ពលរដ្ឋតួកគីសុខចិត្តលោ.តពីលើអគារ ដោយហេតុតែភ័យខ្លា.ចគ្រោះរញ្ជួយដី

ប្រទេសតួកគី ៖ សារព័ត៌មានបរទេសរាយការណ៍ថា កាលពីថ្ងៃទី២៣ ខែមេសា ឆ្នាំ២០២៥ គ្រោះរញ្ជួយដីកម្រិត៦.២រិចទ័រ បានកើតឡើងនៅឆ្នេរសមុទ្រទីក្រុងអ៊ីស្តង់ប៊ុល ប្រទេសតួកគី ដែលធ្វើឱ្យពលរដ្ឋភ័យជ្រួលច្របល់ លោតទម្លាក់ពីលើអគារខ្ពស់ៗ និងចេញពីលំនៅឋានមកឈរនៅតាមផ្លូវ និងសួនច្បារសាធារណៈដើម្បីគេចពីគ្រោះថ្នា.ក់ដោយសាររញ្ជួយដី ។ ការលោតពីលើអគារខ្ពស់ៗបណ្តាលឱ្យពលរដ្ឋរងរបួសរហូតដល់១៥១នាក់ ខណៈ Aftershocks បានកើតឡើងជាង៥០លើក ក្រោយរញ្ជួយដី ។
ភ្នាក់ងារជាតិគ្រប់គ្រងគ្រោះមហន្តរាយ និងសង្គ្រោះបន្ទាន់របស់តួកគីប្រកាសថា កាលពីថ្ងៃទី២៣ ខែមេសា មានរញ្ជួយដីខ្លាំងក្លារយៈពេល១៣វិនាទី ស្មើ៦.២រិចទ័រ នៅសមុទ្រម៉ាម៉ារ៉ា ក្បែរទីក្រុងឈិលិហ្វ្រី និងឆ្ងាយពីទីក្រុងអ៊ីស្តង់ប៊ុល ប្រមាណ៧០គីឡូម៉ែត្រ ។ ទោះជាចំណុចកណ្តាលរបស់រញ្ជួយដីស្ថិតក្នុងទឹកសមុទ្រជ្រៅ ប្រមាណ៧គីឡូម៉ែត្រក្តី ប៉ុន្តែកម្លាំងរំញ័របស់វាធ្វើឱ្យពលរដ្ឋនៅទីក្រុងអ៊ីស្តង់ប៊ុល ទទួលកម្លាំងរំញ័រនាំគ្នារត់ចេញពីលំនៅឋានមកឈរតាមផ្លូវ និងសួនច្បារសាធារណៈដើម្បីគេចពីការស្លាប់ ជាពិសេស នៅកណ្តាលទីក្រុងផាទី មានសេចក្តីរាយការណ៍ថា អគារទុកចោល១កន្លែងបានបាក់រលំ ។

ក្រោយកើតរញ្ជួយដី វាក៏មាន Aftershocks រហូតដល់ជាង៥០លើក ហើយ Aftershocks មានកម្លាំងខ្លាំងបំផុត ស្មើ៥.៩រិចទ័រ ។ ទោះជាគ្មានអ្នកណាម្នាក់ស្លាប់ដោយសាររញ្ជួយដី ប៉ុន្តែមានមនុស្សរងរបួសយ៉ាងហោចណាស់ ១៥១នាក់ ដោយសារការលោតពីលើអគារខ្ពស់ ។ នេះបើតាមលោក អាលី យេលិកាយ៉ា រដ្ឋមន្ត្រីក្រសួងមហាផ្ទៃតួកគី ។

ទោះជារញ្ជួយដីពុំបណ្តាលឱ្យខូចខាតហេដ្ឋារចនាសម្ព័ន្ធ និងដាច់ចរន្តអគ្គិសនី ប៉ុន្តែអាជ្ញាធរបានសំណូមពរឱ្យពលរដ្ឋប្រុងប្រយ័ត្នគ្រោះថ្នាក់ដោយសារកម្លាំងរំញ័រកើតឡើងក្រោយរញ្ជួយដី និងកុំមើលស្រាលស្ថានការណ៍ ។ រញ្ជួយដីអាចនឹងកើតឡើងទៀត ហើយពលរដ្ឋនឹងមានគ្រោះថ្នាក់ដោយសារ Aftershocks ។

តួកគី គឺជាប្រទេសមួយប្រឈមនឹងរញ្ជួយដីខ្ពស់ ដោយសារស្ថិតនៅលើខ្សែបន្ទាត់ធំៗចំនួន២ រួមមាន ៖ North Anatolian Fault និង East Anatolian Fault ជាពិសេស នៅទីក្រុងអ៊ីស្តង់ប៊ុល ស្ថិតនៅក្បែរបន្ទាត់ North Anatolian ត្រឹមតែ២០គីឡូម៉ែត្រប៉ុណ្ណោះ ។

កាលពីខែកុម្ភៈ ឆ្នាំ២០២៣ តួកគីធ្លាប់កើតរញ្ជួយកើតឡើងយ៉ាងខ្លាំងក្នុងរយៈពេល១០០ឆ្នាំ នៅខេត្តហ្គាហ្សិនថេប (ភាគខាងត្បូងប្រទេស) ស្មើកម្រិត៧.៨រិចទ័រ និងមានជម្រៅជាង២៤គីឡូម៉ែត្រ ។ វាបណ្តាលឱ្យពលរដ្ឋតួកគី និងស៊ីរី បាត់បង់ជីវិតរហូតដល់ជាង៥ម៉ឺននាក់ ព្រមទាំងក្លាយជាសោកនាដកម្មដ៏អាក្រក់បំផុតក្នុងប្រវត្តិសាស្ត្រតួកគី ។

មុននេះ នៅឆ្នាំ១៩៩៩ តួកគីបានកើតរញ្ជួយដី ស្មើ៧.៦រិចទ័រ នៅក្បែរទីក្រុងអ៊ីហ្សិត ដែលបណ្តាលឱ្យពលរដ្ឋស្លាប់រហូតដល់ជាង១ម៉ឺន៧ពាន់នាក់ ហើយធ្វើឱ្យពលរដ្ឋប្រមាណ ៥សែននាក់ បាត់បង់ទីលំនៅ ៕