លោក ណាវ៉ាត់ និយាយបែបនេះដាក់ ពេជ្រ វត្តីសារ៉ាវឌ្ឍី ក្នុងការចូលប្រកួតបវរកញ្ញា ចក្រវាលកម្ពុជា

អ្នកតាមដានវិស័យបវរកញ្ញាជ្រាបមកហើយថាកញ្ញា ពេជ្រ វត្តីសារ៉ាវឌ្ឍី បានក្លាយជាបេក្ខភាពផ្លូវការនៃការប្រកួតបវរកញ្ញាចក្រវាលកម្ពុជាឆ្នាំ២០២៥ ដែលនឹងត្រូវប្រកួតប្រជែងជាមួយបេក្ខភាពផ្សេងទៀតដើម្បីឈ្នះមកុដមួយនេះ។ ទោះយ៉ាងណា ការផ្លាស់ប្តូរពីការប្រកួត Miss Grand មកកាន់ Miss Universe ពេជ្រ វត្តីសារ៉ាវឌ្ឍី បានក្លាយជាមុខព្រួញមួយជាពិសេសទាក់ទងជាមួយនឹងលោក ណាវ៉ាត់។

នៅក្នុងការ Live នាពេលថ្មីៗនេះមានអ្នកលេងបណ្តាញសង្គមបានចោទសួរទៅកាន់លោក ណាវ៉ាត់ អំពីការប្រកួតរបស់ ពេជ្រ វត្តីសារ៉ាវឌ្ឍី ទៅកាន់ឆាកបវរកញ្ញាចក្រវាលកម្ពុជា ។
អ្នកលេងបណ្តាញសង្គមនោះបានសួរថា «តើអ្នកគិតយ៉ាងណាចំពោះ Pitchy មកប្រកួតបវរកញ្ញាចក្រវាលកម្ពុជា? លោក ណាវ៉ាត់ បានឆ្លើយតបថា «ខ្ញុំមិនបានគិតអ្វីទាំងអស់។ ហេតុអ្វីបានជានាងមក? ប៉ុន្តែនាងមានសេរីភាព។ យើងមិនអាចបញ្ឈប់អ្នកណាម្នាក់មិនឱ្យមក ឬទៅបវរកញ្ញាចក្រវាលបានទេ។ មនុស្សគ្រប់រូបមានសិទ្ធិ។ ពួកគេអាចមកបាន។ ប៉ុន្តែយើងមានកាតព្វកិច្ចវិនិច្ឆ័យមែនទេ? ព្រោះវាជាកាតព្វកិច្ចរបស់យើង»។

គួរឱ្យដឹងថា លោក ណាវ៉ាត់ បាន Unfollowed ពេជ្រ វត្តីសារ៉ាវឌ្ឍី អំឡុងពេលប្រធាន MGI រូបនេះមានជម្លោះជាមួយលោកស្រី អ៊ឹម សុគន្ធា ដែលកម្ពុជាសម្រេចធ្វើជាម្ចាស់ផ្ទះពាក់កណ្តាលក្នុងការប្រកួត Miss Grand International 2024។ ក្រោយមានរឿងរកាំរកូសភាពស្និទ្ធស្នាលរបស់អ្នកទាំងពីរ ត្រូវបានឃ្លាតឆ្ងាយខណៈកាលពីមុន ពេជ្រ វត្តីសារ៉ាវឌ្ឍី ទទួលបានការស្រលាញ់ពីលោក ណាវ៉ាត់ ច្រើនព្រមទាំងផ្តល់ការងារឱ្យនៅប្រទេសថៃជាហូរហែ។

មែនទែនទៅនេះមិនមែនជាលើកទី១នោះទេសម្រាប់ ពេជ្រ វត្តីសារ៉ាវឌ្ឍី ក្នុងការប្រកួត Miss Universe Cambodia ព្រោះមុននឹងទទួលបានតំណែង Miss Grand Cambodia 2022 នាងក៏បានចូលរួមប្រកួត Miss Universe Cambodia 2020 ផងដែរដោយនាងទទួលបានតំណែងលំដាប់រងទី២ ៕