ជប៉ុនចាត់វិធានការបង្ក្រា.ប ក្រុមជនជាតិវៀតណាមដើរលួ.ច ទ្រព្យសម្បត្តិ និងបញ្ជូនទៅប្រទេសវិញ

ប្រទេសជប៉ុន ៖ ប្រទេសជប៉ុនបានចាត់វិធានការបង្ក្រា.ប ក្រុមជនជាតិវៀតណាមដើរលួ.ច ទ្រព្យសម្បត្តិនៅជប៉ុន និងបញ្ជូនទៅប្រទេសកំណើតវិញ ក្រោយពីរកឃើញថា ពួកគេបានបញ្ជូនសម្ភារៈលួ.ច បានទៅឱ្យបក្ខពួកនៅទីក្រុងហាណូយ ប្រទេសវៀតណាម ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១០ ខែកុម្ភៈ ឆ្នាំ២០២៥ ។

ភ្នាក់ងារស៊ើបអង្កេតជប៉ុនឱ្យដឹងថា ជនជាតិវៀតណាមទាំងនេះបានលួចសម្ភារៈផ្សេងៗពីហាងលក់ទំនិញនៅប្រទេសជប៉ុន រួចហើយ ពួកគេក៏បញ្ជូនសម្ភារៈទៅឱ្យបក្ខពួកដែលមានស្នាក់ការធំនៅទីក្រុងហាណូយ ។ កាលពីខែវិច្ឆិកា ឆ្នាំ២០២៤ ភ្នាក់ងារស៊ើបអង្កេតជប៉ុនបានឆ្មក់ចូលទីតាំងជាច្រើនកន្លែងរបស់ជនជាតិវៀតណាម ដែលត្រូវបានបង្កើតឡើងទូទាំងប្រទេសជប៉ុន ។

ភ្នាក់ងារស៊ើបអង្កេតជឿជាក់ថា មានសម្ភារៈជាច្រើនដែលជនជាតិវៀតណាមលួចពីគ្លីនិកលក់ថ្នាំពេទ្យនៅទូទាំងប្រទេសជប៉ុន ហើយពួកគេបញ្ជូនមកទីតាំងជាច្រើនកន្លែងនៅជប៉ុន ។ តាំងពីខែវិច្ឆិកា ឆ្នាំ២០២៤ សមត្ថកិច្ចជប៉ុនបានចាប់ខ្លួនជនជាតិវៀតណាមចំនួន១១នាក់ តាមលទ្ធផលការសួរចម្លើយ និងឆែកមើលទូរស័ព្ទដៃដែលរឹបអូសបានឃើញថា ពួកគេមានស្នាក់ការធំនៅទីក្រុងហាណូយ និងមានជនជាតិវៀតណាមប្រុស-ស្រី២នាក់ធ្វើដំណើរមកជប៉ុន គឺជាអ្នកទិញសម្ភារៈតាមអនឡាញ ។

កាលពីខែមករា ឆ្នាំ២០២៥ ភ្នាក់ងារផ្សព្វផ្សាយជប៉ុន (NHK) បានធ្វើដំណើរចុះតាមតំបន់នានានៅប្រទេសវៀតណាម ហើយរកឃើញអគារមួយកន្លែងស្រដៀងនឹងឃ្លាំងទំនិញ ។ បុរសវៀតណាមម្នាក់រស់នៅក្បែរអគារប្រាប់ថា បានឃើញរថយន្តដឹកទំនិញចេញ-ចូលទីនេះគ្រប់ពេលវេលា ហើយបុគ្គលិកធ្វើការក្នុងអគារប្រាប់គាត់ថា ធ្វើការផ្នែកនាំចូលថ្នាំពេទ្យពីជប៉ុន ។ ប៉ុន្តែបរិមាណទំនិញដែលពួកគេដឹកជញ្ជូន ចាប់ផ្តើមធ្លាក់ចុះតាំងពីខែធ្នូ ឆ្នាំ២០២៤ ។

គួរបញ្ជាក់ថា សមត្ថកិច្ចជប៉ុនបានចាប់ជនជាតិវៀតណាមលួចសម្ភារៈជាបន្តបន្ទាប់ ដូចជា ៖ កាលពីខែកុម្ភៈ ឆ្នាំ២០២៤ សមត្ថកិច្ចជប៉ុនបានចាប់ជនជាតិវៀតណាម ៤នាក់ ករណីលួចសម្ភារៈ ហើយពួកគេសារភាពថា ធ្វើដំណើរមកជប៉ុនដើម្បីលួចសម្ភារៈយកទៅលក់នៅវៀតណាម ។ ក្រៅពីនេះ សមត្ថកិច្ចជប៉ុនក៏បានចាប់ជនជាតិវៀតណាម ២នាក់ទៀត ដែលលួចកង់ជាង៧០គ្រឿងនៅទីក្រុងតូក្យូ និងដោះគ្រឿងកង់ចេញពីគ្នាបញ្ជូនទៅវៀតណាម ៕