសង្គ្រាមរបស់សម្តេច។ ជី ដេវីត បានបង្ហោះថា «យុទ្ធសាស្រ្តពិជ័យសង្គ្រាមរបស់សម្តេចនៅតែបង្កើតបាននូវរឿងមិនគួរឱ្យជឿ ប្រាំពីរប្រាំបីច្រកសត្រូវវាយសង្រ្គប់ក្នុងពេលតែមួយមិនត្រឹមតែគ្រប់គ្រងស្ថានការបានទេ,ថែមទាំងដេញខ្មាំងរត់បាស់ជើងបានទៀត ពិតជាឆ្នាំងចាស់បាយឆ្ងាញ់ពិតមែន អស្ចារ្យមែន»៕