Zhang Xiaofei បង្កឱ្យមានមតិវែកញែកដោយសារអសកម្មផ្សព្វផ្សាយភាពយន្តជាមួយ ទិនហ្វី និង Dilraba

ភាពយន្តដែលសរសេរនិងដឹកនាំរឿងដោយ ទិនហ្វី (Stephen Chow) កំពុងទទួលបានជោគជ័យគួរឱ្យចាប់អារម្មណ៍នៅក្នុងប្រទេសចិនដោយរកចំណូលបានជាង ២.១៧ ពាន់លានយ័នប្រមាណ៣២១លានដុល្លារបន្ទាប់ពីចាក់បញ្ចាំងបាន ២៤ថ្ងៃ។ ចាប់តាំងពីការចេញផ្សាយ និងភាពជោគជ័យយ៉ាងខ្លាំងនៃរឿង «Kung Fu Soccer» ទិនហ្វី បានដឹកនាំក្រុមការងារភាពយន្តដោយផ្ទាល់ រួមជាមួយតួសម្តែងរួមមាន Dilraba Dilmurat, Lay Zhang និងតួសម្តែងផ្សេងទៀតទៅកាន់ទីក្រុងផ្សេងៗទូទាំងប្រទេសចិន សម្រាប់ព្រឹត្តិការណ៍ផ្សព្វផ្សាយ និងវគ្គជួបជុំអ្នកគាំទ្រ ដើម្បីបង្ហាញពីការដឹងគុណរបស់គាត់ចំពោះទស្សនិកជន។ បរិយាកាសនៅក្នុងព្រឹត្តិការណ៍ទាំងនេះមានភាពរស់រវើកយ៉ាងខ្លាំង។

ទោះជាយ៉ាងណាក៏ដោយ Zhang Xiaofei ដែលជាតារាសម្តែងសំខាន់ម្នាក់របស់ខ្សែភាពយន្តនេះ បានអវត្តមានម្តងហើយម្តងទៀតពីព្រឹត្តិការណ៍ទាំងនេះ ដែលបង្កឱ្យមានភាពចម្រូងចម្រាសជាច្រើន។ អ្នកទស្សនាជាច្រើនបានសម្តែងការមិនពេញចិត្តចំពោះអាកប្បកិរិយារបស់ Zhang Xiaofei។ ពួកគេបានអះអាងថា សូម្បីតែអ្នកដឹកនាំរឿង ទិនហ្វី អាយុ ៦៤ ឆ្នាំ និងតារាសម្តែងសំខាន់ដូចជា Dilraba Dilmurat ក៏បានទៅថ្លែងអំណរគុណដល់ទស្សនិកជនដោយផ្ទាល់ផងដែរ ខណៈដែលតារាសម្តែងសំខាន់ Zhang Xiaofei មិនបានបង្ហាញខ្លួនទេ។ នាងត្រូវបានគេរិះគន់ថាខ្វះភាពរីករាយក្នុងការផ្សព្វផ្សាយខ្សែភាពយន្តនេះ។
ទោះជាយ៉ាងណាក៏ដោយ អ្នកលេងអ៊ីនធឺណិតជាច្រើនក៏បាននិយាយការពារតារាស្រីរូបនេះផងដែរ។ ពួកគេបាននិយាយថាតារាសម្តែងរូបនេះបានចូលរួមជាមួយក្រុមការងារភាពយន្តថ្មីនៃនៅដើមខែមិថុនា ហើយបច្ចុប្បន្នកំពុងឈរជើងនៅទីក្រុងសៀមិនដើម្បីថត។ ដោយសារតែកាលវិភាគថតដ៏មមាញឹក នាងមិនអាចរៀបចំពេលវេលាដើម្បីចូលរួមក្នុងដំណើរផ្សព្វផ្សាយជាមួយក្រុមការងារភាពយន្តបានទេ។

នៅពេលចូលរួមព្រឹត្តិការណ៍សាធារណៈមួយនៅទីក្រុងប៉េកាំង Zhang Xiaofei ធ្លាប់បានផ្សព្វផ្សាយខ្សែភាពយន្តនេះយ៉ាងសកម្ម។ នាងបាននិយាយថា នាងចូលចិត្តតួអង្គ Captain Song Song ជាពិសេស ហើយបានចែករំលែកថា ការរីកចម្រើន និងការផ្លាស់ប្តូររបស់តួអង្គនេះគឺជាកត្តាដែលនាំឱ្យនាងទទួលយកតួនាទីនៅក្នុងគម្រោងនេះ។ តារាស្រីរូបនេះក៏បានថ្លែងអំណរគុណយ៉ាងស្មោះស្ម័គ្រដល់ទស្សនិកជនចំពោះការគាំទ្ររបស់ពួកគេចំពោះខ្សែភាពយន្តនេះ។

ពីមុនមានរបាយការណ៍ថា នៅពេលដែល Zhang Xiaofei បានចុះហត្ថលេខាលើកិច្ចសន្យាដើម្បីចូលរួមក្នុង «Kung Fu Soccer» នាងបានជ្រើសរើសមិនទទួលយកតម្លៃខ្លួនថេរដំបូងចំនួន ៨លានយ័នប្រមាណ១.១៨លានដុល្លារអាម៉េរិកទេ ប៉ុន្តែផ្ទុយទៅវិញបានទទួលចំណែកនៃប្រាក់ចំណេញពីការលក់សំបុត្រ។ ដើម្បីលះបង់ខ្លួនឯងទាំងស្រុងចំពោះគម្រោងនេះ Zhang Xiaofei មិនត្រឹមតែលុបចោលកាលវិភាគទាំងអស់របស់នាងសម្រាប់ឆ្នាំនេះប៉ុណ្ណោះទេ ប៉ុន្តែថែមទាំងបានចំណាយប្រាក់ជិត ២លានយ័នជាសំណងសម្រាប់ការរំលោភកិច្ចសន្យាដើម្បីដកខ្លួនចេញពីការងារផ្សេងទៀត ហើយបានចូលរួមជាមួយក្រុមភាពយន្តមុនពេលកំណត់ដើម្បីហ្វឹកហាត់ក្បាច់គុនរយៈពេល៦ខែ។ តារាសម្តែងស្រីរូបនេះបានសម្តែងឈុតឆាកប្រយុទ្ធដ៏លំបាកទាំងអស់ដោយខ្លួនឯង ដោយមិនបានប្រើតួជំនួស ហើយថែមទាំងកាត់សក់វែងរបស់នាងដែលនាងបានដុះអស់រយៈពេល ៥ ឆ្នាំមកហើយទៀតផង។

ដោយផ្អែកលើអត្រាចែករំលែកប្រាក់ចំណេញជាមធ្យម ២.៥% សម្រាប់តួឯក (ពីចំណែកប្រាក់ចំណេញដែលចែករំលែកជាមួយអ្នកផលិត) ប្រសិនបើខ្សែភាពយន្តនេះទទួលបានប្រាក់ចំណូល ៣.១ ពាន់លានយន់ដូចការព្យាករណ៍ Zhang Xiaofei អាចទទួលបានប្រហែល ២២.៧៥ លានយ័នប្រមាណ៣.៣៦លានដុល្លារអាម៉េរិក ដែលខ្ពស់ជាងថ្លៃសេវាថេរចំនួន ៨លានយ័នដែលនាងត្រូវបានផ្តល់ជូនដំបូង ហើយច្រើនជាងគ្រប់គ្រាន់ដើម្បីទូទាត់សងសម្រាប់ការពិន័យរំលោភកិច្ចសន្យាចំនួន ២ លានយ័នដែលនាងបានបង់៕