តារាសម្តែងជួរមុខប្រចាំប្រទេសកម្ពុជាកញ្ញា ស៊ីន យូប៊ីន បានបង្ហាញអារម្មណ៍មានមោទនភាពដោយសារតែនៅឆ្នាំ២០២៤ នេះទ្វារអន្តរជាតិបានបើកឱកាសឱ្យសិល្បករកាន់តែធំជាងមុន ខណៈអ្នកសិល្បៈនិងបុគ្គលចំនួន៦រូបទាំងខ្លួននាងនឹងពួតដៃគ្នាបង្ហាញសិល្បៈវប្បធម៌ខ្មែរនៅលើឆាកអន្តរជាតិក្នុងពេលឆាប់ៗខាងមុខនេះ។ ឱកាសនេះ ស៊ីន យូប៊ីន ក៏សុំការផ្តល់កម្លាំងចិត្តពីប្រជាជនផងដែរ។
ដូចមហាជនជ្រាបមកហើយថាគូស្នេហ៍ ខាត់ វៃហាំង គឺកញ្ញា ស៊ីន យូប៊ីន ជាតារាស្រីម្នាក់របស់កម្ពុជាដែលមានឱកាសបង្ហាញខ្លួនលើកម្រាលព្រំក្រហមនៅលើឆាកអន្តរជាតិក្នុងព្រឹត្តិការណ៍ធំៗមួយចំនួន។ ការចូលរួមរបស់នាងក៏ត្រូវបានបណ្តាញសារព័ត៌មានបរទេសចាប់អារម្មណ៍ចុះផ្សាយដូចគ្នា ហើយមានពេលខ្លះ យូប៊ីន ថែមទាំងឆ្លៀតបង្ហាញអ្វីដែលជាអត្តសញ្ញាណខ្មែរផងដែរទៅតាមអ្វីដែលខ្លួននាងអាចធ្វើបាន។
យ៉ាងណាមិញ នាពេលថ្មីៗនេះ ស៊ីន យូប៊ីន បានបង្ហើបប្រាប់ទស្សនិកជនថានាងនិងអ្នកសិល្បៈបុគ្គលមានឥទ្ធិពលចំនួន៦រូបនឹងពួតដៃគ្នាបង្ហាញសិល្បៈវប្បធម៌ខ្មែរនៅលើឆាកអន្តរជាតិ។ នាល្ងាចថ្ងៃទី១ ឧសភា ស៊ីន យូប៊ីន បានឱ្យដឹងថា «មោទកភាពដែលឆ្នាំ២០១៤ នេះទ្វារអន្តរជាតិបានបើកសម្រាប់កម្ពុជាកាន់តែធំទូលាយជាងមុន តារាសិល្បៈនិងបុគ្គលមានឥទ្ធិពល៦រូបរួមទាំងនាងខ្ញុំនឹងពួតដៃគ្នាបញ្ចេញពន្លឺនៃសិល្បៈវប្បធម៌ខ្មែរនៅលើឆាកអន្តរជាតិឆាប់ៗនេះ»។ តារាស្រីរូបនេះក៏សុំកម្លាំងចិត្តពីប្រជាជនកម្ពុជាក្នុងការគាំទ្រពួកគេផងដែរ។
ទោះជាយ៉ាងណាសម្រាប់អ្នកសិល្បៈផ្សេងទៀត ស៊ីន យូប៊ីន មិនទាន់បញ្ជាក់ថាជានរណានោះទេ។
គួរបញ្ជាក់ថា កាលពីដើមខែធ្នូ ឆ្នាំ២០២៣ ស៊ីន យូប៊ីន ជាតារាខ្មែរដំបូងគេបានចូលរួមកម្មវិធីមហោស្រពភាពយន្តធំជាងគេនៅលើពិភពលោកក្នុងកម្មវិធី Redsea Film Festival នៅប្រទេសអារ៉ាប៊ីសាអូឌីតដែលមានតារាហូលីវូដ និងតារាអាស៊ីជាច្រើនចូលរួម។ 
លើសពីនេះ យូប៊ីន ក៏ជាតារាស្រីតែម្នាក់គត់ដែលមានឱកាសដើរលើកម្រាលព្រំក្រហមនៅមហោស្រពភាពយន្តលើកទី៧៦ នៅប្រទេសបារាំងផងដែរហើយកាលនោះទោះបីជាមានរបួសជើងក្តី តែតារាស្រីរូបនេះទៅចូលរួមទាំងកាន់ឈើច្រត់។ នៅថ្ងៃទី២ នៃការបង្ហាញខ្លួនលើកម្រាលព្រំក្រហម ស៊ីន យូប៊ីន ក៏បាននាំយកអត្តសញ្ញាណខ្មែរ បង្ហាញពីរូបនាគរាជ និងទង់ជាតិកម្ពុជាដែលមានរូបប្រាសាទអង្គរវត្តនៅចំកណ្តាលផងដែរ៕
