បទចម្រៀងថ្មីរបស់តារាចម្រៀង នាង ដាវីន មានចំណងជើងថា «គេជាអ្នកណា» ផ្ទុះការគាំទ្រមិនធម្មតា រហូតដល់ម្ចាស់ពានពីររូបគឺ សួ វិចិត្រ ម្ចាស់ពាន Beat The Best រដូវកាលទី១ និង លីម តិចម៉េង ម្ចាស់ពាន Cambodian Idol រដូវកាលទី២ ដេញហ្គីតា Cover បទនេះ។ មិនត្រឹមតែប៉ុណ្ណោះតារាចម្រៀងក្រៅទ្រនំ កញ្ញា អ៊ីវ៉ា ក៏បានកោតសរសើរសំឡេង នាង ដាវីន។
វីដេអូចម្រៀង «គេជាអ្នកណា» បានទម្លាក់ជាផ្លូវការកាលពីយប់ថ្ងៃទី១ ឧសភា នៅក្នុងផលិតកម្មរស្មីហង្សមាសពីតារាចម្រៀង នាង ដាវីន ដែលឆ្លុះបញ្ចាំងពីស្នេហាបែបជនបទ។ ស្នាដៃលេចធ្លោរបស់ នាង ដាវីន នេះគឺមានការរួមចំណែកពីតារាចម្រៀង NPN ដែលកំពុងទទួលនូវប្រជាប្រិយភាពពីទស្សនិកជនដែលជាដៃគូស្និទ្ធស្នាលរបស់តារាចម្រៀង ទេព ពិសិដ្ឋ។
ជាមួយនឹងសន្ទុះគាំទ្រ «គេជាអ្នកណា» របស់ នាង ដាវីន គេបានឃើញតារាចម្រៀងដែលជាម្ចាស់ពានក្នុងកម្មវិធីលំដាប់ពិភពលោកចំនួនពីរបាន Cover ជាមួយនឹងការដេញហ្គីតារបស់ខ្លួនទៅជាចង្វាក់ Acoustic នោះគឺជាម្ចាស់ពាន Beat The Best រដូវកាលទី១ និង ម្ចាស់ពាន Cambodian Idol រដូវកាលទី៤ លីម តិចម៉េង។ 
ក្រៅពីទស្សនិកជនម្ចាស់ពានទាំងពីររូបនេះ ស្នាដៃថ្មីរបស់ នាង ដាវីន ក៏ត្រូវបានតារាចម្រៀងក្រៅទ្រនំគឺកញ្ញា អ៊ីវ៉ា ក៏បានកោតសរសើរទឹកដមសំឡេងរបស់ នាង ដាវីន ដូចគ្នា។ តារាចម្រៀង អ៊ីវ៉ា បានសរសេរនៅលើបណ្តាញសង្គមរបស់ខ្លួនថា «កូនហ្នឹងច្រៀងពីរោះពេកហើយ ឡើងស្លុងតាម»។
គួរបញ្ជាក់ផងដែរថា «គេជាអ្នកណា» ជាស្នាដៃផ្ទុះការគាំទ្រខ្លាំងរបស់តារាចម្រៀង នាង ដាវីន ដែលមានតារាចម្រៀងផ្សេងសរសើរនិងបាន Cover បទរបស់លោកចាប់តាំងពីក្លាយជាតារាចម្រៀងកុងត្រាមក៕
