រូបសំណាកស្តេចកន គង់នៅលើសេះ ត្រូវបានរដ្ឋបាលខេត្តត្បូងឃ្មុំ ប្រារព្ធពិធីអភិសេក ក្រោយបញ្ចប់ការសាងសង់១០០ភាគរយ កាលពីថ្ងៃទី២៨ ខែមិថុនានេះ។
រូបសំណាកនេះ មានកម្ពស់ពីដីដល់ចុងកំពូល ១៣.៣៥ ម៉ែត្រ និងរូបសេះកម្ពស់រូប ១១ ម៉ែត្រ ធ្វើពីស្ពាន់គ្រឹះបេតុង នៅចំកណ្តាលរង្វង់មូលហ្លួងព្រះស្តេចកន មានអង្កត់ផ្ចិត ៣៦ ម៉ែត្រ និងមានផ្ទៃក្រឡា ១,០១៧ ម៉ែត្រការ៉េ។
រង្វង់មូល(ហ្លួងព្រះស្ដេចកន) នេះ ចំពោះថវិកាសាងសង់ គឺរដ្ឋបាលខេត្តជាអ្នកចំណាយផ្ទាល់ ហើយនេះក៏ជាសមិទ្ធផលថ្មីមួយបន្ថែមទៀត លើសមិទ្ធផលជាច្រើនទៀត នៅតំបន់រដ្ឋបាលប្រមូលផ្តុំទីរួមខេត្តត្បូងឃ្មុំ។
គួរបញ្ជាក់ផងដែរថា ស្តេចកន ត្រូវបានប្រវត្តិសាស្រ្តខ្មែរកត់ត្រាថា ជាស្តេចជ្រែករាជ្យ ក៏ព្រោះតែទ្រង់មិនជាប់សែស្រឡាយរាជវង្សនោះទេ ហើយការដែលទ្រង់បានឡើងសោយរាជ្យគឺបានធ្វើសង្គ្រាមជាមួយព្រះរាជា៕
