នៅប៉ុន្មានថ្ងៃចុងក្រោយនេះ គេប្រទះឃើញមានការផ្សព្វផ្សាយព័ត៌មានអំពីករណីភ្លើងឆេះនៅកម្ពុជា ដោយផ្អែកទៅលើផ្កាយរណបរបស់អង្គការណាសា។
ពាក់ព័ន្ធនឹងករណីនេះ ក្រសួងបរិស្ថាន បានចេញមកបញ្ជាក់ថា៖” ពុំមានការឆេះព្រៃធ្ងន់ធ្ងរនៅកម្ពុជាទេ ប៉ុន្តែគ្រាន់តែជាការឆេះស្មៅ សំរាមស្បូវ និងជញ្ជាំងស្រូវតែប៉ុណ្ណោះ”។
ក្រសួង បានពន្យល់ថា៖”រូបភាពដែលគេបង្ហោះនៅលើបណ្តាញសង្គម គឺប្រើផែនទីមាត្រដ្ឋានតូច ដែលមិនអាចកំណត់បានថា ជាកន្លែងណាមួយឱ្យច្បាស់លាស់នោះទេ ព្រោះមើលទៅហាក់បីដូចជាកម្ពុជាទាំងមូល ត្រូវបានឆេះក្រហមឆ្អៅ”។
បើយោងតាម អគ្គនាយកដ្ឋានតំបន់ការពារធម្មជាតិ បានលើកឡើងថា៖” ដោយមាន កិច្ចសហការយ៉ាងជិតស្និទ្ធ ជាមួយស្ថាប័នជំនាញក្នុងតំបន់ ពិសេសមជ្ឈមណ្ឌលជំនាញឧតុនិយមអាស៊ាន និងបានធ្វើការផ្ទៀងផ្ទាត់ជាក់ស្តែង នៅទីវាលផងដែរនោះ។ ជាលទ្ធផល ពុំមានការឆេះព្រៃធ្ងន់ធ្ងរទេ ដូចទៅនឹងផ្កាយរណបរបស់អង្គការណាសានោះទេ”។
បន្ថែមពីនេះ ក្រសួងបរិស្ថាន ក៏អំពាវនាវដល់ប្រជាពលរដ្ឋមានការប្រុងប្រយ័ត្នខ្ពស់ និងត្រូវបញ្ឈប់ការដុតស្មៅ សំរាម ជញ្ជាំងស្រូវ និងស្នើដល់អង្គភាពថ្នាក់ក្រោមជាតិទាំងអស់ ឱ្យយកចិត្តទុកដាក់ និងធ្វើការអប់រំ ដល់ប្រជាពលរដ្ឋអំពីករណីនេះ។
