ក្រុមហ៊ុន មូលបត្រ ភីភី លីង ឯ.ក និងធនាគារ អេស៊ីលីដា ភីអិលស៊ី ចាប់ដៃគ្នាផ្តល់យន្តការថ្មីមួយបន្ថែមទៀត ក្នុងការជំរុញកំណើនសេដ្ឋកិច្ច និងលើកកម្ពស់សេវាហិរញ្ញវត្ថុសម្រាប់វិនិយោគិនបរទេស

ពិធីចុះកិច្ចព្រមព្រៀង សហប្រតិបត្តិការផ្ដល់ជូនវិនិយោគិនបរទេសនូវសេវាឥណទានវិនិយោគ រវាងក្រុមហ៊ុន មូលបត្រ ភីភី លីង ឯ.ក និងធនាគារ អេស៊ីលីដា ភីអិលស៊ី បានឆ្លុះបញ្ចាំង ពីការចាប់ដៃគូរសហការដែលផ្តល់នូវយន្តការថ្មីមួយបន្ថែមទៀត ក្នុងការជំរុញកំណើនសេដ្ឋកិច្ច និងលើកកម្ពស់សេវាហិរញ្ញវត្ថុសម្រាប់វិនិយោគិនបរទេស ។ នេះជាប្រសាសន៍របស់ ឯកឧត្ដម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក)ថ្លៃក្នុងពិធីចុះហត្ថលេខា និង សន្និសីទសារព័ត៌មាន ស្ដីពី «កិច្ចព្រមព្រៀងសហប្រតិបត្តិការផ្ដល់ជូនវិនិយោគិនបរទេស នូវសេវាឥណទានវិនិយោគ» រវាងក្រុមហ៊ុន មូលបត្រ ភីភី លីង ឯ.ក និងធនាគារ អេស៊ីលីដា ភីអិលស៊ី ដែលបានប្រព្រឹត្តិទៅយ៉ាងឱឡារឹកនារសៀលថ្ងៃថ្ងៃទី០៤ ខែមេសា ឆ្នាំ២០២៥ ។

ក្នុងឱកាសនោះ ឯកឧត្ដម ស៊ូ សុជាតិ បានមានប្រសាសន៍ថា ការបង្កើតទីផ្សារឧបករណ៍និស្សន្ទមួយប្រកបដោយ ប្រសិទ្ធភាពគឺពិតជាមានសារៈសំខាន់ណាស់សម្រាប់ការពង្រឹងស្ថិរភាពហិរញ្ញវត្ថុ ការគ្រប់គ្រង ហានិភ័យ និងការជំរុញកំណើនសេដ្ឋកិច្ច។ ក្នុងគោលដៅជំរុញទីផ្សារនេះឱ្យឆ្ពោះទៅមុខគឺ ទាមទារនូវកិច្ចខិតខំប្រឹងប្រែង កិច្ចសហការ និងការប្តេជ្ញាខ្ពស់ ដែលកន្លងមកនេះ និយ័តករមូលប័ត្រកម្ពុជា បានសហប្រតិបត្តិការជាមួយស្ថាប័នសាជីវកម្មហិរញ្ញវត្ថុអន្តរជាតិ (IFC) និងភាគីពាក់ព័ន្ធ ផ្សេងទៀត ដើម្បីអភិវឌ្ឍទីផ្សារឧបករណ៍នៅកម្ពុជាឱ្យដំណើរការកាន់តែរលូន និងមានប្រសិទ្ធភាព។

