លោក ថមមី ស្វាមីតារាចម្រៀងល្បីឈ្មោះ សួស វីសារ បានលើកឡើងនៅលើបណ្តាញសង្គមផ្ទាល់ខ្លួននៅពេលចូលរួមកម្មវិធី Asian Film Festival 2024 បានពោលថាសិល្បៈរៀមច្បងគឺមានភាពរួសរាយតែជំនាន់ក្រោយលោក ខ្មឺតញាក់សាច់ អ្នកខ្លះលេងចរិតជាងតារាហូលីវូដទៅទៀត។
កាលពីថ្ងៃទី២៤ ខែសីហា ក្នុងពិធី «មហោស្រពភាពយន្តកម្ពុជាអាស៊ីលើកទី២ ឆ្នាំ២០២៤» ដែលប្រព្រឹត្តទៅនៅរាជធានីភ្នំពេញប្រមូលអស់តារាល្បីៗចូលរួមជាច្រើនរូប រួមទាំងផលិតករភាពយន្តផងដែរ។ កម្មវិធីដើរលើកម្រាលព្រំក្រហមនិងការប្រគល់ពានរង្វាន់ទៅកាន់សិល្បករសិល្បការីនីដ៏ធំមួយនេះលោក ថមមី ស្វាមីតារាចម្រៀង សួស វីសារ ក៏បានទៅចូលរួមដូចគ្នាប៉ុន្តែបាននឹងជួបហេតុការណ៍ប៉ះអ្នកជំនាន់ក្រោយខ្មឺតខ្លាំងរហូតចេញពីកម្មវិធីវិញយ៉ាងលឿន។
នៅលើបណ្តាញសង្គមរបស់លោក ថមមី បង្ហោះនៅយប់ថ្ងៃទី២៤ ខែសីហា បានឱ្យដឹងថា «ខានចូលរួមកម្មវិធីសិល្បៈយូរឆ្នាំមកហើយ ដល់ចូលរួមម្តងភ័យៗ ម៉េចទេ! តើហេតុអ្វីទៅណ ? ហេតុអ្វីមានអារម្មណ៍ភ័យៗហើយអៀនៗគេគ្រប់គ្នាអ្នកសិល្បៈទៅវិញមិនយល់សោះ ? ម៉េចទៅជាចឹងទៅ ទាំងខ្លួនឯងនេះ ស្តេចវហាស័ព្ទ ក្លាហានសឹងអី ហើយឥឡូវនឹងយូរៗខ្លាចចាញ់ច្រាបគេទៅវិញ »។
លោកបន្តទៀតថា «និយាយត្រង់អៀនៗមែន ហើយសិល្បះរៀមច្បងខ្ញុំសំពះជម្រាបសួរពួកគាត់គឺពួកគាត់រួសរាយណាស់ មិត្តៗជំនាន់ខ្ញុំអីហ្នឹងនិយាយពីឃើញគ្នានិយាយញញឹមហើយជម្រាបសួរគ្នា» ។ ស្វាមី សួស វីសារ លើកឡើងទៀតថា «តែណាស់តែប្អូនៗជំនាន់ក្រោយវិញ ញាក់សាច់ ខ្មឺតៗឆុយមាយ ទាំងខ្លះឯងមិនស្គាល់សោះនិយាយត្រង់ និយាយលេងចរិតជាង តារាHollywood ទៀត ចឹងៗខ្ញុំអៀនណាស់ ក៏ចេញពីកម្មវិធីគេវិញយ៉ាងលឿនមកផ្ទះ ព្រោះខ្មាស់ប្អូនៗ PMJKJ អស់នេះ»។
មិនដឹងថាសិល្បៈជំនាន់ក្រោយរូបណានោះទេដែលលេងចរិតលលើសតារាហូលីវូដបែបនេះដល់ថ្នាក់លោក ថមមី ហួសចិត្តពេកបង្ហោះនៅលើបណ្តាញសង្គមតែម្តង។
គួរបញ្ជាក់ថា បច្ចុប្បន្ននេះក្រៅពីការងារសិល្បៈ ថមមី និង សួស វីសារ ក៏ជាម្ចាស់ជំនួញច្រើនមុខផងដែរ និងបានបង្កើតកម្មវិធីផ្ទាល់ខ្លួនថែមទៀតខណៈអ្នកទាំងពីរទើបបង្ហើបប្រាប់អ្នកគាំទ្រដែរថា ពួកគេកំពុងពរពោះកូនទី២ហើយ៕
