ដូចប្រិយមិត្តមួយចំនួនជ្រាបមកហើយថាការសហការរវាង វណ្ណដា និងតារាហ៊ីបហបថៃ Youngohm បង្កឱ្យមានការចាប់អារម្មណ៍យ៉ាងខ្លាំងខណៈអ្នកទាំងពីរសុទ្ធតែល្បីឈ្មោះប្រចាំប្រទេសដូចគ្នា។ ទោះយ៉ាងណា មូលហេតុនៅពីក្រោយដែល វណ្ណដា សម្រេចចិត្តសហការជាមួយនឹង Youngohm ត្រូវបានលាតត្រដាងកាលពីពេលថ្មីៗនេះ។
តាមរយៈវីដេអូរបស់ Bee Moo បង្ហោះនៅលើបណ្តាញសង្គមនាពេលថ្មីៗនេះក្នុងពេលទៅចូលរួមការប្រគំតន្រ្តីរបស់ វណ្ណដា នៅខេត្តបាត់ដំបង វណ្ណដា បានទម្លាយអំពីមូលហេតុនៃការសម្រេចចិត្តសហការជាមួយនឹងតារាថៃ Youngohm ទៅលើបទចម្រៀងមានចំណងជើងថា «smoke up» បទមួយនៅក្នុងអាល់ប៊ុមទី៣របស់ខ្លួនដែលបានចេញទៅថត MV នៅប្រទេសថៃ។
វណ្ណដា បានបង្ហាញថា មូលហេតុការសម្រេចចិត្តសហការរបស់ខ្លួនជាមួយនឹង Youngohm លោកបានប្រាប់ទៅកាន់ក្រុមការងារមិនធ្លាប់បានប្រាប់ទៅខាងក្រៅនោះទេ ហើយការសម្រេចចិត្តសហការគ្នានេះគឺដោយសារតែសមត្ថភាពរបស់លោកនិង Youngohm គឺស្រដៀងគ្នាច្រើនជាមួយនឹងជំនាញ(Skill) តាំងពីអត្តចរិត តាំងពីការនិយាយចូលគ្នាគឺលោកស្រលាញ់ Youngohm មែនទែនហើយលោកគិតថា Youngohm ស័ក្តិសមជាមួយនឹងបទ «smoke up»។
ជាមួយនឹងការលាតត្រដាងនេះ វណ្ណដា បានបង្ហើបដែរថាលោកនឹងមានបន្តទៀតដោយសង្ឃឹមថាទស្សនិកជននឹងពេញចិត្តជាមួយនឹងបទ «smoke up» ហើយវាជាក្តីស្រមៃមួយរបស់លោកក្នុងការសហការគ្នានេះដោយលោកគិតថាលោកនិង Youngohm គួរតែមាន Track ជាមួយគ្នា។ នាថ្ងៃទី១៧ ខែឧសភា ខាងមុខនេះតារាថៃ Youngohm នឹងមានវត្តមានចូលរួមការប្រគំតន្រ្តីដ៏ធំរបស់ វណ្ណដា ផងដែរ។
«smoke up» បានទម្លាក់ MV នៅថ្ងៃទី១៣ ខែមីនា ឆ្នាំ២០២៥ ដែលមកទល់ពេលនេះមានការទស្សនាលើសពី២.៥លានដង។ គួរឱ្យដឹងថាមុននឹងសហការជាមួយ Youngohm វណ្ណដា ធ្លាប់មានការសហការដ៏ជោគជ័យជាមួយតារារ៉េបនៅប្រទេសថៃផ្សេងទៀតដូចជាបទ « Run The Town» ជាមួយ F.HERO 1MILL & SPRITE ដែលបានទម្លាក់កាលពីឆ្នាំ២០២២ និងបទ «BONG» ជាមួយ OG BOBBY ៕