ឯកឧត្ដម ប្រតិភូរាជរដ្ឋាភិបាលបានសង្កត់ធ្ងន់ថា ទីផ្សារឧបករណ៍និស្សន្ទនេះអាចដំណើរការប្រកបដោយ ជោគជ័យ និងរីកចម្រើន គឺតម្រូវឱ្យតួអង្គពាក់ព័ន្ធទាំងអស់មានយន្តការប្រទាក់ក្រឡាគ្នា ព្រមទាំង អនុវត្តយ៉ាងម៉ឺងម៉ាត់នូវច្បាប់ និងបទប្បញ្ញត្តិជាធរមាន។ តួយ៉ាង “ពិធីចុះកិច្ចព្រមព្រៀង សហប្រតិបត្តិការផ្ដល់ជូនវិនិយោគិនបរទេសនូវសេវាឥណទានវិនិយោគ រវាងក្រុមហ៊ុន មូលបត្រ ភីភី លីង ឯ.ក និងធនាគារ អេស៊ីលីដា ភីអិលស៊ី” បានឆ្លុះបញ្ចាំង ពីការចាប់ដៃគូរសហការដែលផ្តល់នូវយន្តការថ្មីមួយបន្ថែមទៀត ក្នុងការជំរុញកំណើនសេដ្ឋកិច្ច និងលើកកម្ពស់សេវាហិរញ្ញវត្ថុសម្រាប់វិនិយោគិនបរទេស ដែលអនុញ្ញាតឱ្យវិនិយោគិន បរទេសទទួលបាននូវសេវាឥណទាន ដើម្បីជួញដូរឧបករណ៍និស្សន្ទជាមួយក្រុមហ៊ុនមូលបត ភីភី លីង ឯ.ក។

ឆ្លៀតក្នុងឱកាសនោះផងដែរ ឯកឧត្ដម ស៊ូ សុជាតិ បានចូលរួមអបអរសាទរដល់ក្រុមហ៊ុនមូលបត្រ ភីភី លីង ឯ.ក និង ធនាគារ អេស៊ីលីដា ភីអិលស៊ី ក៏ដូចជាភាគីពាក់ព័ន្ធផ្សេងទៀត ដែលបានចាប់ដៃគូរ សហការចូលរួមជំរុញការអភិវឌ្ឍវិស័យមូលបត្រនៅកម្ពុជា ។ ឯកឧត្ដម បានចង្អុលបង្ហាញថា សូមឱ្យក្រុមហ៊ុន ឬភាគីពាក់ព័ន្ធបន្តយកចិត្តទុកដាក់អនុវត្តច្បាប់ បទប្បញ្ញត្តិ និងលក្ខខណ្ឌតម្រូវ ដែលមាន ជាធរមានឱ្យបានម៉ឺងម៉ាត់ ដើម្បីរក្សាសណ្តាប់ធ្នាប់ ប្រសិទ្ធភាពនៃទីផ្សារ ជាពិសេសទំនុកចិត្ត របស់វិនិយោគិន ។

ទន្ទឹមគ្នានេះ យោងតាមការបញ្ជាក់ពីសំណាក់ថ្នាក់ដឹកនាំក្រុមហ៊ុន មូលបត្រ ភីភី លីង ឯ.ក បានអោយដឹងថា ក្រុមហ៊ុននឹងមានអ្នកឯកទេសផ្នែកវិនិយោគធ្វើបទបង្ហាញតាមរយៈទំព័រហ្វេសប៊ុកផ្លូ​វការរបស់ក្រុមហ៊ុន ក្នុងមួយសប្ដាហ៍រយៈពេល ៥ថ្ងៃ (ថ្ងៃច័ន្ទ ដល់ សុក្រ) ដើម្បីអោយមហាជនអាចសិក្សា និងស្វែងយល់បន្ថែមអោយកាន់តែស៊ីជម្រៅទៅលើវិស័យវិនិយោគ ។

សូមបញ្ជាក់ថា ពិធីចុះហត្ថលេខា និងសន្និសីទសារព័ត៌មាន ស្ដីពី «កិច្ចព្រមព្រៀងសហប្រតិបត្តិការផ្ដល់ជូនវិនិយោគិនបរទេស នូវសេវាឥណទានវិនិយោគ» ក្រោមអធិបតីភាពរបស់ឯកឧត្ដម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក) និង លោកស្រី ប៊ុន សុវ៉ាត់ឌី ប្រធានគណៈកម្មាធិការប្រតិបត្តិ ទទួលបន្ទុកជាប្រធានសមាគមនៃសមាគមឈ្មួញជើងសាឧបករណ៍និស្សន្ទនៅកម្ពុជា រួមជាមួយ ថ្នាក់ដឹកនាំពីស្ថានប័នក្នុងវិស័យទីផ្សារឧបករណ៍និស្សន្ទ និងធនាគារ ក៏ដូចជាសាធារណជនជាច្រើនទៀតផងដែរ ។