បន្ទាប់ពី១៧ឆ្នាំ BIGBANG និង 2NE1 បានថតរូបជុំគ្នាជាក្រុមម្តងទៀត

នៅថ្ងៃទី២៣ ខែសីហា Minzy បានបង្ហោះរូបថតនៅក្នុងការប្រគំតន្ត្រីរបស់ BIGBANG នៅលើបណ្តាញសង្គមរបស់នាង។ រូបថតទាំងនោះបង្ហាញពីសមាជិក BIGBANG គឺ G-Dragon, Taeyang និង Daesung ថតរូបជាមួយសមាជិក 2NE1 គឺ CL, Sandara Park និង Minzy។ទិដ្ឋភាពនៃសមាជិកទាំង៦នាក់ឈរក្បែរគ្នា និងថតរូបជាមួយគ្នានៅក្រោយឆាកប្រគំតន្ត្រីគឺមានអត្ថន័យពិសេសសម្រាប់អ្នកគាំទ្រ។

ការជួបជុំគ្នាឡើងវិញនេះបានទាក់ទាញការចាប់អារម្មណ៍ជាពិសេសដោយសារតែបទ «Lollipop» ដែលជាបទចម្រៀងដែលក្រុមទាំងពីរបានធ្វើការរួមគ្នាក្នុងឆ្នាំ ២០០៩។ BIGBANG និង 2NE1 បានសហការគ្នាលើបទ «Lollipop» ដែលត្រូវបានផលិតឡើងនៅពេលនោះជាបទចម្រៀងផ្សព្វផ្សាយសម្រាប់ការផ្សាយពាណិជ្ជកម្មតាមទូរសព្ទចល័ត។ បទនេះត្រូវបានចាត់ទុកថាជាការសហការដ៏ល្បីល្បាញមួយដែលបានបង្កើតឡើងយ៉ាងរឹងមាំនូវវត្តមានរបស់ក្រុមទាំងពីរនៅក្នុងក្រសែភ្នែកសាធារណជន។

នៅក្នុងវីដេអូចម្រៀងសម្រាប់បទ «Lollipop» ក្រុមទាំងពីរបានបង្កើតភាពស៊ីសង្វាក់គ្នាយ៉ាងខ្លាំងតាមរយៈរូបភាពដ៏ទាក់ទាញ និងការសម្តែងដ៏មានឥទ្ធិពល។ បន្ទាប់ពីបានបែកគ្នា ហើយក្លាយជាសិល្បករ K-pop ដ៏ធំបំផុតមួយចំនួនសមាជិកបានជួបជុំគ្នាវិញបន្ទាប់ពីជិត ១៧ឆ្នាំ។

ទោះជាយ៉ាងណាក៏ដោយ Park Bom សមាជិកក្រុម 2NE1 មិនមានវត្តមាននៅក្នុងការជួបជុំនោះទេ ដែលធ្វើឱ្យអ្នកគាំទ្រមួយចំនួនខកចិត្ត។

ដើម្បីរំលឹកខួបលើកទី២០ ក្រុម BIGBANG បានរៀបចំការសម្តែងសម្រាប់ដំណើរទេសចរណ៍ពិភពលោកថ្មីរបស់ពួកគេ «XX: COSMOS» នៅឯពហុកីឡដ្ឋាន Goyang ចាប់ពីថ្ងៃទី ២១ ខែសីហា ដល់ថ្ងៃទី ២៣ខែសីហា។ យោងតាមប្រព័ន្ធផ្សព្វផ្សាយមានអ្នកទស្សនាជាង ១០០,០០០នាក់បានចូលរួមការប្រគំតន្ត្រីរយៈពេលបីថ្ងៃរបស់ក្រុមចម្រៀងនេះ៕