លោក អាភិស៊ីត ទទួលស្គាល់ថាសម្ដេចតេជោដឹងច្រើនពីផ្ទៃក្នុងប្រទេសថៃ

អតីតនាយករដ្ឋមន្រ្តីទី២៧ របស់ថៃ លោក អាភិស៊ីត វេចាជីវ៉ា លើកឡើងថា អ្វីដែលសម្ដេចតេជោ ហ៊ុន សែន បានលាតត្រដាងពីលោក ថាក់ស៊ីន គឺជាការពិត និងទទួលស្គាល់ថាសម្ដេចពិតជាដឹងរឿងរ៉ាវពាក់ព័ន្ធនឹងផ្ទៃក្នុងរបស់ថៃច្រើន។

យោងតាមឃ្លីបវីដែអូនៅក្នុងបទសម្ភាសន៍មួយជាមួយសារព័ត៌មាន The Standard កាលពីថ្ងៃសុក្រ ទី១៨ ខែកក្កដា លោក អាភិស៊ីត បាននិយាយថា៖ នៅពេលដែលលោក ហ៊ុន សែន បាននិយាយអ្វីទាំងអស់ពាក់ព័ន្ធនឹងខ្ញុំ ខ្ញុំត្រូវតែទទួលស្គាល់ថា «វាគឺជាការពិត»។ ចំណែកភស្តុតាងថាតើព័ត៌មានដែលលោក ហ៊ុន សែនដឹងនោះបានមកពីលោក ថាក់ស៊ីន ឬយ៉ាងណានោះ យើងមិនច្បាស់ទេ ។ ប៉ុន្តែលោក ហ៊ុន សែន បានប្រាប់ថា គឺបានមកពីលោកថាក់ស៊ីន។

លោក អាភិស៊ីត បានបន្តទៀតថា៖ ខ្ញុំគ្រាន់តែកត់សម្គាល់ថា ឯកសារ ឬអាថ៌កំបាំង ដែលបែ.កធ្លាយដល់លោកហ៊ុន សែន នោះ ប្រហែលជាឯកសារតែមួយដូចគ្នានឹងឯកសារដែលលោក ចតុផន ព្រំផាន់ បានយកមកលាតត្រដាង ហើយក៏ត្រូវបានចាត់ការតាមនីតិវិធីច្បាប់ពីបទបញ្ចេញឯកសារសម្ងាត់របស់រដ្ឋាភិបាល។ ដូច្នេះបើសម្រាប់ខ្ញុំ ខ្ញុំសូមប្រាប់ថា អ្វីដែលលោក ហ៊ុន សែន និយាយគឺពិតមែន។

អតីតនាយករដ្ឋមន្រ្តីថៃរូបនេះបាននិយាយរម្លឹកដល់រឿងរ៉ាវកាលពីឆ្នាំ២០០៩ ដែលមានហេតុការណ៍មួយកើតឡើងចំពេលមានកិច្ចប្រជុំអាស៊ាននៅប៉ាតាយ៉ា។ កាលនោះ មានក្រុមបាតុករបានព្យាយាមធ្វើឲ្យកិច្ចប្រជុំនោះបរាជ័យ ហើយអ្វីដែលពួកគេធ្វើបានសម្រេចនោះគឺការបិទផ្លូវ ដែលធ្វើឲ្យមេដឹកនាំប្រទេសមួយចំនួន មិនអាចមកចូលរួមកិច្ចប្រជុំអាស៊ានបានទេនាពេលនោះ។

លោក អាភិស៊ីត អះអាងថា៖ នៅទីបំផុតខ្ញុំក៏សម្រេចចិត្តលុបកិច្ចប្រជុំនោះចោល ពេលមានហេតុការណ៍នេះកើតឡើង។ ខ្ញុំនៅចាំច្បាស់ ខ្ញុំបាននិយាយថា យើងបើកកិច្ចប្រជុំនេះមិនបានទេ (ពេលនោះប្រហែលជាម៉ោង ១០-១១ ថ្ងៃត្រង់) កិច្ចប្រជុំមិនអាចធ្វើបាន ប៉ុន្តែវាមិនអីទេ សម្រាប់អ្នកដែលបានអញ្ជើញមកដល់ហើយ យើងនឹងទទួលទានអាហារជាមួយគ្នា។ ប៉ុន្តែលោក ហ៊ុន សែន បានបដិសេធថា «មិនបាច់ទៅទទួលទានអាហារអីទេ» ហើយពេលនោះយើងក៏បែកផ្លូវគ្នាទៅ។ បន្ទាប់ពីនោះប៉ុន្មាននាទីក្រោយមក ក្រុមបាតុករក៏បានសម្រុកចូលមកដល់សណ្ឋាគារ (ដែលរៀបចំកិច្ចប្រជុំអាស៊ាន) តែម្ដង។

លោក អាភិស៊ីត បញ្ជាក់ចុងក្រោយថា៖ ខ្ញុំបានកត់សម្គាល់តាំងពីពេលនោះមកថា លោក ហ៊ុន សែន ពិតជាដឹងច្រើនមែន។

គួររម្លឹកថា កាលពីថ្មីៗនេះសម្ដេចតេជោ លាតត្រដាងខ្លះៗនូវទង្វើរបស់ ថាក់ស៊ីន ដែលបាននិយាយប្រមា.ថដល់ព្រះមហាក្សត្រថៃ រួមទាំងជីវិតនយោបាយរបស់ត្រកូល ថាក់ស៊ីន ស្ថានការណ៍នយោបាយនៅប្រទេសថៃកាន់តែមានភាពវឹកវរ។ ក្នុងនោះ ការជឿទុកចិត្តរបស់សាធារណជនចំពោះគ្រួសារ Shinawatra កំពុងធ្លាក់ចុះយ៉ាងខ្លាំង៕