កម្ពុជា នឹងប្រើប្រាស់រថភ្លើងល្បឿនលឿនប្រទេសឡាវ ដឹកជញ្ជូនផលិតផលកសិកម្មទៅកាន់ទីផ្សារចិន

កាលពីថ្ងៃទី៣០ ខែមេសា ដល់ថ្ងៃទី៣ ខែឧសភា ឆ្នាំ២០២៥ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខប្រមាញ់និងនេសាទ បានដឹកនាំគណៈប្រតិភូជាន់ខ្ពស់ធ្វើដំណើរទស្សនកិច្ចផ្លូវការ និងបើកកិច្ចប្រជុំ ពាក់ព័ន្ធនឹងការសហការទ្វេភាគីលើវិស័យកសិកម្ម។

ជាលទ្ធផល នៃកិច្ចប្រជុំនេះ ភាគីទាំងពីរបានឯកភាពគ្នាលើកិច្ចសហប្រតិបត្តិការអាទិភាពចំនួន៣ សំខាន់ៗ ដែលរួមមាន៖

១.កិច្ចសហប្រតិបត្តិការលើធាតុចូលកសិកម្ម
២.កិច្ចសហប្រតិបត្តិការលើឆាកអន្តរជាតិ

៣.ការជំរុញកសិពាណិជ្ជកម្មទ្វេភាគី ដែលក្នុងនោះ ភាគីឡាវ បានអនុញ្ញាតឱ្យកម្ពុជាប្រើប្រាស់ប្រព័ន្ធដឹកជញ្ជូនតាមផ្លូវដែកនិងរថភ្លើងល្បឿនលឿនឆ្លងកាត់ប្រទេសឡាវ ទៅកាន់ទីផ្សារចិន ឬប្រទេសទី៣ ដែលនឹងជួយបង្កើនទីផ្សារថ្មីសម្រាប់ផលិតផលកសិកម្មកម្ពុជា។

គួរបញ្ជាក់ថា ខ្សែរថភ្លើងល្បឿនលឿនឡាវ-ចិន មានចម្ងាយផ្លូវ៤១៤គីឡូម៉ែត្រ ស្ថិតក្រោមគម្រោងខ្សែក្រវាត់ និងវិថីរបស់ចិន ដែលចំណាយថវិកា៦ពាន់លានដុល្លារ៕